Luka 22

Nibaroma ebyo kwita Yesu

(Mt. 26:1-5; Mk. 14:1-2)

1Mbe nigafugera amarya ge mikate jinu jitarimo cifwimbya, ganu gatogwaga Ipasaka. 2Abagabisi abakuru na bandiki nibayenja injira yo kumwita, okuba bariga nibo:baya aba:nu.

3Syetani nengira mu Yuda unu katogwa Iskariote, unu one ariga abariywe kwabo rikumi na babiri. 4Nagenda naroma na bagabisi abakuru, na bakuru ba basirikare kutyo aramutu:ra mu maboko gebwe. 5Nibakonderwa nibaragana okumuyana jimpirya. 6Ne:kirisya, nayenja omwanya gwo kubamugwasya ecise citario.

Okwira:ba kwa Ipasaka

7Mbe orusiku rwe mikate jinu jitarimo cifwimbya nirukinga, runu rwariga rwiire okwitirako ipasaka. 8Natuma Petero na Yoana na:ika ati, Mugende muci:ra:bire ipasaka ciirye. 9Nibamubu:sya ati, ?Owenda ci:ra:bire a:ki? 10Nababwira ati, Mbe, mukengira mu musi, omujo:bonana no mu:nu e:twikire ecitumo ca manji. Mumuru:be mu nyumba inu arengiramo. 11Mubwire omwene nyumba ati, Omwiigisya kakubu:sya ati, ?Inyumba ya bagenyi iri a:ki, munu ndari:ra ipasaka aamwi na be:igisibwa bani? 12Mbe oyo kajo:be:resya inyumba nene eya inguru irebekere. Muci:ra:bire omwo. 13Nibagenda nibasanga rwa kutyo ababwiriye nibe:ra:ba ipasaka.

Ipasaka yo kumarisya

(Mt. 26:20-25; Mk. 14:17-21; Yo. 13:1-35)

14Omwanya wejire gweya, nenyanja aamwi na jintumwa. 15Nababwira ati, Nari nendere muno okurya ipasaka inu aamwi nemwe nicari kunya:sibwa. 16Okuba enibabwira ati, Nitariirya na katyari kukinga runu iriku:mirira mu bukama bwa Nyamuanga. 17Nagega ecikombe, nasi:ma na:ika ati, Mugege cinu mugabane emwe abe:ne:ra. 18Okuba enibabwira ati, Nitarinywa matwasyo ga mujabibu kuso:ka woryanu kukinga anu obukama bwa Nyamuanga buri:jira.

Yesu natao okusangira okweru (Mt. 26:26-30; Mk. 14:22-26; I Bakor. 11:23-26)

19Nagega omukate, nasi:ma, nagubeganya, nabayana, na:ika ati, Gunu nigwo omubiri gwani gunu gwaso:sibwa kurwemwe. Mukorega kutyo nimunyicuka anye. 20Wejire bamara okurya, nagega ne cikombe one, na:ika ati, Ecikombe cinu niyo indagano inya:ya mu manyinga gani, ganu ge:tika kurwemwe. 21Nawe okuboko kwa oyo kandomera iniku kuri aamwi nanye ku meja. 22Okuba Omwana wo mu:nu kagenda rwa kutyo aragiriywe. Nawe jirimubona omu:nu oyo kamuromera iniku! 23Mbe nibamba okubu:syanya abe:ne:ra ati, ?Kwiswe niga unu kajo:kora omusango ogwo? 24Nijigwamo jimamba mu be:ne ati, ?Niga unu ke:ganirisibwa okuba mukuru? 25Nababwira ati, Abakama ba bamaanga ababatunga, na banu ababatunga abatogwa Abo:bwira. 26Nawe emwe mutari kutyo. Nawe Omukuru wemwe abe rwo muto:to, na unu katangasya abe rwa unu kafurubendera be:ja:bo. 27?Mbe Omukuru niga, unu enyanjire ku biryo, tere amwi unu kafurubenda? ?Tari ni unu enyanjire ku biryo? Nawe anye ndi aagati mwimwe rwa unu kafurubendaga.

28Nawe emwe muri banu mukome:ega aamwi nanye mu kusakwa kwani. 29Nanye nibatereeo emwe obukama, rwa kutyo Rata abutereeo anye. 30Korereki murye no kunywa ku nenda yani mu bukama bwani. Na ka muri:nyanja ku bitebe bye cibaro, nimuramura jiŋanda ekumi ne:biri eja Baisraeli.

Yesu naraga ati, Petero kajo:mwiga:na

31Ratabugenyi na:ika ati, Simoni, Simoni mbe Syetani kenda emwe abaungure rwo buro. 32Nawe anye nakusabiywe, okwikirisya kwao kusige kugeruka. Nawe ariba wamara okucu:ka, ubarumye aba:na ba:nyu. 33Namubwira ati, Ratabugenyi nimaririye okuja na:we mwiboero na mu kufwa one. 34Namubwira ati, Awe Petero, enikubwira ati, iŋoko rero itakurira utanyiga:nire kwiya kasatu ati, utakumenya.

35Nababwira ati, Anu nabatumire mutari na nsagwa, amwi rukoba, amwi bikwirya, ?mwabee na cinu mwakenere? Niba:ika ati, Uri. 36Nababwira ati, Nawe woryanu, unu ari na insagwa aigege, no wo rukoba one kutyo. Na unu atana cinyambutu aka:ne omwenda gwae acigure. 37Okuba enibabwira ati, Gunu gwandikirwe ni busibusi guku:misibwe kwanye ati, Abariywe aamwi na banyamusi. Okuba jinu nandikiywe jiri no kuku:mira. 38Niba:ika, ati, Ratabugenyi, mbibi binyambutu bibiri. Nababwira ati, Ebimara.

