Lu̍kū 16

A̍ po̍ bu̍ɛ̍ī kāŋgālā pīlɛ̍ o̍kɔ̄ɔ̄

1Mi̍ Chi̍i̍sū di̍mūl bu̍ɛ̍i̍yāā ndūa̍a̍ tālo̍o̍ āā, “Po̍ su̍lāā pīlɛ̍ wa̍ ni̍, mbo̍ chūā bu̍ɛ̍īyo̍ le̍ wāa̍ nyɛ̄m ndɔ᷄ŋ kpe̍de̍ bo᷅lle̍ŋ. Kɛ̍, te̍le̍ŋ pi᷅lɛ̍ ma̍ dīmūl wānā su̍lāa̍ ho̍ō māā po̍ o̍ ha̍ndu̍ ho̍ō nyɛ̄m ndɔ᷄ŋ bōlle̍ŋ ndo̍ chō nyɛ̄m ndɔ᷄ŋ tɛ̄ɛ̄mbūūwo̍. 2Mi̍ wānā su̍lāa̍ ho̍ō lō o̍ ko̍ŋ mbo̍ vēēlū ndu̍. Mbo̍ nyūnā ndu̍ āā, ‘Īmāā vɛ̄ɛ̍nɛ̍ ya̍ I̍ cho̍ yɛ̄ he̍ī tūēīyɔ̄ɔ̍ a̍ nūm o̍kɔ̄ɔ̄? Hu̍ŋ mā hu̍ŋ dɔ̍u̍nu᷄ŋ nyɛ̍m nu᷄ŋ ko̍na̍. Kāni̍ fo̍ndōle̍, a̍ cho̍ lɛ̍ wā nyɛ̄m nu᷄ŋ bōlle̍ŋ te̍.’ 3Mi̍ pōo̍ ho̍ō nyūnā ndu̍ pi̍la̍ āā, ‘Ō yɛ̄ɛ̍nɛ̍ kpe̍e̍kpe̍i̍ ya̍ I̍ to̍sa̍ yɛ̍? Ma̍sānɔ̄ nūu̍ sōli̍ ya̍ ni᷅ŋ o̍ wa̍llo̍ ni᷄ŋ. I̍ nɔ̍lā yɛ̍ wa̍li̍ ka̍lā ka̍lā le̍. Ndu̍yɛ̍ vɛ̍lɛ̄, si̍ɔ̍mbu̍la̍ŋ lā chō ya̍ le̍ wāŋnda̍ bālɔ̄ɔ̍ pīɛ̄īle̍ŋ.’ Mbo̍ chāl mbo̍ yīya᷄ŋ. 4Mbo̍ dīmī āā, ‘I̍ si̍nā mɛ̄ɛ̍ ya̍ cho̍ tōsā yɛ̍. O̍ ko̍ŋ, ā yɔ᷄ŋ bɛ̍ɛ̍ mbō sōli̍ ya̍ o̍ wa̍llo̍ ni᷄ŋ, I̍ nɔ̍lā mī sɔ̍la̍ ndi̍a̍a̍mɔ̍ɔ̍wa̍ mī wa̍ nda̍ o̍ bɛ̄ŋgu̍ cho̍o̍.’

5“O̍ ko̍ŋ kɔ̍ɔ̍lī, mbo̍ vēēlū wānāā kūēēla̍ ma̍sānɔ̄ ndɔ̄ɔ̍ lā wa̍ chōo̍ wa̍ ā pīlɛ̍ŋ pi̍lɛ̍ŋ nda̍. Mbo̍ nyūnā wāna̍ tāso̍o̍ āā, ‘Vɛ̄ɛ̍nɛ̍ kpɛ̍ kūo̍o̍ chō yɛ̄ nu̍m o̍ ma̍sā nūu̍ lo̍?’ 6Mbo̍ dīmī āā, ‘Chūɛ̄īya̍ŋ ti᷅ŋnda̍ŋ kɛ̄mɛ̄.’ Mi̍ po̍ bu̍ɛ̍īyo̍ dīmūl ndu̍ āā, ‘So̍li̍ ya̍u̍ nu̍m kūo̍o̍ chɔ̍ chɔ̍ mā cha̍l mā po̍o̍nyi̍a̍a̍ ti᷅ŋnda̍ŋ be̍le̍-ŋu̍ɛ̍ɛ̍nu̍.’ 7Mbo̍ nyūnā wāŋndo̍ ō pīlɔ̍ɔ̄ āā, ‘Yɛ̄ɛ̍nɛ̍ kpɛ̍ cho̍ yɛ̄ nu̍m kūēē?’ Mbo̍ mūlī āā, ‘Wi̍tīi̍yo̍ŋ bu̍sɛ̄la̍ŋ wāa̍ lē pīlɛ̍.’ Mbo̍ dīmūl ndu̍ āā, ‘So̍li̍ ya̍u̍ nu̍m kūo̍o̍ mā po̍o̍nyi̍a̍a̍ bu̍sɛ̄la̍ŋ kɛ̄mɔ̄ɔ̍ lē ŋɔ̄ma̍a̍.’

