Lu̍kū 11

Chi̍i̍sū pɛ̍ɛ̍ku̍ a̍ Mɛ̄lɛ̄ka̍ pīɛ̄īyo̍ o̍kɔ̄ɔ̄

(Māa̍ti̍u̍ 6:9-13; 7:7-11)

1Te̍le̍ŋ pi᷅lɛ̍, Chi̍i̍sū wa̍ Mɛ̄lɛ̄ka̍ pīɛ̄īyo̍ o̍ fo̍ndāŋ pūm. Mɛ̄ɛ̍ o̍ chi̍i̍, mi̍ bu̍ɛ̍ī ndɔ̄ pi᷅lɛ̍ dīmūl ndu̍ āā, “Māsānɔ̄ɔ̍, pɛ̍ɛ̍ku̍ na̍a̍ a̍ Mɛ̄lɛ̄ka̍ pīɛ̄īyo̍ mɛ̄ɛ̍ Chɔ᷄ŋ Wānā Yi̍ŋāa̍ ō pɛ̄ɛ̄ku̍ bu̍ɛ̍i̍yāā ndūa̍a̍ yɛ̍.”

2O̍ ko̍ŋ, mi̍ Chi̍i̍sū di̍mūl bu̍ɛ̍i̍yāā ndūa̍a̍ kpo̍u̍ āā, “Tē lā wa̍ Mɛ̄lɛ̄ka̍ pīɛ̄īyo̍ pɛ̍, lā dīmi̍ nu̍a̍ā māā,

kɛ̄kɛ̍,

ŋ̄ chō nu̍m pīɛ̄īyo̍ māā wāŋnda̍ ā ke̍ nu̍m bɛ̄ɛ̄le̍ŋ māā nūm kpe̍e̍kpe̍i̍ cho̍ Mɛ̄lɛ̄ka̍ ni̍.

Wa̍ ni̍ko̍ ma̍sāa̍ ŋ̄wāŋndā chi̍e̍e̍ cho̍o̍ kpo̍u̍.

3To̍sa̍ a̍ sa̍bū mī ŋ̄ sɔ̄la̍ nyɛ̄ dīāā na̍a̍ ŋ̄ dīā lēpāa̍ o̍ lēpāa̍ wo̍.

4Ma̍l na̍a̍ le̍ yɔ̄ŋndā wɔ̄ɔ̍ŋndā na̍a̍ ŋ̄ tōsa̍ la̍ŋ.

Kāni̍ fo̍ndōle̍, na̍a̍ bɛ̍ɛ̍, le̍nde̍ na̍a̍ ŋ̄ māl wa̍nāa̍ to̍sāl na̍a̍ ŋ̄ wɔ̄ɔ̍ŋndo̍ŋ nda̍ ni̍.

To̍sa̍ a̍ sa̍bū tɔ̄ɔ̄nda᷄ŋ ka̍lā ko̍māl na̍a̍ mī ŋ̄ tōsa̍ yɔ̄ŋ wɔ̄ɔ̍ŋndo̍ le̍.”

5Mi̍ Chi̍i̍sū di̍mūl nda̍ āā, “Tē ō wa̍ yɛ̄ mī wāŋndo̍ nɔ̄ ndi̍a̍a̍mɔ̍ɔ̍. Ndu̍yɛ̍, mbō kɔ̍ ku̍ndūl ndi̍a̍a̍mɔ̍ɔ̍ ndɔ̄ ko̍ŋ dīo̍o̍ a̍ dītɛ̍ɛ̄ŋndo̍ mbō di̍mu̍l ndu̍ āā, ‘Yāndi̍i̍ chāa̍ŋ nūu̍, ke̍ ya̍ nyɛ̄ dīa̍a̍ dɔ̍ndɔ̍ɔ̍ fɔ̍. 6Chāa̍ŋ nī pi᷅lɛ̍ lāŋga̍ ko̍māl la̍ su̍ŋ su̍ŋ. Ō chō la̍ŋ īnɛ̍. Kɛ̍, nyɛ̄ o̍ nyɛ̄ dīāā bɛ̍ɛ̍ cho̍ ya̍ o̍ bā mī ke̍ ndu̍ mbō dē le̍.’ 7Bāā ndi̍a̍a̍mɔ̍ɔ̍ ndɔ̄ ko̍ŋ ō nɔ̄lā mbō lo̍ chīɛ̄ī ni̍ŋ mbō dīmi̍ āā, ‘Yɛ̍ī ya̍ īkɔ̄ɔ̄ le̍. Ŋ̄ kīnda̍ ni᷅ŋ dīo̍o̍. Ya̍ ni̍ a̍ chūāūwāā nīa̍a̍ ŋ̄ hīni̍ ni᷅ŋ. I̍ nɔ̍lā lɛ̍ mī chɛ̍ŋ mī ke̍ nu̍m nyɛ̄ o̍ nyɛ̄ le̍.’ ” Mi̍ Chi̍i̍sū nyu̍nā nda̍ āā, “Ō nɔ̄lā mbō dīmu̍l ndu̍ le̍nde̍? 8Mī di̍mu̍l nya̍, ō di̍mī le̍nde̍ le̍. Mī chāa̍ŋ ndɔ̄ ko̍ŋ ō yīya̍ŋ bɛ̍ɛ̍ a̍ ndi̍a̍a̍mɔ̍ɔ̍le̍ cho̍ nda̍ tɛ̄ɛ̄ŋ nde̍ŋ, mbō chɛ᷄ŋ mbō ke̍ ndu̍ le̍ ndi̍a̍a̍mɔ̍ɔ̍le̍ te̍, kɛ̍ ō wa̍ bɛ̍ɛ̍ le̍ tɔ̍ɔ̍ wɔ̍ɔ̍ŋ kōŋ su̍e̍e̍, nu̍a̍ā o̍ cha᷅ŋ mbō ke̍ ndu̍ nyɛ̄ o̍ ye̍e̍ma̍ wo̍.

