Lukà 21

Àhòsì wɔ̀amènɔ̀a be ènu nana

(Mrk 12.41-44)

1Yesù kɔ ŋùmè yìji eye be kpɔ àdɔ̀kùnɔ̀wo lè sɔ woabe ènu nanawo le do ènujɔ̀ɖakaa mè. 2E kpɔ àhòsì wɔ̀amènɔ̀ ɖe cã sɔ flãvi#21.2 Flãvi: ègà kè mi le zã fifìa be cucugbã tɔ̀a. èvè ɖo e mè. 3Eye e gblɔ̃ na àmè kèwo lè funuawo be: “Nyàwo mù le to na mì: àhòsì wɔ̀amènɔ̀ kèa na ènu wu àmè sia àmè. 4Đo àmè kpɔ̀tɛawo kpataa, ènu sùgbɔ kè lè woa sia mè ye wo sɔ lè, va do ènujɔ̀ɖakaa mè. Vɔ̀a, e yaa, ènu kè lè e si ne bèa sɔ nɔ̀ àgbè a kpata ye be sɔ do e mè.”

Yesù be wo la gbã mawuxɔa

(Màt 24.1-2; Mrk 13.1-2)

5Ekè, àmè ɖewo le kã àseŋu so àlekè wo ɖo àcɔ na mawuxɔa kudo èkpe xɔ̀asìwo, gbàkudo ènu nana nyuɛ̃wo ɖoa ŋutia, 6Yesù gblɔ̃ be: “Mì le kpɔ ènu kèawoa? Èŋù ɖewo la va kè, ekè èkpe ɖe mu la kpɔ̀tɔ̀ lè èɖe ji kè wo mu la mù pu ànyi ò.”

Yesù pò nupo so ènu kèwo la va jɔ̀awo ŋuti

(Màt 24.3-14; Mrk 13.3-13)

7Wo biɔ ɛ̀ be: “Ènufiɔtɔ, gà kɛ mè ye ènu kèawo la va jɔ̀ ò? Nukɛ ye la nyi jèsì be wo lili mi ò?” 8Yesù ɖo e ŋuti na wo be: “Mì kpɔ nyuɛ̃ ɖe ne àmè ɖe mu gbà flù mì ò. Đo àmè sùgbɔ la sɔ àpe nyikɔ ɖo ènu, la va gblɔ̃ be: 'Ènyè ye nyi Mɛ̀sia!' Àlo wo la gblɔ̃ be: 'Gàmè sù vɔ̀.' Mì mu gbà jè woa yomè ò. 9Gà kè mè mì la sè àhùa be nyikɔ kudo èzĩ tɔ̀tɔa, mì mu gbà vɔ̃ ò, ɖo ènu kèawo ɖo la jɔ̀ cucugbã, vɔ̀a, vɔ̀vɔnua mu la va trolo ò.” 10Yesù gbà yì e ji gblɔ̃ be: “Dùkɔ̃ ɖe la sitè ɖo dùkɔ̃ bu ŋuti, eye, èfìɔdu ɖe la sitè ɖo èfìɔdu bu ŋuti. 11Ànyigbã la hũhũ, eye àdɔ̀ kudo èdɔ̀ vuɛ̃ la to lè àfi vòvòvòwo. Ŋɔjinuwo gbàkudo jèsì gãgãwo la so jiŋùkusi. 12Vɔ̀a, gbɔ̀xue ènu kèawo la jɔ̀ a, wo la le mì, la tĩ mìa yomè. Wo la kplɔ̀ mì yì bɔ̀bɔ̀pewo, la sɔ mì do ègàkpa mè. Wo la kplɔ̀ mì yì èfìɔwo kudo dùjiɖùtɔwo be ŋùkɔ̀ ɖo ŋuti nyè. 13Ènu kèawo la jɔ̀ ɖo mìa ji, eye, mì la kpɔ èmɔ la ɖù ɖase so ŋuti nyè. 14Ne nɔ̀ susu mè na mì be, mì mu hiã la gbã èta so ènu kè mì la gblɔ̃a ŋuti ò. 15Đo ènyè ŋutɔ ye la sɔ ènu nyãnyãl be ènyà kè mì la gblɔ̃a sɔ ɖo àyè mè na mì, eye mìabe kɛ̃tɔ ɖe ma teŋu gblɔ̃ ènyà ɖe kè la teŋu gbã mìa tɔ̀a do ò. 16Mìabe àjìtɔwo kudo mìa nɔ̀viwo, mìabe xòmètɔwo kudo mìabe èxlɔ̃wo ŋutɔ cã la do mì àsi eye, wo la gblehùɛ do mìa dòmètɔ sùgbɔ. 17Àmèwo kpata la crì mì ɖo ŋuti nyè. 18Vɔ̀a, mìabe èɖà kèwo lè èta na mìa, ɖèka ŋutɔ cã mu la bu ò. 19Mì do veve ènu, ne mìa hlùɛ̃ mìabe àgbè a gã.