8“O̍ ko̍ŋ kɔ̍ɔ̍lī, mi̍ fāl sūlāa̍ ho̍ō kpīŋgā po̍ bu̍ɛ̍ī lēyālāa̍ ho̍ō le̍ tāāsi̍o̍o̍.” Mi̍ Chi̍i̍sū hi̍a̍ū lāchī a̍ dīmīo̍o̍ āā, “Wānāa̍ cho̍ le̍ chi̍e̍ēŋndo̍ ho̍ō wa̍, ā nɔ̄ tāāsi̍o̍o̍ a̍ mɛ̄ɛ̍ nda̍ pi̍la̍ bīya᷅ŋ o̍ sɔ̄ɔ̍ŋ chōo̍ yɛ̍, mbo̍ hīāū wānāa̍ cho̍ o̍ nyɛ̄ wa̍wo̍ŋndo̍ ni᷄ŋ nda̍.

9“Le̍la̍ŋ, mī di̍mu̍l nya̍, lā tōsa̍ kɛ̍ndɛ̄i̍ a̍ nyɛ̄m sɔ̄la᷄ŋ o̍ chi̍e̍ēŋndo̍ ni᷄ŋ le̍ mī lā sɔ̄la̍ ndi̍a̍a̍mɔ̍ɔ̍wa̍. O̍ ko̍ŋ kɔ̍ɔ̍lī, bōōndi̍i̍ nyɛ̄ sɔ̄lāa̍ ō nɔ̍lā lɛ̍ mbō māla̍ nya̍ le̍ ve̍, bōōndi̍i̍ ke̍ŋ Mɛ̄lɛ̄ka̍ ndu̍ nɔ̍lā mbō yīya̍ nya̍ o̍ fo̍ndāŋ wāŋnda̍ chō wā yōōmū, le̍ fɛ̍ɛ̍ŋ a̍ fɛ̍ɛ̍ŋ ndo̍. 10Wānā o̍ wāna̍ wa̍ sa̍kpō o̍ sɔ̄ɔ̍ŋ pɔ̍mbɔ᷄ŋ ni᷄ŋ pɛ̍, ō nɔ̄lā mbō wa̍ sa̍kpō o̍ sɔ̄ɔ̍ŋ bānā ba̍na᷄ŋ ni᷄ŋ. Kɛ̍, wānā o̍ wāna̍ ve̍ sa̍kpō o̍ sɔ̄ɔ̍ŋ pɔ̍mbɔ᷄ŋ ni᷄ŋ te̍, ō ve᷅ sa̍kpō o̍ sɔ̄ɔ̍ŋ bānā ba̍na᷄ŋ ni᷄ŋ te̍. 11Tē a̍ ve̍ sa̍kpō o̍ nyɛ̄m chi̍e̍ēŋndo̍ŋ ni᷄ŋ te̍, vɛ̄ɛ̍nɛ̍ nda̍ lāāla̍ŋ yɛ̍ a̍ nūm o̍ sūl kpe̍e̍kpe̍i̍yo̍ chōo̍? 12Ndu̍yɛ̍, tē a̍ ve̍ sa̍kpō o̍ nyɛ᷄m cho̍ le̍ chāāŋāā chēle̍ŋnda̍ wo̍ŋ chōo̍ le̍, ō nɛ̄ɛ̍nɛ̍ ke᷅ yɛ̍ nu̍m nyɛ̍ cho̍ le̍ nūm ndo̍?”

