Chɛ̄nɛ̍se̍ē 15

Mɛ̄lɛ̄ka̍ yīi̍ kpe̍ma̍a̍ nda̍ E̍bīlām tɛ̍ɛ̄ŋ

1Pāa̍le̍ pi᷅lɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ E̍bīlām chu̍a̍ o̍ yi̍lāŋndo̍ ni᷄ŋ. Mbo̍ dīmūl ndu̍ āā, “E̍bīlām, yɔ̄ŋ īsīōōŋ te̍. Ya̍ cho̍ wāna̍ ma̍ndā nu̍m ndo̍ ni̍. I̍ cho̍ nu̍m māndā o̍ īsɔ̄ɔ̍ o̍ īsɔ̄ɔ̍ pa̍lāa̍ hu̍ŋ nu̍m chōo̍. Ndu̍yɛ̍, fāndā ya̍ I̍ ke̍ ni̍ŋ nu̍m ndo̍ ō wā ni̍ŋ o̍ bɔ̍ɔ̍.”

2Kɛ̍, mi̍ E̍bīlām di̍mī āā, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ke̍ ya̍ bɛ̍ɛ̍ ndu̍ mī yɛ̄ɛ̄ kɛ̍ndɛ̄? Hāū a̍ hāū I̍ vi̍lū wɔ̍ chūā le̍. Wāna̍ lēkāa̍ ho̍ō, ndu̍ yɔ̍nūŋ māā bu̍ɛ̍ī nūu̍ Īlīɛ̍ɛ̍sā ni̍, vīōlɔ᷄ŋ wa̍ā Dāma̍si̍kɔ̄ɔ̄ chi̍e̍e̍, ndu̍ ko̍ lo̍ō ni̍ŋ nyɛ̄m ni᷄ŋ ni̍. 3A̍ ke̍ ya̍ chūā le̍. Tē I̍ hūŋ wū pɛ̍, po̍ chɛ̄ nūu̍ vēlū wo̍ ndu̍ ko̍ni̍ lo᷅ ni̍ŋ o̍ fōōfo̍ nūu̍ ni̍.”

4Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl E̍bīlām āā, “Ō cho̍ Īlīɛ̍ɛ̍sā le̍ lo᷅ ni̍ŋ o̍ fōōfō nu̍mndo̍ le̍. Nūm pi̍la̍ po̍ nu̍m ŋ̄pūlo̍o̍ ndu̍ lo᷅ ni̍ŋ o̍ fōōfō nu̍mndo̍ chōo̍ ni̍.” 5O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ fu̍lā a̍ E̍bīlām o̍ bɛ̍ɛ̄. Mbo̍ di̍mūl ndu̍ āā, “Chu̍a̍ wɔ̍ hɔ̄lla̍ mā to̍fa̍ o̍ ha̍la̍. Chɔ̍m ndɔ̍ lo̍o̍ŋ o̍ ha̍la̍ ŋ̍ pi̍lɛ̍ŋ pi̍lɛ̍ŋ mɛ̄ɛ̍ ŋ̍ cho̍ yɛ̍, tē ā nɔ̄lā pɛ̍.” Mi̍ Mɛ̄lɛ̄ka̍ dīmūl ndu̍ āā, “Le̍nde̍ chūāā nūm a̍ ma̍māa̍ ā wā ni̍ŋ fa̍ŋgā ni̍.”

6Mi̍ E̍bīlām la̍a̍la᷄ŋ su̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ ve̍. O̍ ko̍ŋ, mi̍ Mɛ̄lɛ̄ka̍ hīnī kɔ̄l a̍ E̍bīlām le̍ lāāla᷄ŋ o̍ la̍a̍la̍ŋ a̍ ndu̍ wo̍. Le̍ he̍ī, mi̍ Mɛ̄lɛ̄ka̍ tōsā mi̍ E̍bīlām si̍mnu᷄ŋ wa̍nā sa̍kpō Mɛ̄lɛ̄ka̍ o̍ hɔ̄l.

7Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ mbo̍ dīmūl E̍bīlām āā, “Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, o̍ chɛ̍ŋ a̍ nūm Ɔ̍ɔ̄ chi̍e̍e̍ o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ ndo̍ ni̍, le̍ mī hu̍ŋ ke᷅ nu̍m lɛ̄ŋndēŋ nde᷅ŋ nyɛ̄ nūm.”

