Chɛ̄nɛ̍se̍ē 37

Chōo̍sɛ̍ nda̍ bɛ̄ndāā ndūa̍a̍

1Mi̍ Che̍kɔ̍pū hi̍a̍ū lāchī a̍ cha᷄lle̍ o̍ lɛ̄ŋndē Ke̍nāŋnde̍ŋ ni᷄ŋ lē fi̍nyā ndɔ̄ o̍ wa̍ īchālī le̍ni̍ŋ nde̍ŋ. 2Ko̍na̍a̍ cho̍ ho̍ō a̍ yu̍ŋgu̍ fu̍la̍ o̍ Che̍kɔ̍pū ni̍ŋ ndo̍ o̍kɔ̄ɔ̄ ni̍. Bōōndi̍i̍ Chōo̍sɛ̍ wa̍ wɔ̄sīla̍ŋ tɔ̍ a̍ lā ŋɔ᷄mmɛ̍ū ve̍, nda̍ bɛ̄ndāā ndūa̍a̍ nda̍ a̍a̍ ma̍ndā chɔ̍lūa̍a̍ fi̍nyā ndā wa̍ ni̍, nda̍ yɔ̍nūŋ ni̍ māā lāāndūa̍a̍ fi̍nyā ndɔ̄ wa̍ ā pīli̍a̍a̍, Bi̍li̍hāā nda̍, Si̍li̍pāā, pūa̍a̍ ndāa̍. A̍ bōōndi̍i̍ ke̍ŋ, mi̍ Chōo̍sɛ̍ sa̍āŋ fi̍nyā ndɔ̍ ko̍na̍la̍ wɔ̍ɔ̍ŋnda̍ŋ chūūwo̍ a̍ bɛ̄ndāā ndūa̍a̍ o̍kɔ̄ɔ̄.

3Ndu̍yɛ̍ Che̍kɔ̍pū, ō nda̍ a̍a̍ ve̍e̍lū vɛ̍lɛ̄ āā I̍sɔ̄lūɛ̄ī wo̍ ndu̍ o̍o̍ ka̍a̍la̍ Chōo̍sɛ̍ mbo̍ hīāū a̍ chūāūwāā ndūa̍a̍ ā tūa̍a̍ kpo̍u̍. Kāni̍ fu̍u̍le̍, le̍ mɛ̄ɛ̍ o̍ ve̍lū ndu̍ o̍ yu̍wɛ̍i̍ ndūɛ̍i̍ ni᷄ŋ yɛ̍. Mi̍ I̍sɔ̄lūɛ̄ī lo᷅ o̍ ko̍ŋ mbo̍ sōndūl Chōo̍sɛ̍ po̍ ndɔ̍ dōmā kɛ̍ndɛ̄ vīlɛ̄īyo̍ a̍ chōŋgu̍la̍ŋ. 4Mɛ̄ɛ̍ Chōo̍sɛ̍ bɛ̄ndāā ndūa̍a̍ chē māā ndu̍ fi̍nyā ndā hi̍o̍ū kāālā a̍ nda̍, ma̍ tūl Chōo̍sɛ̍ yɛ̄le̍ŋ ta̍u̍. Sūɛ̍i̍ bɛ̍ɛ̍ nda̍ a̍a̍ su̍ū nāa̍ ndu̍ chu̍a̍ ō kɛ̄ndɛ̄ le̍.

5Nyūmmā pīlɛ̍, mi̍ Chōo̍sɛ̍ sɔ̄l lūa̍a̍ŋ, mbo̍ dīmūl nda̍ lūa̍a̍ŋ ma᷅ŋ. 6Mbo̍ dīmūl nda̍ āā, “Lā tūe̍i̍ yɔ̍ lɔ̍mā ya̍ I̍ sɔ̍l la̍ŋ. 7Na̍a̍ nya̍ā mi̍ ŋ̄ kūā ni᷅ŋ nu̍a̍ā wi̍tīi̍yo̍ŋ kīōlɔ̄ɔ̄. Mɛ̄ɛ̍ na̍a̍ ŋ̄ kēlū mu̍ŋ mi̍ ŋ̄ yīī mu̍ŋ kpɔ̄ŋnda̍ŋ, mi̍ kpɔ᷄ŋ nūu̍ cha᷄ŋ mbo̍ sīm. Mi̍ kpɔ̄ŋnda̍ nyāla̍ŋ lā hu᷄ŋ ba̍lū kpɔ᷄ŋ nūu̍, mi̍ lā tūndu᷄ŋ o̍ kpɔ᷄ŋ nūu̍ bɛ̄ŋgu̍.”

