Markò 11

Yesù yì Yèruzàlɛm

(Màt 21.1-11; Luk 19.28-40; Yòh 12.12-19)

1Eye wàlɛbɛ kè wo le gogo Yèruzàlɛm, le lili Bɛtfagè ku Betanìa lè èto kè wo yɔna be àmìti-toa gbɔa, Yesù dɔ̃ yebe *nukplavi èvè, 2gblɔ̃ na wo be: “Mì yì kɔpe kè lè ŋùkɔ̀ na mì ŋua mè. Ne mì ɖo e mèa, mì la kpɔ èsɔ-àkɛtɛvi ɖèka kè ji àmè ɖe mu lia kpɔ òa, lè èkà mè. Mì tu èkà na ɛ̀ ne mìa kplɔ̀ ɛ̀ va fikè. 3Ne àmè ɖe biɔ mì be: 'Nukɛ ŋuti mì le wɔ̀ ekè a ɖo màa?' Mì ɖo e ŋuti na ɛ̀ be: 'Tɔhonɔ̀ ye hiã ɛ̀; e la gbà trɔ ɛ̀ ɖoɖa fifì jɛ̃.'”

4 *Nukplavi èvèawo yì eye wo kpɔ èsɔ-àkɛtɛvi ɖèka lè èkà mè lè àxue ɖe be àgbonu, lè èmɔ to. Wo tu èkà na ɛ̀. 5Àmè ɖewo lè funu, kpɔ wo, eye wo gblɔ̃ na wo be: “Hee! Nukɛ mì le wɔ̀ ò? Nukɛ ŋuti ye mì le tu èkà na èsɔ-àkɛtɛvia ɖo ò?” 6Wo ɖo e ŋuti na wo sìgbè àlekè Yesù gblɔ̃ na woa nène, eye àmèawo tàsi wo, eye wo jo. 7Wo kplɔ̀ èsɔ-àkɛtɛvia va na Yesù; wo sɔ woabe àwùgãwo ɖo èsɔ-àkɛtɛvia ji, eye Yesù nɔ̀ ànyi ɖo e ji. 8Àmè sùgbɔ ɖo woabe àwùgãwo ɖo èmɔa ji eye àmè ɖewo cã sò àti be àlɔ̀zɛ̃ fɛ̃fɛ̃wo so àgblèwo mè va kãkã ɖo èmɔa ji. 9Àmè kèwo lè ŋùkɔ̀ na Yesùa, ku àmè kèwo lè ŋùgbedòmè na ɛ̀a, wo le do àpa be: “Hozanà! Mawu tusì na àmè kè gbãnà lè Tɔhonɔ̀ be nyikɔ mèa. 10Mawu tusì na mia tɔgbe David be fìɔɖùɖu kè gbãnà a. Hozanà na Mawu lè jiŋùkusi.” 11Yesù yì Yèruzàlɛm, ɖo mawuxɔa mè. Kè be kpɔ àlekè ènuwo le zɔ̃ ɖo lè mawuxɔa mèa, ye ku yebe nukplaviwo yì Betanìa, ɖo gàmè yì vɔ̀.

Yesù sɛ̃kpɛ̃ na vòti ɖe

(Màt 21.18-19)

12Yebe ŋùkè gbèa, wàlɛbɛ kè wo le jo lè Betanìaa, àdɔ̀ wù Yesù. 13E kpɔ vòti ɖe kè to àmà sùgbɔa, lè àzɔ̀ge boo. E yì àtia gbɔ be èta mu nyɔ òa, yè la kpɔ èkusɛ̃sɛ̃ ɖe lè e ji. Vɔ̀a, ekè e gogo àtia, mu kpɔ ènu ɖe lè e ji wu àmàkpawo ò, ɖo gà kè mè àtia la sɛ̃ èkua mu kpɔ sù hàɖe ò. 14Yesù sɛ̃kpɛ̃ na àtia gblɔ̃ be: “Àmè ɖe mu la gbà ɖù àpo èkusɛ̃sɛ̃ kpɔ gbèɖe ò!” Yebe nukplaviwo sè ènu kè be gblɔ̃a.

Yesù nyà àsìsàtɔwo to lè mawuxɔa mè

(Màt 21.12-17; Luk 19.45-48; Yòh 2.13-22)

15Yesù ku yebe nukplaviwo gbà trɔva Yèruzàlɛm. Yesù ɖo mawuxɔa mè, tɔ àmè kèwo le sà ènu ku àmè kèwo le plè ènu lè funuawo nyànya. E mù ègà ɖɔ̀lìtɔwo be èkplɔ̃wo ku àhɔ̃ne sàtɔwo be àzìkpewo pu ànyi. 16Mu lɔ̃ na woa dòmètɔ ɖe be ne dro àjɔ̀nu ɖe to mawuxɔa mè ò. 17E fiɔ ènu wo be: “Wo ŋlɔ̀ ɖɛ be: 'Wo la yɔ àxue nyèa be kuefã-pe na dùkɔ̃wo kpata', vɔ̀a mìawo ya, mì sɔ ɛ̀ wɔ̀ fìãfìwo be èdo.” 18Mawunɔ gãwo ku èsefiɔtɔwo sè ènu kè Yesù wɔ̀a eye, wo le ji lekè wo la wɔ̀ la wù ìa; vɔ̀a wo le vɔ̃, ɖo àmèwo kpata ye Yesù be ènufiɔfiɔa wɔ̀nà ŋùdã na. 19Ekè fìɛ̃si ɖoa, Yesù ku yebe nukplaviwo to lè èdùa mè.

