Yòhanɛ̀s 6

Yesù na ènu ɖùɖu àmèha gãa ɖe

(Màt 14.13-21; Mrk 6.30-44; Luk 9.10-17)

1Lè ènu kèawo yomè a, Yesù yì Galilea be ètɔ̀, kè le nyi Tiberìa be ètɔ̀ gãa godo. 2Àmèha gã ɖe jè e yomè, ɖo àmèwo kpɔ jèsì kèwo be wɔ̀, na èdɔ̀nɔ̀woa. 3Ekèa ŋutia, Yesù yì èto ɖe ji eye be nɔ̀ ànyi lè funua ku yebe nukplaviwo. 4Toŋutivayì, kè le nyi Yudàviwo be àzãɖùɖu gãa gogo. 5Ekè Yesù ɖè ŋùku kpɔ àmèha gã kè gbãnà e gbɔa, e gblɔ̃ na Filipò be: “Fikɛ ye mi la kpɔ kpɔ̃nɔ lè la plè na àmè kèawo ne woa ɖù ò?” 6E gblɔ̃ ekèa sɔ le do è kpɔ, ɖo ye ŋutɔ nya ènu kè be la wɔ̀a. 7Filipò ɖo e ŋuti na ɛ̀ be: “Kpɔ̃nɔ klòsalòga àlɔ̀ èvè cã mu la sù ne àmè sia àmè bèa kpɔ vi ɖe ò.” 8Ãdre, Simɔ̀n Petrò be nɔ̀vi, kè nyi Yesù be nukplaviwo dòmètɔ ɖèkaa gblɔ̃ na ɛ̀ be: 9“Ŋusùvi ɖe lè fikèa, kè si kpɔ̃nɔ àtɔ̃ kudo tɔ̀mèlãvi èvè lèa. Vɔ̀a, fikɛ ènu ŋua teŋu sù na àmè gbogbo kèawo ò?” 10Yesù gblɔ̃ na yebe nukplaviawo be: “Mì na ne àmèawo kpata woa nɔ̀ ànyi.” Ègbe wiwli sùgbɔ lè funu, eye àmèawo nɔ̀ ànyi. Ŋusù àmègãxo kèwo lè funuawo la sù hotu èvè èkà èwì vɔ àtɔ̃. 11Eye Yesù sɔ kpɔ̃nɔawo, ekè be do àkpe na Mawu vɔ̀a, e ma wo na àmèawo. E ma tɔ̀mèlãwo cã na wo nènea, eye àmè sia àmè xɔ̀ ekè be jro a. 12Kè wo ɖɔpò vɔ̀a, Yesù gblɔ̃ na yebe nukplaviawo be: “Mì cã ekè kpɔ̀tɔ̀a bɔ̀, ne ɖekpe mu gbà gũ ò.” 13Yebe nukplaviawo cã wo bɔ̀, eye ekè kpɔ̀tɔ̀ so kpɔ̃nɔ àtɔ̃awo mè, wàlɛbɛ kè àmèwo ɖù ènu vɔ̀a, ɖɔ àjàfi woèvè. 14Kè àmèwo kpɔ ŋùdãdɔ kè bè wɔ̀a, wo gblɔ̃ be: “Mawu be gblɔ̃ɖɛtɔ kè ɖo la va xixea mèa ye be nyi nyàwo.” 15Vɔ̀a, ekè Yesù kpɔ be wo la va le yè àkpasɛ̃sɛ̃, sɔ ɖo èfìɔa, e jo lè woa gbɔ, eye ye ɖèka yì èto ɖe ji.

Yesù zɔ̃ to èsì ji

(Màt 14.22-33; Mrk 6.45-52)

16Kè fìɛ̃si ɖoa, Yesù be nukplaviwo ɖì va Galilea be ètɔ̀a to. 17Wo ɖo ètɔ̀jihũ ɖe mè le sò ètɔ̀a yì Kapɛrnaum. Yesù mu kpɔ va woa gbɔ hàɖe ò, vɔ̀a vìvìti do vɔ̀. 18Àya sɛ̃sɛ̃ ɖe le pò, eye ètɔ̀a le wɔ̀ àdã. 19Wàlɛbɛ kè Yesù be nukplaviawo kù èhũa, sìgbè èkpeti àtɔ̃, àlo èkpeti àdɛ̃ nènea, wo kpɔ Yesù le zɔ̃ lè ètɔ̀a ji gbãnà èhũa gbɔ. Vɔ̃vɔ̃ ɖo wo, 20vɔ̀a Yesù gblɔ̃ na wo be: “Ènyè ye, mì mu gbà vɔ̃ ò!” 21Nukplaviawo ji be yèwoa xɔ̀ Yesù ɖo èhũa mè, vɔ̀a wàlɛbɛ ŋua ye èhũa jè àgo lè ànyigbã kè ji wo le yìa ji.

