Chɛ̄nɛ̍se̍ē 21

Se̍lūā ve̍lū Āa̍se̍

1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sāl Se̍lūā dɛ̍nɛ̍ kɛ̍ndɔ̄ɔ̍, mbo̍ tōsā mɛ̄ɛ̍ o̍ chu̍e̍l E̍bīlāha᷅m būŋgɛ̄i̍ yɛ̍. 2Mi̍ Se̍lūā chu̍ā yo᷄llo̍, mbo̍ vīlūl E̍bīlāha᷅m pōo̍ o̍ yu̍wɛ̍i̍ E̍bīlāha᷅mnde̍ ni᷄ŋ, a̍ bōōndi̍i̍ Mɛ̄lɛ̄ka̍ dīmu̍l ndu̍ ve̍ kpe̍e̍kpe̍i̍. 3Mɛ̄ɛ̍ Se̍lūā ve̍lū, mi̍ E̍bīlāha᷅m ke᷅ po̍ ko̍ŋ dīōla̍ŋ āā, Āa̍se̍.#21:3 Āa̍se̍: Dīōla̍ŋ nda᷅ŋ tɛ̄ɛ̄sīāā ndɔ̄ɔ̍ āā, “Ō ma᷄m.” 4Mɛ̄ɛ̍ Āa̍se̍ chi̍ŋa̍ pālɛ̍i̍ ī ŋɔ̄ma̍a̍, mi̍ E̍bīlāha᷅m hi̍vī ndu̍ o̍ chīɛ̄ī kɔ̄ɔ̄lī mɛ̄ɛ̍ Mɛ̄lɛ̄ka̍ dīmu̍l ndu̍ yɛ̍. 5E̍bīlāha᷅m wa̍ wɔ̄sīla̍ŋ kɛ̄mɛ̄ (100), mi̍ Se̍lūā vi̍a̍lū Āa̍se̍ 6O̍ ko̍ŋ kɔ̍ɔ̍lī, mi̍ Se̍lūā di̍mī āā, “Mɛ̄lɛ̄ka̍ tōsa̍ mi̍ ma᷅m. Wānā o̍ wāna̍ tu̍e̍ī pɛ̍ māā I̍ ve̍lū, māmɔ̄ɔ̍ o̍ ma᷅m ni̍.” 7Mbo̍ dīmī āā, “Ō nɛ̄ɛ̍nɛ̍ ndu̍ o̍o̍ wa᷅ yɛ̍ kɔ̄l māā ya̍ Se̍lūā i̍i̍ vi̍a̍lū chu̍a̍a̍ mī wɛ̍si̍? Kɛ̍ ya̍ kɛ̍i̍ le̍ vi̍lu̍l nu̍a̍ā E̍bīlāha᷅m pōo̍ o̍ yu̍wɛ̍i̍ ndūɛ̍i̍ ni᷄ŋ te̍?”

8Mɛ̄ɛ̍ Se̍lūā so̍li̍ Āa̍se̍ mɛ̄ɛ̄le̍ŋ o̍ sōndō, mi̍ E̍bīlāha᷅m ve̍e̍lū bɔ̄ŋa᷅ŋ dīāā nyɛ̄ dīāā bɛ̄ndōo̍. Mbo̍ tōōsīāā nyɛ̄ dīa̍a̍ ta̍u̍ o̍ pāa̍le̍ le̍ŋ chōo̍.

