Chɛ̄nɛ̍se̍ē 47

1Mi̍ Chōo̍sɛ̍ cha᷄ŋ mbo̍ kūā nāa̍ māsā bɛ̍ndōo̍ I̍chi̍pī chu̍a̍. Mbo̍ kɔ̍ di̍mūl ndu̍ āā, “Fi̍nyā nūu̍ nda̍ bɛ̄ndāā nīa̍a̍ ā chɛ᷄ŋ lɛ᷅ŋndē Ke̍nāŋnde̍ŋ, ma̍ hūŋ. Ā hīŋ a̍ sāa̍ ndāa̍, a̍ nāūwāā ndāa̍, a̍ nyɛ̄ o̍ nyɛ̄ ndā. Ā chō ni᷅ŋ o̍ būŋgɛ̄ī Ku̍u̍sīɛ̄ŋnde̍ ni᷄ŋ”. 2Kɔ̄lā o̍ wa̍ la̍ŋ, mbo̍ chūā wānāā ŋūɛ̍ɛ̍nu̍ bɛ̍ndāā ndūa̍a̍ tɛ̄ɛ̄ŋ, mbo̍ chɔ̄m nda̍ o̍ māsā bɛ̍ndōo̍ lo̍. 3Mi̍ māsā bɛ̍ndōo̍ nyūnā nda̍ āā, “Wa̍li̍ māāvɛ̄ɛ̄ nya̍ tōsā yɛ̍?” Ma̍ dīmūl ndu̍ āā, “Sāa̍ na̍a̍ ŋ̄ māndā ni̍, Fāllo̍. Fi̍nyāā nāā ma̍māa̍ bɛ̍ɛ̍, wa̍li̍ ko̍ŋ nda̍ a̍a̍ to̍sā ni̍.” 4Ma̍ dīmūl māsā bɛ̍ndōo̍ āā, “Le̍ cha᷄lle̍ na̍nu᷄ŋ na̍a̍ ŋ̄ hīŋ ni̍. Yīa̍a̍ŋ mā chō o̍ lɛ̄ŋndē nāāle̍ŋ ni᷄ŋ ha̍a̍a̍ bīl dīa̍a̍ le̍ chɔ̄lūāā nāa̍ bɛ̍ɛ̍ ō sɔ̍lāŋ te̍. Le̍la̍ŋ yāndi̍i̍, ke̍ na̍a̍ fo̍ndāa̍ o̍ būŋgɛ̄ī Ku̍u̍sīɛ̄ŋnde̍ ni᷄ŋ mī ŋ̄ cha᷄l lo̍ŋ.” 5Mi̍ māsā bɛ̍ndōo̍ dīmūl Chōo̍sɛ̍ āā, “Mɛ̄ɛ̍ fi̍nyā nūm a̍ bɛ̍ndāā nūmnda̍ ā hīŋ nu̍m o̍ bɛ̄ŋgu̍ cho̍o̍ yɛ̍, 6lɛ̄ŋndē I̍chi̍pīle̍ŋ lē chō le̍ nda̍. Ke̍ nda̍ Ku̍u̍sīɛ̄ŋ, mā cha᷄l lo̍ŋ. Fo̍ndāŋ kɛ̄ndɛ̄ kɛ̍ndɔ̄ɔ̍ cho̍ ko̍ŋ ni̍. Ndu̍yɛ̍, tē ŋ̄wāŋ ā wa̍ nda̍ tɛ̄ɛ̄ŋ pɛ̍ a̍ si̍nā nyɛ̍ kɛ̄ndɛ̍ī a̍ chɔ̄lūa̍a̍ māndāa̍ o̍kɔ̄ɔ̄ wa̍, a̍ di̍mu̍l nda̍ ā mānda̍l la̍ sāa̍ nīa̍a̍ a̍ nāūvāā nīa̍a̍.”