Àmèha le ji Yesù

22Kè èŋù kèa, àmè kèwo ci ètɔ̀a be àgo ɖèa jiawo kpɔ be èhũ ɖèka kpò ye lè ètɔ̀a to. Wo nya be Yesù mu ɖo ètɔ̀jihũa mè kudo yebe nukplaviwo, wàlɛbɛ kè wo jè èmɔa ò. Nukplaviawo ɖèɖe kpò ye ɖo ètɔ̀jihũa mè. 23Gãke èhũ buwo so Tiberìa, va gogo àfi kè wo ɖù kpɔ̃nɔ lè, wàlɛbɛ kè Tɔhonɔ̀ do àkpe vɔ̀a. 24Kè àmèawo mu kpɔ Yesù ò, eye wo mu kpɔ yebe nukplaviwo cã òa, wo ɖo ètɔ̀jihũawo mè, tùtà Kapɛrnaum, la yì ji ì.

Yesù ye nyi àgbè-nuɖùɖua

25Wo yì kè do e ŋuti lè ètɔ̀a be àgo ɖèa ji, eye wo biɔ ɛ̀ be: “Ènufiɔtɔ, gà kɛ mè ye wò va fikèa ò?” 26Yesù ɖo e ŋuti na wo be: “Nyàwo mù le to na mì; mu nyi ŋùdãdɔ kèwo mù wɔ̀, eye mì kpɔawo ŋuti mì le ji mù ɖo ò. Vɔ̀a, kpɔ̃nɔ kè mì ɖù, ɖɔpòa ŋuti ye. 27Mì mu gbà wɔ̀ èdɔ sɔ ji ènu ɖùɖu kè gblena ò, vɔ̀a, mì ji ekè nɔ̀nà ànyi, nana àgbè mà-vɔa, ekè *Àgbètɔ be Èvia la na mìa; ɖo e ye Mawu, Àta do jèsìdo.” 28Wo biɔ ɛ̀ be: “Nukɛ ye e jè be mia wɔ̀ ne mia teŋu wɔ̀ Mawu be èdɔwo ò?” 29Yesù ɖo e ŋuti na wo be: “Èdɔ kè Mawu le ji be mìa wɔ̀a ye nyi be mìa xɔ̀ àmè kè be dɔ̃ ɖoɖaa ji sè.” 30Wo gbà biɔ ɛ̀ be: “Jèsìdo kɛ ye wò la wɔ̀, mi la kpɔ, sɔ xɔ̀ ji wò sè ò? Èdɔ kɛ ye wò la wɔ̀ ò? 31Mia tɔgbewo ɖù manà#6.31 Manà: nuɖùɖu kè Mawu na yebe dùkɔ̃a lè zògbè jia. lè zògbè ji, sìgbè àlekè wo ŋlɔ̀ ɛ̀ ɖɛ be: 'E na wo ènu ɖùɖu kè so jiŋùkusia be woa ɖù.'” 32Yesù gblɔ̃ na wo be: “Nyàwo mù le to na mì; mu nyi Mosè ye na mì ènu ɖùɖu kè so jiŋùkusia ò. Vɔ̀a Ètɔ nyè ye na mì ènu ɖùɖu àdodoe kè so jiŋùkusia. 33Đo, ènu ɖùɖu kè so Mawu gbɔa, ye nyi àmè kè ɖì so jiŋùkusi va nana àgbè àgbètɔwoa.” 34Wo gblɔ̃ na ɛ̀ be: “Tɔhonɔ̀, nɔ̀ na mi ènu ɖùɖu ŋua tɛ̀gbɛ̀.”

