Chɛ̄nɛ̍se̍ē 25

E̍bīlāha᷅m ve̍lū vɛ̄lɛ̄ chūāūwāā chēle̍ŋ

(Ko̍lo̍ni̍kō Tāso̍o̍ 1:32, 33)

1Mi̍ E̍bīlāha᷅m chu̍ā la̍nɔ̍ che᷅le̍ŋ, dīōla̍ŋ āā, Kɛ̍tu̍lūāā. 2O̍ ko̍ŋ kɔ̍ɔ̍lī, mi̍ Kɛ̄tu̍lūā vi̍lūl E̍bīlāha᷅m chūāūwa̍. Chūāūwāā kāŋ dīōlā ndāla̍ŋ la̍ cho̍ la᷅ŋ ni̍, Si̍mi̍lūāŋ, a̍ Cho̍ki̍sīāŋ, a̍ Mɛ̍dāŋ, a̍ Mi̍dīāŋ, a̍ I̍si̍ba̍kī, a̍ Su̍a̍ā. 3Chōki̍sīāŋ ve̍lū Si̍ɛ̍bā ni̍, a̍ Dɛ̍dāŋ. Dɛ̍dāŋ yɛ̍, pūa̍a̍ ndūa̍a̍ o̍ ve̍lū wa̍ cho̍ ha̍ā ni̍. A̍si̍u̍lūīm, a̍ Lɛ̍tu̍sīm, a̍ Lɛ̄yu̍mīm. 4Mi̍dīāŋ ndu̍ pūa̍a̍ o̍ ve̍lū wa̍ cho̍ ha̍ā ni̍. E̍fā, a̍ E̍fɔ̄, a̍ Ha̍nɔ̍chī, a̍ Ābi̍dā, a̍ Ɛ̍li̍dāā. Chūāūwāa̍ fu̍la̍ o̍ pūlāle̍ Kɛ̍tu̍lūāāle̍ŋ chōo̍ wa̍ ki̍nɛ̍i̍ a̍ cho̍ ka̍ŋ ni̍.

5O̍ ko̍ŋ kɔ̍ɔ̍lī, mi̍ E̍bīlāha᷅m ke᷅ Āa̍se̍ po̍ ndɔ̍ nyɛ̄m ndɔ̄ɔ̍ŋ ki̍ɔ̍ɔ̍ŋ kpo̍u̍. 6Ndu̍yɛ̍, E̍bīlāha᷅m lo̍ yōōmū, mbo̍ kē pūa̍a̍ o̍ ve̍lū nda̍ lāāndāā ndūāā pɔ̍mbūa̍a̍ wa̍ nyɔ̄ɔ̍ŋ ŋ̄ ti᷄ŋ kpɛ̍ kpɛ̍. O̍ ko̍ŋ kɔ̍ɔ̍lī, mbo̍ fāŋā nda̍ Āa̍se̍ po̍ ndɔ̍ chōo̍, mbo̍ yɔ̄ŋgū nda̍ o̍ lɛ̄ŋnde̍ŋ bā pāa̍le̍ŋ lē chāŋ ndo̍. Mi̍ nda̍ chāl lo̍ŋ.