9“Le̍la̍ŋ, mī di̍mu̍l nya̍, lā nyūna̍ Mɛ̍lɛ̄ka̍ dīōm le̍ nyɛ̄ nya̍ hāu̍ bā wo̍. Ō nɔ̄lā mbō ke̍ nya̍ ndu̍. Ndu̍yɛ̍, lā nūūwa̍, lā chō sɔ̄lā. Lā kūndu̍ di̍o̍o̍, Mɛ̄lɛ̄ka̍ nɔ̄lā mbō kūmbu̍l nya̍. 10Kāni̍ fo̍ndōle̍, wānā o̍ wānā tē a̍ nyu̍na̍ Mɛ̄lɛ̄ka̍ dīōm le̍ nyɛ̄ ŋ̄ hāu̍ bā wo̍ pɛ̍, ō nɔ̄lā mbō ke̍ nu̍m ndu̍. Wānā o̍ wānā a̍ nu̍u̍va̍ pɛ̍, a̍ sɔ̍la̍. Ndu̍yɛ̍, wāna̍ ku̍ndū dīo̍o̍ pɛ̍, Mɛ̄lɛ̄ka̍ kūmbu̍l nu̍m.” 11Mi̍ Chi̍i̍sū hi̍a̍ū lāchī a̍ sūɛ̍i̍ āā, “Nya̍ pūmnda̍ lā vēlū chūāūwa̍. Bāā tē chūā nūmndo̍ pīɛ̍i̍ nu̍m pɛ̍ sūūwo̍, ā nɔ̄lā mā ke̍ ndu̍ kɛ̄ūwo̍? 12Kɛ̄lɛ̄ŋgāā, tē ō pīɛ̍i̍ nu̍m pēltē sɔ̄ɔ̍le̍ŋ pɛ̍, ā nɔ̄lā mā ke̍ ndu̍ ŋge̍e̍ma̍a̍? Pe̍sī bɛ̍ɛ̍ lā to̍sā le̍nde̍ le̍. 13Nāa̍ nya̍ wānāā wɔ̄ɔ̍ŋnda̍ sīna̍ wɔ̄ le̍ chūāūwāā nyāa̍ nyɛ̄m kɛ̄ndɔ᷄ŋ kīo̍o̍, lā ke᷅ nda̍ ŋ̄ wɔ̄ɔ̍ŋndo̍ŋ te̍. Fi̍nyā nyā o̍ cho̍ chōo̍ cho̍o̍ wo̍ yɛ̄? Bāā wānāa̍ nyu̍nā ndu̍ le̍ Nyi̍na̍ Mɛ̄lɛ̄ka̍a̍ wa̍ ō to̍sā mī Nyi̍na̍ Mɛ̄lɛ̄ka̍a̍ tōl nda̍ kɔ̄ɔ̄lī le̍? Ō nɔ̄lā mbō tōsa̍ mī Nyi̍na̍ Mɛ̄lɛ̄ka̍a̍ tōl nda̍ kɔ̄ɔ̄lī.”

Wāŋnda̍ dīmi̍ māā Bɛ̄ɛ̍si̍bɔ̄ɔ̄ ma̍lā Chi̍i̍su̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ ni̍

(Māa̍ti̍u̍ 12:22-30; Ma̍kī 3:20-27)

14Chi̍i̍sū wa̍ po̍ pi᷅lɛ̍ nyi̍nāā tōūwɔ̄ɔ̍ kɔ̄ɔ̄lī. Ndu̍yɛ̍, nyi̍nā ko᷄ŋ ndu̍ o̍o̍ to̍sa̍ ni̍ mi̍ pōo̍ sīmnu᷄ŋ bo̍bo̍nɔ̍. Mɛ̄ɛ̍ nyi̍na̍ wɔ̄ɔ̍ŋ kōŋ fāŋa̍ŋ po̍o̍ kɔ̄ɔ̄lī, mbo̍ sūāā. Mi̍ kɔ̄ndɔ̄fi̍llo̍ bīī wāŋnda̍. 15Kɛ̍, mi̍ wāŋnda̍ ā pūm ā dīmī āā, “Bɛ̄ɛ̍si̍bɔ̄ɔ̄ o̍ cho̍ māsa̍ nyi̍nāā wɔ̄ɔ̍ŋnda̍ wo̍ ndu̍ ke᷅ Chi̍i̍su̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī ni̍.”

