Matayo 16

Abafarisayo nibenda ecibarikisyo

(Mk. 8:10-13)

1Abafarisayo na Basadukayo niba:ja okumusaka, nibamusabwa abe:resye ecibarikisyo co kuso:ka mu rwire. 2Omwene naindura nababwira ati, Wora kwaba kegoro, omwaika ati, Okujo:kuba kisi, okuba orwire rutukuye. 3Na katondo ati, Rero, oruja okubao orwijogoro okuba orwire rutukuye ka rutingire. Emwe ba rurimi, mumenyere okubarikisya orususo rwo rwire, nawe ebibarikisyo bya magoro mutakutura kubarikisya. 4Aba riimbo ribi:bi ne ryo buromesi abayenja ecibarikisyo. Nawe batariyabwa cibarikisyo, tari ecibarikisyo ca Yona.

Yesu na:ika ecigambo ce cifwimbya

(Mk. 8:14-21)

5Abe:igisibwa bae nibambuka ku ngego yenderya nibarabirwa okugega emikate. 6Yesu nababwira ati, Mukabuke mwikenge ecifwimbya ca Bafarisayo ne:ca Basadukayo. 7Nibabambasyanya abene:ra niba:ika ati, Okuba citagega emikate. 8Yesu namenya nababwira ati, Emwe abo kwikirisya okuto:to, ?Niki cinu omukora nimubambasyanya emwe abene:ra, okuba mutagega emikate? 9?Mucari kusombo:kerwa? ?Amwi mutakwicuka emikate eta:nu ka bariya ebisira ebita:nu ni bi:bo biringa binu mwabojeemo? 10?Amwi mutakwicuka ebisira ebina, ni bitukuru biringa binu mwabojeemo? 11?Niki cinu ecibabusya okusombo:kerwa ati, nitababwira bya mikate? Nawe mwikenge ecifwimbya ca Bafarisayo ne:ca Basadukayo. 12Mbe niwo niba-sombo:kerwa ati, atakwaika cifwimbya ca mikate, tari okwiigisya kwa Bafarisayo na Basadukayo.

Petero na:ika ati Yesu niwe Kristo

(Mk. 8:27-30; Lk. 9:18-21; 1 Pet. 2:3-8)

13Yesu ejire akinga mu ca:ro ca Kaisaria Filipi, nabu:sya abe:igisibwa bae ati, ?Anye Omwana wo mu:nu, aba:nu abantoga ati, nanye:ga? 14Niba:ika ati, Abandi abakutoga ati, Yoana Omubatija. Abandi ati, Eliya. Abandi ati, Yeremia, amwi oumwi ku baragi. 15Nababu:sya ati, ?Nawe emwe omuntoga ati ndiga? 16Simoni Petero naindura na:ika ati, Awe na:we Kristo Omwana wa Nyamuanga Omuanga. 17Yesu naindura namubwira ati, Una ribando Simoni wa Yona, okuba omubiri na manyinga bitakusweruriye eco, tari Rata unu ari mu rwire. 18Anye enikubwira ati, Awe na:we Petero, nanye ndyumbaka ikanisa yani ku rutare runu, nakabee jiri emiryango je bwire jitariiiga. 19Ndikuyana jifunguro jo bukama bwa mu rwire. Cinu co:ne uraboyaga mu ca:ro ciriboywa mu rwire. Na cinu co:ne urasurumuraga mu ca:ro, arisurumurwa mu rwire. 20Mbe niwo nabakomeresya abe:igisibwa ati, Mutaja kubwira mu:nu wo:ne ati, Niwe Kristo.

Yesu naraga okufwa no kusu:ka kwae

(Mk. 8:31-33; Lk. 9:22)

21Okuso:kerera mu mwanya ogwo Yesu namba okube:resya abe:igisibwa bae ati, ni busi busi agende Yerusalemi, okujo:nya:sibwa kwafu na bakaruka na bagabisi abakuru na bandiki, no kwitwa, no kusu:rurwa ku rusiku rwa kasatu. 22Mbe Petero namwicundya ku mbari namba okumuganya na:ika ati, Tere, Ratabugenyi, ebyo bitarikubako na katyari. 23Yesu nacu:ka nabwira Petero ati, Suba inyuma yani Syetani. Uri ci:ku:juro kwanye, okuba utakwiganirisya ebya Nyamuanga, nawe ebya ba:nu era.

Injira yo kuru:ba Yesu ni yo musaraba

(Mk. 8:34–9:1; Lk. 9:23-27)

24Mbe niwo Yesu nababwira abe:igisibwa bae ati, Omu:nu wo:ne akenda okundu:ba e:ganye omwene, e:twike omusaraba gwae, andu:be. 25Okuba unu wo:ne kenda okukisya obuanga bwae, aribubusya, na unu wo:ne kabusya obuanga bwae kubwani niwe aribubona. 26?Okuba omu:nu aribona muri:ro ki, akarya i:si yone, ke:nu nafwirwamo obuanga bwae? Tere amwi omu:nu arigwata ki eco kutambana no buanga bwae? 27Okuba Omwana wo mu:nu ari:jira mwikusyo rya Esemwene aamwi na bamaraika bae. Mbe niwo ariyana omu:nu wo:ne rwa kutyo ebikorwa byae biri. 28Ni cimari enibabwira ati, Bario ku banu bemereguyu anu, banu batariraba rufu kata, kukinga runu barirora Omwana wo mu:nu na:ja mu bukama bwae.

Currently Selected:

Matayo 16: KIJ1960

Highlight

Copy