Lu̍kū 13

Tē lā me᷄l yɔ̍ŋndā wɔ̄ɔ̍ŋndā nya̍ chō tōsāa̍ la̍ŋ te̍, lā chō wu̍

1A̍ bōōndi̍i̍ ke̍ŋ kpe̍e̍kpe̍i̍, mi̍ wānāā pūm ā hūŋ nāa̍ Chi̍i̍sū chu̍a̍. Ma̍ hu᷄ŋ chɔ᷅m ndu̍ a̍ wānāā pūm a̍ chɛ̍ŋ o̍ lɛ̄ŋndē Kāli̍līle̍ŋ ni᷄ŋ nda̍ o̍kɔ̄ɔ̄. Ma̍ dīmūl ndu̍ māā wānāa̍ chɛ̍ŋ ka̍ŋ Kāli̍lī wa̍, ā lo̍ sa̍lāa̍ sōlīo̍o̍ o̍ Mɛ̄lɛ̄ka̍ lo̍ mi̍ Māsāa̍ Pa̍i̍lē to̍sā ma̍ dīī nda̍. 2Mi̍ Chi̍i̍sū lo᷅ lo̍ŋ mbo̍ nyūnā nda̍ āā, “Lā nɔ̄ mānūāā o̍ kɔ̄l māā pūa̍a̍ nda̍ di̍i̍ ka̍ŋ nda̍, nda̍ hi̍o̍ū yɔ̄ŋ wɔ̄ɔ̍ŋ a̍ wāŋnda̍ ā pīli̍a̍a̍ kpe̍de̍ o̍ lɛ̄ŋndē Kāli̍līle̍ŋ ni᷄ŋ māā le̍la̍ŋ nda̍ sɔ̄la̍ pīɔ̍mndo̍ ni̍? 3Mī di̍mu̍l nya̍, nda̍ a̍a̍ hi̍u̍ nda̍ yɔ̄ŋ wɔ̄ɔ̍ŋ te̍. Kɛ̍ ndu̍yɛ̍, nya̍ bɛ̍ɛ̍, tē lā me᷄l yɔ᷅ŋndā wɔ̄ɔ̍ŋnda̍ŋ te̍, lā chō pīɔ̍mndo̍ sɔ̄lā mɛ̄ɛ̍ nda̍ sɔ̄la̍ pīɔ̍mndo̍ nu̍a̍ā yɛ̍.” 4Mbo̍ nyūnā vɛ̄lɛ̄ nda̍ āā, “Ŋ̄wāŋ tɔ̍ a̍ wānāā ŋɔ̄ma̍a̍ chīɛ̄ī vīlɛ̄ī bɛ̄ndōo̍ ō de᷄l chōo̍ Sa̍i̍lo̍wām chi̍e̍e̍ ma̍ wū wa̍ yɛ̄? Bāā nda̍ nda̍ a̍a̍ hi̍o̍ū yɔ̄ŋ wɔ̄ɔ̍ŋ a̍ wāŋnda̍ ā tūa̍a̍ Chūlu̍sɛ̄lɛ̄m kpo̍u̍? 5Mī di̍mu̍l nya̍, nda̍ a̍a̍ hi̍u̍ nda̍ yɔ̄ŋ wɔ̄ɔ̍ŋ te̍. Ndu̍yɛ̍, nya̍ bɛ̍ɛ̍, tē lā me᷄l yɔ᷅ŋndā wɔ̄ɔ̍ŋnda̍ŋ te̍, lā chō pīɔ̍mndo̍ sɔ̄lā mɛ̄ɛ̍ nda̍ sɔ̄la̍ pīɔ̍mndo̍ nu̍a̍ā yɛ̍.”

