Lu̍kū 3

Chɔ᷄ŋ Wānā Yi̍ŋāa̍ bɛ̄ɛ̄ndi̍a̍a̍ nɛ̄īyo̍

(Māa̍ti̍u̍ 3:1-12; Ma̍kī 1:1-8; Chɔ᷄ŋ 1:19-28)

1Bōōndi̍i̍ pi᷅lɛ̍, mi̍ yōōŋgu̍ Mɛ̄lɛ̄ka̍a̍ hūŋ nāa̍ Chɔ᷄ŋ chu̍a̍, po̍ Sɛ̄kāla̍yā wo̍, nāa̍ o̍ wa̍ o̍ po̍llo̍ ni᷄ŋ nda̍. Bōōndi̍i̍ ke̍ŋ, Māsāa̍ Tābi̍lūā ndu̍ wa̍ māsā bɛ̍ndōo̍ le̍ māsāa̍ kpe̍de̍ o̍ lɛ̄ŋīī Lu̍o̍ma᷅ŋnde̍ ni᷄ŋ ni̍. Ndu̍yɛ̍, wɔ̄sīlā ndɔ̄la̍ tɔ̍ a̍ lā ŋūɛ̍ɛ̍nu̍la̍ŋ o̍ māsāle̍ŋ ni᷄ŋ la̍ wa̍ la᷅ŋ ni̍. Pɔ̍ŋti̍ɔ̍ɔ̍ Pa̍i̍lē, ndu̍ wa̍ māsa̍ māLu̍o̍ma᷅ŋndo̍ le̍ lɛ̄ŋndē Chūdi̍a̍āle̍ŋ ni̍. Hɛ̍lɔ̄ɔ̄, ndu̍ wa̍ māsāa̍ le̍ lɛ̄ŋndē Kāli̍līle̍ŋ, mi̍ Fi̍li̍pī pɔ̍mbɔ̄ ndɔ̄ ndu̍ wa᷅ māsāa̍ le̍ būŋgɛ̄ī Ītu̍lūāāve̍ a̍ būŋgɛ̄ī Ti̍lu̍a̍ko̍na̍i̍tīīve̍. Lāīsa̍nīāā, ndu̍ wa̍ māsāa̍ le̍ būŋgɛ̄ī Ābīli̍i̍nīve̍. 2Ndu̍yɛ̍, A̍na̍sī nda̍ Ka̍ya̍fāā, nda̍ wa̍ wānāā bɛ̄ndūāā sōlīāā lāsa̍lāa̍ le̍ Chu̍ūwāa̍ wa̍ bōōndi̍i̍ ke̍ŋ ni̍. 3Mi̍ Chɔ᷄ŋ ba̍lū si̍lɔ̍ a̍ sūɛ̍i̍ Mɛ̄lɛ̄kɛ̍i̍ dīmīo̍o̍ o̍ lɛ̄ŋīī Pīo̍o̍ Chɔ̍ɔ̍dāŋ ke̍e̍ku̍ ni᷄ŋ nde̍. Mbo̍ yōndā, āā, “Lā ma᷄l yɔ᷅ŋndā nyāla̍ wɔ̍ɔ̍ŋnda̍ŋ mī lā sɔ̄la̍ pūlɔ̄ɔ̍ Mɛ̄lɛ̄ka̍a̍. Ko̍ŋ to̍sā ni̍, mī Mɛ̄lɛ̄ka̍ ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ.” 4Le̍nde̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā po̍o̍nyi̍a̍a̍ o̍ yāu̍ ndɔ̄ɔ̍ ni᷄ŋ ni̍ āā,

“Wāŋndo̍ chō yōndāa̍ o̍ po̍llo̍ ni᷄ŋ, ō chō dīmīo̍o̍ āā,

‘Lā tōōsi̍a̍a̍ nɛ̍īyo̍ Ma̍sānɔ̄ɔ̍ Mɛ̄lɛ̄ka̍ lāchī

Lā tōōsi̍a̍a̍ ndu̍ mbō wa̍ nyɛ̄ kɛ̄ndɛ̄ sa̍kpō.

5Kpo̍lo̍ŋnda̍ŋ kpe̍de̍ lā chō wā lā pēēlāā,

pēmbo᷄ŋ kpo̍u̍ ŋ̄ chō wā ŋ̄ pēsīāā, mī ŋ̄ yɔ̄nu̍ŋ dɛ̍ŋgbɛ̍.

