Lu̍kū 5

Chi̍i̍sū hɛ̍li̍ bu̍ɛ̍i̍yāā tāsi̍a̍a̍

(Māa̍ti̍u̍ 4:18-22; Ma̍kī 1:16-20)

1Pāa̍le̍ pi᷅lɛ̍, Chi̍i̍sū wa̍ īsīsi̍ o̍ mɛ̄ŋmā ībūŋga᷄ŋ īkɛ̄i̍, dīōla̍ŋ āā Kɛ̄nɛ̍sa̍lūɛ̄ī. Wāŋnda̍ wa̍ ndu̍ ā bālāā si̍lɔ̍ ma̍ wā sɔ̄ŋɔ̍ sɔ̍ŋi̍āŋndo̍ le̍ dīo̍m Mɛ̄lɛ̄ka̍a̍ nīla̍ŋ yāŋɔ̄ɔ̍. 2Mbo̍ chā dɛ̄ndɛ̄la̍ŋ lā tīɔ̍ɔ̍ŋ īsīsi̍ o̍ kɔ̄ŋgɔ̍ɔ̍ bɛ̄ŋgu̍. Kɛ̍, wānāa̍ wa̍ yɔ̄ɔ̄yāa̍ lēni᷄ŋ nda̍, nda̍ a̍a̍ fu̍la̍ŋ ni᷅ŋ ma̍ wā yālāla̍ nda̍la̍ŋ tɔ̄ɔ̍. 3Mi̍ Chi̍i̍sū lu̍ɛ̍ī o̍ dɛ̄ndɔ̄ɔ̍ pīlɔ̍ɔ̄ ni᷄ŋ, dɛ̄ndɛ̍ Sa̍i̍mɔ̄ŋndo̍. Mbo̍ dīmūl Sa̍i̍mɔ̄ŋ le̍ mbō kūɛ̄ ti᷄ŋ a̍ dɛ̄ndɔ̄ɔ̍ o̍ mɛ̄ŋnda̍ŋ chōo̍. Mi̍ Sa̍i̍mɔ̄ŋ ku̍ā ti᷄ŋ a̍ dɛ̄ndɔ̄ɔ̍ o̍ mɛ̄ŋnda̍ŋ chōo̍. Mi̍ Chi̍i̍sū cha᷅l lēni᷄ŋ mbo̍ wā wāŋnda̍ pɛ̄ɛ̄kōo̍.

4Mɛ̄ɛ̍ o̍ chi̍i̍ sūɛ̍i̍, mbo̍ dīmūl Sa̍i̍mɔ̄ŋ āā, “Sɔ̍ɔ̍ŋgu̍u̍ dɛ̍ndɔ̄ɔ̍ nāa̍ yi̍ŋgi̍lɛ̍i̍ya̍ mī lā wūu̍ yālāla̍ nyāla̍ŋ o̍ mɛ̄ŋnda̍ŋ ni᷄ŋ mī lā chu̍a̍ sūūwa̍.”

5Mi̍ Sa̍i̍mɔ̄ŋ di̍mūl ndu̍ āā, “Fāllo̍, Chɔ̍chɔ̄l pi̍i̍ pi̍i̍ ŋ̄ chō fāfa̍la̍a̍, kɛ̍, ŋ̄ chu̍e̍ nyɛ᷅ o̍ nyɛ̄ le̍. Kɛ̍, le̍ mɛ̄ɛ̍ ŋ̄ dīmi̍ yɛ̍, I̍ cho̍ yālāla̍ŋ wūū o̍ pēēlo̍.” 6Mɛ̄ɛ̍ nda̍ wūu̍ yālāla̍ŋ, sūūwāā pīlɛ̍ kpe̍ nda̍ āā lu̍ɛ̍ī lēni᷄ŋ ni̍ cho̍be̍ mī yālāla̍ŋ la̍ a̍a̍ ki̍o̍li̍. 7Le̍ nānɔ̄ɔ̍ ma̍ būmbā. Mɛ̄ɛ̍ ma̍ vēēlū chāāŋāā ndāā yɔ̍ɔ̍yāa̍ o̍ dɛ̄ndɔ̄ɔ̍ pīlɔ̍ɔ̄ ni᷄ŋ a̍ lābā le̍ mā hu᷄ŋ ma̍lā nda̍. Mi̍ chāāŋāā ndāa̍ hūŋ. Ma̍ dūāū sūūwa̍ ha̍ā o̍ dɛ̄ndɛ̄la̍ ti̍ɔ̍ɔ̍ŋndā lāŋ ni᷄ŋ. Ma̍ pīā dɛ̄ndɛ̄la̍ŋ cha̍. Ndu̍ o̍o̍ lo̍ cho̍be̍ mī dɛ̄ndɛ̄la̍ŋ la̍a̍ mɔ̍ɔ̍wa̍. 8Mɛ̄ɛ̍ Sa̍i̍mɔ̄ŋ Pītɛ̍ che᷅ nyɛ̍ yɔ̍nu̍ŋ ndo̍, mbo̍ bāŋ wūla̍ŋ Chi̍i̍sū o̍ lābɛ̄ŋgu̍ ni̍ŋ. Mbo̍ dīmūl ndu̍ āā, “Wāna̍ yɔ̄ŋ wɔ̄ɔ̍ŋndo̍ ya̍ cho̍ nī. Le̍la̍ŋ, fa̍ŋa̍ŋ ya̍ na̍nu᷄ŋ, Māsānɔ̄ɔ̍.”