Tālo̍o̍ a̍ yɔ̄m tūālāa̍ kɛ̍ɛ̍ le̍ kōmɔ̄ɔ̍ wo̍

6O̍ ko̍ŋ, mi̍ Chi̍i̍sū di̍mī tālo̍o̍ āā, “Po̍ pi᷅lɛ̍ wa̍ ni̍, mbo̍ tūāl yɔ̄mndo̍ o̍ kpe̍le̍ ndɔ̄ɔ̍ ni᷄ŋ. Ā vēēlū yɔ̄m kōŋ āā, fi̍kīi̍yo̍. Pāa̍le̍ pi᷅lɛ̍, mbo̍ hu᷄ŋ mɛ̍ɛ̍ndīa̍ŋ o̍ yɔ̄mndo̍ ho̍ō chōo̍ le̍ kōmɔ̄ɔ̄ ndɔ̄ɔ̍. Kɛ̍, ō sēēlu̍ŋ nyɛ᷅ o̍ nyɛ̄ le̍. 7O̍ ko̍ŋ, mbo̍ dīmūl wāna̍ wa̍ kpe̍lo̍o̍ māndāa̍ wo̍ āā, ‘Wɔ̄sīla̍ŋ lā yāa̍ ni᷅ŋ kpu̍lu̍ku̍u̍ I̍ cho̍ hūnɔ̄ɔ̄ tōfāa̍ o̍ yɔ̄mndo̍ ho̍ō chōo̍ le̍ ko̍mɔ̄ɔ̄ ndɔ̄ɔ̍. Kɛ̍, nyɛ̄ o̍ nyɛ̄ bɛ̍ɛ̍ I̍ se̍e̍lūŋ te̍. Le̍la̍ŋ, ki̍o̍ŋ ndu̍. Ɔ̍ɔ̄ le̍ sa̍bū o̍ ha̍ū lɛ᷅ŋnde̍ŋ fo̍ndō fu̍u̍ wo̍?’ 8Mi̍ wāna̍ wa̍ kpe̍lo̍o̍ māndāa̍ wo̍ dīmī āā, ‘Ma̍l lɔ̍ ndu̍ le̍ wɔ̄sīo̍o̍ ho̍ō, fāllo̍. I̍ cho̍ lɛ̄ŋnde̍ŋ bɛ̄ɛ̄ndīāā lēbɛ̄ŋgu̍ nyɛ̍ kɛ̄ndɛ̍ī mī dɔ̍ū pūūlu̍ sa᷄llo̍. 9Kɛ̄lɛ̄ŋgāā dɔ̍ɔ̍ mbō kōm nyɛ̄lāsīāŋ. Tē ō kōm yɛ̄ pɛ̍, dɛ̍nɛ̍ kɛ̍ndɛ̄. Tē ō ku᷄m yɛ̍ le̍, a̍ di̍mi̍ I̍ ke᷅ŋ.’ ”

Chi̍i̍sū si̍ŋgi̍ chūā pīlɛ̍ o̍ pāa̍le̍ pɛ̍ŋgīāā lē Chu̍ūwa̍ chōo̍

10O̍ pāa̍le̍ pi᷅lɛ̍ pɛ̄ŋgīāā lē Chu̍ūwa̍ chōo̍, Chi̍i̍sū wa̍ wāŋnda̍ pɛ̄ɛ̄kōo̍ o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ. 11Chūā pīlɛ̍ wa̍ lo̍ŋ, le̍ wɔ̄sīla̍ŋ tɔ̍ a̍ lā ŋɔ̄ma̍a̍ ō wa̍ a̍ nāa̍. Ō wa̍ ō tūnda᷄ŋ. Ndu̍ o̍o̍ nɔ̍lā si̍si̍la̍ŋ sa̍kpō le̍. Nyi̍nā wɔ̄ɔ̍ŋ wa̍ ndu̍ kɔ̄ɔ̄lī wo̍, ndu̍ ndu̍ o̍o̍ ke̍ ndu̍ nāā kōŋ ni̍. 12Mɛ̄ɛ̍ Chi̍i̍sū che᷅ ndu̍, mbo̍ dīmūl ndu̍ āā, “Chūa̍a̍, ā sēŋgū a̍ nāa̍ cho̍ nu̍m ndo̍.” 13Mbo̍ hāndū ndu̍ bāa̍ chōo̍. O̍ lē pīlɛ̍ ni᷄ŋ kpe̍, mi̍ kɔ̄ɔ̍ wa̍ ndu̍ ō tūnda᷄ŋ ndo̍ sāndū nyɛ̄ kɛ̄ndɛ̄ sa̍kpō. Ndu̍yɛ̍, mbo̍ sāŋgālā Mɛ̄lɛ̄ka̍ le̍ sīōŋgɔ̄ɔ̄ o̍ se̍ŋgū wo̍.

