Chɛ̄nɛ̍se̍ē 32

Che̍kɔ̍pū bɛ̍ɛ̍ndi̍a̍ŋ le̍ I̍īsɔ̄ kōmāllo̍

1O̍ ko̍ŋ kɔ̍ɔ̍lī, mi̍ Che̍kɔ̍pū nda̍ yu̍ŋgu̍ ndɔ̄ɔ̍ ā hīāū lāchī a̍ kɔ̄la̍ŋ. Mɛ̄ɛ̍ nda̍ wa̍ kɔ̄la̍ŋ, mi̍ ki̍i̍la̍a̍ Mɛ̄lɛ̄ka̍a̍ ā hūŋ nāa̍ Che̍kɔ̍pū chu̍a̍. 2Mɛ̄ɛ̍ Che̍kɔ̍pū che᷅ nda̍, mbo̍ dīmī āā, “Na̍nu᷄ŋ dɔ̍ɔ̍ŋgɔ̍ Mɛ̄lɛ̄ka̍ nūu̍ chō ni̍.” Mbo̍ kē fo̍ndāŋ kōŋ dīōla̍ŋ āā Māha̍nīm.

3O̍ ko̍ŋ kɔ̍ɔ̍lī, mi̍ Che̍kɔ̍pū so̍lī wāŋnda̍, mbo̍ vīām nda̍ lāchī a̍ yōōŋgōo̍ nāa̍ I̍īsɔ̄ bɛ̍ndɔ̄ chu̍a̍, o̍ lɛ̄ŋndē Si̍ɛ̍ɛ̄le̍ŋ ni᷄ŋ. Le̍ nda̍ vēēlū vɛ̍lɛ̄ āā, lɛ̄ŋndē I̍dɔ̄mnde̍ŋ nde̍ŋ. 4Mbo̍ chōŋgu᷄ŋ nda̍ āā, “Tē lā kūɛ̄ pɛ̍, lā dīmu̍l wa᷅na̍ nī ba̍nāa̍ I̍īsɔ̄ māā ya̍ bu̍ɛ̍i̍ ndɔ̄ɔ̍ Che̍kɔ̍pū ya̍ i̍i̍ ku̍ɛ̄ Le̍bāŋ o̍ bɛ̄ŋgu̍ cho̍o̍. Lo̍ŋ ya̍ I̍ lo̍ ha̍a̍a̍ ni̍ mɛ̄ɛ̍ hūnɔ̄ɔ̄ ya̍ I̍ cho̍ ho̍ō wo̍. 5Lā dīmu̍l ndu̍ māā I̍ nɔ̍ nāūwa̍, a̍ sōfɛ̍li̍a̍a̍, a̍ sāa̍, a̍ chūīŋnda̍, a̍ bu̍ɛ̍i̍yāā wāŋ pīāāndūa̍a̍ a̍ ā lāāndūa̍a̍. Le̍la̍ŋ, dīmūllo̍ ya̍ I̍ cho̍ ndu̍ wa᷅na̍ nī ba̍nāa̍ ni̍ māā I̍ hi᷅ŋ, māā I̍ hɛ̍na̍ŋ mbō na᷄ŋ kɔ̄l a̍ ya̍.”

