Kuyamba 23

Sara adafa Abhurahamu angula manda

1Sara adakhala wamoyo kwamagole dzana namakumi mawili nanomwe (127). Yamweya ndiyo magole yadalalama Sara. 2Sara adazafela mu Kiriyati-aribha iyo ikhachemelewa pomwe kuti Hebhuroni, mudziko la Kenani. Kumweko Abhurahamu adakalila nkazi wake. 3Pamwepo Abhurahamu adasiya chitanda chili munyumba nkuyenda kwaa Hiti kwaadakati, 4#Ahe 11:9,13; Mab 7:16“Ine ndine mulendo mudziko lino landikukhala pakati panu, ndipaseniko mbuto kuti ikhale manda, kuti ndikayikhe nkazi wangu kumweko.” 5Wanthu wachi Hiti adati kwa Abhurahamu, 6“Mbuye wathu, tetekelani kwayise, imwe ndimwe wakulemekezeka pakati pathu. Sankhulani mbuto yabwino yamungawone nkati mwamanda yathu, palibe munango wathu angakulambizeni manda yake, panango kukulambizani kuyikha chitanda chanu.”

7Pamwepo Abhurahamu adasumuka nkukotama pantsi, achiwonesa ulemu kwaa Hiti, wanthu wambuto imweyo. 8Iye adati kwayiwo, “Peno imwe mwabvuma kuti ndikayikhe nkazi wangu, tsapano ndiwuzilenimbo Efuroni mwana wa Zofari, 9kuti andipase mphako yapa Makipera chakumbali kwamunda wake. Ninimpagali masheleni yaaninga walewa mwentse muchiwona, kuti ndikhalembo nambuto yangu yakuyikha wanthu wangu akafa.”

10Tsapano Efuroni akhadakhala pakati paa Hiti, pamwepo Efuroni mu Hiti adadayila Abhurahamu a Hiti wentse achibva, awo wentse akhadapita napansuwo waguta. 11Iye adati, “Nee, mbuya wangu, nditetekeleni, ninkupasani munda namphako ili m'mwemo kuti bzikhale manda yanu. Ine ndaakukupasani wanthu wentse achibva, tsapano kayikheni chitanda chanu.”

12Pamwepo Abhurahamu adakotama pantsi patsogolo pawanthu wamudziko limwelo. 13Iye adadayila Efuroni wanthu wentse wamudziko limwelo achibva, iye adati, “Ndaphata minyendo, ine ninkupasani masheleni yakugula mandayo, tambilani kuchitila kuti ndikwanise kuyikha wanthu wangu kumweko akafa.”

14Efuroni adati kwa Abhurahamu, 15“Mbuye wangu, ibvani, mbuto imweyi in'guliwa namasheleni yasiliva mazana manayi (400) basi, n'chinyi kwamunthu ninga iwe nayine? Imwe Yendani mukayikhe chitanda chanu.” 16Pamwepo Abhurahamu adabvana na Efuroni achimpasa masheleni yaadalewa, adampasa masheleniyo wanthu wentse achibva. Adapagali masheleni yamasiliva mazana manayi (400) kuteyeza mphimo yaanyamalonda.

17Nakutenepo munda wa Efuroni waku Makipela chakumabveladzuwa kwa Mamure, munda namphako ikhali m'mundamo namiti yentse ikhali pamwepo, 18bzidapasiwa Abhurahamu kuti bzikhale bzake, ibzi bzidachitika a Hiti awo wentse akhadapita napansuwo waguta achibva.

19Pambuyo payibzi, Abhurahamu adayikha nkazi wake Sara m'mphako yaku Makipera, chakumabveladzuwa kwa Mamure, iyo ikhachemelewa pomwe kuti Hebhuroni, mudziko la Kenani. 20Munda namphako ikhali m'mwemo bzidapelekewa kwa Abhurahamu naa Hiti kuti ikhale mbuto yakuyikha wanthu.

Currently Selected:

Kuyamba 23: KUNDA

Highlight

Copy