8Kɛ̍, mi̍ E̍bīlām di̍mī āā, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, vɛ̄ɛ̍nɛ̍ ya̍ I̍ lo̍o̍kū yɛ̍ ni̍ŋ si̍nā māā I̍ cho̍ lɛ̄ŋnde̍ŋ nde᷅ŋ sɔ̄lā māā nyɛ̄ nī?”

9Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ mbo̍ dīmūl E̍bīlām āā, “Kɔ̍ mā kɔ̍ bi̍ī nāūwo̍, a̍ chūīŋndo̍, a̍ sāa̍ ō pīāāndōo̍. Chɔ̄lūa̍a̍ ha̍ā ā nɔ̄ mā wa̍ wɔ̄sīla̍ŋ lā yāa̍ ki̍nɛ̍i̍. Mā bīī vɛ̄lɛ̄ pīīŋndo̍, a̍ ka᷅ŋgbo̍o̍, mā hīŋ a̍ nda̍.” 10Mi̍ E̍bīlām hūŋ a̍ nda̍ fa̍ū nāa̍ Mɛ̄lɛ̄ka̍ chūā. Mi̍ E̍bīlām di̍ī chɔ̄lūa̍a̍ ha̍ā. Mbo̍ tɛ̄ndā nāūwo̍ tɛ̄ɛ̄ŋ sālā tīɔ̍ɔ̍ŋ. Chūīŋndo̍ a̍ sāa̍ bɛ̍ɛ̍ le̍nde̍ ko̍ni̍, mbo̍ tɛ̄ɛ̄ndīāā nda̍ tɛ̄ɛ̄ŋ. Tɛ̄ɛ̄ndīa̍a̍ nda̍ tɛ̄ɛ̄ŋ mbo̍ hɛ̄ɛ̄ndūū nda̍ a̍ pɛ᷄lta̍ŋ le̍nde̍, ō chu̍a̍ pɛ̍ bu̍ŋgāŋ nāūwo̍ ō hāndu̍ vēlāa̍ vēllē. Chūīŋndo̍ a̍ sāa̍ bɛ̍ɛ̍, le̍nde̍ ko̍ni̍ o̍ to̍sa̍ ni̍ mbo̍ hāndū būŋga̍ŋ nda᷄ŋ vēllāa̍ vēllē. Kɛ̍ yōūwāa̍ ŋīɔ̍ɔ̍ŋnda̍ nda̍ ō tɛ̄nda̍ ka̍ŋ tɛ̍ɛ̄ŋ te̍. 11O̍ ko̍ŋ kɔ̍ɔ̍lī, mi̍ dūa̍a̍ hu᷄ŋ to᷅l le̍ vīsīāā vīlɛ̍i̍ya̍ ha̍ā dīo̍o̍, kɛ̍, mi̍ E̍bīlām tu̍a̍ū nda̍.