7O̍ ko̍ŋ kɔ̍ɔ̍lī, mi̍ Chōo̍sɛ̍ hu᷅ŋ a̍ fi̍nyā ndɔ̍ le̍ mbō chɔ᷄m māsā bɛ̍ndōo̍ ndu̍. O̍ ko̍ŋ, mi̍ Che̍kɔ̍pū du̍a̍ū māsā bɛ̍ndōo̍ ho̍ō sa̍lā. 8Mi̍ māsāa̍ nyūnā Che̍kɔ̍pū āā, “Vɛ̄ɛ̍nɛ̍ wɔ̄sīlā nūmnda̍ŋ lā chō yɛ̄ ni᷅ŋ?”

9Mi̍ Che̍kɔ̍pū di̍mī āā, “Fi̍nyāā nīa̍a̍ hi̍o̍ū vīōūwɔ̄ɔ̄ a̍ ya̍. Ya̍ yā I̍ cho̍ wɔ̄sīla̍ŋ kɛ̄mɛ̄ a̍ be̍le̍-ya̍a̍ (130) ko̍ni̍. Ndu̍yɛ̍ o̍ wɔ̄sīlā bīŋgīlā kālāla̍ŋ ni᷄ŋ bɛ̍ɛ̍, sɔ̄ɔ̍ŋ pa̍la᷄ŋ pi̍la̍ ya̍ ke̍e̍ku̍ lēni᷄ŋ ni̍.” 10O̍ ko̍ŋ kɔ̍ɔ̍lī, mi̍ Che̍kɔ̍pū du̍a̍ū ndu̍ sa̍lā, mbo̍ chōŋgu᷄ŋ ndu̍, mbo̍ mīīŋgū. 11Mi̍ Chōo̍sɛ̍ to̍sā mɛ̄ɛ̍ māsā bɛ̍ndōo̍ dīmu̍l ndu̍ yɛ̍. Mbo̍ tōsā mi̍ fi̍nyā ndɔ̄ a̍ bɛ̄ndāā ndūa̍a̍ ā sɔ̄lā nāa̍ cha̍lāa̍ I̍chi̍pī. Mbo̍ kē nda̍ fo̍ndāŋ kɛ̄ndɛ̄ kɛ̍ndɔ̄ɔ̍ Lu̍a̍mɛ̍sī chi̍e̍e̍ i̍kɛ̍i̍. 12O̍ ko̍ŋ kɔ̍ɔ̍lī, mi̍ Chōo̍sɛ̍ mūli᷄ŋ, fi̍nyā ndɔ̄ ni̍, bɛ̄ndāā ndūa̍a̍ ni̍, a̍ wānā o̍ wāna̍ cho̍ o̍ yu̍ŋgu̍ fi̍nyā ndɔ̄ɔ̍ chōo̍, a̍ chūāūwāā ndāā pɔ̍mbūa̍a̍ fa̍ū, mbo̍ yɔ̄ŋgū nda̍ nyɛ̄ dīa̍a̍ tūu̍le̍ ndāle̍ŋ, mɛ̄ɛ̍ nda̍ chō fa̍ū.

Te̍le̍ŋ yīmā bɛ̄ndūa̍ŋ

13Mi̍ ī yɔ̄nu᷄ŋ mi̍ nyɛ̄ dīa̍a̍ chūū I̍chi̍pī pa̍ku̍ pa̍ku̍ a̍ Ke̍nāŋ. Mi̍ wāŋnda̍ yɔ̄nu᷄ŋ ni᷅ŋ ya̍fo̍lo̍ ya̍fo̍lo̍ a̍ yīa̍a̍ŋ. 14Nyɛ̄ sɔ̄lāā o̍ nyɛ̄ sɔ̄lāa̍ wa̍ lɛ̄ŋndē I̍chi̍pīle̍ŋ a̍ Ke̍nāŋ, mi̍ Chōo̍sɛ̍ chīī ndu̍ nānɔ̄ɔ̄ tu᷅ a̍ nyɛ̄ dīa̍a̍. Mbo̍ chūūŋgīāā nyɛ̄ sɔ̄lāā kōŋ kpo̍u̍, mbo̍ chūū māsā bɛ̍ndōo̍ o̍ chīɛ̄ī ndɔ̍ lēmāsāa̍. 15Mɛ̄ɛ̍ nyɛ̄ sɔ̄lāa̍ chūū wāŋnda̍ o̍ lābā I̍chi̍pī a̍ Ke̍nāŋ, mi̍ wāŋnda̍ I̍chi̍pī kpo̍u̍ a̍ hu᷅ŋ nāa̍ Chōo̍sɛ̍ chūā. Ma̍ dīmūl ndu̍ āā, “Chōo̍sɛ̍, lo᷅ na̍a̍ nūā mī ŋ̄ vī a̍ yīa̍a̍ŋ te̍. Ke̍ na̍a̍ nyɛ̄ dīa̍a̍. Nyɛ̄ sɔ̄lāa̍ chūū ni᷅ŋ na̍a̍ o̍ lābā pa̍ku̍.”

