Chɛ̄nɛ̍se̍ē 34

Si̍ɛ̍kɛ̄m kpu̍wa̍ Da̍i̍nā

1Pāa̍le̍ pi᷅lɛ̍, mi̍ chūā Che̍kɔ̍pū ve̍lū nda̍ Li̍yā wo̍, dīōla̍ŋ Da̍i̍nā, mbo̍ kūā wāŋ lāāndūāā pi̍la̍ chi̍e̍e̍ya̍ Ke̍nāŋ ā pūm yīlɔ̄ɔ̍. 2Wāna̍ wa̍ māsāa̍ o̍ tāndā kōŋ ni᷄ŋ ndo̍ dīōla̍ŋ āā Ha̍a̍mɔ̄ɔ̄. Hi̍va̍i̍tīi̍nɔ̍ɔ̍ o̍ wa̍ ni̍, ndu̍ o̍o̍ nɔ̍ pōo̍ dīōla̍ŋ āā, Si̍ɛ̍kɛ̄m. Mɛ̄ɛ̍ Da̍i̍nā ku̍ɛ̄ yīlɔ̄ɔ̍, mi̍ Si̍ɛ̍kɛ̄m cha᷅ ndu̍, mbo̍ kpūwā ndu̍. 3O̍ ko̍ŋ, mi̍ Si̍ɛ̍kɛ̄m lu̍ɛ̍ī hɔ̄lte̍ŋ o̍ Da̍i̍nā. Ndu̍ o̍o̍ ka̍a̍la̍ chūāāmbɔ̄ɔ̍ ta̍u̍, le̍ he̍ī, mbo̍ kāndū ndu̍ dɛ̄ɛ̄nīa̍a̍. 4Mi̍ Si̍ɛ̍kɛ̄m ku̍ā mbo̍ kɔ̍ di̍mūl Ha̍a̍mɔ̄ɔ̄ fi̍nyā ndɔ̍ āā, “Kɛ̄kɛ̍, I̍ ye̍e̍ma̍ mā pu̍u̍lu̍l la̍ chūāāmbɔ̄ɔ̍ ho̍ō mbō wa̍ la̍a̍ nī.”

