Chɛ̄nɛ̍se̍ē 30

1Mɛ̄ɛ̍ Lu̍e̍chɛ̄l che᷅ māā ndu̍ vi̍lu̍ chu̍a̍ le̍ Che̍kɔ̍pū le̍, mbo̍ sāā bɛ̄ ndɔ̍ pāŋālāa̍. Mbo̍ lō o̍ ko̍ŋ mbo̍ dīmūl Che̍kɔ̍pū āā, “Che̍kɔ̍pū, ya̍ bɛ̍ɛ̍ ke̍ ya̍ chūāūwa̍. Tē a̍ ke̍ ya̍ chūāūwa̍ le̍ i̍ cho̍ wu̍.”

2Mɛ̄ɛ̍ o̍ di̍mu̍l Che̍kɔ̍pū le̍nde̍, mi̍ Che̍kɔ̍pū tu̍u̍lū kɔ̄l. Mbo̍ dīmūl nda̍ āā, “Bāā ya̍ cho̍ Mɛ̄lɛ̄ka̍ ni̍? Ō cho̍ ya̍ le̍ yi̍i̍ nu̍m pūle̍i̍ māā vi̍a̍lū le̍ le̍.”

3O̍ ko̍ŋ kɔ̍ɔ̍lī, mi̍ Lu̍e̍chɛ̄l di̍mūl Che̍kɔ̍pū āā, “Mɛ̄ɛ̍ ā chē Bi̍li̍hāā bu̍ɛ̍ī nī. Hi̍vi̍ŋ ndu̍ kɔ̄ɔ̄lī, ō wa̍ bɛ̍ɛ̍ ndu̍ ni̍, mī sɔ̍la̍ chūāūwa̍ a̍ ndu̍.” 4O̍ ko̍ŋ, mbo̍ kē Che̍kɔ̍pū Bi̍li̍hāā le̍ wāa̍ la̍a̍ ndɔ̄. Mi̍ Che̍kɔ̍pū hi̍vi᷄ŋ ndu̍ kɔ̄ɔ̄lī. 5Hīōūwɔ̄ɔ̍ Che̍kɔ̍pū kɔ̍ɔ̍lī, mi̍ Bi̍li̍hāā chu̍ā yo᷄llo̍, mbo̍ vīlūl Che̍kɔ̍pū pōo̍. 6Mɛ̄ɛ̍ o̍ ve̍lū, mi̍ Lu̍e̍chɛ̄l di̍mī āā, “Mɛ̄lɛ̄ka̍ kēlū yāmɛ̍i̍, mbo̍ kē ya̍ di̍. Ō mūli̍ pīɛ̄īlē nīle̍ŋ mbo̍ kē ya̍ pōo̍.” Mbo̍ kē pōo̍mbɔ̄ɔ̍ ho̍ō dīōla̍ŋ āā Da᷅ŋ. 7Mūlīo̍o̍, mi̍ Bi̍li̍hāā chu̍ā vɛ̄lɛ̄ yo᷄llo̍, mbo̍ vīlūl Che̍kɔ̍pū po̍ di̍i̍ŋ ndɔ̄ɔ̍. 8Mɛ̄ɛ̍ o̍ ve̍lū, mi̍ Lu̍e̍chɛ̄l di̍mī āā, “Na̍a̍ bɛ̄nūu̍ ŋ̄ sɔ̄ŋga̍ sɔ̍ŋgɔ̄ɔ̍ pi̍la̍, ndu̍yɛ̍ mi̍ ya᷅m.” Mbo̍ kē pōo̍mbɔ̄ɔ̍ dīōla̍ŋ āā Nāfi̍ta̍lī.