16Mi̍ Chōo̍sɛ̍ di̍mūl nda̍ āā, “Mɛ̄ɛ̍ nyɛ̄ sɔ̄lāa̍ chūū nya̍ o̍ lābā yɛ̍, mɛ̄ɛ̍ lā hu᷄ŋ a̍ chɔ̄lūāā nyāa̍, mī ke̍ nya̍ yɛ̄ dīa̍a̍ sɔ̍ŋgɔ̍ ko̍ŋ.” 17O̍ ko̍ŋ kɔ̍ɔ̍lī, mi̍ wāŋnda̍ hūŋ a̍ chɔ̄lūāā ndāa̍, su̍a̍a̍ ni̍, a̍ sāa̍, a̍ chūīŋnda̍, a̍ nāūwa̍, a̍ sōfɛ̍li̍a̍a̍, nāa̍ Chōo̍sɛ̍ chu̍a̍. Mbo̍ lō nda̍ nyɛ̄ dīa̍a̍ kīo̍o̍ wɔ̄sī kōŋ ma̍ chīī chɔ̄lūa̍a̍ pīsī kpo̍u̍.

18Mɛ̄ɛ̍ wɔ̄sī kōŋ chūū, ma̍ hūŋ nāa̍ ndu̍ chu̍a̍ wɔ̄sīo̍o̍ pīlɔ̍ɔ̄. Ma̍ dīmūl ndu̍ āā, “Fāllo̍, ŋ̄ cho̍ nu̍m sūɛ̍i̍ he̍ī vīŋ te̍. Nyɛ̄ sɔ̄lāa̍ chūū na̍a̍ o̍ lābā a̍ nyɛ̄ dīa̍a̍ pīōndɔ̄ɔ̍. Chɔ̄lūāā nāa̍ bɛ̍ɛ̍ kpo̍u̍, ā chō ni᷅ŋ le̍ nūm. Nyɛ̄ o̍ nyɛ̄ bɛ̍ɛ̍ ŋ̄ nɔ̍ lɛ̍ le̍. Na̍a̍ ko̍ni̍ ŋ̄ chīī chɔ᷅ nu̍a̍ā ni̍. 19Le̍la̍ŋ ma᷅l na̍a̍ mī ŋ̄ vī le̍. To̍sa̍ i̍sɔ̍ɔ̍ o̍ sūɛ̍i̍ he̍ī ni᷄ŋ. Na̍a̍ pi̍la̍ ni̍, chīɔ̄ɔ̄ŋ nāa̍ŋ ni̍, pi̍o̍ndu̍ na̍a̍ kpo̍u̍ a̍ nyɛ̄ dīa̍a̍. Ŋ̄ chɛ᷄l mī ŋ̄ wa̍ chīa̍a̍ le̍ māsā bɛ̍ndōo̍. Lɛ̄ŋndē nāāle̍ŋ bɛ̍ɛ̍, mī lē wa̍ nyɛ̄ ndɔ̄. Ke̍ na̍a̍ nyɛ̄ dīa̍a̍ a̍ yɛ̄i̍ye̍, mī ŋ̄ tōsa̍ chīɔ̍ɔ̍ŋ. Lo᷅ tōfā mī chīɔ̄ɔ̄ŋ nāa̍ŋ sīmnu᷄ŋ yo̍ndō fo̍ndō le̍.”