12A̍ te̍le̍ŋ pāa̍le̍ŋ lē kūā le̍ dēlɔ̄ɔ̍ wo̍, mi̍ E̍bīlām hi̍a̍ū o̍ lūa̍a̍ŋ yi᷅kpi̍. O̍ lɔ̄mā ndūa̍ŋ ni᷄ŋ, mbo̍ sīna᷄ŋ mɛ̄ɛ̍ wāŋndo̍ ō pīā nu̍a̍ā a̍ sīōōŋīī bɛ̄ndū bɛ̍ndūe̍i̍ yɛ̍. 13O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ndu̍ o̍ lūa̍ŋ ni᷄ŋ āā, “E̍bīlām, kɛ̍si̍ŋ o̍ kɔ̄l māā chūāā nūm a̍ ma̍māa̍ ā kūā ni̍ŋ o̍ lɛ̄ŋndē pi̍la̍le̍ŋ ni᷄ŋ mā wa̍ lo̍ŋ la̍mi̍a̍l. Wāŋnda̍ sīīŋgūū ni̍ŋ nda̍ chīa̍a̍, mā bīī nda̍ bīyɔ̄ɔ̄ lēchīɔ̍ɔ̍ le̍ wɔ̄sīla̍ŋ kɛ̄mɔ̄ɔ̍ lē hīɔ̍ɔ̍lu̍ (400). 14Kɛ̍ ndu̍yɛ̍, lɛ̄ŋnde̍ si̍i̍ŋgūū ni̍ŋ nda̍ chīa̍a̍ le̍ŋ, I̍ cho̍ nda̍ nyɛ̄ pālāa̍ tūsī chōo̍. O̍ ko̍ŋ kɔ̍ɔ̍lī, ā fūlā ni̍ŋ o̍ lɛ̄ŋndē lēŋ ni᷄ŋ a̍ nyɔ̄ɔ̍ŋ ta̍u̍. 15Kɛ̍ nūm nūm E̍bīlām ā chō yūwā ku̍dɛ̄ɛ̄, mā vī o̍ kɔ̄l nyūlū ni᷄ŋ, mā sɔ̍la̍ kūmbɔ̄ɔ̍. 16Wānāa̍ fu̍lā ni̍ŋ o̍ pūlālē nūmnde̍ŋ chōo̍ wa̍, ā hūŋ ni̍ŋ mā hu᷄ŋ kɔ᷅ o̍ lɛ̄ŋndē pi̍la̍le̍ŋ ni᷄ŋ mā kɔ̍ cha᷅l lo̍ŋ. Kɛ̍ ndu̍yɛ̍, ō fūūlūū ni̍ŋ a̍ te̍le̍ŋ, nda̍ kpo̍u̍ mā hu᷄ŋ mi̍i̍ŋgū o̍ lɛ̄ŋndē ndāle̍ŋ ni᷄ŋ. Kɛ̍ ō chūā ni̍ŋ wɔ̍sīlā fāŋgā. Yu̍ŋgu̍la̍ŋ sālā hīɔ̍ɔ̍lu̍ kpu̍lu̍ku̍u̍ la̍ hi̍a̍ū ni̍ŋ ni̍ ma̍lāŋ he̍ī yɔ̄nūŋ. Mɛ̄ɛ̍ mbō lo̍ o̍ ko̍ŋ, mī yɔ̄ŋndā wɔ̄ɔ̍ŋndā Āmɔ̄lu̍a̍a̍tīi̍ya̍ lā fūūlu̍u̍ a̍ bōōndi̍i̍ ya̍ I̍ tu̍sī ni̍ŋ nda̍ nyɛ̄ pālāa̍ chōo̍ ve̍, ma̍lāŋ he̍ī ī yɔ̄nūŋ.”

17Mɛ̄ɛ̍ pāa̍le̍ŋ lē de᷄l do̍ŋ, mi̍ nyūmnda̍ŋ mā tūāl kpi᷅ŋgbi̍. O̍ lēpīlɛ̍ ni᷄ŋ kpe̍, mi̍ kpɛ̍ɛ̍nɛ̍i̍ ī fūlā a̍ tɛ̄ŋgɛ̍ lēyīŋndo̍. Kūmnde̍ ī wa̍ fūlāa̍ o̍ kpɛ̍ɛ̍nɛ̍i̍ ke̍ŋ ni᷄ŋ. O̍ ko̍ŋ kɔ̍ɔ̍lī, nyɛ̄m sālā tīɔ̍ɔ̍ŋndo̍ŋ mu᷅ŋ, kpɛ̍ɛ̍nɛ̍i̍ īku᷄m ke̍ŋ a̍ tɛ̄ŋgɛ̍ lēyīŋ kōŋ, mi̍ ŋ̄ sāā kēēkōo̍ vīsīŋ lāku̍ndāŋ mu᷅ŋ tɛ̄ɛ̄ŋ. 18O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chu̍ēl E̍bīlām būŋgɛ̄ī bɛ̄ndū bɛ̍ndūe̍i̍ āā, “Lɛ̄ŋnde̍ŋ nde᷅ŋ ki̍nɛ̍i̍, chɔ̍ŋ a̍ I̍chi̍pī, mbō fūūlu̍u̍ a̍ Pīo̍o̍ Yūfi̍lu̍a̍tīī di̍, le̍ŋ ya̍ I̍ cho̍ chūāā nūm a̍ ma̍māa̍ kē ni̍, 19le̍ŋ le̍ yɔ̍nūŋ ni̍ māā lɛ̄ŋnde̍ Ke̍na̍na̍i̍tīi̍ya̍, a̍ Kɛ̍ni̍sa̍i̍tīi̍ya̍, a̍ Ka̍di̍mo̍na̍i̍tīi̍ya̍, 20a̍ Hi̍ta̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Lu̍ɛ̍fēmtīi̍ya̍, 21a̍ A̍mɔ̍lu̍a̍i̍tīi̍ya̍, a̍ Ke̍na̍na̍i̍tīi̍ya̍, a̍ Ka̍ka̍sa̍i̍tīi̍ya̍, a̍ Chɛ̄būsa̍i̍tīi̍ya̍.”

Currently Selected:

Chɛ̄nɛ̍se̍ē 15: YM

Highlight

Copy