9Li̍yā bɛ̍ɛ̍ mɛ̄ɛ̍ o̍ che̍ māā ō cho̍ lɛ̍ vīōlɔ̄ɔ̄ le̍, mbo̍ chūā Si̍li̍pāā bu̍ɛ̍ī ndɔ̄ mbo̍ kē Che̍kɔ̍pū ndu̍ māā la̍nɔ̍. 10O̍ ko̍ŋ kɔ̍ɔ̍lī, mi̍ Si̍li̍pāā vi̍lūl Che̍kɔ̍pū pōo̍. 11Mɛ̄ɛ̍ o̍ ve̍lū, mi̍ Li̍yā di̍mī āā, “To̍fa̍ wɔ̍ dɛ̍nɛ̍ kɛ̍ndɛ̄ bɛ̄ndū.” Mbo̍ ke̍ pōo̍mbɔ̄ɔ̍ dīōla̍ŋ āā Ka̍a̍dī. 12O̍ ko̍ŋ kɔ̍ɔ̍lī, mi̍ bu̍ɛ̍ī Li̍yā wo̍ ō vīlūl vɛ̄lɛ̄ Che̍kɔ̍pū pōo̍. 13Mɛ̄ɛ̍ o̍ ve̍lū, mi̍ Li̍yā di̍mī āā, “I̍ na̍ŋ bɔ̄ɔ̍ kɔ̍l. Wāŋ lāāndūa̍a̍ chō dīmī māā, Mɛ̄lɛ̄ka̍ dɔ̄ū ya̍ sa̍lā bɔ̄ɔ̍.” Mbo̍ ke̍ ndu̍ dīōla̍ŋ āā, A̍sīɛ̄ɛ̄.

14Pāa̍le̍ pi᷅lɛ̍, ā te̍le̍ŋ wi̍tīi̍yo̍ŋ ŋ̄ vēsā o̍ chīɔ̍ɔ̍ŋ ni᷄ŋ le̍ kōūwɔ̄ɔ̍ wo̍, mi̍ Lūbɛ᷅ŋ, po̍ Li̍yā wo̍ kūā kēlāa̍ yōndōo̍ ni᷄ŋ. Mbo̍ hūŋ ā ma̍ndu̍lūe̍i̍ ku̍a̍māa̍. Mbo̍ kɔ̍ ke̍ kāla̍ ndɔ̄. Mi̍ Lu̍e̍chɛ̄l lo̍ o̍ ko̍ŋ mbo̍ pīɛ̄ī Li̍yā ma̍ndu̍lūe̍i̍ ku̍a̍māa̍ ho̍ō āā, “Li̍yā, yāndi̍i̍ ke̍ ya̍ ma̍ndu̍lūe̍i̍ po̍ nu̍mndo̍ hīŋ ndo̍ ō ti᷄ŋ.”

15Kɛ̍ mi̍ Li̍yā di̍mūl nda̍ āā, “Bāā pūū ŋ̄ pūu̍ ya̍ pɔ̍nɔ̍ nūu̍ o̍ bā wo̍ a̍ hi̍ni̍ kɔ̍l a̍ ko̍ŋ te̍, ma̍ndu̍lūe̍i̍ma̍ po̍ nūu̍ ŋ̄ hɛ̄na̍ŋ vɛ̍lɛ̄ ni̍ mā bīī?” Mi̍ Lu̍e̍chɛ̄l di̍mūl Li̍yā āā, “Tē ō wa̍ le̍ Che̍kɔ̍pū pɛ̍, mɛ̄ɛ̍ ā chē ndu̍ mī lā lɔ᷄l chūɛ̄llɛ̄ŋ sɔ̍ŋgɔ̍ ma̍ndu̍lūe̍i̍ma̍ po̍ nu̍mndo̍.”

16O̍ ko̍ŋ, mɛ̄ɛ̍ Che̍kɔ̍pū chɛ̍ŋ yo̍ndōo̍ ni᷄ŋ a̍ pāa̍le̍ de̍lāā le̍ŋ mbo̍ hūŋ, mi̍ Li̍yā ku̍ā ndu̍ dēmūllo̍. Mbo̍ dīmūl ndu̍ āā, “Ŋ̄ nɔ̄ hāū mī ŋ̄ lɔ᷄l na̍a̍ nūm sɔ̍ŋgɔ̍ ma̍ndu̍lūe̍i̍ma̍ po̍ nūu̍. Chɛ̄la᷄ŋ nāa̍ cho̍ ko̍ŋ na̍a̍ Lu̍e̍chɛ̄l ni̍.” O̍ ko̍ŋ kɔ̍ɔ̍lī, mi̍ Li̍yā lɔ᷅l nda̍ Che̍kɔ̍pū nyūmmā māŋ.