A̍ pīɔ̍m E̍bīlāha᷅m ndo̍ o̍kɔ̄ɔ̄

7-8Mi̍ E̍bīlāha᷅m yu̍wā ku̍dɛ̄ɛ̄, ma̍lāŋ o̍ wu᷅. Ō chīi̍ wɔ̄sīla̍ŋ fa̍ū fa̍ū kɛ̄mɛ̄ a̍ be̍le̍-ŋɔ̍mmɛ̍ū a̍ lā ŋūɛ̍ɛ̍nu̍ (175). 9-10Mɛ̄ɛ̍ o̍ vi᷅, mi̍ pūa̍a̍ ndūa̍a̍, Āa̍se̍ nda̍ I̍si̍mɛ̄ɛ̄l a̍ chɔ᷅ ndu̍ o̍ būūlōo̍ Māchīpɛ̍lā nāa̍ o̍ chɔ̍ la̍a̍ ndɔ̄ wa̍. Ndu̍ yɔ̍nūŋ ni̍ māā būūlōo̍ o̍ lɛ̄ŋndē o̍ pe̍ndū Hi̍ta̍i̍tīi̍ya̍ o̍ bā le̍ŋ, le̍ hūnɔ̄ɔ̍ o̍ Ma̍mi̍lūē lo̍, kūmbū pāa̍le̍ŋ lē chāŋ ndo̍. Ɛ̍fu̍lɔ̄ŋ, po̍ So̍hāā wo̍, lɛ̄ŋndē ndɔ̄le̍ŋ le̍ wa̍ yɛ̄ le̍ŋ ni̍. 11Mɛ̄ɛ̍ E̍bīlāha᷅m vi᷅, mi̍ Mɛ̄lɛ̄ka̍ dūāū po̍ ndɔ̄ɔ̍ Āa̍se̍ sa̍lā. O̍ po̍llo̍ ni᷄ŋ o̍ fo̍ndāŋndo̍ dīōla̍ŋ āā Bīāā La̍ha̍i̍ Lo̍ī, lo̍ŋ Āa̍se̍ wa̍ īchāli̍ ni̍.

Pūlāle̍ I̍si̍mɛ̄ɛ̄l le̍ŋ

(Ko̍lo̍ni̍kō Tāso̍o̍ 1:28-31)

12I̍si̍mɛ̄ɛ̄l, po̍ E̍bīlāha᷅m ve̍lū nda̍ Ha̍kāā, chūā chɛ̄ I̍chi̍pīnɔ̄ wa̍ Se̍lūā o̍ bā wo̍, pūlāle̍ ndɔ̄le̍ŋ le̍ cho̍ le᷅ŋ ni̍. 13Pūa̍a̍ ndu̍ I̍si̍mɛ̄ɛ̄l wa̍ cho̍ ha̍ā o̍ pūlāle̍ŋ ni᷄ŋ ni̍. Po̍ ndɔ̍ tāso̍o̍ wa̍ Nɛ̄ba̍yɔ̍tī ni̍, dīi̍ŋ ndɔ̄ɔ̍ wa̍ Kɛ̍dāā ni̍, a̍ A̍di̍bi̍īl, a̍ Mi̍bi̍sām, 14a̍ Mi̍si̍māā, a̍ Du̍māā, a̍ Ma̍sā, 15a̍ Ha̍da̍dī, a̍ Tɛ̍mā, a̍ Chɛ̍tu̍lō, a̍ Na̍fi̍i̍sī, a̍ Kɛ̍dɛ̍māā. 16Mɛ̄ɛ̍ pūa̍a̍ I̍si̍mɛ̄ɛ̄l ve̍lū wa̍ cho̍ ka̍ŋ ni̍. Pūa̍a̍ ŋ̍wa᷅ŋ tɔ̍ a̍ wānāā ŋīɔ̍ɔ̍ŋnda̍ ha̍ā, mi̍ chūāūwāā ndāā ma̍māa̍ ā kūīī ma̍ sīmnu᷄ŋ yu̍ŋgu̍la̍ yɛ̍ yɛ̍la̍ŋ tɔ̍ a̍ lā tīɔ̍ɔ̍ŋ. Ma̍ hōl dīōlā fi̍nyāā ndāā ma̍māa̍ o̍ chi̍e̍e̍ŋ ndāa̍ŋ a̍ ki̍āmndā ndāla̍ yɛ̍ yɛ̍la̍ŋ. 17I̍si̍mɛ̄ɛ̄l chi̍i̍ wɔ̄sīla̍ŋ kɛ̄mɛ̄ a̍ be̍le̍-ya̍a̍ a̍ lā ŋɔ᷄mmɛ̍ū (137) mālāŋ o̍ wu᷅. 18Ha̍vi̍lā tɛ̍ɛ̄ŋ a̍ Si̍ɔ̍ɔ̄ wānāa̍ fu̍la̍ o̍ pūlāle̍ I̍si̍mɛ̄ɛ̄le̍ŋ chōo̍ wa̍ ā wa̍ īchāli̍ ni̍, kpēŋgīi̍ lɛ̄ŋndē I̍chi̍pīle̍ŋ, le̍ kɔ̄la̍ŋ lɛ̄ŋndē Āsi̍i̍līāāle̍ŋ. Mi̍ nda̍ nda̍ kɔ̍ cha᷅l o̍ fo̍ndāŋ ndā te̍ŋge̍le̍ŋ a̍ yu̍ŋgu̍la̍ E̍bīlāha᷅m nda̍ŋ lā tɔ̄la̍ŋ.