9Le̍ sa̍bu̍ Pītɛ̍ di̍mi̍ le̍nde̍ wo̍ cho̍ ni̍ māā ndu̍ ni̍ a̍ wānāā nda̍ wa̍ lo̍ŋ nda̍, kɔ̄ndɔ̄fi̍llo̍ wa̍ nda̍ a̍ sūūwāā bɛ̄ndūāā nda̍ chu̍a̍ wa̍. 10Pītɛ̍ chāāŋāā ndūāā yɔ̍ɔ̍yāa̍ Chēmi̍si̍ nda̍ Chɔ᷄ŋ, nda̍ bɛ̍ɛ̍ mi̍ kɔ̄ndɔ̄fi̍llo̍ bīī nda̍. Pūa̍a̍ ŋi̍ɔ̍ɔ̍ŋnda̍ ha̍ā, fi̍nyā nda̍ wa̍ Sɛ̍bɛ̍dīī ni̍. O̍ ko̍ŋ kɔ̍ɔ̍lī, mi̍ Chi̍i̍sū di̍mūl Sa̍i̍mɔ̄ŋ āā, “Yɔ᷅ŋ īsīōōŋ te̍. Chɔ̍ŋ a̍ hāū wa̍li̍ nu̍mndo̍ cho̍ wā wāŋndā chi̍e̍e̍ya̍ chūūŋgīa̍a̍ mā hi̍ŋ a̍ nda̍ nāa̍ Mɛ̄lɛ̄ka̍ chūā ni̍.”

11Mi̍ pūa̍a̍ ha̍ā hēēlū dɛ̄ndɛ̄la̍ ndāla̍ŋ o̍ kɔ̄ŋgɔ̍. Ma̍ māl wa̍li̍ ndā yɔ̍ɔ̍yāa̍ a̍ nyɛ̄ o̍ nyɛ̄ fe̍e̍ ma̍ tūāl Chi̍i̍su̍ kɔ̄ɔ̄lī.

Chi̍i̍sū si̍ŋgi̍ pōo̍ nāā wɔ̄ɔ̍ŋndo̍ lēkɔ̄ɔ̍

(Māa̍ti̍u̍ 8:1-4; Ma̍kī 1:40-45)

12Ō wa̍ a̍ bōōndi̍i̍ pi᷅lɛ̍, Chi̍i̍sū wa̍ o̍ chi̍e̍e̍ pu̍m mi̍ po̍ pi᷅lɛ̍ hūŋ a̍ nāā wɔ̄ɔ̍ŋ pūm ō tīūwāā ndu̍ lēkɔ̄ɔ̍ si̍lɔ̍. Mɛ̄ɛ̍ o̍ che᷅ Chi̍i̍sū, mbo̍ hu᷄ŋ de᷅l ndu̍ o̍ lābɛ̄ŋgu̍ ni̍ŋ. Mbo̍ nyɔ̄ɔ̄lū ndu̍ āā, “Fāllo̍, sīŋgi̍ ya̍ fɔ̍, mī si̍mnu᷄ŋ o̍ di̍a̍ndāā Mɛ̄lɛ̄ka̍ o̍ hɔ̄l. Ā nɔ̄lā mā si̍ŋgi̍ ya̍, tē ō wa̍ pɛ̍ mā chɛ̍l.”

