Chɛ̄nɛ̍se̍ē 43

Bɛ̄ndāa̍ Chōo̍sɛ̍ wa̍ mīīŋgu̍ I̍chi̍pī nda̍ Bɛ̍ŋnja̍mīŋ wa̍ā

1O̍ ko̍ŋ kɔ̍ɔ̍lī, mi̍ yīa̍a̍ŋ mā kīāndū o̍ lɛ̄ŋnde̍ŋ ni᷄ŋ, mi̍ mā kīāndū. 2Mɛ̄ɛ̍ ma̍ ke̍ndū le̍nde̍, mi̍ yu̍ŋgu̍ Che̍kɔ̍pū wo̍ chīī nyɛ̄ dīāā nda̍ chɛ᷄ŋ I̍chi̍pī wo̍ di̍o̍. O̍ ko̍ŋ, mi̍ fīnyā ndā di̍mūl nda̍ āā, “Lā kɔ̍ vɛ̍lɛ̄ I̍chi̍pī mī lā kɔ̍ pi̍o̍ndū nyɛ̄ dīāā pɔ̄mbɔ̄.”

3Kɛ̍ mi̍ Chu̍dā po̍ ndɔ̄ di̍mūl ndu̍ āā, “Fi̍nyā kōŋ ō dīmu̍l na̍a̍ ō kālā ka̍lā māā tē na̍a̍ ŋ̄ kūe̍ a̍ pɔ̄mbɔ̄ nāa̍ le̍, mɛ̄ɛ̍ ō cha᷅ na̍a̍ le̍. 4Tē a̍ yɔ̍ŋgu̍ pɔ̍mbɔ̄ nāa̍ mī ŋ̄ kūɛ̄ na̍a̍ nda̍ā pɛ̍, ŋ̄ nɔ̄lā mī ŋ̄ kūɛ̄, mī ŋ̄ kɔ̍ pi̍ndūl nu̍m nyɛ̄ dīa̍a̍. 5Kɛ̍ tē a̍ yɔ̍ŋgu̍ ndu̍ le̍, mɛ̄ɛ̍ ŋ̄ ku̍ē lɛ̍ lo̍ŋ te̍. Kāni̍ fu̍u̍le̍, fi̍nyāa̍ dīmu̍l na̍a̍ māā tē ŋ̄ kūe̍ na̍a̍ pɔ̄mbɔ̄ nāa̍ wa̍ā le̍, māā ō cha᷅ na̍a̍ le̍.”

6Mi̍ I̍sɔ̄lūɛ̄ī nyu̍nā nda̍ āā, “Kɛ̍ vɛ᷅ mi̍ lā dīmūl ndu̍ māā lā nɔ̄ pɔ̄mbɔ̄ chēle̍ŋ? Lā tōfa̍ wɔ̍ nyɛ̍ pālāā nya̍ chūu̍ ya̍ wo̍.”

7Ma̍ mūlī āā, “Nyūūnīa̍a̍ o̍ wa̍ na̍a̍ ta̍u̍ ni̍. Ō nyūūni̍a̍a̍ na̍a̍ fɛ̍lɛ̍ŋ a̍ na̍a̍ pi̍la̍ o̍kɔ̄ɔ̄, mbo̍ mūli᷄ŋ vɛ̍lɛ̄ nyūūnīa̍a̍ a̍ yu̍ŋgu̍ nāa̍ o̍kɔ̄ɔ̄. Mbo̍ nyūnā na̍a̍ āā, ‘Fi̍nyā nyā cho̍ wɔ̄ yōōmū?’ Mbo̍ nyūnā āā, ‘Lā nɔ̄ pɔ̄mbɔ̄ chēle̍ŋ?’ Nyūūnīāālā o̍ wa̍ na̍a̍ la̍ŋ la̍ to̍sa̍ ni̍ mi̍ ŋ̄ dīmūl ndu̍ māā ŋ̄ nɔ̄ pɔ̄mbɔ̄ɔ̍. Wānā o̍ wānā ve̍ kɔ̍l māā ō chō dīmī āā, ‘Lā hu᷄ŋ a̍ pɔ̄mbɔ̄ nyā ko̍ŋ’ te̍.”