17Mi̍ Mɛ̄lɛ̄ka̍ mūlī pīɛ̄īle̍ Li̍yā le̍ŋ. Mbo̍ chūā yo᷄llo̍, mbo̍ vīlūl Che̍kɔ̍pū pōo̍. Pūa̍a̍ Li̍yā vi̍lu̍l Che̍kɔ̍pū wa̍ ŋu̍ɛ̍ɛ̍no̍o̍ wa̍ ni᷅ŋ ko̍ŋ ni̍. 18O̍ ko̍ŋ, mi̍ Li̍yā di̍mī āā, “Mɛ̄lɛ̄ka̍ fānda̍ ya̍ le̍ mɛ̄ɛ̍ ya̍ I̍ ke̍ pɔ̍nɔ̍ nūu̍ bu̍ɛ̍ī nī la̍a̍ndōo̍ yɛ̍.” Mbo̍ kē ndu̍ dīōla̍ŋ āā I̍sa̍a̍kā. 19Mūlīo̍o̍, mi̍ Li̍yā chu̍ā vɛ̄lɛ̄ yo᷄llo̍, mbo̍ vīlūl Che̍kɔ̍pū pōo̍. Pūa̍a̍ ŋɔ᷄mpu᷅m ndɔ̄ɔ̍ wa̍ ni᷅ŋ ko̍ŋ ni̍. 20Mi̍ Li̍yā di̍mī āā, “Mɛ̄lɛ̄ka̍ ke̍ ya̍ nyɛ̄ ba̍ā bɛ̄ndū. Pɔ̍nɔ̍ nūu̍ chō ni᷅ŋ kɔ̄llo̍ mūlī o̍ ya̍ lo̍. Kāni̍, I̍ vi̍lu̍l ndu̍ pūa̍a̍ ŋɔ᷄mpu᷅m wa̍ŋ.” Mbo̍ kē pōo̍mbɔ̄ɔ̍ ho̍ō dīōla̍ŋ āā Sɛ̍bu̍lɔ̄ŋ. 21Mɛ̄ɛ̍ te̍le̍ŋ ti̍ŋ hīōū, mi̍ Li̍yā vi̍a̍lū wānā la̍nɔ̍ɔ̍. Mbo̍ kē ndu̍ dīōla̍ŋ āā Da̍i̍nā.

22O̍ ko̍ŋ, mi̍ Mɛ̄lɛ̄ka̍ yīya᷄ŋ Lu̍e̍chɛ̄l chōo̍, mbo̍ mūlī pīɛ̄īlē ndɔ̄le̍ŋ. Mbo̍ kūmbī ndu̍ pūle̍i̍ le̍ mbō vēlū chūāūwa̍. 23Mi̍ Lu̍e̍chɛ̄l chu̍ā yo᷄llo̍, mbo̍ vīālū pōo̍. Mɛ̄ɛ̍ o̍ ve̍lū, mbo̍ dīmī āā, “Mɛ̄lɛ̄ka̍ kēlū ya̍ si̍ɔ̍mbu̍la̍ŋ o̍ hɔ̄l.” 24Mbo̍ kē po̍ o̍ ve̍lū wo̍ dīōla̍ŋ āā, Chōo̍sɛ̍. Mbo̍ dīmī āā, “Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ chɔ̍ɔ̍lu̍ ya̍ po̍ che᷅le̍ŋ fɔ̍.”

Che̍kɔ̍pū to̍sa̍ chɛ̄la᷅ŋndo̍ nda̍ Le̍bāŋ

25Mɛ̄ɛ̍ Lu̍e̍chɛ̄l o̍ ve̍lū Chōo̍sɛ̍, o̍ ko̍ŋ kɔ̍ɔ̍lī, mi̍ Che̍kɔ̍pū di̍mūl Le̍bāŋ āā, “Ma̍l la̍ ni̍ko̍ I̍ mi̍i̍ŋgū o̍ ya̍ lo̍. 26Ke̍ ya̍ ni̍ko̍ la̍a̍ndāā nīa̍a̍ ā ya̍ I̍ to̍sa̍l nu̍m wa̍llo̍ le̍ nda̍ wa̍, a̍ chūāūwāā nīa̍a̍ mī ŋ̄ kūɛ̄. Nūm pi̍la̍ ā sīnā mɛ̄ɛ̍ kpɛ̍ ya̍ I̍ to̍sa̍l nu̍m wa̍llo̍ yɛ̍”