Ā tōū Ha̍kāā nda̍ I̍si̍mɛ̄ɛ̄l

9Pāa̍le̍ pi᷅lɛ̍, mi̍ ī yɔ̄nu᷄ŋ mi̍ chūā I̍chi̍pīnɔ̄ɔ̍, Ha̍kāā, po̍ o̍ ve̍lū nda̍ E̍bīlāha᷅m ndo̍, ō sāā Āa̍se̍ māmɔ̄ɔ̍. Mɛ̄ɛ̍ Se̍lūā che᷅ I̍si̍mɛ̄ɛ̄l cho̍ Āa̍se̍ māmɔ̄ɔ̍, 10mbo̍ dīmūl E̍bīlāha᷅m āā, “E̍bīlāha᷅m, so̍li̍ chu̍ā chīɔ̍ɔ̍ ho̍ō na̍nu᷄ŋ nda̍ po̍ ndɔ̄ɔ̍ ā kɔ̍. Po̍ ndɔ̄ɔ̍ o̍ ve᷅ nyɛ̄m kɛ̄ŋ nūmndo̍ŋ chōo̍ nda̍ Āa̍se̍ po̍ nī le̍.” 11Mi̍ E̍bīlāha᷅m ta̍mbū kɔ̄l o̍ sūɛ̍i̍ he̍ī ni᷅ŋ ta̍u̍, kāni̍ fo̍ndōle̍, I̍si̍mɛ̄ɛ̄l bɛ̍ɛ̍ po̍ ndɔ̄ɔ̍ o̍ wa̍ ni̍. 12Kɛ̍ mi̍ Mɛ̄lɛ̄ka̍ dīmūl E̍bīlāha᷅m āā, “E̍bīlāha᷅m, ta̍mbū kɔ̄l le̍ pōo̍mbɔ̄ɔ̍ a̍ kāla̍ ndɔ̄ le̍. Nyɛ̄ o̍ nyɛ̄ Se̍lūā di̍mu̍l nu̍m pɛ̍, a̍ to̍sa̍. Kāni̍ fo̍ndōle̍, o̍ Āa̍se̍ ni̍ŋ pūlāle̍ nu̍mnde̍ŋ lē fūlā ni̍ŋ ni̍. 13Kɛ̍ ndu̍yɛ̍ chūā chīɔ̍ɔ̍ bɛ̍ɛ̍, I̍ cho̍ tōsā mī pūlālē po̍ ndɔ̄ɔ̍ lē kūi̍i̍, mī lē sīmnu᷄ŋ lɛ̄ŋnde̍ŋ, kāni̍ fu̍u̍le̍, ndu̍ bɛ̍ɛ̍ po̍ nu̍mndo̍ o̍ cho̍ ni̍.”

14Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ E̍bīlāha᷅m pe̍nā chɔ̄nɔ᷄ŋ pu̍u̍ŋ, mbo̍ chūā bēe̍dīi̍yo̍ mbo̍ kē Ha̍kāā. Mbo̍ dūāū mɛ̄ŋnda̍ŋ o̍ bɔ̄lɔ̍ māmɛ̄ŋndo̍ ni᷄ŋ, mbo̍ hāndū Ha̍kāā o̍ chōŋgu̍. Mbo̍ dīmūl ndu̍ nda̍ pōo̍mbɔ̄ɔ̍ āā, “Lā kɔ̍.” O̍ ko̍ŋ kɔ̍ɔ̍lī, mi̍ Ha̍kāā bi̍ī nɛ̄īyo̍, mbo̍ kɔ̍ lu̍ɛ̍ī o̍ lɛ̄ŋndē po̍lte̍ŋ Bīɛ̄ɛ̄si̍ɛ̍bā. 15Mbo̍ lō bālɔ̄ɔ̍ o̍ po̍li̍ ko̍ŋ ni᷄ŋ ha̍a̍a̍ mi̍ mɛ̄ŋnda̍ŋ mā chūū o̍ bɔ̄lɔ̍ māmɛ̄ŋndo̍ ni᷄ŋ. Mɛ̄ɛ̍ mɛ̄ŋnda̍ŋ mā chūū nda̍ o̍ bā, mi̍ pōo̍mbɔ̄ɔ̍ hūŋ le̍ pīɔ̍mndo̍. Mbo̍ kɛ̄sī ndu̍ o̍ yɔ̄mndo̍ bɛ̄ŋgu̍. 16Mbo̍ dīmī āā, “I̍ nu̍ē po̍ nūu̍ o̍ pīɔ̍mndo̍ le̍.” Mbo̍ mɛ̄ī ndu̍ mbo̍ kūā le̍ nɛ̄īyo̍ be̍le̍-ya̍a̍, mbo̍ kɔ̍ cha᷅l. O̍ ko̍ŋ, mbo̍ kāndū cha᷄ŋndo̍.

