Markò 7

Ènyàdɔ̃dɔ̃ so èkɔ̀nuwo ŋuti

(Màt 15.1-9)

1Farizìwo ku ènu ŋlɔ̀tɔ ɖewo so Yèruzàlɛm va bɔ̀ lè Yesù gbɔ. 2Wo kpɔ be Yesù be *nukplaviwo dòmètɔ ɖewo le ɖù ènu ku àlɔ̀ pòɖi; ɖo, wo mu klɔ àsi sìgbè lekè Yudàviwo be èkɔ̀nuwo biɔa nène ò. 3Nyàwo a, keŋu gbɔ̀xue Farizìwo ku Yudàviwo la ɖù ènua, wo klɔna àsi sìgbè lekè woa tɔgbewo be èkɔ̀nu ɖo èa nène. 4Ne wo gbɔ̀ so àsì mè eye wo mu lè woa ɖokoewo ɖì òa, wo mu ɖùnà ènu ò. Ènu buwo gbà lè kèwo wo wɔ̀nà eye wo nyi èkɔ̀nu na wo, sìgbè kogòwo ku èzewo kudo àgbãwo be kɔklɔ nène.

5Vɔ̀a, Farizìawo ku ènu ŋlɔ̀tɔawo biɔ Yesù be: “Nukɛ ŋuti ye *nukplavi woawo yaa, wo mu zɔ̃nà ɖo tɔgbewo be èkɔ̀dowo ji ò? Wo mu klɔna àlɔ̀ sìgbè leke miabe èkɔ̀nu ɖo èa nène keŋu gbɔ̀xue ɖùnà ènu ò.” 6E gblɔ̃ na wo be: “Mì, àyèmènuwɔ̀tɔwo! Ènyà kè Ezayà gblɔ̃ so mìa ŋutia sɔ̀gbè pɛpɛpɛ be:

'Dùkɔ̃ kèa le kafu mù ku ènu kpò; vɔ̀a,

yebe èjì lè boo lè gbɔ nyè.

7Wo be yèwo le sumɔ mù; vɔ̀a,

ènu gbalo ye wo le wɔ̀.

Wo be yèwo le fiɔ mawunya àmè, vɔ̀a àgbètɔ

be *èse ye wo le fiɔ.'

8Mì tàsi Mawu be èsea ɖɛ, eye mì le àgbètɔwo be èkɔ̀nuwo ɖo àsi veve ɖe.”

9Eye e gblɔ̃ na wo be: “Nyàwo ŋutɔ be nyi be mì gble Mawu be èsea ɖɛ eye mì le lebè na mìa ŋutɔwo mìabe èkɔ̀nuwo. 10Đo Mosè gblɔ̃ be: 'Bù ètɔ wò ku ènɔ̀ wò; wu ekèa àmè kè zũ ètɔa àlo ènɔa, jè na èku.' 11Vɔ̀a, mìawo yaa, mì gblɔ̃ be ne àmè ɖe gblɔ̃ na ètɔa àlo ènɔa be: 'Ènu ɖekpekpe kè wò la kpɔ so gbɔ nyèa, Kɔrbàn ye be nyi', ekè be gɔ̃mè le nyi, ènu nana kè wo cã ɖɛ na Mawu a,, 12mì mu gbà nana ɛ̀ èmɔ ne bèa wɔ̀ ènu ɖe na ètɔa àlo ènɔa ò. 13Nène a ye mì sɔna Mawu be ènyàa sɔ wɔ̀nà ènu gbalo, to mìabe èkɔ̀nu kèwo mì ɖoawo jia yeŋu. Mì gbà wɔ̀nà ènu kèawo hati sùgbɔ buwo cã.”

Ènu kèwoe nana àmè nɔ̀nà màkɔ̀ màkɔa

14Yesù gbà yɔ àmèha a va, gblɔ̃ na ɛ̀ be: “Mìa kpata mì ɖo èto mù, ne mìa ŋɔjè ènu kè mù jro la to na mìa mè nyuɛ̃ ɖe. 15Mu nyi ènu kè wo ɖùnà ɖo àdɔ̀ mèa ye pònàɖi àgbètɔ ò; vɔ̀a, ènu kè tona so àgbètɔ be èjì mèa ye pònàɖi ì. [ 16Àmè kè si èto lèa, ne sè è.]”