8Mi̍ Chu̍dā di̍mūl I̍sɔ̄lūɛ̄ī fi̍nyā nda̍ āā, “Yɔ̍ŋgu̍ ya̍ pōo̍mbɔ̄ɔ̍ ŋ̄ bīī nɛ̍īyo̍, mī ŋ̄ kēle̍ŋa̍ lākɔ̄, mī ŋ̄ sɔ̄la̍ yɛ̄ dīa̍a̍, yɔ̄ŋi̍ na̍a̍ ŋ̄ wu̍. Tē ō cho̍ ko̍ŋ te̍, nūm ni̍, chūāūwāā nāā pɔ̍mbūa̍a̍ ni̍, na̍a̍ kpo̍u̍ ŋ̄ chō chūū a̍ yīa̍a̍ŋ. 9To̍fa̍ ya̍ a̍ sūɛ̍i̍ ndūɛ̍i̍. A̍ ya̍ ŋ̄ sɔ̄lā ndu̍ ni̍. Tē I̍ mi̍i̍ŋgu̍ a̍ ndu̍ nāa̍ nūm chu̍a̍ le̍, mɛ̄ɛ̍ tɔ̍ɔ̍ya̍ŋ ko̍ŋ ō wa̍ ya̍ chōo̍ le̍ fɛ̍ɛ̍ŋ fɛ̍ɛ̍ŋ. 10Tē ta̍ma̍lta̍ŋ nda᷅ŋ la̍a̍ yɔ̍nu̍ŋ te̍, māā na̍a̍ ŋ̍ ku̍ɛ̄ ni᷅ŋ lēdīi̍ŋ mī ŋ̄ mīīŋgū.”

11O̍ ko̍ŋ, mi̍ fi̍nyā ndā di̍mūl nda̍ āā, “Tē ī wa̍ le̍nde̍ pɛ̍, mɛ̄ɛ̍ lā yōu̍ wa̍nā bɛ̍ndū kōŋ nyɛ̄ o̍ bā. Lā chūa̍ vɛ̍lɛ̄ nyɛ̄m chūŋ kɛ̄ndɔ᷄ŋ nyɛ̄ pɔ̄mbɔ̄, a̍ līa̍a̍ŋ nyɛ̄ pɔ̄mbɔ̄, a̍ nyɛ̄m na̍a̍ ŋ̄ dūāū o̍ nyɛ̄ dīa̍a̍ wo̍ŋ, yɔ̄mīī nɛ̄ī ku̍a̍mɛ̄i̍ na̍nu᷄ŋ. 12O̍ ko̍ŋ kɔ̍ɔ̍lī, mī lā chu̍a̍ ka̍ni̍o̍ŋ mī ŋ̄ wa̍ mɛ̄ɛ̍ nya̍ kūɛ̄ o̍ tāse̍la̍ ndɔ̄ɔ̍ yɛ̍ lē dīi̍ŋ, mī lā yɛ̄ɛ̄ nyɛ̄ sɔ̄lāā nda̍ mīŋgi̍ wōū o̍ bɔ̄lɔ̄la̍ nyāla̍ŋ ni᷄ŋ ndo̍. Kɛ̄lɛ̄ŋgāā mbō wa̍ dɔ̍ɔ̍ pūɛ̍ɛ̍ŋndo̍ nda̍ pūɛ̄ɛ̄u̍ŋ ni̍. 13Lā chɔ᷄ŋ ni̍ko̍ lā kɔ̍ sa̍kpō nya̍ pɔ̄mbɔ̄ nyā wa̍ā. 14Mbɔ̄ Mɛ̄lɛ̄ka̍ Kpu̍lu̍ŋgūma̍ bɛ̄ndōo̍ ō tōsa̍ mī fi̍nyā kōŋ ō tūīīnu̍ŋ nya̍ īnyīɛ̍ɛ̍, mbō mīŋgi̍ nya̍ Bɛ̍ŋnja̍mīŋ, a̍ bɛ̄ nya̍ lo̍ lo̍ŋ ndo̍ o̍ bā fɔ̍. Ya̍ ya̍, tē ō wa̍ yɛ̄ pɛ̍ māā chūāūwa̍ ha̍ā ā nɔ̄ le̍ ya̍ fūlāa̍ o̍ bā, mɛ̄ɛ̍ ī yɔ̄nu̍ŋ le̍nde̍.”

