Chɔ᷄ŋ 11

A̍ pīɔ̍m La̍sa̍lɔ̄ɔ̄wo̍ o̍kɔ̄ɔ̄

1-2Po̍ pi᷅lɛ̍ wa̍ ni̍ dīōla̍ŋ āā, La̍sa̍lɔ̄ɔ̄. Bɛ̍ta̍nī chi̍e̍e̍ o̍ wa̍ īchāli̍ ni̍. Pōo̍ ho̍ō ndu̍ o̍o̍ nɔ̍ yēmāa̍ ā ŋīɔ̍ɔ̍ŋ, Mēēle̍ nda̍ Ma̍tā. Nda̍ bɛ̍ɛ̍ Bɛ̍ta̍nī lo̍ŋ nda̍ wa̍ īchāli̍ ni̍. Mēēle̍ kōŋ, ndu̍ ndu̍ o̍o̍ ta̍la̍ Māsānɔ̄ɔ̍ Chi̍i̍su̍ si̍ɛ̍ndīi̍ma̍ ba̍ā kāla᷄ŋ chōo̍, mbo̍ wɔ̄ɔ̄sūū ndu̍ pēlo᷄ŋ a̍ yīīŋnde̍ ndu̍ o̍ lēbōl ni̍. Mi̍ ī yɔ̄nu᷄ŋ mi̍ La̍sa̍lɔ̄ɔ̄ wo̍ ho̍ō de᷅l a̍ nāa̍. 3Dēlɔ̄ɔ̍ a̍ nāa̍, mi̍ yēmāa̍ ndūa̍a̍ vīām wānā a̍ yōōŋgōo̍ nāa̍ Chi̍i̍sū chu̍a̍ āā, “Māsānɔ̄ɔ̍, ndi̍a̍a̍mɔ̍ɔ̍ nu̍m kāālāa̍ chō a̍ nāa̍.”

4Mɛ̄ɛ̍ Chi̍i̍sū tu̍e̍ī yōōŋgōo̍ ho̍ō, mbo̍ dīmī āā, “Dīālīī nɛ̄i̍ he̍ī, ī chō dīālīī nāa̍ i̍ di̍ī ndu̍ le̍. Ī yɔ̄nu̍ŋ le̍ mī wāŋnda̍ chē mɛ̄ɛ̍ Mɛ̄lɛ̄ka̍ chō wāna̍ kɔ̄ndɔ̄fi̍li̍ yɛ̍. Ndu̍yɛ̍, ī yɔ̄nu̍ŋ le̍ mī Po̍ Mɛ̄lɛ̄ka̍a̍ sɔ̄la̍ sāŋgālāa̍ lēni᷄ŋ.”

5Chi̍i̍sū ndu̍ o̍o̍ ka̍a̍la̍ Ma̍tā nda̍ Mēēle̍ pɔ̍mbɔ̄ ndɔ̄ a̍ La̍sa̍lɔ̄ɔ̄ ye̍mā nda̍ ta̍u̍. 6Kɛ̍ ndu̍yɛ̍, mɛ̄ɛ̍ o̍ tu̍e̍ī yōōŋgōo̍ māā La̍sa̍lɔ̄ɔ̄ cho̍ a̍ nāa̍, mbo̍ chɔ̄ɔ̄lū pālɛ̍i̍ chūā ī ŋīi̍ŋ o̍ fo̍ndāŋ o̍ wa̍ ko̍ŋ ndo̍. 7O̍ ko̍ŋ kɔ̍ɔ̍lī, mbo̍ dīmūl bu̍ɛ̍i̍yāā ndūa̍a̍ āā, “Ŋ̄ mīīŋgu᷅ŋ o̍ lɛ̄ŋndē Chūdi̍a̍āle̍ŋ ni᷄ŋ.”