13O̍ ko̍ŋ kɔ̍ɔ̍lī, mi̍ Chi̍i̍sū si̍ɛ̍ndī bāa̍ mbo̍ pīla᷄ŋ ndu̍. Mbo̍ dīmūl ndu̍ āā, “I̍ chɛ̍l mī si̍ŋgi̍ nu̍m. Le̍la̍ŋ, si̍o̍ŋgu̍.” O̍ ko̍ŋ kɔ̍ɔ̍lī, mi̍ nāā wɔ̄ɔ̍ŋ kōŋ sīāŋgū pōo̍ ho̍ō lēkɔ̄ɔ̍ o̍ lē pīlɛ̍ ni᷄ŋ kpe̍. 14Mi̍ Chi̍i̍sū si̍lā ndu̍ āā, “Di̍mūl wānā o̍ wānā a̍ ndi̍ o̍kɔ̄ɔ̄ le̍. Wānā so̍līāā lāsa̍lāa̍, nāa̍ ndu̍ chu̍a̍ ko̍ni̍ ŋ̄ kūā sa̍kpō ni̍ mbō kɔ̍ mɛ̍ɛ̍ndīa̍ŋ nu̍m. Ndu̍yɛ̍, mā so̍li̍ sa̍lāa̍ mɛ̄ɛ̍ Mūu̍sē di̍mi̍ yɛ̍ le̍ chɔ̄mndo̍ māā ā sēŋgū.”

15Kɛ̍, mi̍ tɔ̍ɔ̍ Chi̍i̍sōo̍ chɔ̄ɔ̄lū tīū si̍lɔ̍ mbo̍ hīāū bɛ̍ɛ̍ māā pāāndū. Le̍ he̍ī, mi̍ wāŋnda̍ hūŋ fāŋgā bɛ̍ndōo̍ le̍ ndu̍ nīla̍ŋ yāŋɔ̄ɔ̍ a̍ le̍ nāālā ndāla̍ŋ sīŋgīo̍o̍. 16Kɛ̍, te̍le̍ŋnda̍ŋ lā pūm mī Chi̍i̍sū ndu̍ o̍o̍ fu̍la̍ŋ mbō kūɛ̄nu᷄ŋ na̍a̍ do̍ŋ do̍ŋnda̍ le̍ Mɛ̄lɛ̄ka̍ pīɛ̄īyo̍.

Chi̍i̍sū si̍ŋgi̍ po̍ bɛ̍vɛ̍i̍yo̍

(Māa̍ti̍u̍ 9:1-8; Ma̍kī 2:1-12)

17Pāa̍le̍ pi᷅lɛ̍, Chi̍i̍sū wa̍ wāŋnda̍ pɛ̄ɛ̄kōo̍ mi̍ ku̍ndā Fālīsi̍īya̍ a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, ā cha᷄ŋ o̍ chi̍e̍e̍ŋ ka̍ ka̍ o̍ lɛ̄ŋndē Kāli̍līle̍ŋ ni᷄ŋ, a̍ lɛ̄ŋndē Chūdi̍a̍āle̍ŋ a̍ Chūlu̍sɛ̄lɛ̄m. Ma̍ wā īchāli̍ lo̍ŋ. Mi̍ Māsānɔ̄ɔ̍ Mɛ̄lɛ̄ka̍ kē Chi̍i̍su̍ kpāāyāa̍ le̍ wāŋnda̍ sīŋgīo̍o̍. 18Mi̍ pūa̍a̍ hūŋ a̍ wānā bɛ̍vɛ̍i̍yo̍ o̍ mbōōmāa̍ ni᷄ŋ. Ma̍ kīndī le̍ lūɛ̄īyɔ̄ɔ̍ a̍ ndu̍ chi̍ɛ̍ī ni̍ŋ nāa̍ Chi̍i̍sū chu̍a̍ le̍ mā yāmbu̍ ndu̍ Chi̍i̍sū lāchī. 19Kɛ̍, fāŋgāa̍ wa̍ ta̍u̍. Ā nɔ̄la̍ lu̍ɛ̍i̍yɔ̄ɔ̍ le̍. Le̍ he̍ī, ma̍ hēl o̍ chīɛ̄īyo̍ chōo̍ ma̍ būlī kāa̍. Ma̍ tūsī ndu̍ o̍ mbōōmāa̍ ni᷄ŋ o̍ yūe̍i̍ Chi̍i̍su̍ lāchī fāŋgāa̍ tɛ̄ɛ̄ŋ. 20Mɛ̄ɛ̍ Chi̍i̍sū che᷅ mɛ̄ɛ̍ kpɛ̍ pūa̍a̍ ha̍ā lāāla̍ŋ a̍ ndu̍ yɛ̍, mbo̍ dīmūl pōo̍ āā, “Pōo̍, yɔ̄ŋndā nūmnda̍ wɔ̍ɔ̍ŋnda̍ŋ lā chō lā mālna᷄ŋ.”