15O̍ ko̍ŋ kɔ̍ɔ̍lī, mi̍ pūa̍a̍ ha̍ā ā chūā nyɛ̄m nda̍ wa̍ wānā bɛ̍ndōo̍ yōū o̍ bā wo̍ŋ. Ma̍ chūā vɛ̄lɛ̄ nyɛ̄ sɔ̄lāā nda̍ wa̍ lākɔ̄ nyɛ̄ dīa̍a̍ pīōndɔ̄ɔ̄ wo̍ sālā tīɔ̍ɔ̍ŋ. Ma̍ chūā Bɛ̍ŋnja̍mīŋ pɔ̍mbɔ̄ nda̍, ma̍ cha᷄ŋ tu̍u̍sōo̍ I̍chi̍pī. Mɛ̄ɛ̍ nda̍ fūūlu̍u̍, ma̍ kɔ̍ chɔ̍mnu᷄ŋ Chōo̍sɛ̍. 16Mɛ̄ɛ̍ Chōo̍sɛ̍ che᷅ nda̍ ma̍ hūŋ a̍ Bɛ̍ŋnja̍mīŋ kɔ̍ɔ̍lī, mbo̍ dīmūl po̍ bu̍ɛ̍i̍ wa̍ o̍ ndu̍ lo̍ chi̍ɛ̍ī ni̍ŋ ndo̍ āā, “Kɔ̍ a̍ wāŋnda̍ ha̍ā o̍ chīɛ̄ī nūu̍. Lā kūɛ̄ pɛ̍, lā kɔ̍ di̍ī chɔ̄lōo̍ mī lā tōōsi̍a̍a̍ nyɛ̄ dīa̍a̍. Kāni̍ fu̍u̍le̍, na̍a̍ wāŋnda̍ ha̍ā ŋ̍ nɔ̍ le̍ nyɛ̄ dīa̍a̍ dīo̍o̍ hāū a̍ te̍le̍ŋ pāa̍le̍ŋ lē sīm o̍ bōlle̍ŋ chōo̍ wo̍ ni̍.” 17Mi̍ po̍ bu̍ɛ̍īyo̍ tōsā mɛ̄ɛ̍ o̍ di̍mu̍l ndu̍ yɛ̍. Mbo̍ kūā a̍ nda̍ o̍ chīɛ̍i̍ Chōo̍si̍ɔ̍ɔ̍.

18Kɔ̄la̍ŋ a̍ nda̍ o̍ chīɛ̍i̍ Chōo̍si̍ɔ̍ɔ̍, ma̍ kāndū sīōōŋnde̍ yɔ̄ŋndo̍. Ma̍ sāā yīya᷄ŋndo̍ āā, “Ō wā ni̍ŋ le̍ nyɛ̄ sɔ̄lāā nda̍ wōu̍ o̍ bɔ̄lɔ̄la̍ nāāla̍ŋ ni᷄ŋ bo̍o̍ndi̍i̍ na̍a̍ ŋ̄ hīŋ hūnɔ̄ɔ̄ tāso̍o̍ ve̍, le̍la̍ŋ o̍ yɔ̍ŋgu̍ na̍a̍ na̍nu᷄ŋ ni̍. Ō yēēma̍ mbō ho᷄l na̍a̍ sūɛ̍i̍ le̍ nyɛ̄ sɔ̄lāā kōŋ, mā de᷄l na̍a̍ chōo̍, mā pōōndi̍a̍a̍ sōfɛ̍li̍a̍a̍ nāa̍, o̍ ko̍ŋ kɔ̍ɔ̍lī, mbo̍ sīīŋgu̍u̍ na̍a̍ chīāā ndɔ̄.” 19O̍ ko̍ŋ kɔ̍ɔ̍lī, ma̍ kūā o̍ chīɛ̄īyo̍ dīō, ma̍ sūāā nāa̍ wāna̍ wa̍ chīɛ̍i̍ Chōo̍si̍ɔ̍ɔ̍ chīla̍ŋ ndo̍ chūā. 20Ma̍ dīmūl ndu̍ āā, “Fāllo̍, bōōndi̍i̍ na̍a̍ ŋ̄ hīŋ nyɛ̄ dīa̍a̍ pīōndɔ̄ɔ̄ tāso̍o̍ ve̍ wāa̍ mīīŋgōo̍, 21mɛ̄ɛ̍ na̍a̍ ŋ̄ fūūlu̍u̍ nāa̍ na̍a̍ ŋ̍ nɔ̍ le̍ lūa̍a̍ŋ nda̍, mi̍ ŋ̄ kūmbī bɔ̄lɔ̄la̍ nāāla̍ŋ. Mɛ̄ɛ̍ na̍a̍ kūmbi̍ bɔ̄lɔ̄la̍ŋ, mi̍ wānā o̍ wānā sa̍a̍lu᷄ŋ nyɛ̍ ndɔ̄ sɔ̍lāā o̍ pe̍ndū nyɛ̄ dīa̍a̍ wo̍ kpo̍u̍ o̍ bɔ̄lɔ̍ ndɔ̄ɔ̍ ni᷄ŋ. Le̍la̍ŋ, ŋ̄ mīīŋgu̍ na̍nu᷄ŋ a̍ nyɛ̄ sɔ̄lāā kālāa̍. 22O̍ ko̍ŋ kɔ̍ɔ̍lī, ŋ̄ hīŋ vɛ̄lɛ̄ a̍ nyɛ̄ sɔ̄lāā chēle̍ŋ le̍ nyɛ̄ dīa̍a̍ pīōndɔ̄ɔ̍. Ŋ̄ si̍nā wa᷅na̍ mi̍ŋgi̍ nyɛ̄ nāā sɔ̍lāa̍ o̍ bɔ̄lɔ̄la̍ nāāla̍ŋ ni᷄ŋ ndo̍ le̍.”