8Mi̍ bu̍ɛ̍i̍yāā ndūa̍a̍ nyūnā ndu̍ āā, “Ti̍chā, nāa̍ Chu̍ūwa̍ ā wa̍ le̍ nu̍m vīī a̍ pōūta̍ŋ pɛ̍i̍ su̍ŋ su̍ŋ nda̍, lo̍ŋ ŋ̄ chō vɛ̄lɛ̄ kɛ̄ɛ̄sīa̍a̍ le̍ kɔ̄la̍ŋ ni̍?”

9Mi̍ Chi̍i̍sū di̍mūl nda̍ āā, “Le̍ pāa̍le̍ŋ kāndɔ᷄ŋndo̍ a̍ dēlɔ̄ɔ̍, ha̍vɛ̄i̍la̍ŋ tɔ̍ a̍ lā tīɔ̍ɔ̍ŋ la̍ cho̍ ni̍. Le̍la̍ŋ, tē wāŋndo̍ bālu̍ pɛ̍ i̍pa̍la̍ de᷅ŋ, ō de᷅l te̍. Kāni̍ fo̍ndōle̍, ō chō nyɛ̄ wa̍wo̍ŋ cho̍ le̍ chi̍e̍ēŋndo̍ ho̍ō wo̍ chɔ̄ɔ̍. 10Kɛ̍ tē wāŋndo̍ bālu̍ pɛ̍ a̍ nyūmnda̍ŋ, dēlɔ̄ɔ̍ o̍ de᷅l ni̍. Kāni̍ fo̍ndōle̍, nyɛ̄ wa̍wo̍ŋ cho̍ mbō chē le̍.” 11Mɛ̄ɛ̍ Chi̍i̍sū so̍ō dīōmnda̍ŋ nda᷅ŋ, mbo̍ dīmī vɛ̄lɛ̄ āā, “Chāa̍ŋ nāa̍ La̍sa̍lɔ̄ɔ̄ cho̍ o̍ mālɔ̄. Kɛ̍, I̍ cho̍ lākɔ̄ mī I̍ kɔ̍ ti̍ndī ndu̍.”

12Mi̍ bu̍ɛ̍i̍yāā ndūa̍a̍ dīmī āā, “Māsānɔ̄ɔ̍, tē ō wa̍ o̍ mālɔ̄ pɛ̍ o̍ cho̍ ni̍, mɛ̄ɛ̍ ō chō sīōŋgɔ̄ɔ̄.”

13Kɛ̍, nyɛ̍ Chi̍i̍sū wa̍ dīmīo̍o̍ wo̍ cho̍ ni̍, māā La̍sa̍lɔ̄ɔ̄ vi᷅. Kɛ̍, bu̍ɛ̍īya̍ ā wa̍ ko̍ kɔ̍l māā lɔ̄mā yɔ̄ŋa᷄ŋ ma᷅ŋ o̍ wa̍ dīmīo̍o̍ ni̍. 14O̍ ko̍ŋ, mi̍ Chi̍i̍sū di̍mūl nda̍ kpe̍nde̍ke̍le̍ āā, “La̍sa̍lɔ̄ɔ̄ vi᷅. 15Kɛ̍, le̍ sa̍bū nyāa̍ I̍ na̍ŋ bɛ̍ɛ̍ kɔ̍l māā I̍ ve̍ lo̍ŋ te̍. Kāni̍ fo̍ndōle̍, he̍ī chō tōsā mī lā dɔ̄ū tīīnda᷄ŋ nyāa̍ o̍ ya̍ ni̍ŋ. Lā chɔ᷄ŋ ŋ̄ kɔ̄ŋnu᷅ŋ nāa̍ ndu̍ chu̍a̍.”

16O̍ ko̍ŋ, mi̍ Tɔ̄mɔ̍si̍ ō nda̍ vēēlū āā, Pɛ̄ndūnɔ̍ɔ̍ wo̍ dīmūl chāāŋāā ndūāā bu̍ɛ̍īya̍ ā pīli̍a̍a̍ āā, “Lā ŋ̄ kɔ̄ŋnu᷅ŋ na̍a̍ Ti̍chɛ̄i̍nɔ̍ nāa̍ wa̍ā, mī ŋ̄ kɔ̍ wu̍nūŋ lātūlu̍.”