35Yesù ɖo e ŋuti na wo be: “Ènyè ye nyi àgbè be ènu ɖùɖua. Àmè kè dɔ̃ va gbɔ nyèa, àdɔ̀ mu la wù ì gbèɖe ò. Àmè kè xɔ̀ ji nyè sè a, sìkɔ mu la tì ì kpɔ gbèɖe ò. 36Vɔ̀a, mù to è na mì. Mì kpɔ mù, gãke mì mu xɔ̀sè ò. 37Àmè kèwo kpata Ètɔ nyè sɔ na mùawo la va gbɔ nyè, eye nyè mu la nyà àmè kè va gbɔ nyèa ò. 38Đo, nyè mu so jiŋùkusi va, la wɔ̀ àpe èjro ò. Vɔ̀a àmè kè dɔ̃ mù ɖoɖaa be èjro ŋuti ye mù va ɖo. 39Eye, àmè kè dɔ̃ mù ɖoɖo a be èjro ye nyi be, àmè kèwo keŋu be sɔ na mùawo dòmètɔ ɖekpe mu gbà bu ò, vɔ̀ bòhũa, ma fɔ̃ woa kpata ɖo àgbè lè àzã mlɛ̃a ji. 40Ètɔ nyè be èjro ye nyi be, àmè ɖekpekpe àmè kè kpɔ Èvia, eye be xɔ̀ e ji sè a, ne kpɔ àgbè mà-vɔ, ne ènyè yaa, ma fɔ̃ ɛ̀ ɖo àgbè, lè àzã mlɛ̃a ji.”

41So gà ŋua mèa, Yudàviwo tɔ lihũi lìli so Yesù ŋuti, ɖo e gblɔ̃ be: “Ènyè ye nyi ènu ɖùɖu kè so jiŋùkusi vaa.” 42Eye wo gbà gblɔ̃ be: “Mu nyi Yesù, Yozɛ̀f be èvia yeŋuã? Mi mu jèsi ètɔa, ku ènɔa ò a? Nukɛ ŋuti bè le gblɔ̀ fifì be: 'Mu so jiŋùkusi va ò?'”

43Yesù gblɔ̃ na wo be: “Mì mu gbà lì lihũi lè mìa nɔ̀nɔwo dòmè ò. 44Àmè ɖekpe mu teŋu va gbɔ nyè, ne Àta kè dɔ̃ mù ɖoɖaa mu dɔ̃ ɛ̀ va ò; eye mù la fɔ̃ ɛ̀ so èku lè àzã mlɛ̃a ji. 45Wo ŋlɔ̀ ɖo gblɔ̃ɖɛtɔwo be Xoma mè be: 'Mawu la fiɔ ènunya woa kpata.' Ye ŋutia, àmè ɖekpekpe kè sè ènu kè so Àta gbɔ, eye be kpla ènunya so E gbɔa, vana gbɔ nyè. 46Àmè ɖe mu kpɔ Àta kpɔ, ne mu nyi àmè kè so Mawu gbɔa ò. E yaa, e kpɔ Àta. 47Nyàwo mù le to na mì. Àmè kè xɔ̀ ji nyè sè a, ɖo àgbè mà-vɔ. 48Ènyè ye nyi ènu ɖùɖu kè nana àgbè àdodoe a. 49Mìa tɔgbewo ɖù manà lè zògbè ji, gãke wo ku. 50Ènuɖùɖu kè so jiŋùkusia ye nyi ekèa. Àmè kè ɖù ìa, mu la ku ò. 51Ènyè ye nyi àgbè-nuɖùɖu kè ɖì so jiŋùkusi vaa. Àmè kè la ɖù ènu ɖùɖu kèa, la nɔ̀ àgbè kaka sɔ yì. Àpe ŋutilã ye nyi ènu ɖùɖu kè mù la sɔ na ne xixea ne nɔ̀ àgbè.”