13O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “Chɛ̄ o̍ chɛ̄ cho̍ mbō wa̍ le̍ ma̍sāā ŋīɔ̍ɔ̍ŋ te̍. Kāni̍ fu̍u̍le̍, tē ho̍ō o̍ ka̍a̍la̍ ni̍, ō tu᷄l ho̍ō lēyɛ̄. Tē ho̍ō o̍ di̍i̍ku̍ŋ ni̍, ō di̍i̍kūŋ o̍ pi᷅lɔ̍ɔ̍ le̍. Le̍la̍ŋ, wānā le̍ndūŋ kɔ̍l o̍ nyɛ̄ sɔ̄lāa̍ mā nɔ̍la̍ Mɛ̄lɛ̄ka̍ sāāŋgīāl te̍.”

Sɔ̄ɔ̍ŋ Chi̍i̍sū pɛ̍ɛ̍ku̍ wāŋnda̍ wo̍ŋ

(Māa̍ti̍u̍ 11:12-13; 5:31, 32; Ma̍kī 10:11, 12)

14Mɛ̄ɛ̍ ku̍ndā Fālīsi̍īya̍ tūēī nyɛ̄ Chi̍i̍sū wa̍ dīmīo̍o̍ wo̍, ma̍ kāndū ndu̍ pɛ̄ɛ̄sāa̍. Kāni̍ fo̍ndōle̍, ā kāāla̍ nyɛ̄ sɔ̄lāa̍. 15Mi̍ Chi̍i̍sū di̍mūl nda̍ āā, “Lā hɛ̄na̍ŋ tē wāŋnda̍ chē nya̍ pɛ̍ ā dīmi̍ māā lā chō wānāā sa̍kpō. Kɛ̍ ndu̍yɛ̍, Mɛ̄lɛ̄ka̍ ndu̍ si̍nā nyɛ᷅ o̍ nyɛ̍ cho̍ nya̍ o̍ lākɔ̄l. Kāni̍, nyɛ̄ Mɛ̄lɛ̄ka̍ ndu̍ kɛ̍ɛ̍ māā ō ni᷄ŋ kpo̍so̍ŋ te̍ wo̍, ndu̍ wāŋnda̍ nda̍ chu̍a̍ māā nyɛ̍ kpe̍e̍kpe̍i̍ ni̍.

16“Sāwāla̍ Mɛ̄lɛ̄ka̍ ke̍ Mūu̍sē la̍ŋ, a̍ dīōmndā wānāa̍ su̍a̍ā le̍ Mɛ̄lɛ̄ka̍ wa̍ a̍ dīmi̍ la̍ŋ, lā lo̍ lēchōo̍ ha̍a̍a̍ mbo̍ fūūlūū a̍ te̍le̍ŋ Chɔ᷄ŋ Wānā Yi̍ŋāa̍ wo̍. Chɔ̍ŋ a̍ bōōndi̍i̍ ke̍ŋ, wāŋnda̍ chō yōōŋgū kɛ̄ndɔ̄ɔ̍ dīmīo̍o̍ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄. Ndu̍yɛ̍, wāŋnda̍ kpe̍de̍ ā chō kīndīo̍o̍ a̍ lābɛ̄ɛ̄la̍ le̍ lūɛ̄īyɔ̄ɔ̍ lo̍ŋ.” 17Mi̍ Chi̍i̍sū hi̍a̍ū lāchī a̍ sūɛ̍i̍ āā, “Ī chō bɛ̍ɛ̍ŋ bɛ̍ɛ̍ŋ le̍ ɛ̄chɛ̍nɛ̄ a̍ chi̍e̍ēŋndo̍ mā tāmbu̍, mbo̍ hīāū a̍ pōōnyīāā ō pɔ̄mbu̍ɛ̍i̍na̍a̍ wo̍ bɛ̍ɛ̍ fa̍ŋa᷄ŋndo̍ o̍ sāwāla̍ Mɛ̄lɛ̄ka̍ kē Mūu̍sē la̍ŋ chōo̍.

18“Wānā o̍ wāna̍ kɛ̍ɛ̍ la̍a̍ ndɔ̍ mbō chu̍a̍ wānā la̍nɔ̍ che᷅le̍ŋ pɛ̍, mɛ̄ɛ̍ ō tɛ̄ɛ̄mbu̍u̍ sāwa̍ di̍mi̍ māā wānā su̍u̍ndā le̍ wo̍. Ndu̍yɛ̍, wānā pɔ̍nɔ̍ chu̍a̍ wānā la̍nɔ̍ nda̍ kɛ̄ɛ̍ ko̍ŋ ndo̍ pɛ̍, mɛ̄ɛ̍ ndu̍ bɛ̍ɛ̍ ō tɛ̄ɛ̄mbu̍u̍ sāwa̍ di̍mi̍ māā wānā su̍u̍ndā le̍ wo̍.”