16Kɛ̍, wāŋnda̍ ā ti᷄ŋ nda̍ a̍a̍ hɛ̍na̍ŋ le̍ Chi̍i̍sū tɔ̄ɔ̄nda᷄ŋndo̍. O̍ ko̍ŋ, ma̍ dīmūl ndu̍ le̍ mbō tōsa̍ kɔ̄ndɔ̄fi̍llo̍ le̍ chɔ̄mndo̍ māā kpāāya̍ Mɛ̄lɛ̄ka̍a̍ kpe̍e̍kpe̍i̍ o̍ nɔ̍ ni̍. 17Kɛ̍, mi̍ Chi̍i̍sū si̍nā nyɛ̍ wa̍ nda̍ o̍ lākɔ̄l lo̍. Mbo̍ dīmūl nda̍ āā, “Lēlɛ̄ŋ o̍ lēlɛ̄ŋ tē lē pīɔ̄ūvi̍āŋ ku̍ndāla̍ŋ pɛ̍, mā sāa̍ sɔ̍ŋgɔ̄ɔ̍ vēllāā vēllē pɛ̍, lɛ̄ŋndē lēŋ tāmbe̍i̍ le̍ ta̍mbū ni̍. Ndu̍yɛ̍, tē yu̍ŋgo̍o̍ pīɔ̄ūvi̍āŋ pɛ̍ mā sāa̍ sɔ̍ŋgɔ̄ɔ̍ vēllāa̍ vēllē pɛ̍, yu̍ŋgu̍ ko̍ŋ ō tāmbu̍. 18Le̍la̍ŋ, tē Sēta̍nā, māsa̍ nyi̍nāā wɔ̄ɔ̍ŋnda̍, sɔ̄ŋga̍ a̍ ndu̍ pi̍la̍ pɛ̍, vɛ̄ɛ̍nɛ̍ māsāle̍ ndɔ̄le̍ŋ lē sīm yɛ̍? Ō cho̍ fo̍ndōle̍ ya̍ di̍mi̍ he̍ī le̍. Nya̍ di̍mi̍ ni̍ māā Bɛ̄ɛ̍si̍bɔ̄ɔ̄ ke᷅ ya̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ ni̍. 19Mɛ̄ɛ̍ nya̍ dīmi̍ māā māsa̍ nyi̍nāā wɔ̄ɔ̍ŋnda̍ Bɛ̄ɛ̍si̍bɔ̄ɔ̄ māā ndu̍ ke᷅ ya̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī ni̍ yɛ̍, mɛ̄ɛ̍ wānāā nyāa̍ nda̍, ō nɛ̄ɛ̍nɛ̍ ke᷅ yɛ̍ nda̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī?” Mi̍ Chi̍i̍sū di̍mūl nda̍ āā, “Le̍ nyɛ̄ nya̍ dīmi̍ ko̍ŋ ndo̍, wānāā nyāā ka̍ŋ kpe̍e̍kpe̍i̍ nda̍ cho̍ nya̍ hūnɔ̄ɔ̄ se̍īle̍ŋ tɛ̄ndāl ni̍. 20Kɛ̍, tē ō wa̍ yɛ̄ pɛ̍ Mɛ̍lɛ̄ka̍ ke̍ ya̍ kpāāyāa̍ le̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī ni̍, mɛ̄ɛ̍ ke̍ŋ chɔ̍m māā Mɛ̄lɛ̄ka̍ kāndu̍ wāa̍ Māsāa̍ nya̍ chōo̍.”

21Mi̍ Chi̍i̍sū hi̍a̍ū lāchī a̍ sūɛ̍i̍ nāa̍ fāŋgāa̍ chūā āā, “Tē wāna̍ dīāllūŋ kālāa̍ o̍ nɔ̍ wōlɔ̄ɔ̄lā chɔ̄ūla̍ŋ ndo̍, tē ō wa̍ chīɛ̄ī ndɔ̄ɔ̍ māndāa̍ pɛ̍, nyɛ̄ o̍ nyɛ̄ yɔ̍nūŋ nyɛ᷅m ndɔ᷄ŋ te̍. 22Kɛ̍, tē wāna̍ nɔ̍ dīāllūŋ kāla᷄ŋ mbo̍ hīāū ndu̍ wo̍ ō de᷄l ndu̍ chōo̍ pɛ̍, mbō sōli̍ ndu̍ a̍ sɔ̍ŋgɔ̄ɔ̍ pɛ̍, ō pōōndi̍a̍a̍ wōlɔ̄ɔ̄lā chɔ̄ūlā ndu̍ o̍o̍ ti̍i̍nda̍ŋ nda̍ŋ. O̍ ko̍ŋ kɔ̍ɔ̍lī, ō chɔ̄ɔ̄vi̍a̍a̍ nyɛ̄m ndu̍ o̍o̍ po̍o̍ndīāā chāāŋnda̍ o̍ lābā wo̍ŋ. Tē ā chɔ̄ɔ̄vi̍a̍a̍ pɛ̍, ā pīɔ̄ūvi̍āŋ mu̍ŋ nda̍ chāāŋāā ndūa̍a̍.”

