Kuyamba 18

Abhurahamu antsimikiziwa mwana

1Chawuta adabziwonesa kwa Abhurahamu paakhali pamiti yamioki yaku Mamure, paakhadakhala pansuwo watenti yake, dzuwa lichipsa. 2#Ahe 13:2Adanyangana nkuwona amuna atatu adayima pafupi nayiye. Paadandowawona adathamanga achikagumana nawo, achikotama pantsi. 3Iye adati, “Mbuye wangu, peno mwandichitila chifundo, lekani kupitilila panyumba pamulanda wanu. 4Ndikupaseni madzi, musambe nzaye zanu, mungapumule bzanu nyantsi mwamuti. 5Ndikuphikileni zingwa mudye, muwone mphamvu pakufamba ulendo wanu.” Pakuti mwabwelambo kwamulanda wanu, nakutenepo iwo adati, “Chita bzawalewa.”

6Abhurahamu adathamangila kutende kwake, adati kwankazi wake Sara, “Uchite bzakukulumiza, utakule mphimo zitatu zawufa wakunyodoka, ukanye uphike zingwa.” 7Abhurahamu adayenda kuthanga labzifuwo bzake, adasankhula chimwana chang'ombe chakunenepa chabwino, achichipasa mulanda wake kuti akulumize kukonza. 8Adatola khilimu, nankaka nanyama achibzipasa amunawo, iye nkuyima pana iwo munyantsi mwamuti iwo paakhadya.

9Amunawo adazati kwa Abhurahamu, “Ko nkazi wako Sara ali kuponi?”

Iye adati, “Ali mutenti.”

10 # Alo 9:9 Chawuta adati, “Nin'zabwelela kwayiwe muchilimo, Sara nkazi wako an'zakhala namwana.”

Sara akhali chakumbuyo kwatende achitetekela. 11Tsapano Abhurahamu na Sara akhadakalamba, Sara akhadayima kuyenda kumwezi. 12#1 Pit 3:6Nakutenepo Sara adaseka chamuntima, iye adati, “Pakuti ine ndakalamba, nambuya wangumbo pomwe wakalamba. Ko ine ningakomedwe nanyi?”

13Chawuta adati kwa Abhurahamu, “Thangwe lanyi Sara waseka, akuti, ‘Ningachite mwana ine ndakalamba tenepa?’ 14#Luk 1:37Ko pana chintazika na Chawuta? Nthawe ikakwana panin'zabwelela muchilimo, Sara an'zakhala namwana wachimuna.”

15Koma Sara adalamba, adati, “Ndilibe kuseka,” Pakuti akhagopa. Iye adati, “Nee, iwe waseka.”

Abhurahamu ampemphelela Sodhomu

16Amunawo adachoka pamwepo, nkulungama ku Sodhomu, Abhurahamu nkuwapelekeza. 17Pamwepo Chawuta adati, “Ningabisile Abhurahamu bzandikuyenda kachita ku Sodhomu, 18ndichidziwa kuti Abhurahamu an'zakhala nshowo ukulu waphamvu, mishowo yentse yadziko lapantsi in'zabzidalisa nayiye. 19Ningachite lini tenepo, pakuti ndidamusankhula kuti azawuze wana wake nam'badwe wake kuteyeza njila za Chawuta, pakuchita chilungamo nakulinganiza; kuchitila kuti Chawuta azachite kwa Abhurahamu bzaadamutsimisa.”

20Nakutenepo Chawuta adati kwa Abhurahamu, “Kulila kudanyanganana na Sodhomu na Gomora kwakula, pomwe chitazo chawo chakula kwene-kwene, 21nakutenepo nim'buluka ndikawone panango akuchita bziniyendelana nakulila kwandidabva, peno nee ninkadziwa.”

22Amuna awiliwo adachoka pamwepo nkulungama ku Sodhomu, koma Abhurahamu adasala adayima patsogolo pa Chawuta. 23Pamwepo Abhurahamu adafendela pafupi na Chawuta, nkuti, “Ko n'chadidi kuti mukuyenda kapha wanthu wakulungama pabodzi nawakuyipa? 24Ko peno muna wanthu wakulungama makumi mashanu (50) muguta, munkacheneka guta lentse, muchileka kalisiya nathangwe lawanthu makumi mashanu (50) wakulungama ali m'mwemo? 25Mungachite lini tenepo, kuphela kubodzi wakulungama nawakuyipa! Kuchita kuti wakulungama awoneke ninga wakuyipa pomwe! Mungachite lini tenepo! Ko ntongi wadziko lapantsi lentse anfunika lini kutonga bzabwino?”

26Chawuta adati, “Ndikawona mu Sodhomu muna wanthu makumi mashanu (50) wakulungama ninkaphwanya lini gutalo nathangwe lawanthu amwewo.”

27Abhurahamu adati, “Ndabzichitisa ndekha kulewa-lewa nayimwe Chawuta, ne ndingakhale munthu wakukonzewa nadongo nadotha. 28Ko peno pankasayika ashanu wakulungama pamakumi mashanu (50), munkaphwanya gutalo thangwe lakuti pasayika ashanu?” Iye adati, “Ninkaliphwanya lini ndikakawona muna makumi manayi naashanu” (45.)

29Abhurahamu adabvunza pomwe, nkuti, “Ko peno munkawona muna makumi manayi” (40.)

Iye adati, “Ninkaliphwanya lini ndikakawona muna wanthu makumi manayi (40) wakulungama.”

30Abhurahamu adati, “Ndaphatha minyendo lekani kukalipa, ninfuna kubvunza pomwe Mfumu, ko pakachita wanthu wabwino makumi matatu” (30?)

Iye adati, “Ninkaliphwanya lini ndikakawona muna wanthu makumi matatu” (30.)

31Abhurahamu adati, “Wonani, Mfumu ndabzichitisa ndekha kulewa-lewa nayimwe. Ko munkawona muna wanthu wabwino makumi mawili” (20?)

Iye adati, “Ndikakawona muna wanthu makumi mawili (20) wakukhulupilika ninkaphwanya lini gutalo.”

32Abhurahamu adati, “Mfumu lekani kukalipa pakuti ninfuna kukubvunzani pomwe, ko mukakawona muna wanthu khumi?”

Iye adati, “Nathangwe lawanthu khumi niniliphwanya lini.” 33Chawuta paadamala kulewa-lewa na Abhurahamu adayenda, Abhurahamu nkubwelela kumbuto kwake.

Currently Selected:

Kuyamba 18: KUNDA

Highlight

Copy