Yesu nasabwa mu Getesemane

(Mt. 26:36-46; Mk. 14:32-42; Yo. 18:1)

39Nauruka nagenda ku ci:ma ce Mijeituni, rwa jintungwa jae kutyo jariga, na be:igisibwa bae one nibamuru:ba. 40Wejire akinga ao, nababwira ati, Musabwe mutaja kwingira mu kusakwa. 41Omwene naba:ukako etafi rwa awo kurasa ribui, nafukama nasabwa, 42na:ika ati, Rata, ukenda, nso:syako ecikombe cinu. Nawe tari rwa kutyo anye enenda, nawe cinu owenda awe cikorwe. 43Maraika naso:ka mu rwire, namusoromokera namutamo amanaga. 44Omwene neyongesya okusabwa, okuba ariga:ri no butaka bwafu. Amo:iro gae nigaba rwa maguma ga manyinga nigatonyikira a:si. 45Wejire e:muka mu kusabwa, naja ku be:igisibwa bae, nabasanga baongee kurwo busurumbae. 46Nababu:sya ati, ?Omuongerera ki? Mwimuke musabwe mutaja kwingira mu kusakwa.

Yuda na:ja, nibagwata Yesu

(Mt. 26:47-56; Mk. 14:43-52; Yo. 18:3-11)

47Anu ariga aca:ika, mbe ecise nici:ja no:yo katogwa Yuda abatangatiye, niwe oumwi kwikumi na babiri, nafugera ku Yesu okumunyunya. 48Nawe Yesu namubu:sya ati, Yuda, ?Ounyunya Omwana wo mu:nu, nikwo numuromera iniku? 49Na banu ariga anabo, wejire barora jinu ejenda okubao, niba:ika ati, Ratabugenyi, ?cisane ne cinyambutu? 50Oumwi kwabo nasana omugaya wo mugabisi Omukuru, namutemako okutwi kwae okwe buryo. 51Nawe Yesu naindura na:ika ati, Musige mbere. Naku:nia ku kutwi kwae, namuosya. 52Yesu nababu:sya abagabisi abakuru na bakuru ba mu yekaru na bakaruka banu bariga bamwijireko ati, ?Mwanyijira ne binyambutu na masimbo rwo musa:kusi? 53Anu nabaga nemwe kusiku mu yekaru, mutangororeraga maboko gemwe, nawe gunu nigwo omwanya gwemwe, na managa ge cisu:te.

Petero namwiga:na Yesu

(Mt. 26:47-56; Mk. 14:43-52; Yo. 18:3-11)

54Nibamugwata nibamusira nibamwingisya mu nyumba yo mugabisi Omukuru. Nawe Petero naru:baga e:cundireo kura. 55Wejire bamara okukuma omuriro agati mu rugo, nibenyanja aamwi, na Petero nabenyanjamo. 56Mbe omuyara umwi ejire amurora enyanjire mu bweru bwo muriro, namurore:rera nekeneke, na:ika ati, Na unu one ariri nage. 57Ne:ga:na na:ika ati, Mugasi awe, nitakumumenya. 58Wejire babao kasinja, oundi one namurora, na:ika ati, Awe one uri we:ja:bo. Nawe Petero na:ika ati, Mu:nu awe, atari anye. 59Wejire gwaturao omwanya uti saa imwi, oundi namukomeresya na:ika ati, Ni cimari na unu ariri aamwi nage, okuba ni Mugalilaya. 60Nawe Petero na:ika ati, Mu:nu awe, nitakumenya cinu owaika. Mbe aonao anu ariga aca:ika iŋoko ni:rira. 61Mbe Ratabugenyi nainduka, narora Petero. Petero ne:cuka omusango gwa Ratabugenyi gunu ariga amubwiriye ati, Rero iŋoko eijo:ba icari kurira, oujo:nyiga:na kwiya kasatu. 62Nauruka ku mwira, narira masiga mogomogo.

63Na ba:nu banu bariga bagwatire Yesu nibamujimya, nibamubuma. 64Nibamufundigisya ame:so nibamubu:sya ati, Cibwire, ?niga unu akubuma? 65Nibamubwira ne jindi myafu ejo kumufuma.

Yesu mu ci:na ca bakaruka

(Mt. 26:57-68)

66Mbe wejire bwaca, abakaruka ba ba:nu nibe:ko-fyanya, nibo abagabisi abakuru na bandiki. Nibamusira mu cirwaji cebwe. 67Nibamubwira ati, Araba na:we Kristo, cibwire. Omwene nababwira ati, Nakabee ndababwira, nawe mutakwikirisya na katyari. 68Amwi nikababu:sya, mutakuindura na katyari. 69Nawe okwambira woryanu Omwana wo mu:nu kaja okwinyanja ku kuboko kwe buryo okwo buinga bwa Nyamuanga. 70Bo:ne niba:ika ati, ?Ka na:we Omwana wa Nyamuanga? Nababwira ati, Rwa kutyo mwaika, nanye. 71Niba:ika ati, ?Cikenere orusingiro rundi rwa ki? Okuba eswe abe:ne conguywe mu kanwa kae omwene.

Currently Selected:

Luka 22: KIJ1960

Highlight

Copy