20O̍ ko̍ŋ kɔ̍ɔ̍lī, mi̍ Chōo̍sɛ̍ chīī māsā bɛ̍ndōo̍ lɛ̄ŋndē I̍chi̍pīle̍ŋ pīndūl kpo̍u̍. Mɛ̄ɛ̍ yīa̍a̍ŋ mā pāla̍ te̍i̍, mi̍ wānā o̍ wānā chi̍ī lɛ̄ŋīī ndɛ̄i̍ pīīsūū māsā bɛ̍ndōo̍ o̍ bā. Mi̍ lɛ̄ŋndē I̍chi̍pi̍le̍ŋ fa̍ū lē wā ni̍ko̍ nyɛ̍ ndɔ̄. 21Wāŋnda̍ lɛ̄ŋndē I̍chi̍pīle̍ŋ fa̍ū, a̍ sɔ̍ŋgi̍la̍ ndɔ̄ ku̍lu̍pɛ̄, mi̍ Chōo̍sɛ̍ si̍i̍ŋgūū nda̍ chīa̍a̍ le̍ māsā bɛ̍ndōo̍. 22Mɛ̄ɛ̍ wānāā sōlīāā lāsa̍lāa̍ ō pīndu̍ lɛ̍ŋīī ndɛ̄i̍ le̍. Kāni̍ nda̍, māsā bɛ̍ndōo̍ wa̍ nda̍ pāāwāa̍ le̍ wa̍li̍ nda̍ wa̍ wo̍. Le̍ he̍ī nda̍ a̍a̍ nɔ̍ nyɛ̄ sɔ̄lāa̍ le̍ nyɛ̄ dīa̍a̍ pīōndɔ̄ɔ̍. 23Mi̍ Chōo̍sɛ̍ lō o̍ ko̍ŋ mbo̍ dīmūl wāŋnda̍ āā, “Chɔ̍ŋ ni᷅ŋ a̍ hāū, nya̍ ni̍, lɛ̄ŋndē nyāle̍ŋ nde᷅ŋ ni̍, I̍ chi̍i̍ nya̍ pīōndɔ̄ɔ̄ le̍ māsā bɛ̍ndōo̍. Le̍la̍ŋ, lā chē yɛ̄i̍yo̍ŋ, mī lā tōsa̍ chīɔ̍ɔ̍ŋ. 24Kɛ̍ tē lā kōū pɛ̍, o̍ bɔ̄lɔ̄la̍ o̍ bɔ̄lɔ̄la̍ ŋūɛ̍ɛ̍nu̍ cho̍o̍, māsā bɛ̍ndōo̍ nɔ̄ bɔ̄lɔ̄ɔ̍ ō pīlɛ̍. Nya̍ pi̍la̍ nɔ̄ lā hīɔ̍ɔ̍lu̍. Ko̍ŋ wa᷅ ni᷅ŋ yɛ̄i̍yo̍ŋ le̍ chīɔ̄ɔ̄ŋ nyāa̍ŋ a̍ nyɛ̄ dīa̍a̍ le̍ nya̍ pi̍la̍ a̍ yu̍ŋgu̍la̍ nyāla̍ŋ.”

25O̍ ko̍ŋ kɔ̍ɔ̍lī, mi̍ wāŋnda̍ mūlī āā, “A̍ pi̍ŋi̍ yōōmūlā nāāla̍ŋ. Ŋ̄ chɛ᷄l mī ŋ̄ wa̍ chīa̍a̍ le̍ māsā bɛ̍ndōo̍, tē a̍ hi̍ni̍ kɔ̄l pɛ̍.” 26Mɛ̄ɛ̍ mi̍ Chōo̍sɛ̍ to̍sā ni̍ko̍ ndi̍ sāwāa̍ le̍ lɛ̄ŋndē I̍chi̍pīle̍ŋ māā wānā o̍ wāna̍ to̍sa̍ wa̍li̍ īchīɔ̍ɔ̍ pɛ̍, tē tɔ̄lɔ̄ɔ̄ kōŋ ō wa̍ nyɛ̄ pīɔ̄ūwāā sālā ŋūɛ̍ɛ̍nu̍ pɛ̍, māsā bɛ̍ndōo̍ le̍ I̍chi̍pī ndu̍ nɔ̍ kūmbōo̍ ō pīlɛ̍ lēchōo̍. A̍ bōōndi̍i̍ yāu̍wo̍ ho̍ō ō chō pōōnyīa̍ŋndo̍ ve̍ bɛ̍ɛ̍, sāwā ko̍ŋ ō chō wɔ̄ lēchōo̍. Mɛ̄ɛ̍ wānāā sōlīāā lāsa̍lāa̍ lɛ̄ŋndē ndāle̍ŋ lē cho̍ le̍ māsā bɛ̍ndōo̍ le̍.