23Mi̍ Chi̍i̍sū di̍mī āā, “Wānā o̍ wāna̍ ve̍ ku̍mbū nūu̍ le̍, mɛ̄ɛ̍ ndu̍ kpe̍e̍kpe̍i̍ cho̍ sɔ̍ŋgɔ̄ɔ̍ a̍ ya̍ ni̍. Ndu̍yɛ̍, wānā o̍ wāna̍ ma̍la̍ ya̍ sāa̍ nīa̍a̍ chūūŋgīa̍a̍ nāa̍ pi᷅lɛ̍ le̍, mɛ̄ɛ̍ ndu̍ cho̍ nda̍ pūūsi̍a̍a̍ ni̍.”

Nyi̍nā wɔ̄ɔ̍ŋ nda̍ tūāū wa᷅ŋndo̍ kɔ̄ɔ̄lī wo̍ ō mīīŋgū vɛ̍lɛ̄

(Māa̍ti̍u̍ 12:43-45)

24O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “Tē nyi̍nā wɔ̄ɔ̍ŋndo̍ wa̍ wāŋndo̍ kɔ̄ɔ̄lī pɛ̍, wānā ko̍ŋ ō wā ma̍wa̍ā māā chīɛ̄ī ndɔ̄. Le̍ sa̍bōo̍ ho̍ō, tē ā tōū nyi̍nāā wāŋndo̍ kɔ̄ɔ̄lī pɛ̍, nyi̍nā kōŋ ō kɔ̍ ba̍lū nūūvīa̍a̍ o̍ po̍llo̍ ni᷄ŋ le̍ nāa̍ cha̍lāa̍. Tē ō sēēlu̍ŋ na̍a̍ cha̍lāā le̍, ō dīmi̍ āā, ‘I̍ cho̍ mīīŋgū o̍ chīɛ̄ī ni̍ ya̍ wa̍ wo̍.’ 25Tē ō hīŋ yɛ̄ pɛ̍, mbō kōma̍l ndu̍ ō bāsāā ā nyɔ̄ɔ̍ŋ lēni᷄ŋ ŋ̍ bɛ̄ɛ̄ndīāā nyɛ̄ kɛ̄ndɛ̍ī pɛ̍, 26ō kɔ̍ ve̍e̍lū nyi̍nāā wɔ̄ɔ̍ŋāā chēle̍ŋ ā ŋɔ᷄mmɛ̍ū a̍ hi̍o̍ū ndu̍ kɔ̄l vēsɛ̍i̍ ya̍. Ā hīŋ pɛ̍, ā hu᷄ŋ to᷅l wānā ko̍ŋ kɔ̄ɔ̄lī ā wa̍ ndu̍ kɔ̄ɔ̄lī. O̍ ko̍ŋ, mɛ̄ɛ̄lu̍la̍ wānā ko̍ŋ, la̍ŋ la̍ hi̍a̍ū ni᷅ŋ bɛ̍ɛ̍ le̍wɔ̍u̍ a̍ mɛ̄ɛ̍ o̍ wa̍ o̍ tāse̍la̍ ndɔ̄ɔ̍ yɛ̍.”

Wānāā kpe̍e̍kpe̍i̍ sa̍lāa̍ chō kɔ̄ɔ̄lī wa̍

27Mɛ̄ɛ̍ Chi̍i̍sū so̍ō dīōmnda̍ŋ nda᷅ŋ, chūā pīlɛ̍ wa̍ o̍ fāŋgāa̍ tɛ̄ɛ̄ŋ mbo̍ dīmī chōo̍ cho̍o̍ āā, “Wānā la̍nɔ̍ ve̍lū nu̍m mbo̍ wɛ̄sī nu̍m ndo̍, sa̍lāa̍ chō ndu̍ kɔ̄ɔ̄lī bɔ̄ɔ̍.”

28Kɛ̍, mi̍ Chi̍i̍sū mu̍lī āā, “Le̍nde̍ i̍ cho̍ ni̍. Kɛ̍ ndu̍yɛ̍, wānāa̍ ya᷅ŋ ni᷅la̍ŋ o̍ sūɛ̍i̍ Mɛ̄lɛ̄kɛ̍i̍, ndu̍yɛ̍ mā tōsa̍ nyɛ̄ Mɛ̄lɛ̄ka̍ dīmi̍ wo̍ wa̍, nda̍ sa̍lāa̍ hīōū wā kɔ̄ɔ̄lī.”

Le̍ sa̍bū nda̍ bīī ni̍ŋ wa᷅ŋnda̍ te̍le̍ŋndo̍ ho̍ō tɛ̄ɛ̄ wo̍

(Māa̍ti̍u̍ 12:38-42)