21O̍ ko̍ŋ, mi̍ wānāa̍ pɛ̍ɛ̍ku̍ wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ a̍ ku̍ndā Fālīsi̍īya̍ ā kāndū nyūūni̍āŋndo̍ āā, “Wāna̍ māā vɛ̄ɛ̍nɛ̍ pōo̍ ho̍ō chō yɛ̄, mbo̍ wā dīōla̍ Mɛ̄lɛ̄ka̍la̍ŋ tɛ̄ɛ̄mbūū wo̍? Wānā o̍ wānā cho̍ mbō ma᷄l wānā le̍ yɔ̄ŋndā wɔ̄ɔ̍ŋnda̍ŋ te̍ mɛ̄ɛ̍ Mɛ̄lɛ̄ka̍ ndu̍ pīlɛ̍ kpe̍.”

22Mɛ̄ɛ̍ Chi̍i̍sū si̍na̍ nyɛ̄ nda̍ wa̍ dīmīo̍o̍ wo̍, mbo̍ nyūnā nda̍ āā, “Vɛ᷅ mī lā nɔ̄ yīya᷄ŋnda̍ wa̍ā le̍nde̍la̍ŋ o̍ lākɔ̄l? 23Tōsāa̍ mī pōo̍ ho̍ō ō kūɛ̄ a̍ dīmūllo̍ ndu̍ āā, ‘Yɔ̄ŋndā nūmnda̍ wɔ̍ɔ̍ŋnda̍ŋ lā chō lā mālna᷄ŋ,’ o̍ kūɛ̍ɛ̍nɛ̍ hi̍o̍ū yɛ̄ wā bɛ̍ɛ̍ŋ le̍ mī wāna̍ chi̍o̍o̍ tōsa̍? Dīmūllo̍ ndu̍ āā, ‘Yɔ̄ŋndā nūmnda̍ wɔ̍ɔ̍ŋnda̍ŋ lā chō lā mālna᷄ŋ,’ ndu̍ hi̍o̍ū wā bɛ̍ɛ̍ŋ. 24Le̍la̍ŋ, I̍ cho̍ pōo̍ ho̍ō sīŋgī mī lā sīna̍ māā wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ nɔ̄ vɛ̄lɛ̄ kpāāyāa̍ o̍ chi̍e̍ēŋndo̍ chōo̍ mbō ma᷄l wāŋnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ.” O̍ ko̍ŋ, mbo̍ dīmūl po̍ bɛ̄vɛ̍i̍yō āā, “Mī di̍mu̍l nu̍m, chɔ̍ŋ mā chu̍a̍ mbōōmā nu̍mndo̍ mā kūɛ̄nu᷄ŋ o̍ nu̍m ndo̍.”

25Mi̍ pōo̍ cha᷄ŋ le̍ pi᷅lɛ̍ kpe̍ nda̍ o̍ hɔ̄l mbo̍ sīm. Mbo̍ chūā mbōōma̍ o̍ wa̍ īhīni̍ le̍ni̍ŋ ndo̍. Mbo̍ kūānu᷄ŋ o̍ ndu̍ lo̍ a̍ Mɛ̄lɛ̄ka̍ sāŋgālāa̍. 26Mi̍ sīōōŋnde̍ bīī nda̍. Ndu̍yɛ̍, mi̍ kɔ̄ndɔ̄fi̍llo̍ bīī nda̍ kpe̍de̍. Ma̍ sāŋgālā Mɛ̄lɛ̄ka̍ ma̍ dīmī āā, “Ŋ̄ chē hāū sɔ̍ɔ̍ŋ kɔ̄ndɔ̄fi̍li̍ŋ bɛ̄ndū.”