Nɛ̄īla̍ tu̍u̍ndu̍ɛ̍i̍la̍ŋ lā chō sāndɔ̄ɔ̄ sa̍kpo̍,

nɛ̄īla̍ wɔ̍ɔ̍ŋnda̍ŋ lā chō sīmnɔ᷄ŋ nyɛ᷅ kɛ̄ndɛ̄ tɛ̍lɛ̍lɛ̍.

6Wāŋndā chīe̍e̍ya̍ kpe̍de̍ ā chā ni̍ŋ mɛ̄ɛ̍ Mɛ̄lɛ̄ka̍ pīŋī wa᷅ŋnda̍ yɛ̍.’ ”

7Mi̍ wāŋnda̍ hūŋ ta̍u̍ ta̍u̍ nāa̍ Chɔ᷄ŋ chu̍a̍ le̍ mbō yīŋ nda̍ yīŋɔ̄ɔ̍ Mɛ̄lɛ̄ka̍a̍. Mbo̍ dīmūl nda̍ āā, “Lā wɔ̄u̍. Lā chō kɛ̄ūwāā bɛ̄ndū. Nɛ̄ɛ̍nɛ̍ di̍mu̍l lɛ̄ nya̍ māā tē ā pūlū nya̍ pɛ̍, mɛ̄ɛ̍ nyɛ̄ pālāā Mɛ̄lɛ̄ka̍ tūsī ni̍ŋ ndo̍ bēndū nya̍? 8Lā tōsa̍ wɔ̍ fɛ̍lɛ̍ŋ ka̍ālā chɔ᷅m māā lā ma᷄l yɔ̄ŋndā wɔ̄ɔ̍ŋnda̍ŋ nda̍ŋ. Lā yi̍ya᷄ŋ kpo̍so̍ŋ o̍ kɔ̄ltā nyāla̍ŋ ni᷄ŋ mī lā dīmi̍ āā, ‘Na̍a̍ na̍a̍ chūāūwāa̍ E̍bīlāha᷅mnda̍ na̍a̍ ŋ̄ chō ni̍, le̍la̍ŋ, nu̍a̍ā ni̍,’ le̍. Mī di̍mu̍l nya̍, pōūta̍ŋ nda᷅ŋ bɛ̍ɛ̍, Mɛ̄lɛ̄ka̍ nɔ̄lā mbō sīīŋgu̍u̍ la̍ŋ chūāūwa̍ le̍ E̍bīlāha᷅m.” 9Mi̍ Chɔ᷄ŋ lo᷅ o̍ ko̍ŋ mbo̍ dīmūl nda̍ o̍ lētāle̍ ni᷄ŋ āā, “Yɔ̄m o̍ yɔ᷄m ku̍m ko̍mɔ̄ɔ̄ kɛ̄ndɛ̄ le̍, ā chō ndu̍ kīo̍ŋ. Chūe̍i̍ chō ni᷅ŋ ī hēēlāā le̍ ndi̍ kīo̍ŋ ndo̍. Ā kēŋ pɛ̍, ā dɔ̄ū o̍ yīŋ.”

10Mi̍ fāŋgāa̍ ho̍ō nyūnā Chɔ᷄ŋ āā, “Ō yɛ̄ɛ̍nɛ̍ na̍a̍ ŋ̄ tōsa̍ yɛ̍?”

11Mbo̍ mūlūl nda̍ āā, “Tē wāŋndo̍ nɔ̄ pɛ̍ do᷅māla̍ŋ lā tīɔ̍ɔ̍ŋ, ō ke̍ wa᷅na̍ nɔ̍ ho̍ō kpo̍so̍ŋ te̍ wo̍ ō pīlɛ̍. Wāna̍ nɔ̍ nyɛ̄ dīa̍a̍ wo̍ bɛ̍ɛ̍, ō ke̍ wa᷅na̍ nɔ̍ ho̍ō le̍ wo̍ ō ti᷄ŋ.”

12Mbo̍ lō o̍ ko̍ŋ, mi̍ kɔ̍sɔ̄ŋnda̍ bɛ̍ɛ̍ a̍ hu᷅ŋ le̍ mā yīŋ nda̍ yīŋɔ̄ɔ̍ Mɛ̄lɛ̄ka̍a̍. Ma̍ nyūnā Chɔ᷄ŋ āā, “Ti̍chā, yɛ̄ɛ̍nɛ̍ na̍a̍ na̍a̍ ŋ̄ tōsa̍ yɛ̍?”

