Yoana 16

Yesu naraga okunya:sibwa kwa abe:kirisya

1Nababwira ebyo mwasiga kuyabibwa. 2Barabairisyaga mu mekofyanyisyo. Yee, omwanya ogu:ja, unu wo:ne arabe:taga are:ganirisyaga ati kakorera Nyamuanga. 3Barabakoreraga kutyo, okuba Rata batakumumenya, nakabee ari anye. 4Nawe nababwira ebyo, korereki omwanya gwabyo ariba gwaja mwicuke f ati, anye nababwiriye. Kuso:ka ku bwambiro nitababwiriye ebyo, okuba nariga aamwi nemwe. 5Nawe woryanu enigenda ku unu antumire, ka atariwo kwimwe unu kambu:sya ati, ?Ouja a:ki? 6Nawe okuba nababwira ebyo, emitima jemwe ji:juye obutaka.

Omurimu gwo Mwoyo mweru ku ba mu:si

7Nawe anye enibabwira cimari ati, Kube:ire emwe anye okugenda. Okuba anye nikarema okugenda, Omusi:ri:sya ataribe:jira. Nawe nikagenda, ndimutuma kwimwe. 8Omwene ariba:ja, arikomeresya i:si kurwe bibi:bi, na kurwo burengeresi na kurwo kuramura. 9Kurwe bibi:bi, kwo kuba batakunyikirisya anye. 10Kurwo burengeresi, kwo kuba enigenda ku Rata, ka nemwe mutacandora. 11Kurwo kuramura, kwo kuba Omukuru wa i:si inu aramuywe.

12Nicari na byafu byo kubabwira, nawe mutakutura kubi:gumirisya woryanu. 13Nawe ariba:ja Omwoyo we cimari, arabatangasyaga mu bye cimari byone, Okuba ataryaika kubwae, nawe byo:ne binu arongwaga, nibyo ara:ikaga. Arababwiraga binu ebiba nibyendo:ku:ja. 14Oyo arakusyaga anye, okuba arigega ku byani nabwira emwe. 15Byone Rata binu anabyo ni byani. Kwonakora ninaika ati, arigega ku byani nabwira emwe.

Yesu naraga okufwa no kusu:ka kwae

16Gwasigaeo mwanya muto:to, mutakusuba kundora. Ka na rindi guribao mwanya muto:to, nimusubo:kundora. 17Abe:igisibwa bae abandi nikwo bakorere niba:ika abene:ra ati, ?Niki cinu kacibwira ati, Gwasigaeo mwanya muto:to, mutakusuba kundora, ka na rindi guribao mwanya muto:to, nimusubo:kundora, na ka ati, Okuba enigenda ku Rata? 18Nikwo bakorere niba:ika ati, ?Niki cinu ka:ika ati, Omwanya muto:to? Citakumenya cinu ka:ika. 19Yesu namenya ati, abenda okumubu:sya, nababu:sya ati, ?Omubu:syanya abene:ra ku cinu nababwira ati, Gwasigaeo mwanya muto:to, mutakusubao †kundora, ka na rindi guribao* mwanya muto:to nimusuba kundora? 20Ni cimari cimari enibabwira ati, Emwe muririra, nimurira jimamu, nawe i:si kukonderwa. Emwe murisurumbara, nawe Obusurumbae bwemwe buriinduka kuba kukonderwa. 21Omugasi orwo karumwa obusungu kasurumbara okuba omwanya gwae gweire. Nawe akamara okwibura Omwana, atakusuba kwicuka busungu kurwo kukonderwa kwo mu:nu okwiburwa mu:si. 22Mbe nemwe wori omusurumbara, nawe niribarora rindi, ne mitima jemwe jirikonderwa, na ka atario unu aribaso:syako kukonderwa kwemwe. 23Na ku rusiku ruriya mutarinsabwa musango. Ni cimari cimari enibabwira ati, Cinu murisabwa Rata mwisi:na ryani aricibayana. 24Kukinga wori mucariga kusabwa Rata mwisi:na ryani. Musabwega muriyabwa, okukonderwa kwemwe kuku:mire.

25Nababwira ebyo mu bijekekanyo. Nawe omwanya ogu:ja gunu nitaryaikira nemwe mu bijekekanyo, nawe ndibabwirira ebya Rata abweru. 26Ku rusiku ruriya murisabwa mwisi:na ryani, amwi nitakubabwira ati, ndibasabirwa ku Rata, 27Okuba Rata omwene abendere, okuba munyendere anye, na mwikirisisye ati naso:kere ku Rata. 28Ne:jire okuso:ka ku Rata, nini:ja mu:si. Rindi eniso:ka mu:si enigenda ku Rata.

29Abe:igisibwa bae nibamubwira ati, Mbe woryanu owaikira abweru, amwi utakwaika cijekekanyo. 30Wori camenya ati, awe umenyere byone, amwi utakenere mu:nu wo:ne kukubu:sya. Nikwo ecikora nici:kirisya ati waso:kere ku Nyamuanga. 31Yesu nabaindura ati, ?Woryanu omwikirisya? 32Rora omwanya ogu:ja, ka wori gwakingire, anu murinyaraganira mu:nu wo:ne mu byae, nimunsiga anye nenyere. Nawe anye nitari nenyere okuba Rata ari aamwi nanye. 33Nababwira ebyo mube no murembe mwanye. Mu:si muri na inya:ko, nawe mukome:re, anye naigire i:si.

Currently Selected:

Yoana 16: KIJ1960

Highlight

Copy