Chi̍i̍sū di̍mu̍l Li̍va̍ī māā ō tōl ndu̍ kɔ̄ɔ̄lī

(Māa̍ti̍u̍ 9:9-13; Ma̍kī 2:13-17)

27O̍ ko̍ŋ kɔ̍ɔ̍lī, mi̍ Chi̍i̍sū fu̍lā o̍ bɛ̍ɛ̄. Wāa̍ kɔ̄la̍ŋ, mbo̍ chā po̍ kɔ̍sɔ̄ŋnɔ̄ pīlɛ̍ dīōla̍ŋ āā, Li̍va̍ī. Ō wa̍ īchāli̍ o̍ chīɛ̄ī kɔ̍sɔ̄ŋndo̍. Mi̍ Chi̍i̍sū di̍mūl ndu̍ āā, “Hu̍ŋ mā sīmnu᷄ŋ bu̍ɛ̍ī nī.” 28Mi̍ Li̍va̍ī ma᷅l wa̍li̍ ndɔ̍ lēkɔ̍sɔ̄ŋndo̍ mbo̍ tūāl ndu̍ kɔ̄ɔ̄lī.

29O̍ ko̍ŋ kɔ̍ɔ̍lī, mi̍ Li̍va̍ī to̍o̍sīāā nyɛ̄ dīa̍a̍ ta̍u̍ o̍ chīɛ̄ī ndɔ̄ɔ̍ le̍ Chi̍i̍sū. Kɔ̍sɔ̄ŋāā fāŋgā fa̍ŋgā a̍ wānāā chēle̍ŋ ā wa̍ lo̍ŋ. Nda̍ kpe̍de̍ ma̍ chāl nyɛ̄ dīa̍a̍ dīo̍o̍ nda̍ Chi̍i̍sū wa̍ā. 30Mi̍ ku̍ndā Fālīsi̍īya̍ a̍ wānāā ndāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā kāndū ŋɔ̄ɔ̄chīa̍ŋnda̍ŋ a̍ bu̍ɛ̍i̍yāa̍ Chi̍i̍sūa̍a̍. Ma̍ nyūnā āā, “Vɛ᷅ mī lā dīā nyɛ̍ dīa̍a̍ nya̍ kɔ̍sɔ̄ŋnda̍ a̍ wānāā fo̍ndūāā chēle̍ŋ bɛ̍ɛ̍?”

31Mi̍ Chi̍i̍sū mu̍lūl nda̍ āā, “Wānāa̍ cho̍ kɛ̍ndi̍a̍a̍ wa̍, ā hēu̍ ba̍ a̍ wāna̍ chi̍ɔ̍ū wa᷅ŋnda̍ wo̍ le̍, mɛ̄ɛ̍ wānāa̍ cho̍ a̍ nāāla̍ŋ nda̍. 32I̍ hi̍ŋ le̍ wānāā sa̍kpō vēēlū le̍. I̍ hi᷅ŋ māhūnāā le̍ wānāā yɔ̄ŋ wɔ̄ɔ̍ŋnda̍ dīmūllo̍ mā ma᷄l yɔ̄ŋndā ndāla̍ wɔ̍ɔ̍ŋnda̍ŋ.”

Ā nyūna̍ Chi̍i̍sū a̍ su᷅mndo̍ bīyɔ̄ɔ̍ o̍kɔ̄ɔ̄

(Māa̍ti̍u̍ 9:14-17; Ma̍kī 2:18-22)

33O̍ ko̍ŋ kɔ̍ɔ̍lī, mi̍ wānāā pūm ā dīmūl Chi̍i̍sū āā, “Bu̍ɛ̍i̍yāa̍ Chɔ᷄ŋ nda̍ nda̍ mā bīī su᷅mndo̍ te̍le̍ŋnda̍ fa̍ŋgā ndu̍yɛ̍, mā pīɛ̍i̍ Mɛ̄lɛ̄ka̍. Ku̍ndā Fālīsi̍īya̍ bɛ̍ɛ̍ le̍nde̍ bu̍ɛ̍i̍yāā ndāa̍ tōsā ni̍. Kɛ̍ bu̍ɛ̍i̍yāā nūmnda̍, nda̍ hīōūwɔ̄ɔ̍ lāchī a̍ di̍o̍la̍ ndā ko̍ni̍, vɛ᷅ le̍nde̍?”