13Mbo̍ mūlūl nda̍ āā, “Lā bi̍ī wāŋnda̍ nyɛ̍ sɔ̄lāā o̍ bā mbō hīōū mɛ̄ɛ̍ nda̍ dīmūl nya̍ yɛ̍ le̍.”

14So̍vɛ̄i̍ya̍ bɛ̍ɛ̍ ma̍ nyūnā āā, “Na̍a̍ yɛ̄, yɛ̄ɛ̍nɛ̍ na̍a̍ ŋ̄ tōsa̍ yɛ̍?”

Mbo̍ dīmūl nda̍ āā, “Lā bi̍ī wānā nyɛ̍ sɔ̄lāā fo̍ndō o̍ bā le̍. Ndu̍yɛ̍, lā ho᷅l wānā su̍ɛ̍i̍ fo̍ndō le̍. Lā hīni̍ kɔ̍l a̍ pāāwā nya̍ nda̍ kē nya̍ wo̍.”

15Wāŋnda̍ wa̍ lēhɔ̄l o̍ nɛ̄ī māā nyɛ̄ chō hūnɔ̄ɔ̄ yɔ̄nɔ᷄ŋ. Ma̍ kāndū nda̍ pi̍la̍ nyūūnīa̍a̍ o̍ lākɔ̄l āā, “Bāā pōo̍ ho̍ō, ndu̍ cho̍ Ki̍li̍tī wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍?” 16Kɛ̍, mi̍ Chɔ᷄ŋ di̍mūl nda̍ āā, “Ya̍ ya̍ a̍ mɛ̄ŋnda̍ŋ ya̍ I̍ yi᷅ŋ nya̍ yīŋɔ̄ɔ̍ Mɛ̄lɛ̄ka̍a̍ ni̍. Kɛ̍, wānā cho̍ hūnɔ̄ɔ̄ ō nɔ̄ kpāāyāa̍ ō hīōū ya̍. I̍ cho̍ bɛ̍ɛ̍ o̍ sɔ᷅vɛ̍ mī ti̍mbi̍ yūēī ndūɛ̍i̍ lā kɔ̄ɔ̄vɛ̄i̍ye̍ le̍. Wānā ko̍ŋ, ndu̍ cho̍ nya̍ hūnɔ̄ɔ̄ yīŋɔ̄ɔ̄ a̍ Nyi̍na̍ Mɛ̄lɛ̄ka̍a̍ ni̍ a̍ yīŋnde̍ŋ. 17Ō chō hūnɔ̄ɔ̄ wānāā wɔ̄ɔ̍ŋnda̍ sōlī wānāā kɛ̄ndīa̍a̍ tɛ̄ɛ̄ŋ. Ō chō ni᷅ŋ bɛ̍ɛ̍ o̍ bɛ̍ɛ̍ndīa̍ŋ le̍ he̍ī tōsāa̍. Ndu̍yɛ̍, ī chō yɔ̄nɔ᷄ŋ mɛ̄ɛ̍ wāŋndo̍ tōsā nu̍a̍ā a̍ tɔ̄lɔ̄ɔ̍ yɛ̍. Tē ō nɛ̄i̍ pɛ̍, ō hɛ̄i̍, tɔ̄lɔ̄ɔ̄ kpe̍e̍kpe̍i̍yo̍ ndu̍ ō hēēlu̍ o̍ kāā. Tɛ̄fɛ̍la̍ŋ ki̍nɛ̍i̍ a̍ fu̍e̍ēŋnde̍ ō chu̍a̍ ō lōm. Le̍nde̍ i̍ cho̍ hūnɔ̄ɔ̄ yɔ̄nɔ᷄ŋ a̍ wānāā wɔ̄ɔ̍ŋnda̍ o̍ yīŋnde̍ nyu᷅m kpo̍so̍ŋ te̍ le̍ŋ ni᷄ŋ ni̍.”