29Mɛ̄ɛ̍ fāŋgāa̍ chɔ̄ɔ̄lu̍ hūnɔ̄ɔ̄ ma̍ bɔ̄ŋā Chi̍i̍su̍ kpɔ̍kɔ̍su̍, mbo̍ dīmūl nda̍ āā, “Wāŋnda̍ te̍le̍ŋndo̍ ho̍ō ā chō wānāā wɔ̄ɔ̍ŋāā bɛ̄ndū. Ā tu̍i̍ī Mɛ̍lɛ̄ka̍ dīōm te̍. Ā nyūna̍ ya̍ le̍ ka̍a̍ma̍a̍ tōsāa̍ le̍ wāa̍ māā tāāmāsi̍. Kɛ̍, ka̍a̍ma̍ā chēle̍ŋ bɛ̍ɛ̍ cho̍ to̍sa᷄ŋ le̍ nda̍ le̍, mɛ̄ɛ̍ ka̍a̍ma̍a̍ yɔ̍nu̍ŋ a̍ Cho̍nā wo̍. 30Mɛ̄ɛ̍ nyɛ̍ yɔ̍nu̍ŋ a̍ Cho̍nā wo̍, ō wa̍ māā tāāmāsi̍ le̍ wāŋnda̍ Ni̍ni̍vɛ̄ɛ̄ chi̍e̍e̍ yɛ̍, le̍nde̍ nyɛ̄ cho̍ yɔ̄nɔ᷄ŋ a̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō wā ni̍ŋ tāāmāsi̍o̍o̍ le̍ wāŋnda̍ te̍le̍ŋndo̍ ho̍ō ni̍.

31“Ndu̍yɛ̍, Wānā la̍nɔ̍ ma̍sa̍ chɛ̍ŋ o̍ lɛ̄ŋnde̍ŋ bā tōū wo̍ wo̍, nda̍ wāŋnda̍ te̍le̍ŋndo̍ ho̍ō ā mīīŋgū ni̍ŋ yo̍o̍mū o̍ pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ chōo̍. Ndu̍yɛ̍, mbō si᷄m mbō bīī wāŋnda̍ te̍le̍ŋndo̍ ho̍ō tɛ̄ɛ̄. Kāni̍ fo̍ndōle̍, mi̍ chūa̍a̍ ho̍ō kīālū o̍ lɛ̄ŋnde̍ŋ mɛ̄ɛ̄lu̍la̍ŋ kpa̍li̍ mbo̍ hūŋ le̍ dīōmndā kɔ̄l kālu̍la̍ Sɔ̍lɔ̍mɔ̄ŋ ndu̍ o̍o̍ di̍mī la̍ŋ nīla̍ŋ yāŋɔ̄ɔ̍. Nāa̍ ndu̍ ke̍lū wɔ̄ kpa̍li̍ le̍ Sɔ̍lɔ̍mɔ̄ŋ nīla̍ŋ yāŋɔ̄ɔ̍, wāŋnda̍ te̍le̍ŋndo̍ ho̍ō yɛ̍? Kɛ̍, lā sīna̍ pɛ̍ŋgu̍ māā wānā cho̍ na̍nu᷄ŋ ō hīōū Sɔ̍lɔ̍mɔ̄ŋ. 32Wāŋnda̍ Ni̍ni̍vɛ̄ɛ̄ bɛ̍ɛ̍ ā mīīŋgū ni̍ŋ yo̍o̍mū o̍ pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ chōo̍ nda̍ wāŋnda̍ te̍le̍ŋndo̍ ho̍ō. O̍ ko̍ŋ, mī wāŋnda̍ Ni̍ni̍vɛ̄ɛ̄ a̍ si̍m mā bīī wāŋnda̍ te̍le̍ŋndo̍ ho̍ō tɛ̄ɛ̄. Kāni̍ fo̍ndōle̍, mɛ̄ɛ̍ Cho̍nā di̍mu̍l wāŋnda̍ Ni̍ni̍vɛ̄ɛ̄ sūɛ̍i̍ Mɛ̄lɛ̄kɛ̍i̍, ma̍ māl yɔ̄ŋndā ndāla̍ wɔ̄ɔ̍ŋnda̍ŋ. Nāa̍ wāŋnda̍ Ni̍ni̍vɛ̄ɛ̄ a̍ tu̍e̍ī yɔ̄ nyɛ̄ Cho̍nā di̍mi̍ wo̍ ma̍ māl yɔ̄ŋndā ndāla̍ wɔ̍ɔ̍ŋnda̍ŋ, wāŋnda̍ te̍le̍ŋndo̍ ho̍ō yɛ̍? Kɛ̍, lā sīna̍ pɛ̍ŋgu̍ māā wānā cho̍ na̍nu᷄ŋ ō hīōū Cho̍nā.”

Hɔ̄lta̍ŋ lā chō māchūāā māā la̍mbūi̍

(Māa̍ti̍u̍ 5:15; 6:22-23)