27Mi̍ Le̍bāŋ lo̍ lo̍ŋ mbo̍ dīmūl Che̍kɔ̍pū āā, “I̍ di̍mūl lɔ̍ nu̍m sūɛ̍i̍ pi᷅lɛ̍ Che̍kɔ̍pū, I̍ ku̍ɛ̄ nāa̍ wāna̍ yāwāa̍ chūā, mi̍ sa̍a̍lu᷄ŋ māā dɛ̍nɛ̍ kɛ̍ndɛ̄ o̍ dɛ̍nɛ̍ kɛ̍ndɛ̄ ya̍ I̍ sɔ̍la̍, māā o̍ sa̍bū nūmndo̍ ni᷄ŋ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū ya̍ sa̍lāa̍ ho̍ō ni̍. 28Le̍la̍ŋ chɔ̍m pa̍a̍wā nūmndo̍ I̍ yɔ̍ŋgū.”

29Mi̍ Che̍kɔ̍pū di̍mī āā, “Nūm pi̍la̍ ā sīnā mɛ̄ɛ̍ kpɛ̍ ya̍ I̍ sa̍ŋgi̍a̍l nu̍m yɛ̄. Ā chē ni᷅ŋ mɛ̄ɛ̍ chɔ̄lūāā nūmnda̍ kūi̍ yɛ̍. 30Hūnɔ̄ɔ̄ ya̍ I̍ hi᷅ŋ ndo̍, chɔ̄lūāā nūmnda̍ ā ve̍ a̍ bɔ̍ɔ̍ le̍. Kɛ̍ to̍fa̍ mɛ̄ɛ̍ nda̍ kūi̍ ni᷅ŋ cha̍po̍o̍li̍ yɛ̍. Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū nu̍m sa̍lā o̍ nyɛ̄ o̍ nyɛ̄ ya̍ I̍ to̍sa̍l nu̍m ni᷄ŋ. Le̍la̍ŋ ya̍ bɛ̍ɛ̍, ō bɛ̄nda̍ mī to̍sa̍ ni᷅ŋ nyɛ̄ le̍ ya̍ pi̍la̍.”

31Mi̍ Le̍bāŋ nyu̍nā Che̍kɔ̍pū āā, “Ō yɛ̄ɛ̄ ya̍ I̍ ke̍ yɛ̍ nu̍m?” Mi̍ Che̍kɔ̍pū di̍mī āā, “Pa̍a̍wā ya̍ o̍ nyɛ̄ sɔ̄lāā ni᷄ŋ te̍. I̍ hɛ̍na̍ŋ mī hi̍o̍ū lāchī a̍ chɔ̄lūāā nūmnda̍ māndāa̍, tē ō wa̍ pɛ̍ mī ŋ̄ chɛ̄la᷅ŋ mɛ̄ɛ̍ ya̍ I̍ cho̍ dīmī yɛ̍. 32I̍ ba̍lū wɔ̍ hāū chɔ̍lūa̍a̍ chōo̍ mī hɛ̍li̍ sāā o̍ sāa̍ cho̍ ō tīŋī a̍ chūīŋ o̍ chūīŋ cho̍ chūīŋ pōnyɛ̍i̍, mā ke̍ ya̍ ka̍ŋ māā pāāwā ni̍. 33Ko̍ŋ to̍sā o̍ sīɔ̄dīi̍yo̍ ni᷄ŋ bɛ̍ɛ̍, ā nɔ̄lā mā si̍na̍ sāndi̍i̍ nīi̍. Ndu̍yɛ̍ pɛ̄ŋgu̍ o̍ pɛ̄ŋgu̍ tē ā hīŋ pɛ̍ mā to̍fa̍ o̍ chɔ̄lūāā ŋ̄ pāāwa̍ ya̍ wa̍ tɛ̄ɛ̄ŋ, chūīŋnda̍ ki̍nɛ̍i̍ tē a̍ sa̍a̍lu̍ŋ o̍ pi᷅lɛ̍ bɛ̍ɛ̍ mbō ve̍ o̍ po̍nyɛ̍i̍ le̍, mɛ̄ɛ̍ vīīle̍ŋ ya̍ I̍ yɔ̍ŋ ndu̍ ni̍. Sāā o̍ sāā, tē a̍ sa̍a̍lu̍ŋ nda̍ tɛ̄ɛ̄ŋ pɛ̍ mbō ve̍ o̍ ti̍ŋī le̍, mɛ̄ɛ̍ vīīle̍ŋ ya̍ I̍ yɔ̍ŋ ndu̍ ni̍.”

