Zakarìa 14
14
Tɔhonɔ̀ la trɔ zũ Èfìɔ lè ànyigbã kpata ji
1Tɔhonɔ̀ be ŋùkèkèa gogo, mìa Yèruzàlɛmtɔwo.
Dùkɔ̃ kpɔ̀tɛawo la ma mìabe àdɔ̀kùnuwo lè mìabe ŋùku mè.
2Tɔhonɔ̀ la bɔ̀ dùkɔ̃ kpɔ̀tɛawo
eye wo la xa mìabe èdùa.
Wo la xɔ̀ Yèruzàlɛm, wo la ɖè àbòyo àxuewo,
wo la wɔ̀ ènu drã kudo nyɔ̃nùwo.
Wo la kplɔ̀ dùkɔ̃a be mamã mè yì gàtɔnugbe
vɔ̀, àkpa mamã mè èvègɔ̃a mu la jo lè èdùa mè ò.
3Nène a, Tɔhonɔ̀ la sitè ɖo dùkɔ̃ kpɔ̀tɛawo ŋuti.
E la wɔ̀ àvũ sìgbè àlekè be wɔ̀nà àvũ
kòɖò lè àhùa be hùenua nène.
4Àzã ŋua jia, e la nɔ̀ àmìti-toa ji,
lè Yèruzàlɛm gbɔ, lè èdùa be èwèzɛ̃pe.
Àmìti-toa la fɛ̃ lè dòdòmè,
eye e la wɔ̀ bàlì gã ɖe so
èwèzɛ̃pe va yì èwèɖoxɔ̀pe.
Ètoa be àkpa ɖèka la yì èvègo
eye èvègɔ̃a la yì àpùgo.
5Mì la si to bàlì kè èto fɛ̃fɛ̃a
wɔ̀a mè, ɖo e la yì kaka Asàl.
Mì la si sìgbè mìa tɔgbewo nène
lè Yudà be èfìɔ Òzias be hùenu,
lè wàlɛbɛ kè ànyigbã hũhũa.
Nène a, Tɔhonɔ̀, àpe Mawu la va
kudo yebe àtikplɔtɔ kèwo sumɔna ɛ̀a.
6Ŋùkèkè ŋua, wo mu la gbà hiã kɔ̀kɔ̀ɛ ò.
Àvìvɔ mu la gbà wɔ̀ àmè ò,
fàfa mu la gbà le àmè kaka be la jàti ò.
7Lè hùenu kè Tɔhonɔ̀ ɖèka pɛɛ nyaa,
kɔ̀kɔ̀ɛ la nɔ̀ ànyi tɛ̀gbɛ̀.
Èzã àlo kedè mu la gbà nɔ̀ ànyi ò.
Wètrɔ mè ŋutɔ cã, kɔ̀kɔ̀ɛ la nɔ̀ ànyi.
8Lè ŋùkèkè ŋua jia, èsìdo ɖe la to so Yèruzàlɛm.
Yebe èsìa be àkpa ɖèka la srà yì èjè-pùa mè,
àkpa èvègɔ̃a la srà yì àpù gãa mè.
E la nɔ srà lè èpèa kpata mè,
so èjijàja hùenu va ɖo èkuɖìɖi hùenu.
9Tɔhonɔ̀ la trɔ Èfìɔ lè ànyigbã kpata ji.
Ŋùkèkè ŋua jia, Tɔhonɔ̀ ɖèka kpò
wo la sumɔ sìgbè Mawu nène,
eye àmèwo kpata la fãkue
lè yebe nyikɔ ɖèka kpò mè.
10Àgo kèwo trɔdo Yèruzàlɛm
be èdùa kpata la trɔ zũ gbàjàji,
so kaka Gebà, lè èdùa be èvègo
va kɔ̀ ɖo Rimɔ̀n lè àpùgo.
Yèruzàlɛm la nɔ̀ èkpoa ji eye èdùa la kèkè
so kaka Bɛnyamìn be àgboa ji
va kɔ̀ ɖo kɔ̃nà ji be àgboa ji,
fikè ye àgbo xoxoa nɔ̀a.