8Mɛ̄ɛ̍ o̍ di̍mu̍l nda̍ lūa̍a̍ŋ ma̍ŋ, mi̍ bɛ̄ndāā ndūa̍a̍ nyūnā ndu̍ āā, “Mɛ̄ɛ̍ ā nɔ̄ mānūāā o̍ kɔ̄l kpe̍e̍kpe̍i̍ māā mā wa̍ na̍a̍ chōo̍ ma̍sa̍?” Le̍ lɔ̄mā ndɔ̄ma̍ ndu̍ o̍o̍ sɔ᷅l ma̍ŋ nda̍ŋ a̍ sɔ̄ɔ̍ŋ ndu̍ o̍o̍ di̍mūl fi̍nyāa̍ a̍ nda̍ o̍kɔ̄ɔ̄ wo̍ŋ, ma̍ chɔ̄ɔ̄lū ndu̍ yɛ̍le̍ŋ tūl mbo̍ hīāū māā pāāndū.

9Fāŋa᷄ŋndo̍ o̍ ko̍ŋ kɔ̍ɔ̍lī, mbo̍ sɔ̄l vɛ̄lɛ̄ lɔ̄mā chēle̍ŋ, mbo̍ chɔ̄m bɛ̄ndāā ndūa̍a̍. Mbo̍ dīmūl nda̍ āā, “Lā tūe̍i̍ yɔ̍ lɔ̍mā ya̍ I̍ sɔ̍l vɛ̄lɛ̄ wa̍ŋ. Mi̍ sɔ᷅l lūa̍a̍ŋ mi̍ cha᷅ pāa̍le̍ŋ, a̍ pāŋge̍i̍, a̍ lōo̍ŋ tɔ̍ a̍ ī pīlɛ̍, mi̍ ŋ̄ hu᷄ŋ de᷅l la̍ o̍ lābɛ̄ŋgu̍ ni̍ŋ.”

10Kɛ̍, mɛ̄ɛ̍ o̍ di̍mu̍l fi̍nyā ndɔ̍ a̍ bɛ̄ndāā ndūa̍a̍ lūa̍a̍ŋ ma᷅ŋ, mi̍ fi̍nyā ndɔ̄ do̍o̍nu᷄ŋ ndu̍ tu̍mbe̍. Mbo̍ nyūnā ndu̍ āā, “Mɛ̄ɛ̍ lɔ̄mā māā vɛ̄ɛ̍nɛ̍ ŋ̄ sɔ᷄l lɛ̄ ni᷅ŋ ma̍ŋ? Bāā ya̍ ni̍, kālā nu̍m ni̍, a̍ bɛ̄ndāā nūmnda̍ mī ŋ̄ tūndu᷄ŋ lɛ᷅ŋ nu̍m o̍ lābɛ̄ŋgu̍ ni̍ŋ?” 11O̍ ko̍ŋ kɔ̍ɔ̍lī, mi̍ bɛ̄ndāā ndūa̍a̍ ā sāā ndu̍ pāŋālāa̍, kɛ̍ ndu̍yɛ̍, fi̍nyā ndɔ̄ ndu̍, mbo̍ kɛ̄si᷄ŋ sɔ̍ɔ̍ŋ mu᷅ŋ o̍ kɔ̄l kpɛ̍.

Ā pīsi̍ Chōo̍sɛ̍ ma̍ kūā a̍ ndu̍ I̍chi̍pī

12Pāa̍le̍ pi᷅lɛ̍, mi̍ bɛ̄ndāa̍ Chōo̍sɛ̍ wa̍ ā kūā a̍ chɔ̄lūa̍a̍ fi̍nyā ndā wa̍ Si̍ɛ̍kɛ̄m īkɛ̄i̍ le̍ di̍o̍la̍ŋ. 13O̍ ko̍ŋ kɔ̍ɔ̍lī, mi̍ I̍sɔ̄lūɛ̄ī di̍mūl Chōo̍sɛ̍ po̍ ndɔ̄ āā, “Chōo̍sɛ̍, bɛ̄ndāā nūmnda̍ chō a̍ chɔ̄lūa̍a̍ Si̍ɛ̍kɛ̄m i̍kɛ̍i̍. I̍ hɛ̍na̍ŋ mī ve᷅m nu̍m nāa̍ nda̍ chūā.”

Mi̍ Chōo̍sɛ̍ dīmī āā, “I̍ chɛ̍l.”