6Mi̍ wānāā Che̍kɔ̍pū ve᷅m nda̍ kūā ma̍ mīīŋgū. Mɛ̄ɛ̍ nda̍ hīŋ ma̍ dōōnu᷄ŋ ndu̍ ko̍na̍ āā, “Ŋ̄ kūɛ̄ mi̍ ŋ̄ kɔ̍ do̍o̍nu᷄ŋ I̍īsɔ̄ bɛ̍nu̍m ko̍na̍. Ō chō hūnɔ̄ɔ̍ nāa̍ nu̍m chu̍a̍. Ō chō hūnɔ̄ɔ̍ a̍ pūa̍a̍ kɔ̄ɔ̄lī kɛ̄mɔ̄ɔ̍ lē hīɔ̍ɔ̍lu̍ (400).” 7Mɛ̄ɛ̍ nda̍ dōōnu̍ŋ Che̍kɔ̍pū ko̍na̍ le̍nde̍, mi̍ sīōōŋnde̍ bīī ndu̍ ta̍u̍, mbo̍ kāndū būūla᷄ŋndo̍. Le̍ he̍ī, mbo̍ pīɔ̄ū wānāā ndūa̍a̍ ku̍ndāla̍ŋ lā tīɔ̍ɔ̍ŋ. Sāa̍ ni̍, a̍ chūīŋnda̍, a̍ nāūwa̍, a̍ nyɔ̍mi̍a̍a̍, mbo̍ pīɔ̄ū nda̍ sālā tīɔ̍ɔ̍ŋ, mbo̍ yāā nda̍ o̍ fo̍ndāŋnda̍ŋ te̍ŋge̍ŋ te̍ŋge̍ŋ. 8Kāni̍, kɛ̄ɛ̄sīāā ndɔ̄ɔ̍ wa̍ ni̍ māā, tē I̍īsɔ̄ o̍ de̍l ku̍ndāa̍ ō pīlɛ̍ chōo̍ mbō dīu̍ nda̍ pɛ̍, ō wa̍ bɛ̍ɛ̍ ku̍ndāa̍ ō pīlɔ̍ɔ̍ ndu̍ nɔ̍lā mbō hɛ̄lu᷄ŋ.

9O̍ ko̍ŋ kɔ̍ɔ̍lī, mi̍ Che̍kɔ̍pū pi̍ɛ̍ī Mɛ̄lɛ̄ka̍. Mbo̍ dīmī āā, “O̍o̍ Mɛ̄lɛ̄ka̍, nūm Mɛ̄lɛ̄ka̍ fi̍nyā nī ma̍māa̍ E̍bīlāha᷅m, fi̍nyā nūu̍ Āa̍se̍ a̍ pi̍ɛ̍ī yo̍. Nūm Mɛ̄lɛ̄ka̍ Ya̍a̍wɛ̄ɛ̄, nu᷄m di̍mu̍l la̍ ni̍ māā ya̍ I̍ chɔ̍ŋ mī mi̍i̍ŋgu̍ o̍ lɛ̄ŋndē nīle̍ŋ ni᷄ŋ, nāa̍ wānāā nīa̍a̍ chūā, ma̍ dīmī māā ā chō ya̍ mālā. 10Ndu̍yɛ̍ nyɛ̄ o̍ nyɛ̄ ŋ̄ chūe̍l la̍ būŋgɛ̄i̍ ma̍ tōsā ndu̍ mɛ̄ɛ̍ ŋ̄ dīmi̍ yɛ̍. I̍ cho̍ bɛ̍ɛ̍ le̍tu̍u̍ le̍ tōnya̍ wāā le̍nde̍ sɔ̍lā nu̍m o̍ bā le̍. Kɔ̄lā ya̍ I̍ wa̍ mī ta᷅ŋ Chɔ̍ɔ̍dāŋ nda̍ŋ ndo̍, mɛ̄ɛ̍ tīnda̍a̍ mbo̍ wā ya̍ o̍ bā. I̍ ku̍e̍ a̍ nyɛ̄ o̍ nyɛ̄ o̍ bā le̍. Kɛ̍ hāū ni᷅ŋ, I̍ cho̍ mīīŋgōo̍ a̍ wāŋnda̍ ku̍ndāla̍ŋ lā tīɔ̍ɔ̍ŋ. 11Le̍la̍ŋ, Mɛ̄lɛ̄ka̍ Ya̍a̍wɛ̄ɛ̄, ma̍nda̍ ya̍ I̍īsɔ̄ bɛ̍nī o̍ yɔ᷅ŋ ya̍ nyɛ̄ le̍. Sīōōŋīī ndūɛ̍i̍ chō ya̍, yɔ̄ŋi̍ o̍ hu̍ŋ di̍ū na̍a̍ kpo̍u̍ na̍a̍ chɔ̄ūwāā nīa̍a̍ a̍ kālāa̍ ndāa̍.” 12Mi̍ Che̍kɔ̍pū hi̍a̍ū lāchī a̍ pīɛ̄īle̍ŋ āā, “Kɛ̍ ndu̍yɛ̍, nūm Mɛ̄lɛ̄ka̍ a̍ di̍mu̍l la̍ māā ā chō ya̍ mālā o̍ īsɔ̄ɔ̍ o̍ īsɔ̄ɔ̍ ni̍ŋ. Ma̍ dīmī vɛ̄lɛ̄ māā ā chō tōsā mī wānāa̍ cho̍ fūlā o̍ pūlālē nīle̍ŋ chōo̍ wa̍ ā wa̍ fāŋgā māā si̍o̍ōŋnde̍ o̍ pēē mɛ̄ŋmā īhɛ᷄llo̍ kɔ̄ŋgɔ̍, ā chu̍ū chɔ᷅m te̍.”