14Kɛ̍, mi̍ wāna̍ wa̍ chīɛ̄īyo̍ ho̍ō bōlle̍ŋ ndo̍ dūāūnu᷄ŋ tu̍mbe̍ le̍ mɛ̄ɛ̍ Chi̍i̍sū si̍ŋgi̍ chūa̍a̍ ho̍ō o̍ pāa̍le̍ pɛ̍ŋgīāālē Chu̍ūwa̍ chōo̍ yɛ̍. Mbo̍ dīmūl wāŋnda̍ āā, “Pālɛ̍i̍ ī ŋɔ᷄mpu᷅m i̍ cho̍ le̍ mī lā tōsa̍ wa̍llo̍ ni̍. O̍ pālɛ̍i̍ ke̍ŋ chōo̍ nya̍ nɔ̄ ni̍ mī lā hīŋ le̍ nya̍ sīŋgīo̍o̍, ō cho̍ o̍ pāa̍le̍ nāāle̍ pɛ̍ŋgīāāle̍ŋ chōo̍ le̍.”

15Mi̍ Māsānɔ̄ɔ̍ Chi̍i̍sū mu̍lūl ndu̍ āā, “Lā chō wānāā kāŋgālāā bɛ̄ndū. Lā tīmbī na̍ūwāā nyāa̍ a̍ sōfɛ̍li̍a̍a̍ nyāa̍ o̍ hēe̍la̍ŋ mī lā kūɛ̄ a̍ nda̍ mā kɔ̍ ko᷅l o̍ pāa̍le̍ pɛ̍ŋgīāālē Chu̍ūwa̍ chōo̍. 16Chu̍a̍ ve̍lu᷄ŋ ho̍ō o̍ pūlāle̍ E̍bīlāha᷅mnde̍ŋ chōo̍ wo̍, ō chō ni᷅ŋ o̍ yūe̍i̍ Sēta̍nā māsa̍ nyi̍nāā wɔ̄ɔ̍ŋnda̍ o̍ bā le̍ wɔ̄sīla̍ŋ tɔ̍ a̍ lā ŋɔ̄ma̍a̍. Bāā ndu̍ ya̍ I̍ kɛ̍ɛ̄ ti̍mbī o̍ pāa̍le̍ nāāle̍ pɛ̍ŋgīāāle̍ŋ chōo̍ ni̍?” 17Mɛ̍ɛ̄ o̍ di̍mi̍ dīōmnda̍ŋ nda᷅ŋ, mi̍ si̍ɔ̍mbu̍la̍ŋ lā bīī ya̍a̍mɔ̍ɔ̍wa̍a̍ ndūa̍a̍ kpo̍u̍. Kɛ̍ ndu̍yɛ̍, mi̍ wānāā fāŋgā fa̍ŋgā nda̍ wā kɔ̄l kɛ̄ndɔ̄ɔ̍ le̍ wa̍lta̍ kɔ̄ndɔ̄fi̍ltā o̍ to̍sa̍ la̍ŋ.

Nyɛ̄ māsāle̍ Mɛ̄lɛ̄ka̍le̍ŋ lē vēla᷅ŋ ndo̍

(Māa̍ti̍u̍ 13:31-32; Ma̍kī 4:30-32)