14Mi̍ fi̍nyā ndɔ̄ di̍mūl ndu̍ a̍a̍, “Kɔ̍ mā kɔ̍ to̍fā bɛ̄ndāā nūmnda̍, mā hu̍ŋ di̍mūl la̍ tē ā chō kɛ̄ndɛ̄. I̍ hɛ̍na̍ŋ vɛ̍lɛ̄ mī si̍na̍ tē chɔ̄lūa̍a̍ chō nyɛ̄ kɛ̄ndɛ̍ī.” O̍ ko̍ŋ, mi̍ Chōo̍sɛ̍ ma᷅l nāa̍ nda̍ wa̍ īchāli̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Hi̍būlɔ̄ŋ nda̍.

Mbo̍ kūā Si̍ɛ̍kɛ̄m. 15Ō lo̍ bālɔ̄ɔ̍ o̍ po̍llo̍ ni᷄ŋ nda̍ nūūvīa̍a̍, mi̍ po̍ pi᷅lɛ̍ chā ndu̍. Mi̍ pōo̍ nyūnā ndu̍ āā, “Ō yɛ̄ɛ̍nɛ̍ ŋ̄ chō yɛ̄ nūūvīa̍a̍?”

16Mi̍ Chōo̍sɛ̍ mu̍lī āā, “Bɛ̄ndāā nīa̍a̍ ya̍ cho̍ nūūvīa̍a̍ ni̍. Yāndi̍i̍ chɔ̍m ya̍ nāa̍ nda̍ chō a̍ chɔ̄lūa̍a̍ wa̍.”

17Mi̍ pōo̍ dīmūl ndu̍ āā, “Ā fāŋa̍ŋ na̍nu᷄ŋ. I̍ wa̍ nda̍ tūēīyɔ̄ɔ̍ ma̍ wā dīmu̍la᷅ŋndo̍ āā, ‘Lā ŋ̄ kɔ̄ŋnu᷅ŋ Do̍tāŋ.’ ” Mɛ̄ɛ̍ pōo̍ dīmu̍l ndu̍ le̍nde̍, mi̍ Chōo̍sɛ̍ tu̍āl bɛ̄ndāā ndūa̍a̍ kɔ̄ɔ̄lī nāa̍ nda̍ kūɛ̄ wa̍, mbo̍ sāālu᷄ŋ nda̍ Do̍tāŋ chi̍e̍e̍.

18Ō lo̍ la̍nda̍ŋ, mi̍ bɛ̄ndāā ndūa̍a̍ chā ndu̍ hūnɔ̄ɔ̍. Mɛ̄ɛ̍ nda̍ chē ndu̍, ma̍ chōŋgū ndu̍ le̍ ndu̍ dīyɔ̄ɔ̍. 19Ma̍ dīmu̍la᷅ŋ āā, “Mi̍ che᷄ŋ po̍ sɔ᷅l lɔ̍mā bɛ̄ŋnda̍ŋ ndo̍ hūnɔ̄ɔ̍. 20Kɛ̍ tē ō hīŋ pɛ̍, lā ŋ̄ dīīnu᷅ŋ ndu̍ mī ŋ̄ ma᷄l ndu̍ o̍ so̍o̍ŋnda̍ ve̍lɛ̍i̍la̍ŋ ō pīlɛ̍ ni᷄ŋ. Tē ŋ̄ kūɛ̄ pɛ̍, ŋ̄ kɔ̍ dɔ̍ɔ̍nu᷄ŋ ko̍na̍ māā vīsī bīyāa̍ bīī ndu̍ mbo̍ dīā ndu̍. Ŋ̄ chō chɔ̄ nyɛ̍ fu̍lā ni̍ŋ o̍ lɔ̄mā ndɔ̄ma̍ sɔ̍la᷄ŋ ni᷄ŋ ndo̍.”

21Kɛ̍ mɛ̄ɛ̍ Lūbɛ᷅ŋ tu̍e̍ī nyɛ̄ nda̍ kɛ̄ɛ̄si̍a̍a̍ wo̍, mbo̍ kīndī le̍ yōōmū Chōo̍si̍ɔ̍ɔ̍ chīīndīa̍a̍. Mbo̍ dīmī āā, “Ŋ̄ di̍i̍nūŋ ndu̍ le̍. 22Lā ma᷄l ndu̍ o̍ so̍o̍ŋ ve̍lɛ̍i̍yo̍ ho̍ō ni᷄ŋ o̍ po̍llo̍ ni᷄ŋ na̍nu᷄ŋ. Kɛ̍ lā yɔ᷅ŋ ndu̍ nyɛ̄ le̍.” Lūbɛ᷅ŋ ndu̍ o̍o̍ hɛ̍na̍ŋ mī ndu̍ o̍o̍ hu̍ŋ so̍lī ndu̍ nda̍ tɛ̄ɛ̄ŋ, mī ndu̍ o̍o̍ yɛ̍ɛ̄ ndu̍ nāa̍ fi̍nyā ndɔ̄ chu̍a̍. 23O̍ ko̍ŋ kɔ̍ɔ̍lī, mɛ̄ɛ̍ Chōo̍sɛ̍ fūūlu̍u̍ nāa̍ bɛ̄ndāā ndūa̍a̍ chūā, ma̍ bīī ndu̍. Dōma̍ ndɔ̄ vi̍lɛ̄ī nda̍ a̍a̍ so̍ndu̍l ndu̍ a̍ chōŋgu̍la̍ŋ ndo̍, ma̍ sōlī ndu̍ ndu̍ lēkɔ̄ɔ̍. 24Ma̍ kūā a̍ ndu̍, ma̍ kɔ̍ ma᷅l ndu̍ o̍ so̍o̍ŋ māmɛ̄ŋ vēlɛ̍i̍yo̍ ni᷄ŋ.

