Matayo 6

Ebya bo rurimi

1Mukabukega mutakoreraga ebyo oburengeresi bwemwe mu me:so ga ba:nu, korereki babarore, kwo kuba murakoraga kutiyo mutayabwega muyero Kwisomwana unu ari mu rwire. 2Mbe awe ukagabira abataka, utabumaga ŋombi imbere yao rwa bo rurimi kutyo abakora mu mekofyanyisyo na mu njira, korereki aba:nu babayane ecibaro. Ni cimari enibabwira ati, bamarire okuyabwa omuyero gwebwe. 3Nawe awe, uragabiraga abataka, okuboko kwao okwe bumosi kusigega kumenya okwe buryo binu okukora. 4Okugaba kwao kubega mu bumbise, na Esomwana unu karoraga mu bumbise arikuyana omuyero.

5Murasabwaga mutabaga rwa bo rurimi, kwo kuba abenda okusabwa bemereguyu mu mekofyanyisyo na ku njira ya ma:ka:ka, korereki aba:nu babarore. Ni cimari enibabwira ati, bamarire kuyabwa omuyero gwebwe. 6Nawe awe urasabwaga ingiraga esi:ko wao, wigare orwigi, niwo usabwe Esomwana unu ari mu bumbise, na Esomwana unu karoraga mu bumbise arikuyana omuyero.

7Nawe emwe murasabwaga, musigega kusubasubagamo misango kutyo era rwa ba:maanga kutyo abakora, okuba abe:togera ati, abongwibwa kurwe misango jebwe okufura. 8Mbe mutasusanaga nabo kwo kuba Esomwana amenyere binu mukenere mucari na kumusabwa.

Okusabwa kwa Beigisibwa

(Lk. 11:1-4)

9Mbe musabwega kutya ati,

Rata unu uri mu rwire,

Risi:na ryao rikusibwe.

10Obukama bwao bu:je.

Okwenda kwao kukorwega mu:si rwa kutyo okukorwa mu rwire.

11Uciyane rero ebiryo byeswe byo kuci:ya.

12Uci:swaririre amabanja geswe, rweswe kutyo eci:swaririra banu ecitonga.

13Utacisira mu kusakwa nawe ucikisye ku mubi:bi.

Kwo kuba obukama no buinga na rikusyo ni byao kajanende na kajanende. Amina.

14Kwo kuba muke:swaririra aba:nu ebikayo byebwe, Esomwana wa mu rwire aribe:swaririra emwe one. 15Nawe mukarema okwiswaririra aba:nu ebikayo byebwe, nyaburiko Esomwana one atakube:swaririra ebikayo byemwe.

Okusara:rira

16Mbe mukasara:rira, musige kususana na bo rurimi banu abairiga obusu, okuba abe:surumbasya obusu, korereki barorwe ati abasara:rira. Ni cimari enibabwira ati, bamarire okuyabwa omuyero gwebwe. 17Nawe awe ukasara:rira, ibambagaga amafuta ku mutwe, wiyosyega mu busu, 18Korereki aba:nu basige kukurora ati, ousara:rira, tari Esomwana unu ari mu bumbise, na Esomwana unu karora mu bumbise, oyo arikuyana omuye:ro.

Obuni:bi bwa mu rwire

19Mute:bikiraga ebi:nu mu:si, omwo ebinyamurirwa jifufunyi no butaretare, na be:fi mbatakura nibe:ba. 20Nawe Mwibikirega ebi:nu mu rwire, omwo bitakunyamurirwa fufunyi nakabee buri butaretare, amwi abe:fi batakutakura amwi kwiba. 21Kwo kuba anu ebi:nu byemwe ebiba, niwo no mutima gwemwe one oguba.

22Orumuri rwo mubiri ndye ri:so. Mbe eri:so rikaba rikobere omubiri gwao gwone oguba no bweru. 23Nawe eri:so ryao rikaba ebi:bi omubiri gwao gwone oguba ne cisu:te mbe, obweru bunu buri mwawe bukaba cisu:te, ni cisu:te ca:fu kutiki!

24Atariwo mu:nu unu katura okubakorera besebugenyi babiri. Okuba amwi arisokako oumwi, nenda oundi, amwi naruma ku umwi, nagaya oundi. Mutakutura kukorera Nyamuanga no kukorera obuni:bi one.

Ebyo kwigana

25Nikwo enikora nimbabwira ati, Mute:ganaga obuanga bwemwe ati, Cirirya ki? amwi, Cirinywa ki? amwi mutaganiraga emibiri jemwe ati, Cirifwara ki? ?Obuanga butakukira ebiryo, no mubiri gutakukira ebifwaro? 26Murore jinyonyi ja mu rutumba, jitakubiba amwi jitakugesa, amwi jitakusombera mu bitara. Nawe Esomwana wa mu rwire kajiri:sya:ra. ?Emwe ejo mutakujikira muno? 27?Niga mwimwe unu katura okwigana okwiyongesyako obure:ra bwae cita cimwi? 28?Niki cinu ecikora nimwigana ebifwaro? Murore obwaso bwa mu ndiri kutyo obumera. Butakukora murimu amwi kuruka myenda. 29Nawe enibabwira ati, Sulemani mwikusyo ryae, ryone atafwae rwo bwejabo obwo. 30Kambe Nyamuanga araba kafwafya obunyasi bwa mu ndiri bunu buriwo rero, na mutondo obweswa mu co:to, ?mbe ka atakubafwafya emwe kukira obwo, emwe abo kwikirisya okuto:to? 31Nikwo murakoraga nimurema okwigana ati, Cirirya ki? amwi ati, Cirinywa ki? amwi ati, Cirifwara ki? 32Okuba ebyo byone nibyo abamaanga abayenja. Kwo kuba Esomwana wa mu rwire amenyere ati, mukenere ebyo byone. 33Nawe muyenje okwamba obukama bwa Nyamuanga no burenge:resi bwae, nebyo byone niwo muryongesibwa. 34Mbe mute:ganaga bya mutondo, kwo kuba orusiku rwa mutondo orwiganira orwene. Orusiku orumwi ecibi:bi cendemo ecirumara.

Currently Selected:

Matayo 6: KIJ1960

Highlight

Copy