5O̍ ko̍ŋ kɔ̍ɔ̍lī, mi̍ Che̍kɔ̍pū tu̍ɛ̍ī māā Si̍ɛ̍kɛ̄m o̍ kpu̍wa̍ chūā ndɔ̄ɔ̍. Kɛ̍ a̍ bōōndi̍i̍ ke̍ŋ, pūa̍a̍ Che̍kɔ̍pū wa̍ ā wa̍ nāūwa̍ o̍ po̍llo̍ ni᷄ŋ. Le̍ he̍ī, ō tōsa̍ nyɛ᷅ o̍ nyɛ̄ a̍ ndi̍ o̍kɔ̄ɔ̄ le̍. Mbo̍ chūm mi̍ pūa̍a̍ ndūa̍a̍ hūŋ. 6O̍ ko̍ŋ kɔ̍ɔ̍lī, mi̍ Ha̍a̍mɔ̄ɔ̄, fi̍nyāa̍ Si̍ɛ̍kɛ̄m o̍ cha̍ŋ mbo̍ hūŋ nāa̍ Che̍kɔ̍pū chu̍a̍ le̍ mbō sūūki̍āŋ nda̍ ndu̍ a̍ sūɛ̍i̍ he̍ī o̍kɔ̄ɔ̄. 7A̍ bōōndi̍i̍ Ha̍mɔ̍ɔ̄ hi᷅ŋ ke̍ŋ nde̍, mi̍ pūa̍a̍ Che̍kɔ̍pū wa̍ bɛ̍ɛ̍ a̍ hu᷅ŋ ki̍nɛ̍i̍. Ā lo̍ lo̍ŋ ma̍ tūɛ̄ī a̍ ndi̍ o̍kɔ̄ɔ̄, ma̍ cha᷄ŋ ma̍ hūŋ. Mi̍ sūɛ̍i̍ nɛ̄ī nda̍ ta̍u̍, māā nyɛ̄ Si̍ɛ̍kɛ̄m to̍sa̍ ko̍ŋ mbo̍ kpūwā chu̍a̍ Che̍kɔ̍pū wo̍, mbo̍ wā a̍ ndu̍ wo̍, mɛ̄ɛ̍ yēīyo̍ o̍ ye̍i̍ ko̍ŋ yu̍ŋgu̍ Che̍kɔ̍pū wo̍ ni̍. He̍ī wa̍ sūɛ̍i̍ lāsi̍ɔ̍mbu̍ le̍ yu̍ŋgo̍o̍ I̍sɔ̄lūɛ̄ī. 8Kɛ̍ mi̍ Ha̍a̍mɔ̄ɔ̄ di̍mūl nda̍ āā, “Kāālā chūā nyāa̍ o̍ hi̍u̍ŋ bɔ̍ɔ̍ Si̍ɛ̍kɛ̄m po̍ nī o̍ kɔ̄l pu᷅ŋ. Lēla̍ŋ, lā yāndi̍i̍, lā ke᷄ ndu̍ ō wa̍ la̍a̍ ndɔ̄. 9Na̍a̍ nya̍ā ŋ̄ wāŋnu᷅ŋ dīōm pīlɛ̍, mī ŋ̄ wa̍ lāāndūa̍a̍ kēna᷅ŋndo̍ vēllāa̍ vēllē. 10Ŋ̄ wāŋnu᷅ŋ na̍nu᷄ŋ na̍a̍ nya̍ā. Bā o̍ bā nya̍ hɛ̄na̍ŋ le̍ chālle̍ o̍ lɛ̄ŋnde̍ŋ ni᷄ŋ pɛ̍, lā chāā i̍cha̍li̍ lo̍ŋ, kāsī bɛ̍ɛ̍ cho̍ nya̍ le̍. Yākōle̍ŋ bɛ̍ɛ̍ lā tōsā na̍nu᷄ŋ mī lā sɔ̄la̍ nyɛ̄ nyā sɔ̍lāā.”

11Si̍ɛ̍kɛ̄m bɛ̍ɛ̍ mbo̍ sūāā nāa̍ fi̍nyāa̍ chūa̍a̍ chūā nda̍ yēmāa̍ ndūa̍a̍. Mbo̍ dīmūl nda̍ āā, “Lā māla̍ ya̍ mī lā ke̍ ya̍ chūa̍a̍ ho̍ō. Tē lā chɛ᷄l le̍ ya̍ ndu̍ kīo̍o̍ pɛ̍, nyɛ̄ o̍ nyɛ̄ nya̍ dīmu̍l la̍ le̍ yɔ̄ŋgōo̍ pɛ̍, yɔ̄ŋgōo̍ ya̍ I̍ yɔ̍ŋgū ni̍. 12Nyɛ̄ o̍ nyɛ̄ nya̍ dīmi̍ le̍ kālāa̍ ŋ̄chūāūwa̍ yɔ̄ŋgōo̍, I̍ chɛ̍l mī yɔ̍ŋgu̍. Fu̍lo̍o̍ bɛ̍ɛ̍, mɛ̄ɛ̍ o̍ mɛ̄ɛ̍ nya̍ hɛ̄na̍ŋ le̍ ndu̍ kīōlɔ̄ɔ̍, lā kīōlu̍ ya̍ chōo̍. I̍ chɛ̍l mī yɔ̍ŋgu̍, hāli̍ su̍e̍e̍ lā ke̍ ya̍ ndu̍ mbō wa̍ la̍a̍ nī.”