18Mi̍ Chɔ᷄ŋ di̍mūl wāŋnda̍ ha̍ā sɔ̄ɔ̍ŋ ka̍ ka̍ ŋ̍ che᷅le̍ŋ māā ā māŋga̍la̍ ka̍ālā ndāla̍ŋ. Mbo̍ dīmūl nda̍ yōōŋgū kɛ̄ndɛ̍ Mɛ̄lɛ̄ka̍a̍. 19Kɛ̍, Māsāa̍ Hɛ̍lɔ̄ɔ̄ ndu̍ mi̍ Chɔ᷄ŋ do̍u̍nu᷄ŋ ndu̍ tu̍mbe̍ māā ō tōsa̍ su̍ɛ̍i̍ kɛ̍ndɛ̄ le̍, kāni̍ fo̍ndōle̍, le̍ chūā Hɛ̍lɔ̄ɔ̄ chu̍a̍ Hɛ̄lo̍o̍dīāā la̍nɔ̍ɔ̍ pɔ̄mbɔ̄ ndɔ̄ o̍ nɔ̄ɔ̍ ni᷄ŋ ndo̍. Mi̍ Chɔ᷄ŋ pɛ̍ɛ̍sā ndu̍ vɛ̄lɛ̄ le̍ yɔ̄ŋndā wɔ̄ɔ̍ŋndā chēle̍ŋndā o̍ to̍sa̍ la̍ŋ fa̍ū. 20Le̍ he̍ī, mi̍ Hɛ̍lɔ̄ɔ̄ bi̍ī Chɔ᷄ŋ mbo̍ dūāū ndu̍ o̍ chīɛ̄ī mānyūmndo̍ ni᷄ŋ. Dɛ̍nɛ̍ ndɔ̄ wɔ̍ɔ̍ŋndo̍ bōlle̍ŋ kīōlɔ̄ɔ̍ kpa̍li̍ wa̍ ko̍ŋ ni̍.

Ā yīŋ Chi̍i̍sū yīŋɔ̄ɔ̍ Mɛ̄lɛ̄ka̍a̍

(Māa̍ti̍u̍ 3:13-17; Ma̍kī 1:9-11)

21Chīī Chɔ᷄ŋ chi̍i̍ wāŋnda̍ kpe̍de̍ yīŋɔ̄ɔ̍ Mɛ̄lɛ̄ka̍a̍ wo̍, o̍ ko̍ŋ, Chi̍i̍sū bɛ̍ɛ̍, mi̍ Chɔ᷄ŋ yīŋ ndu̍. O̍ ko̍ŋ, mɛ̄ɛ̍ Chi̍i̍sū wa̍ Mɛ̄lɛ̄ka̍ pīɛ̄īyo̍, mi̍ ha̍la̍a̍ kūmbi᷄ŋ. 22Mi̍ Nyi̍na̍ Mɛ̄lɛ̄ka̍a̍ tūāl ndu̍ chōo̍ o̍ īka᷅ŋgbo̍. Mi̍ dīōmndo̍ sūāā o̍ ha̍la̍a̍ ni᷄ŋ. Mbo̍ dīmī āā, “Nu᷄m cho̍ po̍ nūu̍ ni̍. I̍ ka̍a̍la̍ nu̍m. I̍ hi̍ni̍ kɔ̄l a̍ nūm ta̍u̍.”

Pūlālē Chi̍i̍sū fu̍la̍ chōo̍ le̍ŋ

(Māa̍ti̍u̍ 1:1-17)