Chi̍i̍su̍ cho̍ wāna̍ mi̍ŋgī wa᷅ŋnda̍ yōōmū wo̍ ni̍

17A̍ bōōndi̍i̍ Chi̍i̍sū fu̍u̍lu̍u̍ Bɛ̍ta̍nī ve̍, ma̍ dīmūl ndu̍ māā chɔ̍ŋ a̍ pāa̍le̍ nda̍ chɔ̍ La̍sa̍lɔ̄ɔ̄ le̍ŋ mbo̍ fūūlūū a̍ pāa̍le̍ le̍ŋ, ndu̍ o̍o̍ chu̍a̍ ni᷅ŋ pālɛ̍i̍ ī hīɔ̍ɔ̍lu̍. 18Chɔ̍ŋ Chūlu̍sɛ̄lɛ̄m kɔ̍ Bɛ̍ta̍nī, ō ve̍ ti᷅ŋ vīlɛ̄ī le̍. Ndu̍ o̍o̍ su᷅l bɛ̍ɛ̍ mɛ̍ɛ̍līi̍la̍ ti̍ɔ̍ɔ̍ŋ te̍. 19Mi̍ Chu̍ūwa̍ ta̍u̍ a̍ cha̍ŋ lo̍ŋ ma̍ hūŋ nāa̍ Ma̍tā chu̍a̍ nda̍ Mēēle̍, le̍ nda̍ kɔ̄lta̍ŋ dɛ̄ɛ̄nīa̍a̍ ni᷄ŋ le̍ pīɔ̍m yēmā nda̍a̍.

20Mɛ̄ɛ̍ Ma̍tā tu̍e̍ī māā Chi̍i̍sū cho̍ hūnɔ̄ɔ̍, mbo̍ kūā ndu̍ lāchī. Kɛ̍, Mēēle̍ ndu̍ wa̍ chīɛ̄ī ni̍ŋ. 21Mi̍ Ma̍tā di̍mūl Chi̍i̍sū āā, “Māsānɔ̄ɔ̍, tē nūm o̍o̍ wa̍ na̍nu᷄ŋ pɛ̍, yēma̍ nūu̍ ō ve̍ wu̍ le̍. 22Kɛ̍, pɛ̄ŋgo̍o̍ ho̍ō bɛ̍ɛ̍, I̍ si̍nā māā te̍ a̍ pi̍ɛ̍i̍ Mɛ̍lɛ̄ka̍ pɛ̍, ō nɔ̄lā mbō tōsa̍ nyɛ̄ ŋ̄ nyūna̍ ndu̍ dīōm ndo̍.”

23Mi̍ Chi̍i̍sū di̍mūl ndu̍ āā, “Yēmā nu̍m chō mīīŋgū yōōmū.”

24Mi̍ Ma̍tā di̍mūl ndu̍ āā, “I̍ si̍nā māā ō chō mīīŋgū yōōmū o̍ pāa̍le̍ mɛ̍ɛ̍lāāle̍ŋ chōo̍, pāa̍le̍ Mɛ̄lɛ̄ka̍ mīŋgī ni̍ŋ wa᷅ŋnda̍ yōōmū le̍ŋ.”

25Mi̍ Chi̍i̍sū di̍mūl ndu̍ āā, “Ya̍ cho̍ wāna̍ mi̍ŋgī wa᷅ŋnda̍ yōōmū wo̍ ni̍. Ndu̍yɛ̍, ya̍ to̍sā ni̍ mī wāŋnda̍ ā wa̍ yōōmū kpe̍e̍kpe̍i̍. Wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ ya̍ ni̍ŋ pɛ̍, ā yɔ᷄ŋ bɛ̍ɛ̍ mbō vī ō chō wā yōōmū. 26Ndu̍yɛ̍, wānā o̍ wāna̍ wa̍ yōōmū kpe̍e̍kpe̍i̍ pɛ̍, ndu̍yɛ̍, mbō dɔ̄ū tīīnda᷄ŋ ndɔ̄ɔ̍ o̍ ya̍ ni̍ŋ pɛ̍, ō vi᷅ le̍. A̍ la̍a̍la̍ŋ te̍?”

