Yoana 3

Yesu na Nikodemu. Okwiburwa okuya:ya

1Mbe ariga ario mu:nu wa mu Bafarisayo, risi:na ryae Nikodemu niwe Omukuru wa Bayaudi. 2Omwene namu:jako mu ngeta, namubwira ati, Rabbi, cimenyere ati uri mwiigisya unu uso:kere ku Nyamuanga, okuba atario unu katura okukora ebibarikisyo binu oukora awe, tari Nyamuanga ari aamwi nage. 3Yesu naindura namubwira ati, Ni cimari cimari enikubwira ati, Omu:nu ate:buywe kwiya kabiri, atakutura kubona obukama bwa Nyamuanga. 4Nikodemu namubu:sya ati, ?Omu:nu katura kutiki okwiburwa akaba akokoe? ?Katura okwingira munda ya nyiramwene orwa kabiri, ne:burwa? 5Yesu naindura ati, Ni cimari cimari enikubwira ati, Omu:nu ate:buywe na manji no mwoyo, atakutura kwingira mu bukama bwa Nyamuanga. 6Cinu ce:buywe no mubiri nico mubiri. Na Cinu ce:buywe no Mwoyo nico mwoyo. 7Wasiga kurugu:ra okuba nakubwira ati, Kube:ire okwiburwa kabiri. 8Omuyaga oguyembera eyo ogwenda, nu:ngwa okuutu:tura kwagwo, nawe utakumenya enu oguso:ka, amwi enu ogugenda. Nikwo kutyo omu:nu wo:ne unu e:buywe no Mwoyo.

9Nikodemu naindura namubu:sya ati, ?Binu ebitura kutiki okubao? 10Yesu naindura namubu:sya ati, ?Awe uri mwiigisya wa Israeli, na ka utakusombo:kerwa ebyo? 11Ni cimari cimari enikubwira ati, Eca:ika binu cimenyere, eci:mako binu carorere, no kwimako kweswe mutakukwikirisya. 12Nikababwira ebya mu:si nemwe mutakwikirisya, ?muri:kirisya kutiki nikababwira ebya mu rwire? 13Atario unu ararinyire mu rwire, tari unu aso:kere mu rwire, niwe Omwana wo mu:nu. 14Rwa Musa kutyo aanikire injoka mwibara, nikwo kutyo Omwana wo mu:nu kumwiire okuanikwa, 15Mu:nu wo:ne unu kamwikirisya abe no buanga bunu butakuwao.

16Okuba nikwo kutyo Nyamuanga abendere abanyaca:ro, ndijei natuma Omwana wae umwi era, korereki mu:nu wo:ne unu kamwikirisya asige kubura, nawe abe no buanga bunu butakuwao. 17Okuba Nyamuanga atatumire Mwana wae mu:si korereki atemere i:si eci:na, nawe amutumire korereki i:si ikisibwe mu mwene. 18Unu kamwikirisya atakuramurwa. Unu ate:kirisisye amarire okuramurwa, kwo kuba atari:kirisisye risi:na ryo Mwana oumwi era wa Nyamuanga. 19Kunu nikwo okuramura ati, obweru bwejire mu ca:ro, aba:nu nibenda ecisu:te kukira obweru, kwo kuba ebikorwa byebwe byariga bibi:bi. 20Okuba mu:nu wo:ne unu kakora obubi:bi katamanganwa no bweru, na ka ataku:ja mu bweru, ebikorwa byae bireme okugonyibwa. 21Nawe unu kakora ebye cimari ka:ja mu bweru korereki ebikorwa byae biboneke ati, byakoreywe mu Nyamuanga.

Okwimako kwa Yoana okwo kumarisya

22Wejire ejo jawa, Yesu nagenda mu ca:ro ca Buyaudi aamwi na be:igisibwa bae, nabao aamwi nabo nabatija. 23Nawe Yoana ariga nabatijisya mu Amoni yei na Salimu, okuba niyo gariga amanji ma:fu. Aba:nu nibajaga nibabatijibwa. 24Okuba Yoana ariga acari kutu:rwa mwiboyero.

25Abe:igisibwa ba Yoana nibabambasyanya no Muyaudi omusango gwo kwesibwa. 26Niba:ja ku Yoana, nibamubwira ati, Rabbi, wuriya ariga:ri aamwi na:we ku ngego yenderya ya Yorodani, unu wemireko, one kabatija, na ba:nu bo:ne abamuja:ko. 27Yoana naindura na:ika ati, Omu:nu atakutura kuramira ecigambo co:ne tari aciyabirwe okuso:ka mu rwire. 28Emwe abene muri bo kunyimako ati, na:ikire anye ati, Nitari Kristo, nawe natumirwe okumutangatira. 29Unu ari no mwenga niwe omutwasi. Nawe omusa:ni wo mutwasi ke:mereguru namungwa nakondererwa muno oburaka bwo mutwasi. Mbe nikwo okukonderwa kwani kuku:miye kutyo. 30Omwene kumwiire okukura, nawe anye kunyiire okukea.

31Unu kaso:ka mu rwire katunga byone. Owa mu:si kaba ari wa mu:si, kaika bya mu:si. Unu kaso:ka mu rwire niwe katunga byone. 32Cinu arorere na cinu onguywe, nico ka:ika, amwi atario unu ke:kirisya okwimako kwae. 33Unu e:kirisisye okwimako kwae, ateeo ecibarikisyo cae ati, Nyamuanga ni we cimari. 34Okuba unu atumirwe na Nyamuanga kaika ebigambo bya Nyamuanga, okuba Nyamuanga kagaba Omwoyo atakurenga. 35Rata endere Omwana, amuyae byone mu kuboko kwae. 36Unu ke:kirisya Omwana ari no buanga bunu butakuwao. Nawe unu atakwikirisya Omwana, ataribona buanga, nawe risungu rya Nyamuanga rimuriko.

Currently Selected:

Yoana 3: KIJ1960

Highlight

Copy