33Mi̍ Chi̍i̍sū hi̍a̍ū lāchī a̍ di̍mīo̍o̍ āā, “Wānā o̍ wānā a̍ mɛ̍ndūl la̍mbūi̍yo̍ mā kɛ̍si̍ nāa̍ wāŋnda̍ chi᷅ ndu̍ le̍ wa̍ le̍. Kɛ̄lɛ̄ŋgāā ni᷅ŋ te̍, mā ku̍u̍mbu̍u̍ hɛ̄ŋgɔ̍ɔ̍ lēchōo̍. Wānā o̍ wānā tē a̍ mɛ̄ndu̍l la̍mbūi̍yo̍ pɛ̍, nāa̍ te̍māa̍ ŋ̄ kɛ̄sī ni̍ le̍ mī wānāa̍ wa᷅ lu̍ɛ̍i̍yɔ̄ɔ̍ chīɛ̄ī ni̍ŋ nda̍ ā chē nyɛ̄ wa̍wo̍ŋ ko̍ŋ. 34Hɔ̄ltā ŋ̄ nɔ̄ la̍ŋ lā chō māchūāā la̍mbūi̍yo̍ le̍ dīāllūŋ nūmndo̍ŋ. Tē hɔ̄ltā nūmnda̍ŋ lā chō nyɛ̄ kɛ̄ndɛ̍ī pɛ̍, ŋ̄ tēŋgāā wa̍ke̍e̍ dīāllūŋ nūmndo̍ŋ ŋ̄ wā le̍ni̍ŋ a̍ nyɛ̄ wa̍wo̍ŋndo̍ ni̍. Kɛ̍, tē hɔ̄ltā nūmnda̍ŋ lā cho̍ la̍ kɛ̍ndɛ̄ le̍, dīāllūŋ nūmndo̍ŋ fa̍ū o̍ nyūmnda̍ŋ ni᷄ŋ kpi᷅ŋgbi̍ ŋ̍ wa᷅ ni̍. 35Le̍la̍ŋ, mɛ̍ɛ̍ndi̍a̍ŋ nu᷅m pi̍la̍ ko̍ nyūmnda̍ŋ ma̍ cho̍ o̍ dīāllūŋ nūmndo̍ŋ ni᷄ŋ ni̍. 36Tē ō wa̍ yɛ̄ pɛ̍, mī nyɛ̄ wa̍wo̍ŋndo̍ wa̍ o̍ dīāllūŋ nūmndo̍ŋ ni᷄ŋ kpe̍de̍, ndu̍yɛ̍ mī fo̍ndāŋ o̍ fo̍ndāŋ ve̍ le̍ni̍ŋ mbō wa̍ a̍ mānyūm te̍, mɛ̄ɛ̍ dīāllūŋ nūmndo̍ŋ chō ŋ̄ tēŋgāā kpe̍e̍kpe̍i̍ mɛ̄ɛ̍ la̍mbūi̍yo̍ kē wa̍nā nyɛ᷅ tēŋgāa̍ yɛ̍.”

Chi̍i̍sū pɛ̍ɛ̍sa̍ Fālīsi̍īya̍ a̍ wānāa̍ pɛ̍ɛ̍kū wa᷅ŋnda̍ sāwāla̍ŋ nda̍

(Māa̍ti̍u̍ 23:1-36; Ma̍kī 12:38-40)

37Mɛ̄ɛ̍ Chi̍i̍sū chi̍i̍ sūɛ̍i̍, mi̍ Fālīsi̍īnɔ̄ pīlɛ̍ vēēlū ndu̍ le̍ kɔ̄la̍ŋ mā kɔ̍ di̍ō nyɛ̄ dīa̍a̍ nda̍ ndu̍. Mi̍ Chi̍i̍sū ku̍ā mbo̍ cha̍l nyɛ̄ dīa̍a̍ dīo̍o̍. 38Kɛ̍, mɛ̄ɛ̍ po̍ Fālīsi̍īnɔ̄ɔ̍ ho̍ō chē mi̍ Chi̍i̍sū wa᷅ nyɛ̄ dīa̍a̍ dīo̍o̍ ō pūlu̍ fɛ̍lɛ̍ŋ ba᷅la̍ŋ mɛ̄ɛ̍ ka̍ā ndāa̍ ō dīmi̍ yɛ̍ le̍, mi̍ kɔ̄ndɔ̄fi̍llo̍ bīī ndu̍. 39Mi̍ Māsānɔ̄ɔ̍ Chi̍i̍sū dīmūl ndu̍ āā, “Nya̍ ku̍ndā Fālīsi̍īya̍ mānda᷄ŋndo̍ pi̍la̍ nya̍ māndāŋ a̍ mɛ̄ɛ̄ nya̍ tōsā sɔ̍ɔ̍ŋ ŋ̄ pūm yɛ̍ ni̍. Tāālāla̍ nya̍ kōl le̍ni̍ŋ nda̍ŋ ni̍, a̍ hɛ̄ŋgɛ̍i̍la̍ nya̍ dīā nyɛ̄ dīa̍a̍ la̍ŋ, mɛ̄ɛ̍ mī lā tūe̍i̍ la̍ŋ tūēī pūm o̍ kɔ̄ɔ̍. Kɛ̍ ndu̍yɛ̍, lā vɛ᷅ o̍ ko̍ŋ kɔ̍ɔ̍lī, mī lā māndā vɛ̍lɛ̄ sɔ̍ɔ̍ŋ wɔ̍ɔ̍ŋndo̍ŋ o̍ kɔ̄ltā nyāla̍ŋ ni᷄ŋ, mɛ̄ɛ̍ nīīlū ka̍la̍nyɔ̍ɔ̍ a̍ kɔ̄l vēsɛ̍i̍yo̍ chō nu̍a̍ā yɛ̍? 40Mɛ̄lɛ̄ka̍ o̍ to̍o̍si̍a̍a̍ nyɔ̄ɔ̍ o̍kɔ̄ɔ̍ wo̍, ndu̍ ko̍ni̍ le̍ to̍o̍si̍a̍a̍ lēni᷄ŋ te̍? Lā nɔ̄ dīɔ̄mnde̍ bɔ̄ɔ̍. 41Lā tōsa̍l lɔ̍ fɛ̍lɛ̍ŋ wa̍nāā tāmbɛ̍i̍ya̍ sɔ̄ɔ̍ŋ kɛ̍ndɛ᷄ŋ cho̍ nya̍ o̍ lākɔ̄l lo̍ŋ. He̍ī cho̍ wāa̍ ō dīāndāā o̍ kɔ̄llo̍ ni᷄ŋ ni̍. Tē lā tōsa̍ he̍ī pɛ̍, nyɛ̍ o̍ nyɛ̄ a̍ nya̍ o̍kɔ̄ɔ̄ ō dēndū kpo̍u̍.