A̍ wānā su̍lāa̍ nda̍ La̍sa̍lɔ̄ɔ̄ o̍kɔ̄ɔ̄

19Mi̍ Chi̍i̍sū di̍mī vɛ̄lɛ̄ tālo̍o̍ āā, “Wānā su̍lāā pīlɛ̍ wa̍ ni̍, lɔ̍ɔ̍ o̍ lɔ̍ɔ̍ ō chō ō dōvīa̍ŋ a̍ nyɛ̄lā ba̍ā kālālā bɛ̄ndūla̍ŋ. Lēpāa̍ o̍ lēpāa̍ nyɛ̄m kɛ̄ndɔ᷄ŋ ko̍ni̍ ndu̍ o̍o̍ di̍ā ni̍. 20-21Kɛ̍, po̍ ta̍mbɛ̍i̍ pi᷅lɛ̍ wa̍ dīōlā ndɔ̄la̍ŋ āā, La̍sa̍lɔ̄ɔ̄. Pāūve̍ wa̍ ndu̍ ī tīūwāā lēkɔ̄ɔ̍ si̍lɔ̍. Tūŋnda̍ bɛ̍ɛ̍ hūnɔ̄ɔ̍ mī nda̍ a̍a̍ de̍e̍mbūū ndu̍ pāūvīī kēŋ. Ndu̍yɛ̍, o̍ kpāki̍ wa̍ chīɛ̄ī wānā su̍lāa̍ ho̍ō ō bālāā wo̍ sōndōo̍ nda̍ a̍a̍ ya̍mbū ndu̍ ni̍. Kāni̍ fo̍ndōle̍, ndu̍ o̍o̍ ye̍e̍mā le̍ nyɛ̄ dīāā wānā su̍lāa̍ ho̍ō ndu̍ o̍o̍ de̍ma̍ wo̍ sɔ̄lāa̍ le̍ dīo̍o̍.

22“Mi̍ po̍ ta̍mbɛ̍i̍yo̍ ho̍ō wū. Mɛ̄ɛ̍ o̍ vi᷅, mi̍ ki̍i̍la̍a̍ Mɛ̄lɛ̄ka̍a̍ hu᷄ŋ chu̍ā ndu̍ ma̍ kūānu᷄ŋ a̍ ndu̍ o̍ E̍bīlāha᷅m ndo̍. O̍ ko̍ŋ kɔ̍ɔ̍lī, mi̍ wānā su̍lāa̍ bɛ̍ɛ̍ o̍ wu᷅. Ma̍ chɔ̄ ndu̍. 23Mɛ̄ɛ̍ nda̍ chɔ̍ ndu̍, mbo̍ kūā chi̍e̍e̍ pīɔ̍m. Lo̍ŋ o̍ wa̍ o̍ mɔ̍nɛ̍i̍ ni᷄ŋ ni̍. Mɛ̄ɛ̍ o̍ to̍fa̍ chōo̍ cho̍o̍, mbo̍ chā E̍bīlāha᷅m la̍nda̍ŋ. Mbo̍ chā La̍sa̍lɔ̄ɔ̄ cho̍ ndu̍ īkɛ̄i̍. 24Mbo̍ vēēlū āā, ‘Kɛ̄kɛ̍, E̍bīlāha᷅m, tūīīnu̍ŋ ya̍ īnyīɛ̍ɛ̍ mā di̍mu̍l La̍sa̍lɔ̄ɔ̄ ō pīla̍ sūe̍i̍ o̍ mɛ̄ŋnda̍ŋ ni᷄ŋ mbō hu᷄ŋ ma᷅l la̍ o̍ lēdīɔ̄ɔ̄mū fɔ̍, mī bo̍lōle̍ŋ lē pɔ̄lu̍l la̍. I̍ cho̍ bɔ̄ɔ̍ o̍ nyɛ̄ nɛ̄īyāā bɛ̄ndōo̍ ni᷄ŋ o̍ yīŋnde̍ŋ nde᷅ŋ ni᷄ŋ.’