13O̍ ko̍ŋ kɔ̍ɔ̍lī, mi̍ Che̍kɔ̍pū lɔ᷅l lo̍ŋ nyu᷅mmā māŋ. Dīi̍mā ndɔ̄ɔ̍, mbo̍ chūā chɔ̄lūa̍a̍ ā ti᷄ŋ le̍ I̍īsɔ̄ kīo̍o̍. Chɔ̄lūāā kāŋ nda̍ cho̍ ha̍ā nī. 14Chūīŋāā lāāndūa̍a̍ kɛ̄mɔ̄ɔ̍ lē dīi̍ŋ (200), chūi̍ŋāā tōōyīa̍a̍ bi̍di̍i̍ŋ, sāā la̍a̍ndūa̍a̍ kɛ̄mɔ̄ɔ̍ lē dīi̍ŋ (200), sāā ko̍ndu̍a̍a̍ bi̍di̍i̍ŋ, 15nyɔ̍mi̍a̍a̍ nɔ̍ mɛ̄ɛ̄ya̍ŋ le̍ wāāyīa̍a̍ wa̍ be̍le̍-ya̍a̍ a̍ chūāūwāā ndāa̍, nāūwāā lāāndūa̍a̍ be̍le̍-hi̍ɔ̍ɔ̍lu̍, nāūwāā tōōyīa̍a̍ tɔ̍, sōfɛ̍li̍a̍a̍ la̍a̍ndūa̍a̍ bi̍di̍i̍ŋ, sōfɛ̍li̍a̍a̍ pi̍a̍a̍ndūa̍a̍ tɔ̍. 16Mi̍ Che̍kɔ̍pū chu̍ā chɔ̄lūa̍a̍ ha̍ā mbo̍ dīmūl bu̍ɛ̍i̍yāā ndūa̍a̍ māā ā hīo̍u̍ pɔ̍ɔ̍ ndu̍ lāchī a̍ nda̍. Mbo̍ dīmūl nda̍ māā a̍ kɔ̍ a̍ nda̍ a̍ ku̍ndāla̍ŋ le̍nde̍ te̍ŋge̍ŋ te̍ŋge̍ŋ, ndu̍yɛ̍ mā ma᷅lna᷅ŋ fo̍ndāŋnda̍ŋ tɛ̄ɛ̄ŋ. 17Mbo̍ dīmūl bu̍ɛ̍i̍yāa̍ wa̍ kɔ̄la̍ŋ a̍ ku̍ndā tāso̍o̍ wa̍ āā, “Tē lā bɔ̄ŋa᷅ŋ nya̍ bɛ̄nūu̍ I̍īsɔ̄ wa̍ā pɛ̍, mbō nyūna̍ nya̍ āā, ‘Bu̍ɛ̍i̍yāa̍ nɛ̄ɛ̍nɛ̍ nya̍ chō yɛ̄? Kūɛ̍ɛ̍nɛ̍ nya̍ chō yɛ̄ la̍ŋ? Nɛ̄ɛ̍nɛ̍ nɔ̍ yɛ̄ chɔ̄lūa̍a̍ cho̍ ka̍ŋ kɔ᷅la̍ŋ nya̍ lāchī wa̍?’ Tē ō nyūna̍ nya̍ le̍nde̍ pɛ̍, 18lā dīmu̍l ndu̍ āā, ‘Bu̍ɛ̍ī nūmndo̍ Che̍kɔ̍pū nɔ̍ nda̍ ni̍. Ō dīmi̍ āā, nda̍ o̍ chu̍u̍ nūm wāna̍ ndɔ̄ ba̍nāa̍ o̍ bā ni̍. Ndu̍ pi̍la̍ cho̍ hūnɔ̄ɔ̍ kɔ̄ɔ̄lī.’ ” 19Bu̍ɛ̍i̍yāa̍ wa̍ kɔ̄la̍ŋ a̍ chɔ̄lūāā ku̍ndā dīi̍ŋ ndɔ̄ɔ̍ wa̍ ni̍, a̍ bu̍ɛ̍i̍yāa̍ wa̍ kɔ̄la̍ŋ a̍ chɔ̄lūāā ku̍ndālā yɛ̍ yɛ̍la̍ŋ lā tɔ̄la̍ŋ nda̍ fa̍ū, chōŋgɔ᷄ŋ pi᷅lɛ̍ kōŋ ko̍ni̍ o̍ cho̍ŋgu̍ŋ nda̍ le̍ I̍īsɔ̄ dīmu̍llo̍ tē ā bɔ̄ŋa᷅ŋ pɛ̍ ni̍. 20Mbo̍ dīmūl nda̍ āā, “Lā dīmu̍l ndu̍ āā, ‘Bu̍ɛ̍ī nūmndo̍ Che̍kɔ̍pū pi̍la̍ bɛ̍ɛ̍ ō chō hūnɔ̄ɔ̍ kɔ̄ɔ̄lī.’ ” Kāni̍, yīya᷄ŋndo̍ Che̍kɔ̍pū yi̍ya̍ŋ ni̍ māā, tē chɔ̄lūāā o̍ chu̍u̍ I̍īsɔ̄ wa̍ ā kōma̍l ndu̍ pɛ̍, kɔ̄llo̍ chō ndu̍ pɔ̄lūl, māā tē I̍īsɔ̄ pɔ̍lu̍l ni᷅ŋ kɔ̄l pɛ̍ ō kūɛ̄ ni᷅ŋ ā kɔ̍ chi̍i̍ki̍āŋ. Mbo̍ yīya᷄ŋ māā bɛ̍ndɔ̄ cho̍ ndu̍ chɛ̄lɔ̄ɔ̄ a̍ kɔ̄l kɛ̄ndɛ̄. Chīīyo̍ nda̍ chōŋgɔ᷄ŋndo̍, 21mbo̍ hīvī chɔ̄lūāā o̍ chu̍u̍ I̍īsɔ̄ o̍ bā wa̍ lāchī. Mi̍ ndu̍ pi̍la̍ lɔ᷅l nyūmmā māŋ o̍ fo̍ndāŋ kōŋ.