13Kɛ̍ ndu̍yɛ̍, le̍ bɛ̄ɛ̄la̍ Si̍ɛ̍kɛ̄m o̍ tɛ̍ɛ̍mbu̍u̍ yēmā nda̍ la̍ŋ, ma̍ tōsāl nda̍ wo̍yāa̍. 14Ma̍ mūlūl nda̍ āā, “Na̍a̍ o̍ ka̍ā nāa̍ ni᷄ŋ, wāna̍ ve̍ o̍ hi̍vīāā o̍ chīɛ̄ī kɔ̄ɔ̄lī le̍, ŋ̄ ke᷅ nu̍m yēmā na̍a̍ le̍. Sūɛ̍i̍ wɔ̍ɔ̍ŋ bɛ̄ndū i̍ wa᷅ le̍ yu̍ŋgu̍ nāa̍ ni̍. 15Le̍ mī ŋ̄ chɛ᷄l nyɛ̄ nya̍ dīmi̍ wo̍, mɛ̄ɛ̍ mī lā sɔ̄la̍ hīvīo̍o̍ o̍ chīɛ̄ī kɔ̄ɔ̄lī, mɛ̄ɛ̍ na̍a̍ ŋ̄ chō ā hīvīāā yɛ̍. Wāŋ pīāāndūa̍a̍ ki̍nɛ̍i̍ nya̍ tɛ̄ɛ̄ŋ, mɛ̄ɛ̍ mā sɔ̄la̍ fɛ̍lɛ̍ŋ hi̍vīo̍o̍ o̍ chīɛ̄ī kɔ̄ɔ̄lī. 16Tē lā tōsa̍ le̍nde̍ pɛ̍, ŋ̄ nɔ̄lā ni᷅ŋ na̍a̍ nya̍ā mī ŋ̄ kēna᷅ŋ la̍a̍ndūa̍a̍ vēllāa̍ vēllē, mī ŋ̄ cha᷄l nya̍ tɛ̄ɛ̄ŋ, mī ŋ̄ sīmnu᷄ŋ wa̍nāā pīlɛ̍. 17Kɛ̍ ndu̍yɛ̍, tē lā kɛ̄ɛ̍ dɔ̍ɔ̍ le̍ hīvīo̍o̍ sɔ̄lāa̍ mɛ̄ɛ̍ na̍a̍ ŋ̄ dīmi̍ yɛ̍ pɛ̍, mɛ̄ɛ̍ ŋ̄ chō chūā nāa̍ chūā, mī ŋ̄ fāŋa̍ŋ na̍nu᷄ŋ, mī ŋ̄ kūɛ̄nu᷄ŋ.”

18Mi̍ Si̍ɛ̍kɛ̄m nda̍ Ha̍a̍mɔ̄ɔ̄ fi̍nyā ndɔ̄ a̍ chɛ᷅l nyɛ̄ nda̍ dīmi̍ wo̍. 19Ta̍ma̍la̍ bɛ̍ɛ̍ Si̍ɛ̍kɛ̄m to̍sa̍ le̍ nyɛ̄ nda̍ dīmi̍ wo̍ tōsāa̍ le̍. Kāni̍ fu̍u̍le̍, a̍ mɛ̄ɛ̍ ndu̍ o̍o̍ ka̍a̍la̍ chu̍a̍ Che̍kɔ̍pū wo̍ ho̍ō yɛ̍. Si̍ɛ̍kɛ̄m yɛ̍ o̍ yu̍ŋgu̍ ndāa̍ chōo̍ ni᷄ŋ, ndu̍ wa̍ wāna̍ nda̍ a̍a̍ kɛ̍si̍ kɔ̄llo̍ chōo̍ mbo̍ hīāū kpo̍u̍ wo̍ ni̍.