17O̍ ko̍ŋ kɔ̍ɔ̍lī, pōo̍mbɔ̄ɔ̍ bɛ̍ɛ̍ mbo̍ kāndū cha᷄ŋndo̍. Mbo̍ lō o̍ ko̍ŋ mi̍ Mɛ̄lɛ̄ka̍ tūɛ̄ī pōo̍mbɔ̄ɔ̍ cha᷄ŋndo̍. O̍ ko̍ŋ, mi̍ ki̍i̍la̍nɔ̍ Mɛ̄lɛ̄ka̍a̍ nyūnā Ha̍kāā āā, “Ha̍kāā, vɛ̄? Yɔ̄ŋ i̍sīōōŋ te̍, kāni̍ fo̍ndōle̍, Mɛ̄lɛ̄ka̍ tūēī cha᷄ŋ pōo̍mbɔ̄ɔ̍ chō wo̍. 18Le̍la̍ŋ, chɔ̍ŋ mā kɔ̍ chu̍ā ndu̍ mā nyɔ̍ɔ̍lu̍ ndu̍, kāni̍ fu̍u̍le̍, I̍ cho̍ tōsā mī pūlālē ndɔ̄le̍ŋ lē sīmnu᷄ŋ lɛ̄ŋndē bɛ̄ndū.” 19O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ kūmbī Ha̍ka̍a̍ hɔ̄lta̍ŋ, mbo̍ chā so̍o̍ŋ māmɛ̄ŋndo̍. O̍ ko̍ŋ, mbo̍ kūā mbo̍ kɔ̍ kɔ̍ndū mɛ̄ŋnda̍ŋ o̍ bɔ̄lɔ̍ māmɛ̄ŋndo̍ ni᷄ŋ, mbo̍ kē pōo̍mbɔ̄ɔ̍, mi̍ pōo̍mbɔ̄ɔ̍ ō kōl. 20Chɔ̍ŋ a̍ pōo̍mbɔ̄ɔ̍ ho̍ō hīndɔ̄ɔ̄ ndɔ̄ɔ̍ ha̍a̍a̍ mbo̍ sūl, Mɛ̄lɛ̄ka̍ wa̍ ndu̍ kɔ̄ɔ̄lī. Ō lo̍ o̍ lɛ̄ŋndē po̍lte̍ŋ Pa̍lūāŋ ha̍a̍a̍ mbo̍ sīmnu᷄ŋ do̍o̍sūnɔ̍ bɛ̍ndū. Ō wa̍ wāna̍ cha̍ā dōōsūle̍ŋ a̍ chīɔ̄ū ndɔ̄ɔ̍. 21Mi̍ Ha̍kāā ka᷅la̍ ndɔ̄ lo᷅ o̍ ko̍ŋ mbo̍ pūūlūl ndu̍ la̍nɔ̍ɔ̍, chūā wāā lɛ̄ŋndē I̍chi̍pīle̍ŋ.

E̍bīlāha᷅m yi̍i̍ kpe̍ma̍a̍ nda̍ Ābīmɛ̍lɛ̍kī

22A̍ bōōndi̍i̍ ke̍ŋ, mi̍ Māsāa̍ Ābīmɛ̍lɛ̍kī chu̍ā lāŋu̍nɔ̍ wa̍ so̍vɛ̄i̍ya̍a̍ ndūa̍a̍ bōlle̍ŋ ndo̍, dīōla̍ŋ āā, Fi̍kɔ̄l, ma̍ hūŋ nāa̍ E̍bīlāha᷅m chu̍a̍. Mi̍ Ābīmɛ̍lɛ̍kī di̍mūl E̍bīlāha᷅m āā, “Ŋ̄ sīnā māā Mɛ̄lɛ̄ka̍ chō nūm E̍bīlāha᷅m kɔ̄ɔ̄lī o̍ nyɛ̄ o̍ nyɛ̄ fe̍e̍ ni̍ŋ. 23Nūm pi̍la̍ ā sīnā māā ya̍ A̍bīmɛ̍lɛ̍kī I̍ sa̍ndu̍ a̍ nūm ta̍u̍. Le̍la̍ŋ nūm bɛ̍ɛ̍ chu̍e̍l la̍ ībūŋgā māā ā sāndū ni̍ŋ a̍ ya̍, a̍ lɛ̄ŋndē nīle̍ŋ, lē ŋ̄ hīŋ nde᷅ŋ na̍a̍ nya̍ mi̍ ŋ̍ wā īchāli̍ le̍ni̍ŋ nde̍ŋ. Me̍na̍la̍ŋ ya̍ o̍ Mɛ̄lɛ̄ka̍ lo̍ māā ya̍ ni̍, a̍ chūāūwāā nīa̍a̍, a̍ chūāūwāā nīāā ma̍māa̍ māā a̍ hu̍i̍ī ni̍ŋ na̍a̍ le̍.”

24Mi̍ E̍bīlāha᷅m mu̍lī āā, “I̍ chu̍a̍ būŋgɛ̄i̍ Mɛ̄lɛ̄ka̍ o̍ hɔ̄l māā I̍ cho̍ tōsā mɛ̄ɛ̍ ŋ̄ dīmi̍ yɛ̍.”