23Mi̍ lāŋu̍nɔ̄ɔ̍ dīmūl nda̍ āā, “Lā bu̍u̍la᷄ŋ te̍, ndu̍yɛ̍ lā yɔ᷅ŋ īsīōōŋ te̍. Nya̍ ni̍ a̍ fi̍nyāā nyāa̍, Mɛ̄lɛ̄ka̍ nya̍ chō pīɛ̄īyo̍ wo̍, ō wā ni̍ŋ ndu̍ wo̍u̍ nyɛ̄ sɔ̄lāā kōŋ o̍ bɔ̄lɔ̄la̍ nyāla̍ŋ ni᷄ŋ ni̍. Kāni̍ fu̍u̍le̍, mi̍ lā kē ya̍ nyɛ̄ sɔ̄lāa̍.” O̍ ko̍ŋ kɔ̍ɔ̍lī, mbo̍ kūā, mbo̍ kɔ̍ hu᷅ŋ a̍ Si̍mīɔ̄ŋ nāa̍ nda̍ chūā.

24Mi̍ la̍ŋu̍nɔ̄ɔ̍ ho̍ō ō kūā a̍ nda̍ o̍ Chōo̍sɛ̍ lo̍ chi̍ɛ̍ī ni̍ŋ. Mbo̍ kē nda̍ mɛ̄ŋnda̍ŋ mā pūlū pēlo᷄ŋ. Mbo̍ kē vɛ̄lɛ̄ sōfɛ̍li̍a̍a̍ ndāa̍ nyɛ̄ dīa̍a̍. 25O̍ ko̍ŋ kɔ̍ɔ̍lī, nyɛ̄m nda̍ chūu̍ Chōo̍sɛ̍ wo̍ŋ, ma̍ bɛ̄ɛ̄ndīāā mu̍ŋ pɔ̍ɔ̍ le̍ hūnɔ̄ɔ̄ Chōo̍sɛ̍ wa̍ o̍ chīɛ̄īyo̍ a̍ te̍le̍ŋ pāa̍le̍ŋ lē sīm o̍ bōlle̍ŋ chōo̍ wo̍. Kāni̍, ma̍ tūɛ̄ī māā nda̍ nda̍ā cho̍ hūnɔ̄ɔ̄ nyɛ̄ dīa̍a̍ di̍o̍ ni̍. 26Mɛ̄ɛ̍ Chōo̍sɛ̍ hīŋ o̍ chīɛ̄īyo̍, ma̍ hūŋ a̍ nyɛ̄m nda̍ chūu̍ ndu̍ wo̍ŋ chīɛ̄ī ni̍ŋ. Mɛ̄ɛ̍ nda̍ hīŋ, ma̍ tūndu᷄ŋ lɛ᷅ŋ ndu̍ o̍ lābɛ̄ŋgu̍ ni̍ŋ. Mbo̍ nyūnā nda̍ tē ā chō kɛ̄ndɛ̄. 27Mbo̍ nyūnā nda̍ āā, “Fi̍nyā nyā yu̍wɛ̍i̍ nya̍ dīmu̍l la̍ a̍ ndu̍ o̍kɔ̄ɔ̄ wo̍, ō chō wɔ̄ pa̍ yōōmu̍? Ō chō kɛ̄ndɛ̍?”

28Ma̍ chɛ̄l āā, “E̍ī, kɛ̄kɛ̍ nāa̍, bu̍ɛ̍ī nūmndo̍ chō wɔ̄ pa̍ yo̍o̍mū, ndu̍yɛ̍ ō chō kɛ̄ndɛ̄.” Ma̍ tūndū bōlle̍ lɛ̄ŋ le̍ ndu̍ bɛ̄ɛ̄le̍ŋ kīo̍o̍.