Lūībɛ̍kā ve̍lū I̍īsɔ̄ a̍ Che̍kɔ̍pū ni̍

19Po̍ E̍bīlāha᷅m ndo̍ Āa̍se̍, wānāa̍ fu̍la̍ o̍ pūlālē ndɔ̄le̍ŋ chōo̍ wa̍ a̍ cho̍ ha̍ā ni̍. 20Āa̍se̍ wa̍ wɔ̄sīla̍ŋ be̍le̍-hi̍ɔ̍ɔ̍lu̍ (40) mbo̍ chūā Lūībɛ̍kā o̍ nɔ̄ɔ̍ ni᷄ŋ, po̍ A̍lu̍e̍mīānɔ̄ɔ̍ dīōla̍ŋ āā, Bɛ̄tīhɔ̍ɔ̄, o̍ wa̍ īchāli̍ Mɛ̄sōpōte̍e̍mīāā chi̍e̍e̍ wo̍ chūā ndɔ̄ɔ̍, yēmāa̍ Le̍bāŋ. 21Lūībɛ̍kā ve̍ wa̍nā vi̍a̍lāā le̍, o̍ ko̍ŋ, mi̍ Āa̍se̍ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄ le̍ mī la̍a̍ ndɔ̄ ndu̍ o̍o̍ ve̍lū. Mi̍ Mɛ̄lɛ̄ka̍ Ya̍a̍wɛ̄ɛ̄ mu̍lī pīɛ̄īlē ndɔ̄le̍ŋ. Mi̍ Lūībɛ̍kā chu̍ā yo᷄llo̍. 22Mɛ̄ɛ̄māā pɛ̄ndūa̍a̍ wa̍ ndu̍ o̍ dēmbē ni̍, mi̍ chɛ̄lɛ̄kpi̍a̍a̍ ha̍ā ā sa̍āŋ sɔ̍ŋgɔ̄ɔ̍ vēllāa̍ vēllē ndu̍ o̍ dēmbē. Mi̍ Lūībɛ̍kā di̍mī āā, “Tē ō wa̍ nu̍a̍ā pɛ̍ mɛ̄ɛ̍ ī kīāndū ni̍ŋ ya̍ chōo̍ fɔ̍. Nāa̍ nda̍ chō wɔ̄ ya̍ o̍ dēmbē nu̍a̍ā, tē ā hu᷄ŋ vi̍o̍lu᷄ŋ yɛ̍?” O̍ ko̍ŋ, mi̍ Lūībɛ̍kā ku̍ā o̍ chīɛ̄ī sōlīāā lāsa̍la̍ Mɛ̄lɛ̄ka̍a̍ ni᷄ŋ le̍ mī Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ chɔ̍m ndu̍ nyɛ̍ wa̍ ko̍ŋ ndu̍ yɔ̄nɔ᷄ŋndo̍ wo̍.

23Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ mbo̍ dīmūl ndu̍ āā,

“Chūāūwāā ŋ̄ chō hūnɔ̄ɔ̍ vīōlɔ̄ɔ̍ wa̍, ā chō hūnɔ̄ɔ̄ kūīī vēllāa̍ vēllē mā sīmnu᷄ŋ ka̍a̍la̍ŋ.

Ā pīɔ̄ūwa᷅ŋ ni̍ŋ ka̍a̍la̍ŋ lā tīɔ̍ɔ̍ŋ, mā sīmu̍la᷅ŋ ve̍llāa̍ vēllē,

kāa̍le̍ŋ lē pīlɛ̍le̍ŋ le̍ hi̍a̍ū ni̍ŋ kpa̍a̍yā.

O̍ cho̍ wānā ba̍nāa̍ wo̍, pūlālē ndɔ̄le̍ŋ lē chō wā pūlāle̍ pɔ̄mbɔ̄ ndɔ̄le̍ŋ o̍ bā bɛ̄ŋgu̍.”

24O̍ ko̍ŋ kɔ̍ɔ̍lī, mi̍ te̍le̍ŋ Lūībɛ̍kā ndu̍ o̍o̍ nɔ̍ le̍ vīōlɔ̄ɔ̍ wo̍ fūūlūū. Ndu̍yɛ̍, pɛ̄ndūa̍a̍ wa̍ ndu̍ o̍ dēmbē ni̍. 25Po̍ tāso̍o̍ vīōlɔ̄ɔ̍ ndu̍, ō wa̍ ō sīāŋā, a̍ yīīŋnde̍ ndu̍ ī tīūwāā kɔ̄ɔ̍le̍ŋ kpo̍u̍, wānā a̍a̍ cha᷅ ko̍ āā, dōma̍ yīŋīī vīsīo̍o̍ wa̍ ndu̍ lēkɔ̄ɔ̍ ni̍. O̍ ko̍ŋ, ma̍ kē ndu̍ dīōla̍ŋ āā I̍īsɔ̄. 26Vīōlɔ̄ɔ̄ nda̍ wa̍ pɔ̄mbɔ̄ ndɔ̍ wo̍, mbo̍ sāā bɛ̄ ndɔ̍ tɔ̄ndīī kɔ̄ɔ̄līe̍i̍. Le̍ he̍ī, ma̍ kē ndu̍ dīōla̍ŋ āā, Che̍kɔ̍pū. Āa̍se̍ wa̍ wɔ̄sīla̍ŋ be̍le̍-ŋɔ̍mpu᷅m (60) mi̍ Lūībɛ̍kā vi̍a̍lū nda̍.

I̍īsɔ̄ pi̍si̍ di̍ ndɔ̄ɔ̍

27Mi̍ pūa̍a̍mbūa̍a̍ ha̍ā ā hīndū, ma̍ sūl lāka̍a̍so̍ŋ. Sūlɔ̄ɔ̍ lāka̍a̍so̍ŋ, mi̍ I̍īsɔ̄ ndu̍ si̍mnu᷄ŋ do̍o̍sūnɔ̍ bɛ̍ndū. Wāna̍ yōndōo̍ ndu̍ wa̍ ni̍. Kɛ̍ Che̍kɔ̍pū ndu̍ wānā me̍i̍yāa̍ o̍ wa̍ ni̍. Ndu̍ ndu̍ ve̍ wa᷅na̍ yōndō le̍. Le̍ te̍le̍ŋ o̍ te̍le̍ŋ chi̍e̍e̍ ko̍ni̍ o̍ wa̍ŋnu̍ŋ ni̍. 28Wāna̍ Āa̍se̍ ndu̍ o̍o̍ hi̍o̍ū kāālā wo̍ wa̍ I̍īsɔ̄ ni̍, kāni̍ fo̍ndōle̍, le̍ nyɛ̄ māhīlū I̍īsɔ̄ ndu̍ o̍o̍ yo̍ū ndu̍ mbō dīā wo̍. Lūībɛ̍kā yɛ̍, ndu̍ Che̍kɔ̍pū ndu̍ o̍o̍ hi̍o̍ū kāālā.