Yesù pò nupo so Yèruzàlɛm gbàgbã ŋuti

(Màt 24.15-21; Mrk 13.14-19)

20“Ne mì kpɔ àhùakɔ̃wo xa Yèruzàlɛm-a, mì nya be gà kè mè wo la gbã ɛ̀a gogo. 21Eŋuãa, àmè kèwo lè Yudeà a, wo ne si yì ètowo ji. Àmè kèwo lè èdùa mèawo ne to, eye àmè kèwo lè àgblètaawo mu gbà trɔva èdùa mè ò. 22Đo èhlɔ̃biɔ-zãwo ye be la nyi, ne ènu kèwo wo ŋlɔ̀ ɖɛawo ne zɔ̃ sù. 23Hèlu na nyɔ̃nù kèwo si èfu la nɔ̀awo ku àmè kèwo la nɔ na ànɔ èvi lè àzã ŋuawo jiawo. Đo àyàɖùɖu gã ɖe la va ànyigbã ji, eye Mawu be àdɔ̀mèze la va dùkɔ̃ kèa ji. 24Wo la wù àmè ɖewo kudo èwui, eye wo la le àmè ɖewo, la kplɔ̀ wo yì èdù buwo mè, eye àgbàlèwo la ɖiki Yèruzàlɛm ku àfɔ̀ kaka sɔ na gà kè mè woabe hùenu la sùa.”

Àgbètɔ be Èvia be tɔtrɔ va

(Màt 24.29-31; Mrk 13.24-27)

25“Eye jèsìdowo la nɔ̀ èwè ku wètri kudo wètriviwo mè. Lè ànyigbã jia, vɔ̃vɔ̃ la ɖo dùkɔ̃wo, eye wo la ci jojojoe ɖo àpù kudo àsrɔ̀kewo be ègbèɖèɖe ŋuti. 26Ne àmèwo le susu ènu kè la va jɔ̀ lè àgbè a mèa, vɔ̃vɔ̃ la ɖo wo, eye, wo la ku ɖo tè, ɖo Jiŋùkusi be hɔ̃hlɔ̃wo la hũhũ. 27Eye wo la kpɔ *Àgbètɔ be Èvia la nɔ ɖì so lilikpowo mè gbãnà kudo ŋusɛ̃ gbàkudo gogo gãa ɖe. 28Ne ènu kèawo tɔ jɔ̀jɔa, mì sitè ne mìa jɔ̀. Mì kɔ èta yì ji, ɖo gà kè mè Mawu la hlùɛ̃ mì gãa ye lili.”

Yesù sɔ vòti fiɔ ènu

(Màt 24.32-35; Mrk 13.28-31)

29Yesù do èlo kèa na wo be: “Mì kpɔ vòti kudo àtiwo kpata ɖa, 30ne wo le to àmàkpaa, mìa ŋutɔ mì nyana be zòzo hùenu ye lili. 31Nène a ke ye ne mì va kpɔ ènu kèawo keŋu le jɔ̀ a, mì nya be Mawu be fìɔdua lili vɔ̀. 32Nyàwo ye mù le to na mì: jìjimè kèa mu la va yì gbɔ̀xue ènu kèawo keŋu la jɔ̀ ò. 33Jiŋùkusi ku ànyigbã la klo va yì, vɔ̀a, ènyà nyèwo mu la va yì ò.”

E hiã be mìa nɔ̀ ŋùzɔ̃

34“Mì kpɔ mìa ɖokoewo ji nyuɛ̃ ɖe, ne ènusuɖùɖu ku àhànùmu, kudo èji cici ɖo àgbè kèa be ènuwo ŋuti mu gbà xɔ̀ mìabe èjìwo, ne kòjoɖoɖo be àzã kèa mu gbà va tù mì lè àvò mè ò. 35Đo àzã ŋua la va wàlɛbɛ kè mì mu le ɖoŋù òa, sìgbè àlekè èlã jènà gàmɔ mè lè àvò mèa nène. 36Ye ŋutia, mì nɔ̀ ŋùzɔ̃; mì nɔ̀ fãkue wè sia wè ne mìa teŋu kpɔ ŋusɛ̃ kè la ɖè mì to lè ènu kèwo keŋu la va jɔ̀awo mè, ne mìa teŋu va nɔ̀tè lè *Àgbètɔ be Èvia be ŋùkɔ̀.”

37Lè ŋùkèkè mèa, Yesù fiɔna ènu lè mawuxɔa mè; fìɛ̃si mèa, e yì cina èto kè wo yɔna be *Àmìtiwo be Ètoa ji. 38Ŋùdekɛ̃nyɛ fùtùa, dùkɔ̃a kpata yì bɔ̀nà lè mawuxɔa mè, ɖona èto è.

Currently Selected:

Lukà 21: GEN

Highlight

Copy