29Mɛ̄ɛ̍ Chōo̍sɛ̍ mɛ̍ɛ̍ndi̍a̍ŋ, mbo̍ chā Bɛ̍ŋnja̍mīŋ, pɔ̄mbɔ̄ ndɔ̍ kālā pi᷅lɔ̍ɔ̄. Mbo̍ nyūnā nda̍ āā, “Pɔ̄mbɔ̄ nya̍ ya̍ dīmu̍l la̍ a̍ ndu̍ o̍kɔ̄ɔ̄ wo̍ cho̍ ho̍ō ni̍?” Ma̍ chɛ̄l. Mbo̍ dīmūl Bɛ̍ŋnja̍mīŋ āā, “Kɛ̄ndɛ̄i̍ Mɛ̄lɛ̄kɛ̍i̍ ī wa̍ nu̍m chōo̍ po̍ nūu̍.” 30O̍ ko̍ŋ, mɛ̄ɛ̍ yēēmɛ̍i̍ pɔ̄mbɔ̄ ndūɛ̍i̍ ī pɛ̄ o̍ kɔ̄l ndɔ̄ɔ̍ ni᷄ŋ, mi̍ cha᷄ŋndo̍ hūŋ ndu̍ o̍ kɔ̄l. Mbo̍ cha᷄ŋ nya̍ le̍ mbō kūɛ̄ īnɛ̍, mbō kɔ̍ cha᷅ŋ. Mbo̍ lūɛ̄ī o̍ ndu̍ lo̍ chi̍ɛ̍ī ni̍ŋ, mbo̍ kɔ̍ cha᷅ŋ. 31Chīīyo̍ cha᷄ŋndo̍, mbo̍ pūlū hɔ̄lla̍ fo̍, mbo̍ fūlā. Mɛ̄ɛ̍ kɔ̄l ndɔ̄ɔ̍ sīmu̍l, mbo̍ dīmī māā bu̍ɛ̍īya̍ pīɔ̍u̍ nyɛ̍ dīa̍a̍. 32Mi̍ ndu̍ pi̍la̍ cha᷅l nāa̍ ndɔ̄, ma̍ kē ndu̍ nyɛ̄ dīa̍a̍ o̍ ndɔ̍ɔ̍. Ma̍ tōsā mi̍ wānāā ndūa̍a̍ chāl nāa̍ ndā. I̍chi̍pīa̍a̍ wa̍ lo̍ŋ nda̍, mi̍ nda̍ chāl nāa̍ ndā. I̍chi̍pīa̍a̍ nda̍ a̍a̍ di᷅ nyɛ̍ dīa̍a̍ nda̍ Hi̍būlūi̍ya̍ le̍, kāni̍ fu̍u̍le̍, māā dɔ̄ɔ̄nāa̍ nda̍ pi̍la̍ cho̍ ko̍ŋ ni̍. 33Wānāa̍ Chōo̍sɛ̍ wa̍ nda̍ wa̍ īchāli̍ ku̍mbōo̍ pīlɔ̍ɔ̄ ndu̍ lāchī, ma̍ mūlī hɔ̄lla̍ kūmbu̍ Chōo̍si̍ɔ̍ɔ̍. Ā wa̍ īchāli̍ mɛ̄ɛ̍ wɔ̄sīlā ndāla̍ŋ lā chō yɛ̍, kāndɔ̄ɔ̍ a̍ bɛ̄ ndā bɛ̍ndōo̍ mbo̍ kūā a̍ lūm ndāa̍. Mɛ̄ɛ̍ nda̍ chē mɛ̄ɛ̍ nda̍ cha᷄l lɛ̍, mi̍ kɔ̄ndɔ̄fi̍llo̍ bīī nda̍. 34O̍ ko̍ŋ kɔ̍ɔ̍lī, ma̍ kāndū nda̍ nyɛ̄ dīa̍a̍ pīɔ̄ūwo̍, ā kēlū pɛ̍ o̍ ti̍bi̍i̍ Chōo̍sɛ̍ wa̍ īchāli̍ wo̍, ā yōu̍ nda̍. Kɛ̍ Bɛ̍ŋnja̍mīŋ ndu̍, nyɛ̄ dīāā nda̍ kīlūl ndu̍ wo̍, ndu̍ o̍o̍ chu̍ā nyɛ̍ dīāā ndā ke̍ wānā pi᷅lɛ̍ wo̍ sālā ŋūɛ̍ɛ̍nu̍. Mbo̍ lō o̍ ko̍ŋ ma̍ dīā nyɛ̄ dīa̍a̍, ma̍ kōl mūɛ̄īya̍ŋ. Nda̍ Chōo̍sīa̍a̍ ma̍ nāŋ kɔ̄l lātūlu̍.

Currently Selected:

Chɛ̄nɛ̍se̍ē 43: YM

Highlight

Copy