Markò 9

1Yesù gbà gblɔ̃ na wo be: “Nyàwo ye mù le to na mì. Àmè ɖewo lè mìa dòmè lè fikèa fifì, kèwo mu la ku gbɔ̀xue la kpɔ Mawu be fìɔɖùɖua la va ku ŋusɛ̃ ò.”

Èli ku Mosè pò nupo ku Yesù

(Màt 17.1-13; Luk 9.28-36)

2Ŋùkèkè àdɛ̃ yomè a, Yesù kplɔ̀ Petrò ku Yakobò kudo Yòhanɛ̀s yì èto gãa ɖe ji, lè àsàmè. Woawo ɖèɖe kpò ye lè funua. Yesù be kpɔkpɔmè trɔ lè woabe ŋùkumè. 3Eye yebe àwùwo le dàzò, ɣe peŋu-peŋu, nɔ̀nɔmè kè hati àvɔdotɔ ɖekpe mu lè ànyigbã ji la teŋu wɔ bèa ɣe nènea ò. 4Èli ku Mosè to ɖo woa ji, le pò nupo ku Yesù. 5Eye Petrò to na Yesù be: “E nyɔ be mia nɔ̀ fikèa. Mi la tù gòxɔ ètɔ̃, ɖèka la nyi tɔ̀ wò, ɖèka la nyi Mosè tɔ̀ eye ɖèka la nyi Èli cã tɔ̀.” 6Mu gbà nya ènu kè be la gblɔ̃ ò, ɖo vɔ̃vɔ̃ gãa ɖe jè ye ku *nukplavi kpɔ̀tɛawo ji. 7Lilikpo ɖe va cɔ̃ woa ji, eye ègbè ɖe ɖì so lilikpoa mè be: “Àmè kèa ye nyi èvi nyè ɖève a, mì ɖo èto è.” 8Eye troloa, wo sã ŋùku kpɔ àfi sia àfi, vɔ̀a, wo mu gbà kpɔ àmè ɖe lè funu, tovò na wo ku Yesù ò.

9Ekè wo le ɖì so ètoa ji gbãnàa, Yesù do *èse na wo be: “Mì mu gbà gblɔ̃ ènu kè mì kpɔa na àmè ɖe keŋu gbɔ̀xue Mawu bèa fɔ̃ *Àgbètɔ be Èvia so èku ò.”

10Eye wo wla ènyà ŋua ɖo woa ŋutɔwo dòmè, le biɔ woa nɔ̀nɔwo ènu kè “Fɔ̃fɔ̃ so èkua” gɔ̃mè le nyia.

11Eye wo biɔ Yesù be: “Nukɛ ŋuti ye ènuŋlɔ̀tɔwo gblɔ̃nà be, Èli ye ɖo la va keŋu gbɔ̀xue ò?” 12Yesù ɖo e ŋuti na wo be: “Èli ɖo la va cucugbã, la gbìgbɔ̀ sɔ ènu sia ènu ɖo ye tèpe nyàwo. Vɔ̀a, nukɛ ŋuti ye wo ŋlɔ̀ ɖɛ be, *Àgbètɔ be Èvia la kpe èfũ ŋutɔ eye wo la dovlo è ɖo ò? 13Vɔ̀a, mù le to na mì be, Èli va ŋutɔ cã vɔ̀ eye, wo wɔ̀ ènu kè wo jroa ku ì sìgbè àlekè wo ŋlɔ̀ ɖɛ so e ŋutia nène.”

Yesù dà èdɔ̀ na ŋusùvi ɖe kè gbɔ̃gbɔ̃ vuɛ̃ le ɖè èfũ na a

(Màt 17.14-21; Luk 9.37-43)