E la so Hànanèl be àsãŋu gã gbɔ
va Èfìɔ be vɛ̃fiɔ̃pewo.
11Àmèwo la nɔ̀ èdùa mè,
wo mu la gbà crɔ̃ ɛ̀ ɖe ò,
eye àmèwo la kpɔ àgbɔ̃jèpò lè èdùa mè.
12Jɔ̀gbèvuɛ̃ kèwo Tɔhonɔ̀ la ɖùɖù kɔ̀ ɖo dùkɔ̃
kèwo wɔ̀ àvũ ku Yèruzàlɛm be èdùa jia, ye nyi be:
wàlɛbɛ kè wo kpɔ̀tɔ̀ lè àgbè ŋutɔ cã,
woabe ŋutilãwo la vovo.
Woabe ŋùkuwo la nyìnyɔ̀ lè àkpà mè na wo
eye woabe àɖe la pìpì lè ènu mè na wo.
13Ŋùkèkè ŋua jia, Tɔhonɔ̀ la do vɔ̃vɔ̃ gã ɖe woa dòmè.
Wo la wɔ̀ àvũ lè woa nɔ̀nɔwo dòmè
eye àmè sia àmè la sitè ɖo yebe havi ŋuti.
14Yudà be ŋusùwo la va wɔ̀ àhùa lè Yèruzàlɛm.
Wo la ɖè àbòyo dùkɔ̃ kèwo trɔdo woa be àdɔ̀kùnuwo:
sìka, klòsalò, àwù xɔ̀asìwo.
Wo la lɔ wo zĩ ɖo èdùa ŋuti trɔ do.
15Jɔ̀gbèvuɛ̃ kèwo jè kɛ̃tɔwo jia,
wo ke la jè woabe èlãwo cã ji,
èsɔwo ku èdɔwɔ̀lãwo,
èsɔ èkpotɔnɔ̀wo kudo èsɔ àkɛtɛwo.
16So ŋùkèkè ŋua jia, àmè kèwo kpɔ̀tɔ̀ ci àgbè
lè àmè kèwo wɔ̀ àhùa kudo Yèruzàlɛmtɔwo dòmèa,
la nɔ yì Yèruzàlɛm èpè sia èpè.
Funu ye wo la nɔ sumɔ Tɔhonɔ̀ ŋusɛ̃kpatatɔa lè
eye wo la yì nɔ ɖù ègòxɔwo be àzã.
17Ne dùkɔ̃ ɖe lè ànyigbã ji mu yì Yèruzàlɛm òa,
èji mu la jà kɔ̀ ɖo yebe ànyigbã ji ò.
18Ne Ejiptètɔwo mu yì ɖù
ègòxɔwo be àzã lè Yèruzàlɛm òa,
jɔ̀gbèvuɛ̃ la va woa ji sìgbè lekè
be la va na dùkɔ̃ kpɔ̀tɛawo nène.
19E la nyi ètodɔ̃ na Ejiptè kudo dùkɔ̃
kèwo mu la yì àzã ŋua tèpe òa.
20Wo la ŋlɔ̀ lè ŋùkèkè ŋua ji be:
“Wo ɖè è ɖovò na Tɔhonɔ̀”,
ɖo èsɔwo be àyroloewo ŋutɔ cã ŋuti.
Mawuxɔa be èzewo cã la nyi ènu ɖè ɖovò
sìgbè kogò kèwo mè èlãwo be èhũ nɔ̀nà
lè vɔsakpea be ŋùkɔ̀a nène.
21Wo la ɖè Yèruzàlɛm kudo Yudà be èdùwo kpata
be èzewo ɖovò na xixea be Tɔhonɔ̀.
Àmè kèwo la va wɔ̀ vɔsaa, la zã wo sɔ ɖà vɔsalãa.
Wàlɛbɛ kè ye ŋùkèkè ŋua la va,
ènusàtɔwo mu la gbà nɔ̀
àhùadù Tɔhonɔ̀a be mawuxɔa mè ò.
Currently Selected:
Zakarìa 14: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