Che̍kɔ̍pū sɔ̍ŋga̍ nda̍ pōo̍ Pɛ̍nīɛ̄l

22-23Nyūmmā māŋ kpe̍e̍kpe̍i̍, mi̍ Che̍kɔ̍pū cha̍ŋ mbo̍ chūā lāāndāā ndūāā ŋi̍ɔ̍ɔ̍ŋnda̍, a̍ pūa̍a̍ ndūāā ŋ̍wa᷅ŋ tɔ̍ a̍ wānā pi᷅li̍a̍a̍, a̍ lāāndāā ndūāā ŋi̍ɔ̍ɔ̍ŋnda̍ ā pīli̍a̍a̍, a̍ nyɛ̄ o̍ nyɛ̄ ndɔ̄. Mbo̍ tɛ̄ɛ̄ŋgūū nda̍ Cha̍bɔ̍kī le̍e̍lōo̍. 24Mɛ̄ɛ̍ o̍ tɛ̍ɛ̍ŋgu̍u̍ nda̍, mi̍ ndu̍ pi̍la̍ lo᷅ kɔ̄ŋgɔ̍ɔ̍ pīlɔ̍ɔ̍ ndu̍ pīlɛ̍. Ī chɔ̄l kōŋ, mi̍ pōo̍ hu᷄ŋ sa̍ā ndu̍ a̍ sɔ̍ŋgɔ̄ ŋ̄būŋndo̍. Ma̍ lō sɔ̍ŋgɔ̄ɔ̍ mi̍ pāa̍le̍ŋ lē hūŋ le̍ sīɔ̍ɔ̍. 25Mɛ̄ɛ̍ wāna̍ nda̍ wa̍ sɔ̍ŋgɔ̄ɔ̍ wo̍ sāālu̍ŋ māā ō nɔ̍lā Che̍kɔ̍pū le̍, mbo̍ lūāā Che̍kɔ̍pū lɔ̄lū tūmndo̍, mbo̍ bēēŋgīāā ndu̍ lɔ̄lōo̍. 26Mi̍ pōo̍ lō o̍ ko̍ŋ mbo̍ dīmūl Che̍kɔ̍pū āā, “Ma̍l la̍ I̍ ku̍a̍nūŋ, ā chē mɛ̄ɛ̍ pāa̍le̍ŋ lē chō ni᷅ŋ sīɔ̍ɔ̍ yɛ̍.”