Àti kè Yesù sɛ̃kpɛ̃ na a

(Màt 21.20-22)

20Kè èŋù kè, eye Yesù ku yebe nukplaviwo va le yì ŋùdekɛ̃nyɛ mèa, wo kpɔ àti kè Yesù sɛ̃kpɛ̃ na a. Àtia ku keŋu-keŋu so èji kaka va jè yebe èkèwo ji. 21Petrò ɖoŋù ènu kè jɔ̀a eye e gblɔ̃ na Yesù be: “Ènufiɔtɔ, kpɔ àti kè wo sɛ̃kpɛ̃ na a pu keŋu-keŋu ɖa!” 22Eye Yesù ɖo e ŋuti na wo be: “Mì xɔ̀ Mawu ji sè. 23Nyàwo mù le to na mì, ne àmè ɖe to na èto kèa be: 'Hɔ̃ jo lè fikè yì jè àpù mèa', ne àmèa mu do àɖìka lè yebe èjì mè òa, vɔ̀ xɔ̀sè be ènu kè yè gblɔ̃a la jɔ̀ a, e la kpɔ ɛ̀ ɖo nènea ji. 24Ye ŋuti ye mù le to na mì be, ènu ɖekpekpe ènu kè mì la biɔ Mawu lè kuefã mèa, mì kã ɖo e ji be mì xɔ̀ ɛ̀ vɔ̀, eye wo la sɔ ɛ̀ na mì. 25Eye wàlɛbɛ kè mì le fãkuea, ne mì ɖo ènu ɖe ɖo àmè ɖe ŋutia, mì sɔ ɛ̀ kè è ne mìa Tɔ kè lè jiŋùkusia cã ne sɔ mìabe nuvuɛ̃wo kè mì. [ 26Vɔ̀a, ne mì mu sɔna nuvuɛ̃ kènà àmè òa, mìa Tɔ kè lè jiŋùkusia cã mu la sɔ kè mì ò#11.26 Ŋɔ̀ŋlɔ̃ xoxotɔ̀ ɖewo mu ɖo hɛ̃hlɛ̃ kèa ò. .]”

Àmè kɛ ye na àcɛ̀ Yesù ò?

(Màt 21.23-27; Luk 20.1-8)

27Wo gbà trɔ yì Yèruzàlɛm. Eye, wàlɛbɛ kè Yesù zɔ̃ lè mawuxɔa mèa, * mawunɔ gãwo ku ènu ŋlɔ̀tɔwo kudo èdùmèmègãwo va e gbɔ, 28biɔ ɛ̀ sè be: “Àcɛ̀ kɛ ye wò ɖo sɔ le wɔ̀ ènu kèawo keŋu ò, àlo Àmè kɛ ye na wò ŋusɛ̃ kè wò sɔ le wɔ̀ ènu kèawo ò?” 29Yesù gblɔ̃ na wo be: “Ènyà ɖèka kpò ye mù la biɔ mì. Ne mì ɖo e ŋuti na mùa, eŋuãa mù la gblɔ̃ àcɛ̀ kè mù sɔ le wɔ̀ ènu kèawoa na mì. 30Yòhanɛ̀s be mawusilèlea ɖe, jiŋùkusi be soa, àlo àgbètɔwo gbɔ ye? Mì ɖo e ŋuti na mù.” 31Wo tɔ ènyà dɔ̃dɔ̃ lè woa nɔ̀nɔwo dòmè be: “Ne mi gblɔ̃ be: 'Jiŋùkusi be soa', e la gblɔ̃ na mi be: 'Nukɛ ŋuti ye mi mu xɔ̀ Yòhanɛ̀s be àŋɛ̀a ji sè ò?' 32Vɔ̀a ne mi gblɔ̃ be: 'Àgbètɔwo gbɔ ye à…'” Wo le vɔ̃ dùkɔ̃a, ɖo àmèwo keŋu sɔ Yòhanɛ̀s be e nyi gblɔ̃ɖɛtɔ nyàwo. 33Wo ɖo e ŋuti na Yesù be: “Mi mu nya ò.” Eye Yesù gblɔ̃ na wo be: “Nyè cã nyè mu la gblɔ̃ àmè kè na mù àcɛ̀ kè mù sɔ le wɔ̀ ènu kèawo ò.”

Currently Selected:

Markò 11: GEN

Highlight

Copy