23Chi̍i̍sū wa̍ le̍ wɔ̄sīla̍ŋ be̍le̍-ya̍a̍ mbo̍ kāndū wa̍li̍ ndɔ̄ɔ̍. Mɛ̄ɛ̍ wāŋnda̍ yīya̍ŋ yɛ̍ māā Chi̍i̍sū fi̍nyā ndɔ̍ wa̍ Chōo̍sɛ̍ ni̍. Chōo̍sɛ̍ fi̍nyā ndɔ̍ wa̍ Hɛ̍lī ni̍. 24Hɛ̍lī fi̍nyā ndɔ̍ wa̍ Māta̍tī ni̍. Māta̍tī fi̍nyā ndɔ̍ wa̍ Li̍va̍ī ni̍. Li̍va̍ī fi̍nyā ndɔ̍ wa̍ Mɛ̍li̍kī ni̍. Mɛ̍li̍kī fi̍nyā ndɔ̍ wa̍ Cha̍nāī ni̍. Cha̍nāī fi̍nyā ndɔ̍ wa̍ Chōo̍sɛ̍ ni̍. 25Chōo̍sɛ̍ fi̍nyā ndɔ̍ wa̍ Mātāti̍ya̍sī ni̍. Mātāti̍ya̍sī fi̍nyā ndɔ̍ wa̍ E̍mɔ̍ɔ̍sī ni̍. E̍mɔ̍ɔ̍sī fi̍nyā ndɔ̍ wa̍ Nāhu᷅m ni̍. Nāhu᷅m fi̍nyā ndɔ̍ wa̍ Ɛ̍si̍lī ni̍. Ɛ̍si̍lī fi̍nyā ndɔ̍ wa̍ Na̍kāī ni̍. 26Na̍kāī fi̍nyā ndɔ̍ wa̍ Māātī ni̍. Māātī fi̍nyā ndɔ̍ wa̍ Mātātīya̍sī ni̍. Mātātīya̍sī fi̍nyā ndɔ̍ wa̍ Sɛ̍mɛ̄īŋ ni̍. Sɛ̍mɛ̄īŋ fi̍nyā ndɔ̍ wa̍ Cho̍sɛ̍kī ni̍. Cho̍sɛ̍kī fi̍nyā ndɔ̍ wa̍ Cho̍dā ni̍. 27Cho̍dā fi̍nyā ndɔ̍ wa̍ Chōha̍nāŋ ni̍. Chōha̍nāŋ fi̍nyā ndɔ̍ wa̍ Lu̍e̍sā ni̍. Lu̍e̍sā fi̍nyā ndɔ̍ wa̍ Sɛ̄lūba̍bɛ̄l ni̍. Sɛ̄lūba̍bɛ̄l fi̍nyā ndɔ̍ wa̍ Si̍ɛ̍ɛ̍tīɛ̄l ni̍. Si̍ɛ̍ɛ̍tīɛ̄l fi̍nyā ndɔ̍ wa̍ Nɛ̍lūī ni̍. 28Nɛ̍lūī fi̍nyā ndɔ̍ wa̍ Mɛ̍li̍kī ni̍. Mɛ̍li̍kī fi̍nyā ndɔ̍ wa̍ A̍dīī ni̍. A̍dīī fi̍nyā ndɔ̍ wa̍ Ko̍sām ni̍. Ko̍sām fi̍nyā ndɔ̍ wa̍ Ɛ̄līma̍dām ni̍. Ɛ̄līma̍dām fi̍nyā ndɔ̍ wa̍ Ɛ̍ɛ̄ ni̍. 29Ɛ̍ɛ̄ fi̍nyā ndɔ̍ wa̍ Chɔ̄ɔ̍sūāā ni̍. Chɔ̄ɔ̍sūāā fi̍nyā ndɔ̍ wa̍ Īlīɛ̍ɛ̍sā ni̍. Ɛ̄li̍ɛ̍ɛ̍sā fi̍nyā ndɔ̍ wa̍ Cho̍lūīm ni̍. Cho̍lūīm fi̍nyā ndɔ̍ wa̍ Māta̍tī ni̍. Māta̍tī fi̍nyā ndɔ̍ wa̍ Li̍va̍ī ni̍. 30Li̍va̍ī fi̍nyā ndɔ̍ wa̍ Si̍mīɔ̄ŋ ni̍. Si̍mīɔ̄ŋ fi̍nyā ndɔ̍ wa̍ Chu̍dā ni̍. Chu̍dā fi̍nyā ndɔ̍ wa̍ Chōo̍sɛ̍ ni̍. Chōo̍sɛ̍ fi̍nyā ndɔ̍ wa̍ Cho̍nām ni̍. Cho̍nām fi̍nyā ndɔ̍ wa̍ Īlīa̍a̍kīm ni̍. 