20O̍ ko̍ŋ kɔ̍ɔ̍lī, mi̍ Ha̍mɔ̍ɔ̄ nda̍ Si̍ɛ̍kɛ̄m po̍ ndɔ̄ a̍ ma᷅l, ma̍ mīīŋgū. Ma̍ kɔ̍ ve̍e̍lū pūa̍a̍ ki̍nɛ̍i̍ nāa̍ nda̍ bīī bɔ᷅ŋa᷅ŋnda̍ŋ o̍ sāāsa̍ chi̍o̍o̍ sōndōo̍ wa̍. 21Ma̍ dīmūl nda̍ āā, “Wānāa̍ hi᷅ŋ ha̍ā wa̍ na̍a̍ nda̍ā ŋ̄ chō wānāā pīlɛ̍. Le̍la̍ŋ ŋ̄ chɛ̄lnu᷅ŋ nda̍ mā cha᷄l o̍ lɛ̄ŋndē nāāle̍ŋ ni᷄ŋ, mā tōsa̍ yākōle̍ŋ na̍nu᷄ŋ. Ā yɔ᷄ŋ bɛ̍ɛ̍ mā cha᷄l na̍nu᷄ŋ, lɛ̄ŋnde̍ŋ lē wā tu̍u̍le̍ŋ le̍ na̍a̍ nda̍ā fa̍ū. O̍ fūla̍ o̍ ko̍ŋ kɔ̍ɔ̍lī, ŋ̄ nɔ̄lā na̍a̍ nda̍ā mī ŋ̄ kēna᷅ŋ la̍a̍ndūa̍a̍ vēllāa̍ vēllē. 22Kɛ̍ ndu̍yɛ̍, ā dīmi̍ māā le̍ mā chɛ᷄l mī ŋ̄ cha᷄l na̍nu᷄ŋ na̍a̍ nda̍ā, mī ŋ̄ wa̍ dīōmndo̍ ō pīlɛ̍, mɛ̄ɛ̍ mī ŋ̄ hīvi̍ wānā pɔ̍nɔ̍ o̍ wānā pɔ̍nɔ̍ na̍a̍ tɛ̄ɛ̄ŋ, mɛ̄ɛ̍ nda̍ chō ā hīvīāā yɛ̍.” 23Ma̍ dīmūl nda̍ āā, “Tē ō wa̍ ni᷅ŋ pɛ̍ mā cha᷄l na̍a̍ tɛ̄ɛ̄ŋ, nyɛ̄ o̍ nyɛ̄ fe̍e̍ nda̍ nɔ̄, kɔ̍ bi̍ī a̍ lāchɔ̄lū, na̍a̍ ko̍ni̍ ŋ̍ nɔ᷅ ni᷅ŋ mu̍ŋ fa̍ū ni̍. Le̍la̍ŋ, ŋ̄ chɛ̄lnu᷅ŋ nyɛ̄ nda̍ dīmi̍ wo̍, mā cha᷄l na̍nu᷄ŋ.” 24O̍ ko̍ŋ kɔ̍ɔ̍lī, wānā pɔ̍nɔ̍ o̍ wānā pɔ̍nɔ̍ ku̍ɛ̄ o̍ lu᷅ŋ ndo̍ŋ, ma̍ chɛ̄l dīōm māsāa̍ Ha̍a̍mɔ̄ɔ̄ nda̍ Si̍ɛ̍kɛ̄m po̍ ndɔ̄ a̍ di̍mi̍ wo̍. Wāŋ pīāāndūa̍a̍ kpo̍u̍ chi̍e̍e̍ lo̍ŋ ma̍ sɔ̄ɔ̄ŋgūū ma̍ hīvī nda̍ o̍ chīɛ̄ī kɔ̄ɔ̄lī kpo̍u̍.