25O̍ ko̍ŋ kɔ̍ɔ̍lī, mi̍ E̍bīlāha᷅m o̍ ŋɔ̍ɔ̍cha᷄ŋ nāa̍ A̍bīmɛ̍lɛ̍kī chu̍a̍, a̍ mɛ̄ɛ̍ bu̍ɛ̍i̍yāa̍ Ābīmɛ̍lɛ̍kī wa̍ ā bīī so̍o̍ŋ māmɛ̄ŋ E̍bīlāha᷅m ndo̍ yɛ̍. 26Kɛ̍ mi̍ Ābīmɛ̍lɛ̍kī di̍mūl ndu̍ āā, “I̍ si̍nā bu̍ɛ̍ī ni̍ to̍sa̍ ko̍ŋ ndo̍ le̍. A̍ di̍mu̍l la̍ a̍ ndi̍ o̍kɔ̄ɔ̄ le̍, mɛ̄ɛ̍ dīmī ŋ̄ chō ho̍ō wo̍.” 27O̍ ko̍ŋ kɔ̍ɔ̍lī, mi̍ E̍bīlāha᷅m bi̍ī sāa̍ a̍ nāūwa̍ mbo̍ kē Ābīmɛ̍lɛ̍kī. Nda̍ ŋi̍ɔ̍ɔ̍ŋ ma̍ yīī kpe̍ma̍a̍ pāa̍le̍ le̍ŋ. 28Mi̍ E̍bīlāha᷅m so̍lī vɛ̄lɛ̄ sāā la̍a̍ndūāā fɔ̍ŋndu̍a̍a̍ ā ŋɔ᷄mmɛ̍ū o̍ sāa̍ ndūa̍a̍ chōo̍, mbo̍ kɛ̄sī nda̍ ku̍ndā yɛ̍. 29Mi̍ Ābīmɛ̍lɛ̍kī nyu̍nā ndu̍ āā, “Vɛ̄ ma̍ sōlī sāā la̍a̍ndūāā fɔ̍ŋndu̍a̍a̍ ŋɔ̍mmɛ̍ūva̍ ha̍ā o̍ sāā nu̍mnda̍ chōo̍ ma̍ kɛ̄sī nda̍ yɛ̍?”

30Mi̍ E̍bīlāha᷅m di̍mūl ndu̍ āā, “Bi̍i̍ sa̍ā ŋɔ̍mmɛ̍ūwa̍ ha̍ā, le̍ nu̍m chɔ̄mndo̍ mā si̍na̍ māā ya̍ E̍bīlāha᷅m, māā ya̍ to̍ū so̍o̍ŋ māmɛ̄ŋndo̍ ho̍ō ni̍.” 31Le̍la̍ŋ, nda̍ vēēlu̍ fo̍ndāŋ kōŋ ni̍ āā, Bīɛ̄ɛ̄si̍ɛ̍bā,#21:31 Bīɛ̄ɛ̄si̍ɛ̍bā: Tɛ̄ɛ̄sīāā ndɔ̄ɔ̍ āā, “So̍o̍ŋ kpe̍ma̍a̍.” kāni̍ fu̍u̍le̍, lo̍ŋ pūa̍a̍ ŋīɔ̍ɔ̍ŋāā kāŋ ā chūēlna᷅ŋ kpe̍ma̍la̍ŋ ni̍.

32Mɛ̄ɛ̍ nda̍ yīi̍ kpe̍ma̍ ko̍ŋ Bīɛ̄ɛ̄si̍ɛ̍bā, mi̍ Ābīmɛ̍lɛ̍kī cha᷄ŋ nda̍ Fi̍kɔ̄l, bōllē so̍vɛ̄i̍ya̍a̍ ndūa̍a̍, ma̍ mīīŋgū o̍ lɛ̄ŋndē Fīli̍i̍tīāāle̍ŋ ni᷄ŋ. 33O̍ ko̍ŋ kɔ̍ɔ̍lī, mi̍ E̍bīlāha᷅m tu̍āl yɔ̄mndo̍ Bīɛ̄ɛ̄si̍ɛ̍bā#21:33 Yɔ̄mndo̍: Ā vēēlu̍ yɔ̄m E̍bīlāha᷅m tɔ̄l ho̍ō wo̍ o̍ pūūlūe̍i̍ ni᷄ŋ āā, ta̍ma̍lu̍i̍. lo̍ŋ. Mbo̍ sōōlūū Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ le̍ kpo̍u̍ wo̍, o̍ fo̍ndāŋ kōŋ. 34Mi̍ E̍bīlāha᷅m cha᷅l o̍ lɛ̄ŋndē Fīli̍i̍tīāāle̍ŋ ni᷄ŋ le̍ te̍le̍ŋ vi̍lɛ̄ī.

Currently Selected:

Chɛ̄nɛ̍se̍ē 21: YM

Highlight

Copy