34Mɛ̄ɛ̍ Che̍kɔ̍pū di̍mi̍ le̍nde̍, mi̍ Le̍bāŋ di̍mī āā, “I̍ chɛ̍l nyɛ̄ ŋ̄ dīmi̍ wo̍.” 35Kɛ̍ pāa̍le̍ le̍ŋ, mi̍ Le̍bāŋ ku̍ā mbo̍ kɔ̍ fa̍a̍ŋīāā chūīŋāā tōōyīa̍a̍ ki̍nɛ̍i̍, a̍ nɔ̍ tīndi̍a̍ŋ kɛ̄lɛ̄ŋgāā ma̍ wā ā pōnyɛ̍i̍ ya̍, a̍ chūīŋāā lāāndūa̍a̍ cho̍ ā pōnyɛ̍i̍, kɛ̄lɛ̄ŋgāā ma̍ nɔ̄ būŋgāŋ hu̍mbo᷄ŋ nda̍. Mbo̍ fāāŋīāā vɛ̄lɛ̄ sāā ti̍ŋīa̍a̍. Mbo̍ chūā nda̍ mbo̍ kē pūa̍a̍ ndūa̍a̍ le̍ mī nda̍ wa̍ ka̍ŋ hɔ̄lte̍ŋ. 36Mbo̍ chūā nda̍ mbo̍ yāā nda̍ nāa̍ che̍le̍ŋ pɔ̍ɔ̍li̍. Nāa̍ o̍ ku̍ɛ̄ a̍ nda̍ wa̍, ndu̍ o̍o̍ wa᷄ ti᷅ŋ wānā ku̍ɛ̄ le̍ pālɛ̍i̍ ya̍a̍. Mi̍ Che̍kɔ̍pū ndu̍ lo̍ chɔ̄lūa̍a̍ Le̍bāŋ nda̍ ā tūa̍a̍ māndāa̍.

37O̍ ko̍ŋ kɔ̍ɔ̍lī, mi̍ Che̍kɔ̍pū ku̍ā mbo̍ kɔ̍ ki̍o̍lū yɔ̄mīī pūm yōndōo̍ ni᷄ŋ, yɔ̄mndo̍ ō pīlɔ̍ɔ̍ dīōla̍ŋ āā, pɔ̍pi̍lāā, ho̍ō dīōla̍ŋ āā, a̍lmɔ̍ŋ, a̍ ō pīlɔ̍ɔ̍ dīōla̍ŋ āā Pi̍lāŋ. Mbo̍ mūli᷄ŋ mbo̍ kīŋī yɔ̄mīī kīyɛ̍i̍ kēŋ mbo̍ pēēŋgūū, mbo̍ tōsā ndi̍ a̍ tīndi̍ma̍ hu̍mbu̍a̍ŋ. 38Mbo̍ chūā yɔ̄mīī tīndi̍ma̍ hu̍mbūīī kēŋ mbo̍ kɛ̄ɛ̄su̍u̍ o̍ nyɛ̄ nda̍ dōū chɔ̍lūa̍a̍ mɛ̄ŋnda̍ŋ le̍ kōlɔ̄ɔ̍ wo̍ hɔ̄lndɔ̄, māā tē chɔ̄lūa̍a̍ nda̍ a̍a̍ hi᷅ŋ kōlɔ̄ɔ̍ pɛ̍, ā chē yɔ̄mīī tīndi̍ma̍ hu̍mbūīī kēŋ. Ndu̍yɛ̍, bōōndi̍i̍ chɔ̄lūa̍a̍ hūŋ ke̍ŋ ko̍lɔ̄ɔ̍ ve̍ nda̍ a̍a̍ nɔ̍ hēlɔ̄ɔ̍ ni̍. 39Tē chɔ̄lūa̍a̍ he̍l lɛ̄ o̍ yɔ̄mīī tīndi̍ma̍ hu̍mbūīī kēŋ hɔ̄lndɔ̄ pɛ̍, chūāūwāā nda̍ kūām nda̍ bɛ̍ɛ̍ tīndi̍ma̍ hu̍mbūmā māŋ o̍ yɔ̄mīī kēŋ, ma̍ŋ ko̍ni̍ kɔ̄ɔ̍le̍ ndāle̍ŋ lē chūā ni̍. Le̍nde̍ nda̍ wā a̍ pōnyɛ̍i̍ a̍ tīndi̍a̍ŋ ni̍.