27Mi̍ Ma̍tā di̍mī āā, “Māsānɔ̄ɔ̍, I̍ la̍a̍la̍ŋ māā nu᷄m cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍. Nu᷄m cho̍ Po̍ Mɛ̄lɛ̄ka̍a̍ ni̍ ō Mɛ̄lɛ̄ka̍ dīmi̍ māā ō chō hūnɔ̄ɔ̄ o̍ chi̍e̍ēŋndo̍ ni᷄ŋ ndo̍.”

Chi̍i̍sū cha̍ŋ le̍ pīɔ̍m La̍sa̍lɔ̄ɔ̄wo̍

28Mɛ̄ɛ̍ Ma̍tā chi̍i̍ dīōmnda̍ŋ nda᷅ŋ dīmī, mbo̍ mīīŋgū. Mbo̍ kɔ̍ di̍mūl Mēēle̍ pɔ̍mbɔ̄ ndɔ̍ nda̍ nda̍ ŋi̍ɔ̍ɔ̍ŋ āā, “Ti̍chɛ̄i̍nɔ̍ nāa̍ hīŋ. Ō chō nu̍m vēēlū.” 29Mɛ̄ɛ̍ Mēēle̍ tu̍e̍ī nyɛ̄ o̍ di̍mi̍ wo̍, mbo̍ cha᷄ŋ nya̍ mbo̍ kūā Chi̍i̍su̍ lāchī. 30Ndu̍yɛ̍, Chi̍i̍sū ndu̍ o̍o̍ he̍l lɔ̍ chi̍e̍e̍ le̍. Ō wa̍ wɔ̄ o̍ fo̍ndāŋ Ma̍tā ko̍ma̍l ndu̍ wo̍. 31Mɛ̄ɛ̍ Chu̍ūwa̍ a̍ wa̍ Mēēle̍ īkɛ̄i̍ chi̍ɛ̍ī ni̍ŋ le̍ ndu̍ nyɔ̄ɔ̄lōo̍ wa̍ chē mi̍ Mēēle̍ cha̍ŋ nya̍ mbo̍ fūlā ma̍ tūāl ndu̍ kɔ̄ɔ̄lī. Ā wa̍ ko̍ kɔ̍l māā kɔ̄la̍ŋ o̍ wa̍ o̍ sɛ̄īyo̍ le̍ kɔ̄la̍ŋ cha᷄ŋndo̍ lo̍ŋ ni̍.

32Mɛ̄ɛ̍ Mēēle̍ fu̍u̍lu̍u̍ nāa̍ Chi̍i̍sū wa̍ wa̍, mbo̍ chā Chi̍i̍su̍ mbo̍ dēl lɛ̄ŋ ndu̍ o̍ lābɛ̄ŋgu̍ ni̍ŋ. Mbo̍ dīmūl ndu̍ āā, “Māsānɔ̄ɔ̍, tē nūm o̍o̍ wa̍ na̍nu᷄ŋ pɛ̍, yēma̍ nūu̍ ō ve̍ wu̍ le̍.”

33Mɛ̄ɛ̍ Chi̍i̍sū che᷅ Mēēle̍ ni̍ a̍ Chu̍ūwa̍ a̍ to᷅l ndu̍ kɔ̄ɔ̄lī wa̍ nda̍ kpo̍u̍ ā chō cha᷄ŋnda̍ŋ, mi̍ mɔ̍nɛ̍i̍ bīī ndu̍, ndu̍yɛ̍, mbo̍ tāmbū kɔ̄l. 34Mbo̍ nyūnā nda̍ āā, “Kūɛ̍ɛ̍nɛ̍ nya̍ chɔ̍ yɛ̄ ndu̍?”

Ma̍ dīmī āā, “Hu̍ŋ mā hu̍ŋ to̍fā, Māsānɔ̄ɔ̍.”