25“Kɛ̍, mi̍ E̍bīlāha᷅m lo᷅ o̍ ko̍ŋ mbo̍ mūlūl ndu̍ āā, ‘Po̍ nūu̍, lo̍o̍nu̍ŋ māā bōōndi̍i̍ ŋ̄ wa̍ yōōmū ve̍, ma̍ sɔ̄lā dɛ̍nɛ̍ kɛ̍ndɔ̄ɔ̍ o̍ nu̍mndo̍, mi̍ La̍sa̍lɔ̄ɔ̄ ndu̍ sɔ̍lā dɛ̍nɛ̍ pa̍lāa̍. Kɛ̍, ndu̍ cho̍ ni᷅ŋ o̍ kɔ̄l nyūlōo̍ ni᷄ŋ na̍nu᷄ŋ mi̍ nūm wā o̍ mɔ̍nɛ̍i̍ ni᷄ŋ. 26Ō fūla̍ wɔ̍ bɛ̍ɛ̍ o̍ ko̍ŋ kɔ̍ɔ̍lī, kpōlōŋ kpo̍lo̍ŋ yīŋgi̍lɛ̍i̍ bɛ̍ndōo̍ chō na̍a̍ tɛ̍ɛ̄ŋ na̍a̍ nya̍ā. Wānā ye̍e̍ma̍ bɛ̍ɛ̍ le̍ chɔ̄nɔ᷄ŋndo̍ na̍nu᷄ŋ mbō kūɛ̄ lo̍ŋ, ō nɔ̍lā le̍. Ndu̍yɛ̍, wānā nɔ̍lā mbō chɛ᷄ŋ lo̍ŋ mbō ta᷄ŋ nāa̍ na̍a̍ chūā na̍nu᷄ŋ te̍.’ 27Mi̍ wānā su̍lāa̍ ho̍ō dīmī āā, ‘Mɛ̄ɛ̍ yāndi̍i̍, kɛ̄kɛ̍, vi̍o̍m La̍sa̍lɔ̄ɔ̄ o̍ chīɛ̍i̍ fi̍nyā nūu̍. 28Kāni̍ fu̍u̍le̍, I̍ nɔ̍ pɔ̄mbūa̍a̍ ā ŋūɛ̍ɛ̍nu̍ lo̍ŋ. Vi̍o̍m ndu̍ ō kɔ̍ mbō kɔ̍ si̍lā nda̍, yɔ̍ŋi̍ nda̍ bɛ̍ɛ̍ nda̍ hu᷄ŋ o̍ fo̍ndāŋ nyɛ̄ nɛ̄īyāa̍ ho̍ō.’

29“Mi̍ E̍bīlāha᷅m di̍mūl ndu̍ āā, ‘Yāu̍la̍ Mūu̍sē po̍o̍nyi̍a̍a̍ la̍ŋ a̍ lā wānāa̍ su̍a̍ā le̍ Mɛ̄lɛ̄ka̍ wa̍ ā pōōnyi̍a̍a̍ la̍ŋ lā chō nda̍ o̍ bā lo̍ŋ. Ā ya᷄ŋ nyɛ᷅ la̍ di̍mi̍ wo̍ lānī.’ 30Kɛ̍ mbo̍ dīmī āā, ‘Ā ye᷅ŋ ni̍ŋ nyɛ᷅ la̍ di̍mi̍ wo̍ lānī le̍. Kɛ̍ tē wānā mi̍i̍ŋgu̍ pɛ̍ yo̍o̍mū mbō kɔ̍ si̍lā nda̍, ā nɔ̄lā mā ma᷄l yɔ̄ŋndā ndāla̍ wɔ̍ɔ̍ŋnda̍ŋ.’ 31Mi̍ E̍bīlāha᷅m di̍mūl ndu̍ āā, ‘Nyɛ̄ yāu̍la̍ Mūu̍sē a̍ wānāa̍ su̍a̍ā le̍ Mɛ̄lɛ̄ka̍ wa̍ ā pōōnyi̍a̍a̍ la̍ŋ lā dīmi̍ wo̍, tē ā kɛ̄ɛ̍ ndu̍ lānī yāŋɔ̄ɔ̄ pɛ̍, ā yɔ᷄ŋ bɛ̍ɛ̍ mī wāŋndo̍ mīīŋgu̍ yōōmū mbō kɔ̍ si̍lā nda̍ ā la̍a̍lāŋ te̍.’ ”

Currently Selected:

Lu̍kū 16: YM

Highlight

Copy