25Mālɔ̄ɔ̍ ndu̍ o̍ so̍o̍ŋndo̍ ni᷄ŋ, ma̍ chāl nyɛ̄ dīa̍a̍ dīo̍o̍. Dīmīo̍o̍ nu̍a̍ā ā chu̍a̍ hɔ̄lla̍, mā chā Īsīmāli̍īya̍ hūnɔ̄ɔ̍ ku̍ndāa̍. Ā wa̍ chɔ̄nɔ᷄ŋndo̍ o̍ būŋgɛ̄ī Ki̍i̍li̍a̍dīve̍ ni᷄ŋ ma̍ wā kɔ̄la̍ŋ lɛ̄ŋndē I̍chi̍pīle̍ŋ. Nyɔ̍mi̍a̍a̍ ndāa̍ ā wa̍ hūnɔ̄ɔ̍ a̍ nyɛ̄m yɛ̍ yɛ̍ŋ nda̍ wa̍ kɔ̄la̍ŋ ndo̍ŋ o̍ lākɔ̄ɔ̄. Nyɛ̄m nda̍ dūāū o̍ nyɛ̄ dīa̍a̍ wo̍ŋ ni̍, a̍ nyɛ̄m chūŋ kɛ̄ndɔ᷄ŋ, nyɛ̄m nda̍ tōōsīāā ko̍o̍ma̍ chi̍ɔ̍u̍wa᷄ŋnda̍ŋ ndo̍ŋ. 26Chɔ̄ kōŋ nda̍ hūnɔ̄ɔ̍, mi̍ Chu̍dā lo᷅ o̍ ko̍ŋ mbo̍ dīmūl bɛ̄ndāā ndūa̍a̍ a̍ pɔ̄mbūāā ndūa̍a̍ ā pīli̍a̍a̍ āā, “Tē ŋ̄ dīī pɔ̄mbɔ̄ nāa̍ pɛ̍, mī ŋ̄ vēŋ sūɛ̍i̍ ke̍ŋ, ɔ̍ɔ̄ tɔ̄nɔ̍ na̍a̍ ŋ̄ sɔ̄lā le̍ni̍ŋ ndo̍? 27Le̍la̍ŋ, lā ŋ̄ pīsi᷅ŋ ndu̍ Īsīmāli̍īya̍ ha̍ā o̍ bā. O̍ nɛ̄īyo̍ ho̍ō ni᷄ŋ ŋ̄ di̍ī lɛ̍ ndu̍ mī tɔ̍ɔ̍ya̍ŋ pīɔ̍m ndɔ̄ o̍ wa᷄ na̍a̍ chōo̍ le̍, kāni̍ fo̍ndōle̍, pɔ̄mbɔ̄ nāa̍ o̍ cho̍ ni̍. Na̍a̍ nda̍ā kōo̍ma̍ pi᷅li̍a̍ŋ na̍a̍ ŋ̄ chō ni̍.” Ma̍ chɛ̄l nyɛ̄ Chu̍dā di̍mi̍ wo̍. 28Mɛ̄ɛ̍ wānāā lēyākūa̍a̍ ha̍ā chɛ̍ŋ lɛ᷅ŋndē Mi̍dīāŋnde̍ŋ ma̍ wa̍ hīōūwɔ̄ɔ̍, mi̍ bɛ̄ndāa̍ Chōo̍sīa̍a̍ sōlī Chōo̍sɛ̍ o̍ so̍o̍ŋndo̍ ni᷄ŋ. Ma̍ pīsī ndu̍ Īsīmāli̍īya̍ o̍ bā le̍ ka̍ni̍ŋ hu̍mbo᷄ŋ bi̍di̍i̍ŋ. Mi̍ Īsīmāli̍īya̍ ā kūā a̍ Chōo̍sɛ̍ I̍chi̍pī.