18O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “A̍ yɛ̄ɛ̍nɛ̍ māsāle̍ Mɛ̄lɛ̄ka̍le̍ŋ lē vēla᷅ŋ yɛ̍? Ndu̍yɛ̍, a̍ yɛ̄ɛ̍nɛ̍ ya̍ I̍ tu̍ū yɛ̍ le̍ŋ?” 19Mbo̍ dīmī āā, “Māsāle̍ Mɛ̄lɛ̄ka̍le̍ŋ lē chō māchūāā māā nyɛ̍ yɔ̍nu̍ŋ o̍ tālo̍o̍ ho̍ō ni᷄ŋ ndo̍. Tē wāŋndo̍ chu̍a̍ pɛ̍ ku̍lu̍ tɔ̄lɔ̄ɔ̄ pūm mā vēēlū ndu̍ āā, mɔ̍si̍tāā, ō tɔ̄l ndu̍ o̍ kpe̍le̍ ndɔ̄ɔ̍ ni᷄ŋ. O̍ ko̍ŋ kɔ̍ɔ̍lī, ō hīndū ō sīmnu᷄ŋ yɔ᷅m. Ndu̍yɛ̍, yōūwa̍ tāŋgu̍l wāa̍ŋnde̍ o̍ lɛ̄ūwūŋ ndɔ᷄ŋ.”

Chi̍i̍sū tu̍u̍ māsāle̍ Mɛ̄lɛ̄ka̍le̍ŋ a̍ yi̍i̍sīi̍ lu̍a̍māā bēe̍dīi̍yo̍

(Māa̍ti̍u̍ 13:33)

20Mi̍ Chi̍i̍sū di̍mī vɛ̄lɛ̄ āā, “A̍ yɛ̄ɛ̍nɛ̍ ya̍ I̍ tu̍u̍ yɛ̍ māsāle̍ Mɛ̄lɛ̄ka̍le̍ŋ? 21Māsāle̍ Mɛ̄lɛ̄ka̍le̍ŋ lē chō māchūāā māā nyɛ̍ yɔ̍nu̍ŋ o̍ tālo̍o̍ ho̍ō ni᷄ŋ ndo̍. Tē wāŋndo̍ chu̍a̍ pɛ̍ ko᷅lo̍ nda̍ lūām bēe̍dīi̍yo̍ wo̍ mbō dɔ̄ū yi̍i̍sīi̍yo̍ lēni᷄ŋ nyɛ̍ pɔ̍mbɔ̄ mbō bīŋu̍la᷅ŋ a̍ mɛ̄ŋnda̍ŋ pɛ̍, kōlō ko̍ŋ ō wa̍ bɛ̍ɛ̍ ta̍u̍. Tē ō cha᷄l dɔ̍ɔ̍ pɛ̍ kpɛ̍ɛ̍, nyɛ̄ pɔ̄mbɔ̄ kōŋ ō tīu̍ lēni᷄ŋ si̍lɔ̍. O̍ ko̍ŋ, kōlo̍ bēe̍dīi̍ li̍ndāā ko̍ŋ kpe̍de̍ o̍ hi̍ndū pɔ̍fūū.”

Dīō sɔ̍ɔ̍kɛ̍nyɛ̍ɛ̍ wo̍

(Māa̍ti̍u̍ 7:13-14, 21-23)

22Mi̍ Chi̍i̍sū hi̍a̍ū lāchī a̍ kɔ̄la̍ŋ bā Chūlu̍sɛ̄lɛ̄m ndo̍. O̍ kɔ̄lā ndɔ̄la̍ŋ ni᷄ŋ mbo̍ kūā a̍ wāŋnda̍ pɛ̄ɛ̄kōo̍ a̍ Mɛ̄lɛ̄ka̍ o̍kɔ̄ɔ̄ o̍ chi̍e̍e̍ŋ bɛ̍ndo᷄ŋ ni᷄ŋ a̍ sɔ̄ndɔ̄kɔ̍lta̍ŋ. 23Mi̍ wānā pi᷅lɛ̍ nyūnā ndu̍ āā, “Fāllo̍, bāā wāŋnda̍ nyɛ̄ pɔ̄mbɔ̄ ko̍ni̍ a̍ pi̍āŋ ni̍ŋ ni̍?”