35Mi̍ mɛ̍mi̍a̍ŋ mā tūāl Chi̍i̍sū kpa̍sū kpāsū. 36O̍ ko̍ŋ, mi̍ Chu̍ūwa̍ dīmu̍la᷅ŋ āā, “Lā tōfa̍ wɔ̍ ka̍a̍lā bɛ̄ndū o̍ ka̍a̍la̍ ndu̍ wo̍.”

37Kɛ̍, mi̍ ā pūm ā wā dīmu̍la᷅ŋndo̍ āā, “Nāa̍ o̍ to̍sa̍ wɔ̄ mi̍ wānāā sūmɛ̍i̍ya̍ chā, ndu̍ o̍o̍ nɔ̍lā mī ndu̍ o̍o̍ to̍sa̍ La̍sa̍lɔ̄ɔ̄ ndu̍ o̍o̍ vi᷅ le̍.”

Chi̍i̍sū mi̍ŋgi̍ La̍sa̍lɔ̄ɔ̄ yōōmū

38Mi̍ mɔ̍nɛ̍i̍ bīī vɛ̄lɛ̄ Chi̍i̍sū. Mbo̍ kūā o̍ sɛ̄īyo̍, ndu̍yɛ̍, sɛ̄i̍ būūlōo̍. Pōūwo̍ wa̍ ō hāndāā o̍ sōndōo̍. 39Mi̍ Chi̍i̍sū di̍mī āā, “Lā fāŋa̍ po̍ūwo̍.”

Mi̍ po̍ vi᷅ wo̍ yēma̍ ndɔ̄ Ma̍tā mbo̍ dīmī āā, “Māsānɔ̄ɔ̍, chɔ̍ŋ a̍ bōōndi̍i̍ o̍ chɔ̍nu̍ŋ nde̍ ō chō ni᷅ŋ pālɛ̍i̍ ī hīɔ̍ɔ̍lu̍. Tē wānā fa̍ŋa̍ pɛ̍ po̍ūwo̍, chūŋndo̍ tīu̍ si̍lɔ̍.”

40Mi̍ Chi̍i̍sū di̍mūl ndu̍ āā, “I̍ di̍mu̍l nu̍m nu̍a̍ā māā tē a̍ la̍a̍la̍ŋ pɛ̍, ā chā ni̍ŋ mɛ̄ɛ̍ Mɛ̄lɛ̄ka̍ chō wāna̍ kɔ̄ndɔ̄fi̍li̍ yɛ̍ le̍?” 41O̍ ko̍ŋ, ma̍ fāŋā pōūwo̍. Mi̍ Chi̍i̍sū to̍fā chōo̍. Mbo̍ dīmī āā, “Kɛ̄kɛ̍, I̍ me̍l nu̍m ba̍li̍ka̍ le̍ mɛ̄ɛ̍ ŋ̄ mūli̍ ya̍ dīōm yɛ̍. 42I̍ si̍nā māā ā mūlī ya̍ dīōm lɔ̍ɔ̍ lɔ̍ɔ̍. Kɛ̍, le̍ wānāa̍ si̍m ha̍ā wa̍, ya̍ cho̍ he̍ī dīmīo̍o̍ ni̍ le̍ mā lāāla̍ŋ māā nu᷄m ve᷅m ya̍ ni̍.” 43Mɛ̄ɛ̍ o̍ di̍mi̍ le̍nde̍, mbo̍ dīmī chōo̍ cho̍o̍ āā, “La̍sa̍lɔ̄ɔ̄, fu̍la̍.” 44Mi̍ po̍ ndu̍ o̍o̍ vi᷅ wo̍ fūlā. Bāla̍ŋ ni̍ a̍ pēlo᷄ŋ, lā wa̍ ndu̍ lā yīū yīūwāā a̍ nyɛ̄lā nda̍ chɔ̍ ndu̍ la̍ŋ. Kōlāa̍ wa̍ ndu̍ ō yīyāā o̍ hɔ̄l. Mi̍ Chi̍i̍sū di̍mūl nda̍ āā, “Lā tīīmbu̍u̍ ndu̍ ō kɔ̄nu̍ŋ.”