40O̍ ko̍ŋ kɔ̍ɔ̍lī, mi̍ Che̍kɔ̍pū pi̍ɔ̍ū sāā fɔ̍ŋndu̍a̍a̍ tɛ̄ɛ̄ŋ nda̍ chūīŋnda̍. Mbo̍ mūlī sāā fɔ̍ŋndu̍a̍a̍ ka̍ŋ hɔ̄lla̍ kūmbūī Le̍bāŋ chɔ̄lūāā ndūāā po̍nyɛ̍i̍ya̍ a̍ ā tīŋīa̍a̍ ā chō ve̍. Mi̍ Che̍kɔ̍pū chɔ̄lūāā ndūa̍a̍ ā hīāū lāchī a̍ kūīyo̍, ndu̍yɛ̍, mbo̍ kɛ̄sī a̍ ndūāā yɛ̍ a̍ chɔ̄lūa̍a̍ Le̍bāŋ nda̍.

41Pɛ̄ŋgu̍ o̍ pɛ̄ŋgu̍ chɔ̄lūāā kɛ̄ndīa̍a̍, a̍ pɛ᷅ lēni᷄ŋ nyɛ̍ kɛ̄ndɛ̍ī ya̍, ā hīŋ nāa̍ nda̍ kōl kāŋ nda̍ mā yēēma̍ le̍ hēlɔ̄ɔ̍ pɛ̍, Che̍kɔ̍pū hɛ̍ɛ̍ndu̍u̍ yɔ̄mīī o̍ to̍o̍si̍a̍a̍ ke̍ŋ a̍ tīndi̍a̍ŋ nde̍ vēllāa̍ vēllē nda̍ o̍ hɔ̄l. 42Kɛ̍, tē chɔ̄lūa̍a̍ pe̍ le̍ni̍ŋ la̍pi̍ le̍ wa̍ ā wa̍ hēlɔ̄ɔ̍ pɛ̍, ō he̍ndū yɔ̍mīī mātīndi̍i̍ ke̍ŋ te̍, yɔ̄ŋi̍ o̍ hu̍ŋ sɔ̍lā yɛ̄yi̍i̍ ke̍ŋ. Mɛ̄ɛ̍, a̍ pe̍ ka̍ŋ le̍ni̍ŋ la̍pi̍ le̍ wa̍ ki̍nɛ̍i̍, Le̍bāŋ nɔ᷅ ka̍ŋ ni̍. A̍ pɛ᷅ lēni᷄ŋ nyɛ᷅ kɛ̄ndɛ̄i̍ ya̍ ki̍nɛ̍i̍, ndu̍ Che̍kɔ̍pū ndu̍ o̍o̍ ni̍ ka̍ŋ ni̍. 43O̍ ko̍ŋ kɔ̍ɔ̍lī, mi̍ chɔ̄lūa̍a̍ Che̍kɔ̍pū wa̍ ā nāŋ ma̍ kūī kūīyo̍ pi̍la̍. Mbo̍ bīī mbo̍ sūl kpe̍e̍kpe̍i̍. Mbo̍ sɔ̄lā chīa̍a̍ a̍ chɔ̄lūa̍a̍ cha̍po̍o̍li̍. Sāa̍ ni̍, a̍ nyɔ̍mi̍a̍a̍, a̍ sōfɛ̍li̍a̍a̍, ā wa̍ ndu̍ o̍ bā cha̍po̍o̍li̍.

Currently Selected:

Chɛ̄nɛ̍se̍ē 30: YM

Highlight

Copy