29Mɛ̄ɛ̍ Lūbɛ᷅ŋ mi̍i̍ŋgu̍ o̍ so̍o̍ŋ nda̍ a̍a̍ ma̍l Chōo̍sɛ̍ wo̍, ō sēēlu̍ŋ ndɛ̍ ndu̍ lēni᷄ŋ te̍. Mbo̍ tāmbū kɔ̄l, mbo̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍. 30Mbo̍ mīīŋgū nāa̍ pɔ̄mbūāā ndūa̍a̍ chūā. Mbo̍ dīmī āā, “Pōo̍mbɔ̄ɔ̍ cho̍ lo̍ŋ te̍, vɛ̄ɛ̍nɛ̍ kpe̍e̍kpe̍i̍ ya̍ I̍ cho̍ yɛ̄ yɔ̄ŋ a̍ he̍ī.” 31O̍ ko̍ŋ kɔ̍ɔ̍lī, ma̍ dīī chūīŋndo̍, ma̍ chūā dōma̍ Chōo̍si̍ɔ̍ɔ̍ ma̍ wōū o̍ kōo̍ma̍ ma̍ŋ ni᷄ŋ. 32Ma̍ chūā dōmā ko̍ŋ le̍nde̍ ma̍ yōū fi̍nyā nda̍. Ma̍ dīmūl ndu̍ āā, “Dōmāa̍ ho̍ō na̍a̍ ŋ̄ sāālu̍ŋ ni̍. To̍fa̍ wɔ̍ ko̍ dōma̍ po̍ nu̍mndo̍ ndo̍o̍.”

33Mɛ̄ɛ̍ fāllo̍ mɛ̄ɛ̄ndi̍a̍ŋ do᷅māa̍, mbo̍ sīnā māā Chōo̍sɛ̍ po̍ ndɔ̄ dōma̍ ndɔ̄ɔ̍ ni̍. Mbo̍ dīmī āā, “Dōma̍ po̍ nūu̍ cho̍ ho̍ō ni̍. Vīsī bīyāa̍ di᷄l la̍ po̍ nūu̍ fɔ̍. Vīsīo̍o̍ sɛ̄ɛ̄si̍a̍a̍ Chōo̍sɛ̍ wo̍.” 34Mi̍ Che̍kɔ̍pū fi̍nyā ndā sɛ̍ɛ̍sīa̍ŋ nyɛ᷅la̍ŋ le̍kɔ̄ɔ̍. Mbo̍ wōōnu᷄ŋ nyɛ̍lā lābɛ̍kīla̍ŋ. Mbo̍ chāŋ le̍ po̍ ndɔ̄ɔ̍ le̍ pālɛ̍i̍ fa̍ŋgā. 35Mi̍ pūa̍a̍ ndūa̍a̍ a̍ chūāūwāā ndūāā la̍a̍ndūa̍a̍ kpo̍u̍ a̍ ku̍ā, ma̍ nyɔ̄ɔ̄lū ndu̍. Mbo̍ dīmī āā, “I̍ me̍ī le̍. I̍ cho̍ lō po̍ nūu̍ cha᷄ŋndo̍ ya̍ bɛ̍ɛ̍ mī ko̍ma̍l ndu̍ chi̍e̍e̍ pīɔ̍m.” O̍ ko̍ŋ, mbo̍ hīāū lāchī a̍ cha᷄ŋndo̍ le̍ po̍ ndɔ̄ɔ̍.

36O̍ ko̍ŋ kɔ̍ɔ̍lī, mɛ̄ɛ̍ nda̍ fūūlu̍u̍ a̍ Chōo̍sɛ̍ I̍chi̍pī, mi̍ wānāa̍ fu̍la̍ ka̍ŋ lɛ᷅ŋndē Mi̍dīāŋnde̍ŋ nda̍ ā pīsī ndu̍ po̍ pi᷅lɛ̍ o̍ bā dīōla̍ŋ āā, Pɔ̍ti̍fā. Māsā bɛ̍ndu̍ wa̍ lɛ̄ŋndē I̍chi̍pīle̍ŋ bōlle̍ŋ ndo̍, so̍vɛ̄i̍ya̍a̍ wa̍ ndu̍ māndāa̍ wa̍, Pɔ̍ti̍fā ko̍ŋ wā nda̍ chīla̍ŋ ni̍.

Currently Selected:

Chɛ̄nɛ̍se̍ē 37: YM

Highlight

Copy