34Mi̍ Chi̍i̍sū lo᷅ o̍ ko̍ŋ mbo̍ dīmūl nda̍ āā, “Mīālāa̍ hi᷅ŋ wāna̍ cho̍ la̍nɔ̍ɔ̍ chūa̍a̍ wo̍ o̍ bɛ̄ŋgu̍ cho̍o̍ wa̍, tē wāna̍ cho̍ la̍nɔ̍ɔ̍ chūa̍a̍ wo̍ chō wɔ̄ nda̍ tɛ̄ɛ̄ŋ pɛ̍, mīālāā kāŋ ō cho̍ ku̍e̍e̍ kpo̍so̍ŋ mā bīī su᷅m te̍. 35Kɛ̍ ndu̍yɛ̍, te̍le̍ŋ cho̍ fūūlūū mā fāŋa̍ wāna̍ cho̍ la̍nɔ̍ɔ̍ chūa̍a̍ wo̍ nda̍ tɛ̄ɛ̄ŋ. Tē ā fāŋa̍ ndu̍ nda̍ tɛ̄ɛ̄ŋ pɛ̍, ā chō su᷅mndo̍ bīyɔ̄ɔ̄ o̍ pāa̍le̍ le̍ŋ chōo̍.”

36Mbo̍ dīmūl nda̍ vɛ̄lɛ̄ tālo̍o̍ āā, “Wānā sɛ̍ɛ̍sā do᷅mā sɛ̍nɛ̄īye̍ mā ba̍ŋu̍l tɛ̄ɛ̄ŋgēi̍ o̍ dōmā pa̍a̍ndōo̍ a̍ ndu̍ le̍. Tē a̍ to̍sa̍ le̍nde̍ pɛ̍, mɛ̄ɛ̍ a̍ tɛ̍ɛ̍mbu̍u̍ dōmā sɛ̍nɛ̄īyo̍. Ndu̍yɛ̍, pɛ̄ŋgɛ̍i̍ dōmā sɛ̍nɛ̄īyo̍ ī bɛ̍ndā vɛ̍lɛ̄ o̍ dōmā pa̍a̍ndōo̍ le̍. 37Wānā do̍ū yɛ̍ŋgīa̍ŋ o̍ bɔ̄lɔ̍ yāu̍ vīsīo̍o̍ ō pāāndōo̍ ni᷄ŋ te̍. Kāni̍ fo̍ndōle̍, tē ā dɔ̄ū pɛ̍, yɛ̍ŋgīa̍ŋ mā chō hēlɔ̄ɔ̄ mī mā kīndu᷄ŋ. O̍ ko̍ŋ, mī mā būli̍ bɔ̄lɔ̄ ka̍lāa̍. Ndu̍yɛ̍, mī mūɛ̄īmā kāla᷄ŋ mā lūlnu̍ŋ, mī bɔ̄lɔ̄ɔ̍ bɛ̍ɛ̍ ndu̍ ta̍mbu̍. 38O̍ bɔ̄lɔ̍ yāu̍ vīsīo̍o̍ ō sɛ̄nɛ̄īyo̍ ni᷄ŋ wānā du̍a̍ū yɛ̍ŋgīa̍ŋ ni̍. Mɛ̄ɛ̍ o̍ mɛ̄ɛ̍ ma̍ he̍l, ō bu̍lī le̍. 39Ndu̍yɛ̍, wāŋndo̍ ko᷄l ni᷅ŋ mūɛ̄īmā pāāndūa̍ŋ pɛ̍, ō ye̍e̍mā lɛ̍ yɛ̍ŋgīa̍ŋ te̍. Mbō dīmi̍, āā, ‘Mūɛ̄īmā pāāndūa̍ŋ ma̍ hi̍o̍ū nāŋɔ̄ɔ̄ a̍ yɛ̍ŋgīa̍ŋ.’ ”

Currently Selected:

Lu̍kū 5: YM

Highlight

Copy