52Yudàviwo tɔ ènyà dɔ̃dɔ̃ sɛ̃sɛ̃ ɖe lè woa nɔ̀nɔwo dòmè. Wo le gblɔ̃ be: “Àlekè ye ŋusù kèa la teŋu na mi yebe ŋutilã be mia ɖù ɖo ò?” 53Vɔ̀a Yesù gblɔ̃ na wo be: “Nyàwo ye mù le to na mì: ne mì mu ɖù *Àgbètɔ be Èvia be ŋutilã ò, eye ne mì mu nù yebe èhũ òa, mì mu la ɖo àgbè a ò. 54Àmè kè ɖùnà àpe ŋutilã, eye be nùnà àpe èhũa, ɖo àgbè mà-vɔ, eye ènyè ya, mù la fɔ̃ ɛ̀ so èku, lè àzã mlɛ̃a ji. 55Đo ŋutilã nyèa, ènu ɖùɖu àdodoe ye be nyi, eye èhũ nyè cã nyi ènunùnu àdodoe. 56Ne àmè ɖe ɖù ŋutilã nyè, eye be nù èhũ nyèa, àmè ŋua lè àgbè lè ènyè mè, eye nyè cã mù lè àgbè lè ye mè. 57Sìgbè àlekè Àta kè dɔ̃ mù ɖoɖaa lè àgbè, eye mù lè àgbè to Àta jia, nènea ke ye àmè kè la ɖù ŋutilã nyèa la nɔ̀ àgbè to ji nyèa yeŋu. 58Ènuɖùɖu kè ɖì so jiŋùkusia ye nyi ekèa. E tovò na ekè mìa tɔgbewo ɖùa. Mìa tɔgbewo yaa, wo ku, vɔ̀a àmè kè la ɖù ènu ɖùɖu kèa, la nɔ̀ àgbè kaka sɔ yì.” 59Yesù gblɔ̃ ènyà kèawo, wàlɛbɛ kè be le fiɔ ènu àmèwo lè bɔ̀bɔ̀pe kè lè Kapɛrnaum-a.

Àgbè mà-vɔ be ènyàwo

60Kè Yesù be nukplaviwo sè ènu kèwo be gblɔ̃ woa, woa dòmètɔ sùgbɔ gblɔ̃ be: “Ènyà kèa ve sèse ŋutɔ! Àmè kɛ ye la teŋu xɔ̀ ɛ̀ ò?”

61Yesù nya be yèbe nukplaviwo le lì lihũi so ènyà kè yè gblɔ̃a ŋuti, eye be gblɔ̃ na wo be: “Ènyà kè mù gblɔ̃a nyrã lè ŋùmè na mìa? 62Ne mì kpɔ Àgbètɔ be Èvia le yì jiŋùkusi, àfi kè be so vaa ɖe, nukɛ ye mì la wɔ̀ ò? 63Gbɔ̃gbɔ̃ Kɔ̀kɔ̀ɛ a ye nana àgbè àmè. Àgbètɔ be ŋutilã mu teŋu wɔ̀ ènu ɖe ò. Ènyà kèwo mù gblɔ̃ na mìa ye nana Mawu be gbɔ̃gbɔ̃ kè nana àgbè a. 64Vɔ̀a àmè ɖewo lè mìa dòmè kèwo mu xɔ̀sè ò.” So gɔ̃mèjèje a kea, Yesù nya àmè kèwo mu xɔ̀sè òawo, eye be nya àmè kè la do è àsia cã. 65Yesù yì e ji, gblɔ̃ be: “Ènu kèa ŋuti mù gblɔ̃ na mì be, ne Àta ŋutɔ mu ɖè èmɔ na àmè ɖe òa, àmèa mu la teŋu va gbɔ nyè ò.”

66So gà ŋua mèa, yebe *nukplavi sùgbɔ trɔ lè e yomè, eye wo mu gbà zɔ̃nà kudo è ò. 67Wàlɛbɛ ŋua, e gblɔ̃ na woèvèawo be: “Mìawo ya ɖe, mì mu le ji la jo òa?” 68Simɔ̀n Petrò ɖo e ŋuti na ɛ̀ be: “Tɔhonɔ̀, àmè kɛ gbɔ ye mi la yì ò? Gbɔ wò ye àgbè mà-vɔ be ènyàwo lè. 69Fifìa, mi xɔ̀sè, eye mi nya be èwò ye nyi Mɛ̀sia kè Mawu dɔ̃ ɖoɖaa.” 70Yesù ɖo e ŋuti na wo be: “Ènyè ŋutɔ ye cã mì, mì, àmè woèvèawo, gãke àmè ɖèka lè mìa dòmè kè nyi Àbòsam.” 71Yudà, Simɔ̀n Iskariɔt be èvi ŋuti be gblɔ̃ ènyà kèa so. Đo ye cã lè Yesù be *nukplavi woèvèawo dòmè, gãkea, e ye nyi àmè kè la va xɔ̀ kpli na ɛ̀.

Currently Selected:

Yòhanɛ̀s 6: GEN

Highlight

Copy