31Īlīa̍a̍kīm fi̍nyā ndɔ̍ wa̍ Mɛ̍līāā ni̍. Mɛ̍līāā fi̍nyā ndɔ̍ wa̍ Mɛ̍nā ni̍. Mɛ̍nā fi̍nyā ndɔ̍ wa̍ Māta̍tā ni̍. Māta̍tā fi̍nyā ndɔ̍ wa̍ Ne̍ta̍ŋ ni̍. Ne̍ta̍ŋ fi̍nyā ndɔ̍ wa̍ Dēēve̍ ni̍. 32Dēēve̍ fi̍nyā ndɔ̍ wa̍ Chɛ̄ɛ̍se̍ ni̍. Chɛ̄ɛ̍se̍ fi̍nyā ndɔ̍ wa̍ Ōbɛ̄ɛ̄ ni̍. Ōbɛ̄ɛ̄ fi̍nyā ndɔ̍ wa̍ Bo̍wāā ni̍. Bo̍wāā fi̍nyā ndɔ̍ wa̍ Sa̍li̍mɔ̄ŋ ni̍. Sa̍li̍mɔ̄ŋ fi̍nyā ndɔ̍ wa̍ Na̍a̍sīɔ̄ŋ ni̍. 33Na̍a̍sīɔ̄ŋ fi̍nyā ndɔ̍ wa̍ Āmi̍na̍da̍bī ni̍. Āmi̍na̍da̍bī fi̍nyā ndɔ̍ wa̍ A̍di̍mīŋ ni̍. A̍di̍mīŋ fi̍nyā ndɔ̍ wa̍ A̍a̍nāŋ ni̍. A̍a̍nāŋ fi̍nyā ndɔ̍ wa̍ Hɛ̍si̍lɔ̄ŋ ni̍. Hɛ̍si̍lɔ̄ŋ fi̍nyā ndɔ̍ wa̍ Pɛ̍lu̍ɛ̍sī ni̍. Pɛ̍lu̍ɛ̍sī fi̍nyā ndɔ̍ wa̍ Chu̍dā ni̍. 34Chu̍dā fi̍nyā ndɔ̍ wa̍ Che̍kɔ̍pū ni̍. Che̍kɔ̍pū fi̍nyā ndɔ̍ wa̍ Āa̍se̍ ni̍. Āa̍se̍ fi̍nyā ndɔ̍ wa̍ E̍bīlāha᷅m ni̍. E̍bīlāha᷅m fi̍nyā ndɔ̍ wa̍ Tɛ̍lūā ni̍. Tɛ̍lūā fi̍nyā ndɔ̍ wa̍ Nāhɔ̍ɔ̄ ni̍. 35Na̍hɔ̄ɔ̄ fi̍nyā ndɔ̍ wa̍ Sɛ̍lu̍kī ni̍. Sɛ̍lu̍kī fi̍nyā ndɔ̍ wa̍ Lu̍ɛ̍yū ni̍. Lu̍ɛ̍yū fi̍nyā ndɔ̍ wa̍ Pɛ̍lɛ̍kī ni̍. Pɛ̍lɛ̍kī fi̍nyā ndɔ̍ wa̍ Ɛ̍bā ni̍. Ɛ̍bā fi̍nyā ndɔ̍ wa̍ Sɛ̍i̍lūā ni̍. 36Sɛ̍i̍lūā fi̍nyā ndɔ̍ wa̍ Ke̍nāŋ ni̍. Ke̍nāŋ fi̍nyā ndɔ̍ wa̍ A̍fa̍sa̍dī ni̍. A̍fa̍sa̍dī fi̍nyā ndɔ̍ wa̍ Si̍ɛ̄m ni̍. Si̍ɛ̄m fi̍nyā ndɔ̍ wa̍ Nu̍u̍wā ni̍. Nu̍u̍wā fi̍nyā ndɔ̍ wa̍ La̍mɛ̍kī ni̍. 37La̍mɛ̍kī fi̍nyā ndɔ̍ wa̍ Mɛ̄tu̍si̍lā ni̍. Mɛ̄tu̍si̍lā fi̍nyā ndɔ̍ wa̍ I̍nɔ̍kī ni̍. I̍nɔ̍kī fi̍nyā ndɔ̍ wa̍ Cha̍lu̍ɛ̍dī ni̍. Cha̍lu̍ɛ̍dī fi̍nyā ndɔ̍ wa̍ Māhāla̍lɛ̄l ni̍. Māhāla̍lɛ̄l fi̍nyā ndɔ̍ wa̍ Ke̍nāŋ ni̍. 38Ke̍nāŋ fi̍nyā ndɔ̍ wa̍ I̍nɔ̍ɔ̍sī ni̍. I̍nɔ̍ɔ̍sī fi̍nyā ndɔ̍ wa̍ Sɛ̍ɛ̍tī ni̍. Sɛ̍ɛ̍tī fi̍nyā ndɔ̍ wa̍ A̍dām ni̍. A̍dām fi̍nyā ndɔ̍ wa̍ Mɛ̄lɛ̄ka̍ ni̍.

Currently Selected:

Lu̍kū 3: YM

Highlight

Copy