42“Nyɛ̄ nɛ̄īyāa̍ chō le̍ nya̍ ku̍ndā Fālīsi̍īya̍. Kāni̍ fo̍ndōle̍, mī lā tōsa̍ mɛ̄ɛ̍ o̍ cho̍ o̍ ka̍ā nyāa̍ ni᷄ŋ yɛ̍. Ā yɔ᷄ŋ bɛ̍ɛ̍ āā nyɛ̄m ta̍a̍ni̍ŋndo̍ mɛ̄ɛ̍ mi̍ŋtī, a̍ lu̍ū, a̍ nyɛ̄m chēle̍ŋ nda̍ dūāū o̍ nyɛ̄ dīa̍a̍ wo̍ŋ ŋ̄ chō nu̍a̍ā yɛ̍, mu̍ŋ bɛ̍ɛ̍ mɛ̄ɛ̍ mī lā sōli̍ ta̍la̍ma̍ Mɛ̄lɛ̄ka̍a̍ lēchōo̍. Kɛ̍ ndu̍yɛ̍, le̍ wāa̍ sa̍kpō a̍ chāāŋāā nyāā wa᷅ŋndā chīe̍e̍ya̍, a̍ Mɛ̄lɛ̄ka̍ kāālāa̍, lā bu̍u̍lāŋ a̍ ko̍ŋ te̍. Wāa̍ nya̍ a̍a̍ wa᷅ fɛ̍lɛ̍ŋ sa̍kpō a̍ chāāŋāā nyāā wa᷅ŋndā chīe̍e̍ya̍ ni̍, ndu̍yɛ̍, mī nya̍ a̍a̍ ka̍a̍la̍ vɛ̄lɛ̄ Mɛ̄lɛ̄ka̍. O̍ ko̍ŋ ni᷅ŋ, mī nya̍ a̍a̍ to̍sa̍ sɔ̄ɔ̍ŋ ŋ̄ pīlɔ᷅ŋ.

43“Nyɛ̄ nɛ̄īyāa̍ chō le̍ nya̍ ku̍ndā Fālīsi̍īya̍. Kāni̍ fo̍ndōle̍, o̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ bɛ̍ɛ̍, o̍ kpe̍ŋgbe̍i̍la̍ tāse̍la̍ŋ nya̍ hɛ̄nāŋ cha̍lle̍ ni̍. Ndu̍yɛ̍, lā hɛ̄nāŋ tē wāŋnda̍ ā wa̍ nya̍ yīlɔ̄ɔ̍ o̍ lɔ̍ɔ̍la̍ŋ ni᷄ŋ fāŋgāa̍ o̍ hɔ̄l pɛ̍, ā sūŋgu᷄ŋ mɔ̍si̍lta̍ŋ o̍ lēbōl. 44Nyɛ̄ nɛ̄īyāa̍ chō le̍ nya̍. Kāni̍ fo̍ndōle̍, lā chō māchūāā māā sɛ̄īla̍ wāŋnda̍ si̍nā pɛ̍ŋgu̍ le̍ la̍ŋ. Ndu̍yɛ̍, mā kēēku̍ lēchōo̍ ā si̍nā pɛ̍ŋgu̍ le̍. Tē ā kēēku̍ yɛ̄ lēchōo̍ pɛ̍, ā sīmnu᷄ŋ wa̍nāā nɔ̄ɔ̄lɛ̍i̍ Mɛ̍lɛ̄ka̍ o̍ hɔ̄l.”

45Mɛ̄ɛ̍ Chi̍i̍sū so̍ō dīōmnda̍ŋ nda᷅ŋ mi̍ wānāa̍ pɛ̍ɛ̍ku̍ wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ō pīlɛ̍ dīmūl Chi̍i̍su̍ āā, “Ti̍chā tē a̍ di̍mi̍ dīōmndā wāā nu̍a̍ā pɛ̍, mɛ̄ɛ̍ na̍a̍ fa̍ū ŋ̄ chō yīōūla̍ŋ ni̍.”