Kɛ̍ mi̍ Che̍kɔ̍pū di̍mūl ndu̍ āā, “Mɛ̄ɛ̍ mā dɔ̄ū ya̍ fɛ̍ɛ̍ŋ sa̍lā ma̍lāŋ ya̍ ma᷅l nu̍m mā kūɛ̄.”

27Mi̍ wānā ko̍ŋ nyūnā ndu̍ āā, “Ɔ̍ɔ̄ dīōlā nūmnda̍ŋ?”

Mbo̍ mūlī āā, “Dīōlā nīla̍ŋ āā, Che̍kɔ̍pū.”

28Mi̍ wānā ko̍ŋ dīmūl ndu̍ āā, “Chɔ̍ŋ a̍ hāū dīōlā nūmnda̍ cho̍ lɛ̍ āā, Che̍kɔ̍pū le̍, dīōlā nūmnda̍ŋ ni᷅ŋ āā I̍sɔ̄lūɛ̄ī. Kāni̍ fu̍u̍le̍, a̍ sɔ̍ŋga̍ nya̍ Mɛ̄lɛ̄ka̍, ma̍ sɔ̄ŋgā nya̍ wāŋndā chīe̍e̍ya̍, ma̍ yām.”

29Mi̍ Che̍kɔ̍pū di̍mī āā, “Nūm bɛ̍ɛ̍ chɔ̍m ya̍ dīōlā nūmnda̍ŋ.” Kɛ̍ mi̍ pōo̍ dīmūl ndu̍ āā, “Ɔ̍ɔ̄ le̍ sa̍bū ŋ̄ yēēma̍ dīōlā nīla̍ŋ sīnāa̍ wo̍?” O̍ ko̍ŋ kɔ̍ɔ̍lī, mbo̍ dūāū Che̍kɔ̍pū sa̍lā.

30Mi̍ Che̍kɔ̍pū lo᷅ o̍ ko̍ŋ mbo̍ kē fo̍ndāŋ kōŋ dīōla̍ŋ āā, Pɛ̍nīɛ̄l, kāni̍, mi̍ Che̍kɔ̍pū di̍mī āā, “Ŋ̄ chāna᷅ŋ ha̍ū hɔ᷅lla̍ pɛ̍ɛ̍ŋ na̍a̍ Mɛ̄lɛ̄ka̍, kɛ̍ mbo̍ chīīndīāā yōōmū nūu̍.” 31Le̍ mī Che̍kɔ̍pū ma̍l ni᷅ŋ Pɛ̍nīɛ̄l, pāa̍le̍ŋ lē wa̍ ni᷅ŋ lē hēlāā. Mbo̍ kūā a̍ tīndāa̍ a̍ lɔ̄lū kōŋ. 32Le̍ sa̍bōo̍ ho̍ō, pāa̍le̍ hāūle᷅ŋ bɛ̍ɛ̍ I̍sɔ̄lūɛ̍i̍ya̍ ā di᷅ nyɛ̍su̍ma̍ wa᷅ vi̍sīo̍o̍ o̍ lɔ̄lū tūmndo̍ wa̍ŋ te̍. Kāni̍ fo̍ndōle̍, o̍ lɔ̄lū tūm wāā le̍nde̍ nda̍ lɔ̄ɔ̄ Che̍kɔ̍pū ma̍ bēēŋgīāā ndu̍ lɔ̄lōo̍ ni̍.

Currently Selected:

Chɛ̄nɛ̍se̍ē 32: YM

Highlight

Copy