14Kè wo va *nukplavi kpɔ̀tɛawo gbɔa, wo kpɔ àmèha gãa ɖe bɔ̀ do wo, eye ènuŋlɔ̀tɔwo le dɔ̃ ènyà ku wo. 15Kè àmèwo kpɔ Yesùa, e wɔ̀ ŋùdãdɔwo ŋutɔ eye wo sidù yì e gbɔ be yèwoa do ègbè na ɛ̀. 16Yesù biɔ yebe nukplaviwo be: “Ènyà kɛ ye mì le dɔ̃ ku wo ò.” 17Àmè ɖèka lè àmèha a dòmè ɖo e ŋuti na ɛ̀ be: “Ènufiɔtɔ, ènyè ye kplɔ̀ èvi nyè ŋusùvi va gbɔ wò, ɖo gbɔ̃gbɔ̃ vuɛ̃ ɖe le ɖè èfũ na ɛ̀, eye mu teŋu ponà nupo ò. 18Àfi ɖekpekpe kè gbɔ̃gbɔ̃a jè e ji lèa, e sɔna ɛ̀ pu ànyi, futukpɛ tona lè ènu mè na ɛ̀, eye e ɖùnà àɖuklui, jo lìanà. Mù biɔ *nukplavi wòwo be woa nyà gbɔ̃gbɔ̃ vuɛ̃ a to lè èvi nyèa mè, vɔ̀a, wo mu teŋu ì ò.” 19Eye Yesù gblɔ̃ na yebe nukplaviawo be: “Mìa jìjimè màxɔ̀sètɔ kèawo, kaka va na gà kɛ mè ye mù la nɔ̀ mìa gbɔ ò? Kaka va na gà kɛ mè ye mù la gbà dojì la nɔ hɛ̃ mì ò? Mì kplɔ̀ ɖèvia va na mù.” 20Wo kplɔ̀ ɛ̀ sɔ yì na ɛ̀. Kè gbɔ̃gbɔ̃ vuɛ̃ a kpɔ Yesù troloa, e hũhũ ɖèvia sɛ̃sɛ̃ ɖe, sɔ ɛ̀ pu ànyi eye ɖèvia tɔ mìmli, le tu futukpɛ. 21Yesù biɔ èvitɔa be: “So gà kɛ mè ye be lè nènea ò?” Eye èvitɔa ɖo e ŋuti na ɛ̀ be: “So yebe ɖèvi mè ke ye 22gbɔ̃gbɔ̃ vuɛ̃ a tùtùnà ɛ̀ eji-eji ɖo èzò mè, àlo ètɔ̀ mè ne bèa ku. Ne wò teŋuã, ku ŋuzĩzĩ na mi, ne wòa do mi àlɔ̀.” 23Yesù ɖo e ŋuti na ɛ̀ be: “Ne wò teŋuã ye wo gblɔ̃a? Ènu sia ènu lè bɔ̀bɔɛ ɖe na àmè kè xɔ̀sèa.” 24Zè ɖèkaa, ɖèvia be ètɔ do àpa be: “Mù xɔ̀sè vɔ̀a, do mù àlɔ̀, ɖo xɔ̀sè nyèa hùe!”

25Wàlɛbɛ kè ye Yesù kpɔ be àmèha a le bɔ̀a, e ɖè ègbè ɖo gbɔ̃gbɔ̃ vuɛ̃ a ji, gblɔ̃ na ɛ̀ be: “Èwò, gbɔ̃gbɔ̃ àmumui ku ètokukunɔ̀, mù le ɖè ègbè na wò be wòa to lè ɖèvi kèa mè, eye mù gbà ɖo e mè ke ò!” 26Gbɔ̃gbɔ̃ vuɛ̃ a hũhũ ɖèvia sɛ̃sɛ̃ ɖe, eye be to lè e mè ku àpa. Đèvi a jè ànyi, ci sìgbè àmèkuku nène, àleke be àmè kèwo lè funuawo dòmètɔ sùgbɔ be: “E ku.” 27Vɔ̀a, Yesù le àlɔ̀ na ɛ̀, sɔ ɛ̀ sitè, eye be nɔ̀tè. 28Ekè Yesù yì àxomè, eye yebe nukplaviwo ɖèɖe kpò ye kpɔ̀tɔ̀ lè e gbɔa, wo biɔ be: “Nukɛ ŋuti ye mìawo yaa, mì mu teŋu nyà gbɔ̃gbɔ̃ vuɛ̃ ŋua ò?” 29Yesù ɖo e ŋuti na wo be: “Kuefã#9.29 Kuefã: lè Màt 17.21 mèa wo gblɔ̃ be kuefã ku ènubabla kpo ye… kpò ye wo teŋu sɔ nyànà gbɔ̃gbɔ̃ vuɛ̃ kèa hati.”

Yesù gbà gblɔ̃ yebe àyàɖùɖu ku fɔ̃fɔ̃ so èku be ènyà

(Màt 17.22-23; Luk 9.43b-45)

30Yesù ku yebe nukplaviwo jo lè funu yì to Galilea be àgowo ji. Yesù mu ji be àmè ɖe bèa nya àfi kè ye lèa ò 31ɖo, e le fiɔ ènu yebe nukplaviwo; e le gblɔ̃ na wo be: “Wo la do Àgbètɔ be Èvia àsi na àmèwo, eye wo la wù ì. Ne wo wù ì vɔ̀a, Mawu la fɔ̃ ɛ̀ so èku lè ŋùkèkè ètɔ̃gɔ̃a gbè.” 32Yebe nukplaviwo mu ŋɔjè ènyà ŋua mè ò, vɔ̀a, wo mu biɔ ɛ̀ e gɔ̃mè sè ò, ɖo wo le vɔ̃.

Àmè kɛ ye nyi àmègã lè Mawu be fìɔdua mè ò?