Mbo̍ dīmūl wāŋnda̍ āā, 24“Lā fāfa̍la̍ kpe̍e̍kpe̍i̍ le̍ lūɛ̄īyɔ̄ɔ̍ o̍ māsāle̍ Mɛ̄lɛ̄ka̍le̍ŋ ni᷄ŋ o̍ dīō sɔ̍ɔ̍kɛ̍nyɛ̍ɛ̍ wo̍. Kāni̍, mī di̍mu̍l nya̍, wānāā fāŋgā ā kīndī ni̍ŋ le̍ lūɛ̄īyɔ̄ɔ̍, kɛ̍ mā būmba̍. 25Tē wāna̍ chīɛ̄īyo̍ chɛ᷄ŋ ni᷅ŋ pɛ̍ mbō kīnda̍ dīo̍o̍, lā chō īsīsi̍ o̍ dīō mī lā wa̍ dīo̍o̍ lɔ̄ɔ̍ mī lā dīmī āā, ‘Fāllo̍, ku̍mbu̍l na̍a̍ dīo̍o̍.’ Kɛ̍, mbō mūli̍ āā, ‘I̍ si̍nā nya̍ le̍.’ 26O̍ ko̍ŋ, mī lā dīmi̍ āā, ‘Na̍a̍ nya̍ā ŋ̄ dē ni᷅ŋ nyɛ̄ dīa̍a̍ mi̍ ŋ̄ kōl lātūlu̍. Ndu̍yɛ̍, a̍ pɛ̍ɛ̍ku̍ ni᷅ŋ wāŋnda̍ o̍ bɛ̍ɛ̄la̍ nāāla̍ŋ a̍ o̍ chi̍e̍e̍ŋ na᷄ŋ ni᷄ŋ.’ 27O̍ ko̍ŋ, mī wāna̍ chīɛ̄īyo̍ mūli̍ āā, ‘I̍ si̍nā nya̍ le̍. Nya̍ wānāā yɔ̄ŋ wɔ̄ɔ̍ŋnda̍ kpe̍de̍ lā fāŋa̍ŋ ya̍ kɔ̄ɔ̄lī.’ 28Lā chā ni̍ŋ E̍bīlāha᷅m, a̍ Āa̍se̍, a̍ Che̍kɔ̍pū, a̍ wānāa̍ su̍a̍ā le̍ Mɛ̄lɛ̄ka̍ o̍ māsāle̍ Mɛ̄lɛ̄ka̍le̍ŋ ni᷄ŋ nda̍, kɛ̍ nya̍ nya̍, mā kūūna̍ nya̍. Lā kōŋūl ni̍ŋ mī lā sɔ̄m chīŋndo̍ŋ a̍ nyɛ̄ nɛ̄īyāa̍. 29Ndu̍yɛ̍, wāŋnda̍ chāŋ ni̍ŋ ba᷅ lūāŋ, ndo̍ a̍ bā tōū wo̍, a̍ bā o̍ bā fe̍e̍ o̍ chi̍e̍ēŋndo̍ chōo̍, mā cha᷄l o̍ fo̍ndāŋndā ndāla̍ŋ o̍ māsāle̍ Mɛ̄lɛ̄ka̍le̍ŋ ni᷄ŋ nyɛ̍ dīāā kɔ̄l kɛ̄ndɔ̄ɔ̍ dīo̍o̍. 30O̍ ko̍ŋ, wānāa̍ cho̍ wānāā pɔ̄mbūa̍a̍ pɛ̄ŋgo̍o̍ ho̍ō wa̍, ā sīmnūŋ ni̍ŋ wa̍nāā bɛ̄ndū, mī wānāa̍ cho̍ wānāā bɛ̄ndūa̍a̍ pɛ̄ŋgo̍o̍ ho̍ō wa̍, ā sīmnu᷄ŋ wa̍nāā pɔ̄mbɔ̄.”

Mɔ̍nɛ̍i̍ bīī Chi̍i̍sū le̍ Chūlu̍sɛ̄lɛ̄m

(Māa̍ti̍u̍ 23:37-39)

31A̍ bōōndi̍i̍ ke̍ŋ, mi̍ wānāā pūm o̍ ku̍ndā Fālīsi̍īya̍ chōo̍ a̍ hu̍ŋ di̍mūl Chi̍i̍sū āā, “Māsāa̍ Hɛ̍lɔ̄ɔ̄ kɛ̍ɛ̍si̍a̍a̍ le̍ nu̍m dīyɔ̄ɔ̍. Le̍la̍ŋ, fa̍ŋa̍ŋ na̍nu᷄ŋ mā kūɛ̄nu᷄ŋ.”