25Mɛ̄ɛ̍ pālɛ̍i̍ ī hīōū ī yāa̍, a̍ bōōndi̍i̍ kpɛ̍ŋnde̍ ī nɛ̄ī nɛ̍ī bɛ̄ndōo̍ ve̍, mi̍ Che̍kɔ̍pū pūa̍a̍ ndūa̍a̍ ā ŋīɔ̍ɔ̍ŋ, Si̍mīɔ̄ŋ nda̍ Li̍va̍ī, Da̍i̍nā yēmāa̍ ndūa̍a̍, ma̍ sɔ̄ɔ̄ŋgūū ma̍ chūā mɔ̄ɔ̄ŋ ndāa̍ŋ fāŋndo̍ŋ. Ma̍ lūɛ̄ī chi̍e̍e̍ sɔ̍ɔ̍ sɔ̍ɔ̍, ma̍ kɔ̍ lɔ̍ɔ̍vīāā wānā pɔ̍nɔ̍ o̍ wānā pɔ̍nɔ̍ lo̍ŋ, ma̍ dīū nda̍ pa̍ku̍. 26Ma̍ kūā vɛ̄lɛ̄ ma̍ kɔ̍ lɔ̍ɔ̍vīāā māsāa̍ Ha̍a̍mɔ̄ɔ̄ nda̍ Si̍ɛ̍kɛ̄m po̍ ndɔ̄, ma̍ dīū nda̍. Ma̍ sōlī yēmā nda̍ o̍ Si̍ɛ̍kɛ̄m ndo̍ chi̍ɛ̍ī ni̍ŋ ma̍ kūānu᷄ŋ a̍ ndu̍. 27Mɛ̄ɛ̍ Che̍kɔ̍pū pūa̍a̍ ndūa̍a̍ ā pīli̍a̍a̍ ā hu᷄ŋ sa̍a̍lu᷄ŋ māā bɛ̄ ndā wa̍ā ā mīŋgi̍ māa̍ yēmā nda̍ wo̍ ma̍ dīū pūa̍a̍ kpo̍u̍, mi̍ nda̍ pūŋgā nyɛ̄ o̍ nyɛ̍ wa̍ chi̍e̍e̍ lo̍ŋ. Kāni̍ fu̍u̍le̍, le̍ nyɛ̄ nda̍ tōsa̍ a̍ yēmā nda̍ wo̍. 28Ma̍ bīū chɔ̄lūāā ndāa̍, lāsāā ni̍, lānāū ni̍, lāsōfɛ̍lɛ̍ ni̍, a̍ nyɛ̄ o̍ nyɛ̄ chēle̍ŋ nda̍ a̍a̍ nɔ̍ chi̍e̍e̍ kɛ̄lɛ̄ŋgāā yōndō ni᷄ŋ. 29Ma̍ chɔ̄ɔ̄vīāā nyɛ̄ o̍ nyɛ̄ ba̍ā kāla̍ wa̍ chi̍e̍e̍ lo̍ŋ. Ma̍ bīū chūāūwāā ndāa̍ ā lāāndāā ndāa̍ lo̍ wa̍, ma̍ kūānu᷄ŋ a̍ nda̍, a̍ nyɛ̄ o̍ nyɛ̄ fe̍e̍ wa̍ chīɛ̄īla̍ŋ ni᷄ŋ.

30Mɛ̄ɛ̍ Che̍kɔ̍pū che᷅ wa̍li̍ Si̍mīɔ̄ŋ nda̍ Li̍va̍ī a̍ to̍sa̍ wo̍, mbo̍ dīmūl nda̍ āā, “Si̍mīɔ̄ŋ nya̍ Li̍va̍ī lā ma᷄l la̍ kpūndɔ̍ɔ̍ chōo̍ wo̍o̍. Lā sīīŋgu̍u̍ ya̍ wānā wɔ̍ɔ̍ŋ kāa̍la̍ ba̍lu̍ la᷅ŋ ki̍nɛ̍i̍ la̍ŋ o̍ hɔ̄l. Ke̍na̍na̍i̍tīi̍ya̍ ni̍, Pɛ̍lu̍i̍sa̍i̍tīi̍ya̍ ni̍, a̍ kāa̍la̍ che᷅le̍ŋnda̍ cho̍ na̍nu᷄ŋ nda̍ŋ, tē ā tūēī he̍ī pɛ̍ mā yīīna᷅ŋ di̍ōm pīlɛ̍, mā hu᷄ŋ sa̍ā ya̍ a̍ sɔ̍ŋgɔ̄ɔ̍, I̍ nɔ̍ yɛ̍ pūa̍a̍ bɔ̍ɔ̍ le̍, mɛ̄ɛ̍ chīīyo̍ ko̍ni̍ le̍ nda̍ chō na̍a̍ hūnɔ̄ɔ̄ yu̍ŋgu̍ pa̍ku̍ le̍?”

31Kɛ̍ ma̍ dīmūl fi̍nyā nda̍ āā, “Vɛ᷅ mbō kūɛ̍i̍ le̍nde̍ a̍ yēmā na̍a̍, mɛ̄ɛ̍ nda̍ yɔ̄ŋ ko̍ āā wānā la̍nɔ̍ ke̍ī su̍u̍ndīāāla̍ŋ ndo̍ o̍ cho̍ ni̍?”

Currently Selected:

Chɛ̄nɛ̍se̍ē 34: YM

Highlight

Copy