Wānāā bɛ̄ndūāā Chu̍ūwa̍ kɛ̄ɛ̄si̍a̍a̍ le̍ Chi̍i̍su̍ dīyɔ̄ɔ̍

(Māa̍ti̍u̍ 26:1-5; Ma̍kī 14:1-2; Lu̍kū 22:1, 2)

45O̍ ko̍ŋ, mɛ̄ɛ̍ Chu̍ūwa̍ a̍ hi᷅ŋ Mēēle̍ yīlɔ̄ɔ̄ wa̍ chē nyɛ̄ Chi̍i̍sū to̍sa̍ wo̍, mi̍ ā ka̍ ka̍ du̍a̍ū tīīnda᷄ŋndo̍ o̍ ndu̍ ni̍ŋ. 46Kɛ̍, mi̍ ā ti᷄ŋ ā mīīŋgū o̍ ku̍ndā Fālīsi̍īya̍ lo̍ ma̍ chɔ̄m nda̍ nyɛ̄ Chi̍i̍sū to̍sa̍ wo̍. 47O̍ ko̍ŋ kɔ̍ɔ̍lī, mi̍ ku̍ndā Fālīsi̍īya̍ a̍ wānāā bɛ̄ndūāā sōlīāā lāsa̍lāa̍, a̍ lāŋgba̍ā kālāa̍ ki̍a̍lū ya᷅ma̍ŋnda̍ ā bīī bɔ̄ŋa᷅ŋndo̍. Ma̍ dīmī āā, “Ō yɛ̄ɛ̍nɛ̍ na̍a̍ ŋ̄ yɔ᷄ŋ yɛ̍? Ā chē wa̍lta̍ kɔ̄ndɔ̄fi̍ltā fāŋgā pōo̍ ho̍ō chō tōsāa̍ la̍ŋ. 48Tē ŋ̄ ma᷄l ndu̍ mbō hīōū lāchī nu̍a̍ā pɛ̍, wāŋnda̍ kpo̍u̍ ā chō tīīnda᷄ŋndo̍ dɔ̄wɔ̄ɔ̄ o̍ ndu̍ ni̍ŋ. Ndu̍yɛ̍, tē ī yɔ̄nu̍ŋ le̍nde̍ pɛ̍, wānāā bɛ̄ndūāā Lu̍o̍ma᷅ŋnda̍ ā chō hūnɔ̄ɔ̄ chīɛ̍i̍ Mɛ̄lɛ̄ka̍a̍ ho̍ō tɛ̄ɛ̄mbūū, ndu̍yɛ̍, mā sōli̍ na̍a̍ o̍ lɛ̄ŋndē nāāle̍ŋ ni᷄ŋ.”

49Wānā pi᷅lɛ̍ wa̍ nda̍ tɛ̄ɛ̄ŋ dīōla̍ŋ āā, Ka̍ya̍fāā. Ndu̍ wa̍ māsa̍ wānāā so̍līāā lāsa̍lāa̍ wɔ̄sī kōŋ ni̍. Mbo̍ dīmī āā, “Lā si̍nā bɛ̍ɛ̍ nyɛ᷅ o̍ nyɛ̄ a̍ sūɛ̍i̍ he̍ī o̍kɔ̄ɔ̄ le̍. 50Lā si̍nā nu̍a̍ā, māā ō bɛ̄nda̍ mī wāŋndo̍ ō pīlɛ̍ vī le̍ wāŋnda̍ mbo̍ hīāū a̍ na̍a̍ sōlīo̍o̍ o̍ lɛ̄ŋndē nāāle̍ŋ ni᷄ŋ te̍?” 51Kɛ̍, dīōmndā Ka̍ya̍fāā o̍ di̍mi̍ la̍ŋ nda̍ŋ, ō ve̍ la̍ŋ dīmī o̍ ndu̍ pi̍la̍ ni̍ŋ te̍. Mɛ̄ɛ̍ o̍ wa̍ yɛ̄ māsa̍ wānāā sōlīāā lāsa̍lāa̍ wɔ̄sī kōŋ yɛ̍, ō wa̍ māwāā sūɛ̍i̍ wa̍ā lāchī dīmīo̍o̍ a̍ Chi̍i̍sū o̍kɔ̄ɔ̄. Ō wa̍ dīmīo̍o̍ a̍ mɛ̄ɛ̍ Chi̍i̍sū wa̍ hūnɔ̄ɔ̄ pīɔ̍mndo̍ sɔ̄lā le̍ Chu̍ūwa̍ yɛ̍. 52Ndu̍yɛ̍, ō cho̍ ko̍ le̍ nda̍ le̍, kɛ̍, le̍ chūāūwāa̍ Mɛ̄lɛ̄ka̍a̍ a̍ cho̍ bā o̍ bā fe̍e̍ wa̍, le̍ tōsāa̍ mā wa̍ dīōmndo̍ ō pīlɛ̍ ku̍ndā.