32Mi̍ Chi̍i̍sū lo᷅ o̍ ko̍ŋ mbo̍ di̍mūl nda̍ āā, “Lā kɔ̍ di̍mūl Hɛ̍lɔ̄ɔ̄ lēyālā kōŋ āā, ‘I̍ cho̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī, ndu̍yɛ̍ mī si̍ŋgī wānāā lānāāwa̍ o̍ pālɛ̍i̍ bi̍ŋgī bɛ̄ŋgu̍. Tē pālɛ̍i̍ ke̍ŋ ī hīōū pɛ̍, I̍ si̍o̍u̍ wa̍li̍ nūu̍.’ 33Kɛ̍, ō wa̍ bɛ̍ɛ̍ le̍nde̍ ni̍, I̍ nɔ̍ le̍ hīōūwɔ̄ɔ̍ lāchī a̍ kɔ̄lā nīla̍ŋ o̍ pālɛ̍i̍ bi̍ŋgī bɛ̄ŋgu̍. Kāni̍ fo̍ndōle̍, le̍ lɔ̍ɔ̍ o̍ lɔ̍ɔ̍ mɛ̄ɛ̍ Chūlu̍sɛ̄lɛ̄m mī wānāa̍ su̍a̍ā le̍ Mɛ̄lɛ̄ka̍ wa̍ ā sɔ̄la̍ pīɔ̍mndo̍.”

34Mi̍ Chi̍i̍sū di̍mī āā, “A̍ a̍a̍ nya̍ wāŋnda̍ Chūlu̍sɛ̄lɛ̄m, te̍le̍ŋ o̍ te̍le̍ŋ tē Mɛ̄lɛ̄ka̍ vēm wānāa̍ su̍a̍ā le̍ ndu̍ wa̍ nāa̍ nya̍ chūā pɛ̍, lā dīu̍ nda̍. Ndu̍yɛ̍, mī lā vīi̍ wānāā o̍ vi̍ām nāa̍ nya̍ chūā a̍ yōōŋgū ndɔ̄ɔ̍ wa̍ a̍ pōūta̍ŋ mī lā dīu̍ nda̍. Yēēmɛ̍i̍ wa̍ ya̍ te̍le̍ŋnda̍ ka̍ ka̍ le̍ mī ya̍ i̍i̍ chu̍u̍ŋgi̍a̍a̍ nya̍ kpo̍u̍ ya̍ o̍ ībūŋ mɛ̄ɛ̍ sɔ̄ɔ̍ ko̍msa̍a̍ chūūŋgīāā chu̍a̍u̍wāā ndūa̍a̍ o̍ kūmba᷅ŋndā ndɔ̄la̍ŋ bɛ̄ŋgu̍ yɛ̍. Kɛ̍, lā chɛ᷄l te̍. 35Le̍la̍ŋ, lā kɛ̄si̍ŋ o̍ kɔ̄l māā Mɛ̄lɛ̄ka̍ chō chi̍e̍e̍ nyāa̍ bāla̍ŋ fāŋa̍ chōo̍. Ndu̍yɛ̍, mī di̍mu̍l nya̍, chɔ̍ŋ a̍ bōōnde̍i̍ he̍ī lā chi᷅ lɛ̍ ni̍ŋ ya̍ le̍, ha̍a̍a̍ mɛ̄ɛ̍ mbō lo̍ o̍ ko̍ŋ mī te̍le̍ŋ fu̍u̍lu̍u̍. Te̍le̍ŋ ko̍ŋ nya̍ dīmī ni̍ŋ ni̍ āā, ‘Nu᷄m hi᷅ŋ sɔ̍ŋgɔ̍ Māsānɔ̄ɔ̍ Mɛ̄lɛ̄ka̍a̍ wo̍, Mɛ̄lɛ̄ka̍ dɔ̄ū nu̍m sa̍lā bɔ̄ɔ̍.’ ”

Currently Selected:

Lu̍kū 13: YM

Highlight

Copy