(Màt 18.1-5; Luk 9.46-48)

33Yesù ku yebe nukplaviwo va Kapɛrnaum. Kè wo yì àxomèa, e biɔ yebe nukplaviwo be: “Ènyà kɛ ye mì le dɔ̃ lè mìa nɔ̀nɔwo dòmè wàlɛbɛ kè mi lè èmɔ jia ò?” 34Vɔ̀a, wo mu kè ènu ò, ɖo àmè kè la nyi àpetɔ lè woa nua be ènyà ye wo le dɔ̃. 35Yesù nɔ̀ ànyi, yɔ yebe nukplavi woèvèawo, gblɔ̃ na wo be: “Ne àmè ɖe le ji la nyi àpetɔ lè mìa dòmèa, àmèa ɖo la bɔ̀bɔ̀ ye ɖokoe, la nyi àmè sia àmè be sumɔ̃vi.” 36E yomè a, e kplɔ̀ ɖèvi vitukui ɖèka va woa dòmè. E kɔ ɛ̀ ɖo àsi, gblɔ̃ na wo be: 37“Àmè kè la xɔ̀ ɖèvi kèa hati ɖèka ɖo ŋuti nyèa, ènyè ŋutɔ ye be xɔ̀. Vɔ̀a àmè kè xɔ̀ mùa, mu nyi ènyè ɖèɖe kpò ye be xɔ̀ ò; e gbà xɔ̀ àmè kè dɔ̃ mù ɖoɖaa cã.”

Àmè kè mu sitè ɖo mia ŋuti ò a, mia ji ye be lè

(Luk 9.49-50)

38Yòhanɛ̀s gblɔ̃ na Yesù be: “Ènufiɔtɔ, mi kpɔ àmè ɖe le nyà gbɔ̃gbɔ̃ vuɛ̃wo lè àpo nyikɔ mè eye mi gbe na ɛ̀, ɖo mù lè mia dòmè ò.” 39Vɔ̀a, Yesù gblɔ̃ na wo be: “Mì mu gbà gbe na ɛ̀ ò, ɖo, àmè ɖe mu lè kè la yɔ àpe nyikɔ sɔ wɔ̀ ŋùdãdɔ, la gbà sitè trolo gblɔ̃ àpe ènyà bàɖà ò. 40Đo àmè kè mu sitè ɖo mia ŋuti òa, lè mia ji. 41Nyàwo ye mù le to na mì. Àmè kè la na mì èsì kɔpò ɖèka, ɖo mì nyi Kristòtɔ̀ ŋutia, àmè ŋua mu la bu yebe àjɔ̀ ò.”

Àfɔ̀ ɖo àfɔ̀ ji

(Màt 18.6-9; Luk 17.1-2)

42“Àmè kè la dɔ̃ vifɛ̃ kèwo xɔ̀ ji nyè sèawo dòmètɔ ɖèka ɖo nuvuɛ̃ mèa, ne wo sã ète gãa ɖe ɖo èkɔ̀ na ɛ̀, sɔ ɛ̀ dãŋùgbe ɖo àpù mèa, e la nyɔ na ɛ̀ wu. 43Ne àpo àlɔ̀ ye le dɔ̃ wò ɖo nuvuɛ̃ mèa, sò ɛ̀ dãŋùgbe, ɖo ne wò hɛ̃ àlɔ̀ ɖèka yì àgbè màvɔ mèa, e la nyɔ na wò wu be àpo àlɔ̀ èvèawo kpata ne sɔ̀gbè lè ŋuti wò, vɔ̀a, woa sɔ wò dà ɖo èzò kè mu cina gbèɖe òa mè. [ 44Àfi kè 'èŋɔ kèwo ɖùnà ŋutilãawo mu kuna lè ò, eye èzò cã mu cina lè gbèɖe òa.'] 45Ne àpo àfɔ̀ le dɔ̃ wò ɖo nuvuɛ̃ mèa, sò ɛ̀ dãŋùgbe, ɖoa, ne wò zɔ̃ àfɔ̀ ɖèka yì àgbè mà-vɔ mèa, e la nyɔ na wò wu be wòa zɔ̃ àpo àfɔ̀ èvèawo ji, vɔ̀a, woa sɔ wò dãŋùgbe ɖo èzò kè mu cina gbèɖe òa mè; [ 46Àfi kè 'èŋɔ mu kuna lè ò, eye èzò cã mu cina lè gbèɖe òa.'] 47Ne àpo ŋùkuvi ye le dɔ̃ wò ɖo nuvuɛ̃ mèa, hɔ̃ ɛ̀ dãŋùgbe. Ne wò nyi ŋùkuvi ɖèkatɔ ɖo Mawu be fìɔdua mèa, e la nyɔ na wò wu be wòa ɖo ŋùkuvi èvè, vɔ̀a woa sɔ wò dãŋùgbe ɖo èzò kè mu cina gbèɖe òa mè; 48àfi kè 'èŋɔ mu kuna lè ò, eye èzò cã mu cina lè gbèɖe òa.' 49Đo èzò ye nyi èjè kè wo la do àmè sia àmèa.”

50“Èjèa, ènu nyuɛ̃ ɖe ye be nyi. Vɔ̀a, ne ènu kè nana ye be nyi èjèa mu gbà lè e mè òa, nukɛ ye wo la teŋu wɔ̀ ne bèa gbà trɔ zũ èjè ò? Mì na ne èjè bèa nɔ̀ mìa mè, ne mìa nɔ̀ fàfa mè ku mìa nɔ̀nɔwo.”

Currently Selected:

Markò 9: GEN

Highlight

Copy