17Kè Yesù jo lè àmèha a gbɔ yì àxomèa, yebe nukplaviwo biɔ ɛ̀ ènyà sè so èlo kè be do a ŋuti. 18Yesù gblɔ̃ na wo be: “Mìawo cã mì gbà dã ènu kèa ye à? Eŋuã mì mu nya be ènu kè ɖo àgbètɔ be àdɔ̀mè a mu teŋu pòɖi ì òa? 19Đo ènu ŋua mu yìnà yebe èjì mè ò; yebe pòdo mè ye be yìnà eye ne àmèa yì àfɔ̀jia, e dènà ɛ̀.” To ènyà kèa jia, Yesù gbà le ɖèfiɔ zè ɖèka be ènu ɖùɖuwo kpata lè kɔ̀kɔ̀ɛ. 20Yesù gbà to na wo be: “Ènu kè to lè àgbètɔ mèa ye pònàɖi ì. 21Đo àgbètɔ be èjì mè ye susu vuɛ̃wo sona: gbòlò wɔ̀wɔ, èfĩ fìfi, àmè wùwu, 22*àhasì wɔ̀wɔ, ŋùbìa, èku nyànyrã, àmè fùflu, àgbè yàkà yàkà zãzã, ŋuhuã, bùsunya gbɔ̃gblɔ̃, àmè ɖokoe kpɔkpɔ ku woa wɔ̀nu sìgbè yɛ̀yìnɔ̀ nène. 23Èjì mè ye ènu vuɛ̃ kèawo sona, pònà ɖi àgbètɔ.”

Nyɔ̃nù ɖe xɔ̀ Yesù ji sè

(Màt 15.21-28)

24Yesù jo lè funu yì Tirò be àgowo ji. E ɖo àxue ɖe mè eye mu ji be àmè ɖe bèa nya be yè lè funu ò, gãke àmèwo kpɔ ɛ̀. 25Zè ɖèkaa, nyɔ̃nù ɖe kè be nyɔ̃nùvi, gbɔ̃gbɔ̃ vuɛ̃ ɖe le ɖè èfũ na a, sè Yesù be nyikɔ eye e va jè èklò ɖo ŋùkɔ̀ na ɛ̀. 26Nyɔ̃nùa, àgbàlè ye be nyi, Sirò-Foenikè-vi jìji be nyi. E ɖè kuku na Yesù be bèa nyà gbɔ̃gbɔ̃ vuɛ̃ kè le ɖèfũ na yèbe nyɔ̃nùvia to. 27Vɔ̀a, Yesù ɖo e ŋuti na ɛ̀ be: “Na ne ɖèviwo woa ɖù ènu ɖɔpò gbɔ̀xue; ɖo mu jè be woa sɔ ɖèviwo be ènu ɖùɖu dà ɖoɖa àvũviwo ò.” 28Nyɔ̃nùa ɖo e ŋuti na ɛ̀ be: “Tɔhonɔ̀, nyàwo ye wò to, e lè nène, gãke àvũvi kèwo lè èkplɔ̃ gɔ̃mèawo cãna ɖèviwo be ènu ɖùɖu kè hlɛ̃ kɔ̀ ɖo ànyigbãa.” 29Yesù ɖo e ŋuti na ɛ̀ be: “Đo ènyà kè wò gblɔ̃a ŋutia, trɔyì àxomè, gbɔ̃gbɔ̃ vuɛ̃ a to lè èvi wò nyɔ̃nùvia mè.” 30Nyɔ̃nùa trɔyì àxomè eye e kpɔ be gbɔ̃gbɔ̃ vuɛ̃ a jo lè èvia mè, eye be lè ànyimɔmlɔ̃ lè àba ji.

Yesù dà èdɔ̀ na ètokunɔ̀, àɖe kukutɔ ɖe

31Yesù jo lè Tirò be àgowo ji, yì to Sidɔ̀n ku àfi kè wo yɔna be èdù èwoawo be ànyigbã ji va Galilea be ètɔ̀ to. 32Wo kplɔ̀ ètokunɔ̀ ɖe kè mu teŋu pònà nupo nyuɛ̃ ɖe òa va na ɛ̀, eye wo ɖè kuku na ɛ̀ be bèa ɖo àlɔ̀ e ji sɔ dà èdɔ̀ na ɛ̀. 33Yesù kplɔ̀ ètokunɔ̀a jo lè àmèha a gbɔ yì àsà mè. E sɔ yebe àlɔ̀viwo do ètokunɔ̀a be ètowo mè; e tu ètã sɔ tɔ yebe àɖe. 34Eŋuã yomè a, Yesù kɔ ŋùkuvi yì èji, kpɔ jiŋùkusi ɖoɖa. E gbɔ̃ fùu, eye e gblɔ̃ na ɛ̀ be: “Èfatà!” E gɔ̃mè ye le nyi be: “Hũ!” 35Troloa, ŋusùa be ètowo hũ; yebe àɖèkawo tu, eye e tɔ nupo pòpo nyuɛ̃ ɖe. 36Yesù do *èse na àmè kèwo kpɔ ènu kèa tèpea be wo mu gbà gblɔ̃ ɛ̀ na àmè ɖe ò. Vɔ̀a, àlekè be le do èse na woa, nènea ke ye wo le kãkã ènyàa yeŋu. 37E wɔ̀ ŋùdã na àmè kèwo sè a ŋutɔ, eye wo gblɔ̃ be: “E wɔ̀nà ènuwo keŋu-keŋu nyuɛ̃ ɖe, e nana ètokunɔ̀wo sènà ènu eye àɖèkukunɔ̀wo pònà nupo.”

Currently Selected:

Markò 7: GEN

Highlight

Copy