Chōŋgɔ᷄ŋ Che̍kɔ̍pū cho̍ŋgu̍ŋ Cho̍o̍sɛ̍ wo̍

27Mi̍ I̍sɔ̄lūɛ̍i̍ya̍ ā hīāū lāchī a̍ wāa̍ o̍ būŋgɛ̄ī Ku̍u̍sīɛ̄ŋnde̍ ni᷄ŋ, o̍ lɛ̄ŋndē I̍chi̍pīle̍ŋ ni᷄ŋ. Ma̍ bīī ma̍ sɔ̄lā nyɔ̄ɔ̍ŋ, ma̍ pīā lābā ki̍ŋ ki̍ŋ. Ma̍ kūīī cha̍po̍o̍li̍. 28Che̍kɔ̍pū chu̍a̍ wɔ̄sīla̍ŋ tɔ̍ a̍ lā ŋɔ᷄mmɛ̍ū I̍chi̍pī mālāŋ o̍ wu᷅. Mɛ̄ɛ̍ fa̍ū fa̍ū, Che̍kɔ̍pū chi̍i̍ wɔ̄sīla̍ŋ kɛ̄mɛ̄ a̍ be̍le̍-hi̍ɔ̍ɔ̍lu̍ a̍ lā ŋɔ᷄mmɛ̍ū (147). 29Mɛ̄ɛ̍ te̍le̍ŋndo̍ wa̍ ni᷅ŋ kpɛ̍ɛ̍lūŋ le̍ mī Che̍kɔ̍pū vi᷅, mbo̍ dīmūl Chōo̍sɛ̍ āā, “Chōo̍sɛ̍, hu̍ŋ mā hu̍ŋ wo̍ū ya̍ bāa̍ o̍ lɔ̄lūla̍ŋ tɛ̄ɛ̄ŋ mā chu̍e̍l la̍ ībūŋgā mā me̍na̍ŋ māā tē I̍ vi᷅ pɛ̍, a̍ chɔ᷅ ni̍ŋ ya̍ I̍chi̍pī na̍nu᷄ŋ te̍. 30I̍ hɛ̍na̍ŋ mī sɔ̍la̍ chɔ̄ɔ̍ o̍ sɛ̄īla̍ fi̍nyāā nīa̍a̍ īkɛ̄i̍. Tē I̍ vi᷅ pɛ̍, kɔ̍ a̍ ya̍ mā chɔ̍ ya̍ nāa̍ nda̍ sɔ̄la̍ chɔ̄ɔ̍ wa̍.”

Mi̍ Chōo̍sɛ̍ mu̍lī āā, “I̍ cho̍ tōsā mɛ̄ɛ̍ ŋ̄ dīmi̍ yɛ̍.”

31Mi̍ Che̍kɔ̍pū di̍mī āā, “Chu̍e̍l la̍ ībūŋgā mā me̍na̍ŋ māā ā chō tōsā mɛ̄ɛ̍ ya̍ I̍ di̍mi̍ yɛ̍.” Mi̍ Chōo̍sɛ̍ chu̍ā būŋgɛ̄i̍ mbo̍ me̍na᷄ŋ māā ō chō tōsā le̍nde̍. O̍ ko̍ŋ kɔ̍ɔ̍lī, mi̍ Che̍kɔ̍pū me᷅l Mɛ̄lɛ̄ka̍ ba̍li̍ka̍ nāa̍ o̍ wa̍ īhīni̍ o̍ ndu̍ lo̍ kpēlē wa̍.

Currently Selected:

Chɛ̄nɛ̍se̍ē 47: YM

Highlight

Copy