29Pāa̍le̍ pi᷅lɛ̍, mɛ̄ɛ̍ I̍īsɔ̄ chɛ̍ŋ yo̍ndōo̍ ni᷄ŋ, mbo̍ kōmāl Che̍kɔ̍pū cho̍ kpɔ̄ndɔ̄mɛ̄i̍yo̍ yāu̍wo̍. Ndu̍yɛ̍, yīa̍a̍ŋ mā wa̍ I̍īsɔ̄ nɛ̄īyo̍ ta̍u̍ ta̍u̍. 30Mbo̍ dīmūl Che̍kɔ̍pū āā, “Che̍kɔ̍pū, ke̍ ya̍ kpɔ̄ndɔ̄mɛ̄i̍ si̍a̍ŋā ko̍ŋ fɔ̍, I̍ di̍ā. I̍ cha̍l le̍ dɛ̍nɛ̍ kɔ̍ndɔ̄ɔ̍ a̍ yīa̍a̍ŋ.” Le̍ he̍ī ma̍ kē I̍īsɔ̄ dīōla̍ŋ āā, I̍dɔ̄m.

31Kɛ̍, mi̍ Che̍kɔ̍pū di̍mūl ndu̍ āā, “Mɛ̄ɛ̍ ŋ̄ sīŋga̍fi̍la̍ mī nūm ke̍ ya̍ di̍ ŋ̄ nɔ̄ o̍ yu̍ŋgu̍ nāa̍ chōo̍ māā po̍ tāse̍ wo̍, mī ya̍ I̍ ke̍ nu̍m nyɛ̄ dīa̍a̍.”

32Mi̍ I̍īsɔ̄ di̍mī āā, “I̍ chɛ̍l. Yīa̍a̍ŋ mā cha᷄l le̍ ya̍ dīyɔ̄ɔ̍, ndu̍yɛ̍ tē I̍ vi᷅ pɛ̍, mī yɛ̄ɛ̄ di̍ ko̍ŋ ō tōsa̍l lɛ̄ ya̍?”

33Mi̍ Che̍kɔ̍pū di̍mūl ndu̍ āā, “Mɛ̄ɛ̍ mɛ̍na̍ŋ māā a̍ vi̍i̍nūŋ ni̍ŋ si̍ɔ̍dīi̍ le̍.”

O̍ ko̍ŋ, mi̍ I̍īsɔ̄ me̍na᷄ŋ. Mbo̍ pīsī di̍ ndu̍ o̍o̍ nɔ̍ māā po̍ tāso̍o̍ o̍ yu̍ŋgu̍ ndāa̍ chōo̍ wo̍ Che̍kɔ̍pū o̍ bā. 34Mi̍ Che̍kɔ̍pū ke᷅ ndu̍ bēe̍dīi̍yo̍ a̍ kpɔ̄ndɔ̄mɛ̄i̍ ko̍ŋ mbo̍ dīā, mbo̍ kōl wu̍lāŋ. Mbo̍ cha᷄ŋ mbo̍ kūānu᷄ŋ. Mɛ̄ɛ̍ nu̍a̍ā I̍īsɔ̄ lo̍o̍ku̍ di̍ ndɔ̄ɔ̍ pīsī māā chūā tāse̍ o̍ yu̍ŋgu̍ ndāa̍ chōo̍ ni̍, o̍ nyɛ̄ dīāā tāa̍ni̍ŋndo̍ bɛ̄ŋgu̍, ō chūe̍ ndi̍ bɛ̍ɛ̍ māā Īsɔ̄ɔ̍ le̍.

Currently Selected:

Chɛ̄nɛ̍se̍ē 25: YM

Highlight

Copy