53Chɔ̍ŋ a̍ pāa̍le̍ le̍ŋ, mi̍ wānāā bɛ̄ndūāā Chu̍ūwa̍ ā kɛ̄ɛ̄sīāā le̍ Chi̍i̍su̍ dīyɔ̄ɔ̍. 54Le̍ he̍ī, Chi̍i̍sū ndu̍ o̍o̍ be̍lū lɛ̍ kpe̍nde̍ke̍le̍ Chu̍ūwa̍ tɛ̄ɛ̄ŋ te̍. O̍ ko̍ŋ, mbo̍ māl mbo̍ kūā o̍ būŋgɛ̄i̍ cho̍ o̍ po̍llo̍ īkɛ̄i̍ ye̍, o̍ chi̍o̍o̍ dīōla̍ŋ āā, E̍fi̍lūēm. Mbo̍ wānu᷄ŋ lo̍ŋ nda̍ bu̍ɛ̍i̍yāā ndūa̍a̍.

55Bōōndi̍i̍ Chu̍ūwa̍ bīī bɔ᷅ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ ve̍ ī wa̍ ni᷅ŋ kpɛ̍ɛ̍lūŋ. Le̍ he̍ī, mi̍ wāŋnda̍ cha᷄ŋ o̍ tāndāla̍ŋ ni᷄ŋ ta̍u̍. Ma̍ kūā Chūlu̍sɛ̄lɛ̄m chi̍e̍e̍ le̍ dīōndɔ̄ɔ̍ sɔ̄lāa̍ Mɛ̄lɛ̄ka̍ o̍ hɔ̄l, lɔ̍ɔ̍pa̍ bɔ̄ŋa᷅ŋndo̍ fūūlūū. 56Ndu̍yɛ̍, ā wa̍ Chi̍i̍su̍ nūūvīa̍a̍ kpe̍e̍kpe̍i̍. Mɛ̄ɛ̍ nda̍ chu̍ūŋgi̍āŋ o̍ chīɛ̍i̍ Mɛ̄lɛ̄ka̍a̍ ni᷄ŋ, ma̍ sa̍āŋ nyu̍ūni̍āŋndo̍ āā, “Lā yīya̍ŋ māā ō chō hūnɔ̄ɔ̄ o̍ bɔ̄ŋa᷅ŋndo̍ ho̍ō?” Āā, “Mbɔ̄ ō hi᷅ŋ ni̍ŋ te̍.” 57Ndu̍yɛ̍, wānāā bɛ̄ndūāā sōlīāā lāsa̍lāa̍, a̍ ku̍ndā Fālīsi̍īya̍ nda̍ a̍a̍ di̍mu̍l ni᷅ŋ wāŋnda̍ māā wānā o̍ wāna̍ si̍na̍ bā Chi̍i̍sū cho̍ wo̍ pɛ̍, māā ō hu᷄ŋ mbō hu᷄ŋ di̍mūl nda̍ le̍ mā bīī ndu̍.

Currently Selected:

Chɔ᷄ŋ 11: YM

Highlight

Copy