46Kɛ̍, mi̍ Chi̍i̍sū lo᷅ lo̍ŋ mbo̍ dīmūl nda̍ āā, “Nya̍ wānāa̍ pɛ̍ɛ̍kū wāŋnda̍ sāwāla̍ Mɛ̄lɛ̄ka̍la̍ŋ nda̍ bɛ̍ɛ̍, nyɛ̄ nɛ̄īyāa̍ chō le̍ nya̍. Kāni̍ fo̍ndōle̍, wōlɔ̄ɔ̄lā lūsu̍lɛ̍i̍la̍ pa̍lā chu̍ā la̍ŋ, lā nya̍ pi̍la̍ de᷅l bɛ̍ɛ̍ kɔ̍l le̍ chūā le̍ la̍ŋ, la̍ŋ nya̍ sīīlūū chāāŋnda̍ o̍ lēbōl ni̍. Kɛ̍, nya̍ pi̍la̍ lā pi̍lāŋ bɛ̍ɛ̍ la̍ŋ le̍ nda̍ mālā le̍. 47Nyɛ̄ nɛ̄īyāa̍ chō le̍ nya̍. Kāni̍ fo̍ndōle̍, wānāa̍ nda̍ a̍a̍ su̍a̍ā le̍ Mɛ̄lɛ̄ka̍ wa̍ ā fi̍nyāā nyāā ma̍māa̍ dīī ya̍, sɛ̄īla̍ ndāla̍ŋ nya̍ chūā nyɛ̄ kɛ̄ndɛ̍ī a̍ pōūta̍ŋ ni̍. 48Chɔ̄mndo̍ nya̍ chɔ᷄m ko̍ŋ ni̍ māā lā hīni̍ kɔ̄l a̍ nyɛ̄ fi̍nyāā nyāā ma̍māa̍ tōsa̍ wo̍. Kāni̍ fo̍ndōle̍, fi̍nyāā nyāā ma̍māa̍ dīī nda̍, mi̍ nya̍ chɔ̄ū sɛ̄īla̍ wānāā nda̍ dīī ka̍ŋ nda̍ a̍ pōūta̍ŋ. 49Le̍ he̍ī, mi̍ Mɛ̄lɛ̄ka̍ dīmī o̍ kɔ̍l kālu̍ ndɔ̄ɔ̍ ni᷄ŋ āā, ‘I̍ cho̍ nda̍ wānāa̍ su̍a̍ā le̍ ya̍ wa̍ vīm. Ndu̍yɛ̍, mī vi̍m nda̍ ŋ̄wāŋ māā hɔ̄ltē nī. Ā chō ā ti᷄ŋ dīyɔ̄ɔ̄, ndu̍yɛ̍ mā tūsi̍ ā ti᷄ŋ nyɛ̄ pālāa̍ chōo̍.’ 50Kɛ̍, wāŋnda̍ te̍le̍ŋndo̍ ho̍ō nda̍ Mɛ̄lɛ̄ka̍ chō sūɛ̍i̍ pīɔ̍m ndāa̍ hāndɔ̄ɔ̄ o̍ lēbōl ni̍, wānā o̍ wāna̍ su̍a̍ā le̍ Mɛ̄lɛ̄ka̍ nda̍ dīī, chɔ̍ŋ ha̍a̍a̍ a̍ chi̍e̍ēŋndo̍ kāndɔ᷄ŋndo̍. 51Wāna̍ tāse̍ sɔ̍la̍ dīyɔ̄ɔ̍ wo̍ wa̍ E̍bɛ̄ɛ̄l ni̍. Ō mɛ̄ɛ̄lāa̍ wa̍ Sɛ̄kāla̍yā ni̍, ō nda̍ dīī o̍ ma̍āŋ nda̍ sōlī sa̍lāa̍ wo̍ tɛ̄ɛ̄ŋ a̍ chīɛ̄ī Mɛ̄lɛ̄ka̍a̍ wo̍. Mī di̍mu̍l nya̍, wāŋnda̍ te̍le̍ŋndo̍ ho̍ō nda̍ pīɔ̍m wāŋnda̍ ha̍ā chō hēlɔ̄ɔ̄ o̍ lēbōl ni̍.

52“Nyɛ̄ nɛ̄īyāa̍ chō le̍ nya̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍. Kāni̍ fo̍ndōle̍, lā sōli̍ ki̍yīi̍ ku̍mbī di̍o̍o̍ o̍ fo̍ndāŋ wāŋnda̍ sɔ̄lā pɛ̍ɛ̍kū dɛ̍nɛ̍ si̍nāa̍ wo̍. Nya̍ pi̍la̍ lu̍e̍ī yɛ̍ le̍, mi̍ lā kūūnā vɛ̍lɛ̄ chāāŋāa̍ ye̍e̍ma̍ lu̍ɛ̍i̍yɔ̄ɔ̍ wa̍.”

53Mɛ̄ɛ̍ Chi̍i̍sū wa̍ fāŋa᷄ŋndo̍ lo̍ŋ, mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ a̍ ku̍ndā Fālīsi̍īya̍ ā sa̍āŋ ndu̍ pɛ̄ɛ̄sāa̍ ta̍u̍. Ma̍ nyūūnīāā ndu̍ nyūūnīāālā fāŋgā a̍ sɔ̄ɔ̍ŋ ka̍ ka̍ o̍kɔ̄ɔ̄. 54Ma̍ yēŋ ndu̍ yāŋɔ̄ɔ̄la̍ŋ hāli̍ kpe̍ŋ mī ndu̍ o̍o̍ di̍mi̍ dīōm wɔ̄ɔ̍ŋ.

Currently Selected:

Lu̍kū 11: YM

Highlight

Copy