Yòhanɛ̀s 4

Yesù pò nupo ku Sàmarìa nyɔ̃nùa

1Ekè Yesù nya be Farizìwo sè be yè le kpɔ nukplaviwo wu, eye yè gbà le lè mawusi na àmèwo wu Yòhanɛ̀s-a, 2lè nyàwo toto mèa, Yesù ŋutɔ mu le lè mawusi na àmè ɖe ò; vɔ̀a, yebe nukplaviawo ye le lè è. 3E jo lè Yudeà, trɔ yì Galilea. 4Vɔ̀a, e ɖo la to Sàmarìa nyigbã ji.

5Nène a ye bè va ɖo Sàmarìa be èdù ɖe kè wo yɔna be Sìkar-a mè. Èdù kèa gogo ànyigbã kè Yakɔb na èvia Yozɛ̀f-a. 6Àfi kè tutu Yakɔb be vudoa lèa. Ekè ènu tìkɔ̀ na Yesù ɖo àzɔ̃lì kè be zɔ̃a ŋutia, e bɔ̀bɔ̀ nɔ̀ ànyi ɖo vudoa to. E lè pò sìgbè gà woèvè nène.

7Sàmarìa nyɔ̃nù ɖe va èsì kù gbe. Yesù gblɔ̃ na ɛ̀ be: “Na mù èsì ma nù.” 8Yebe nukplaviwo yì èdùa mè, la yì plè ènu ɖùɖu. 9Vɔ̀a Sàmarìa nyɔ̃nù kèa ɖo e ŋuti na ɛ̀ be: “Àleke èwò kè nyi Yudàvia, wò teŋu biɔ èsì ènyè, Sàmarìa nyɔ̃nù ɖo ò?” Yudàviwo ku Sàmarìatɔwo mu nyina ò. 10Yesù ɖo e ŋuti na ɛ̀ be: “Ne wò kè jèsi Mawu be ènu nana, ku àmè kè le biɔ wò be: 'Na mù èsì ma nùa', èwo bòhũ ye la biɔ ɛ̀, eye be la na wò àgbè sìa.” 11Nyɔ̃nùa gblɔ̃ na ɛ̀ be: “Àpetɔ wò mu ɖo èsìkùnu tètè ò, eye vudoa cã tito. Fikɛ ye wò la kpɔ èsì kè nana àgbè àmèa so ò? 12Wò wu gã mia tɔgbe Yakɔb, kè ɖè vudo kèa ɖɛ na mi, eye ye ŋutɔ nù yebe èsì, èviawo cã nù, eye yebe èlãwo cã nùa?” 13Yesù ɖo e ŋuti na ɛ̀ be: “Ne àmè ɖe nù èsì kèa, èsìkɔ la gbà tì ì. 14Vɔ̀, àmè kè la nù èsì kè mù la na ɛ̀a, sìkɔ mu la gbà tì ì gbèɖe ò, ɖo èsì kè mù la na ɛ̀a, la trɔ zũ èsìvudo kè la nɔ ji kaka na àgbè mà-vɔa.” 15Nyɔ̃nùa gblɔ̃ na ɛ̀ be: “Àpetɔ, na mù èsì ŋua, ne sìkɔ mu gbà tì mù ke ò, ne nyè mù gbà va nɔ kù èsì lè fikèa ke ò.”

16Yesù gblɔ̃ na ɛ̀ be: “Yì yɔ èsrɔ̃ wò ne mìa va fikèa.” 17Nyɔ̃nùa gblɔ̃ na ɛ̀ be: “Èsrɔ̃ mu lè àsi nyè ò.” Yesù gblɔ̃ na ɛ̀ be: “Nyàwo ye wò to be: 'Èsrɔ̃ mu lè àsi nyè ò.' 18Đo wò ɖè ŋusù àtɔ̃ kpɔ vɔ̀, eye ŋusù kè lè ku wò fifìa cã, mu nyi èsrɔ̃ wò ò. Nyàwo ye wò to.” 19Nyɔ̃nùa gblɔ̃ na ɛ̀ be: “Àpetɔ, mù kpɔ fifì be Mawu be gblɔ̃ɖɛtɔ ye wò nyi. 20Mia tɔgbewo sumɔ Mawu lè èto kèa ji, vɔ̀a mìawo yaa, mì be, àfi kè jè be woa sumɔ Mawu lèa, ye nyi Yèruzàlɛm.” 21Yesù ɖo e ŋuti na ɛ̀ be: “Nyɔ̃nù, xɔ̀ ènyà nyè ji sè. Gà mè gbãnà, ekè ye mu la gbà nyi èto kèa ji, àlo Yèruzàlɛm kpò ye mì la nɔ sɛ̃ Àta lè ò. 22Mìa Sàmarìatɔwoa, mì le sɛ̃ ènu kè mì mu jèsi òa. Vɔ̀a, mia Yudàviwo a, mi nya ènu kè mi le sɛ̃a, ɖo Yudàviwo gbɔ ye Hlùɛ̃gãa so. 23Vɔ̀a gà mè gbãnà; e va cã vɔ̀, ekè mè ye, Mawu sumɔtɔ àdodoewo la sumɔ Àta lè gbɔ̃gbɔ̃ kudo nyàwototo mè, ɖo àmè kèawo hati ye Àta le ji. 24Mawu a, gbɔ̃gbɔ̃ ye be nyi, ye ŋutia, e jè be àmè kèwo le sumɔ ɛ̀awo, ne sumɔ ɛ̀ lè gbɔ̃gbɔ̃ kudo nyàwototo mè.” 25Nyɔ̃nùa gblɔ̃ na ɛ̀ be: “Mù nya be *Mɛ̀sia ɖo la va. Àmè kè ye le nyi Kristò. Ne e vaa, e la ɖè ènuwo keŋu gɔ̃mè na mi.” 26Yesù gblɔ̃ na ɛ̀ be: “Ènyè, àmè kè le pò nupo na wòa, ye.”

27Wàlɛbɛ kè wo le gblɔ̃ ènyà kèawoa, yebe nukplaviwo gbɔ̀ va. E wɔ̀ ŋùdã na wo be Yesù le pò nupo ku nyɔ̃nù. Vɔ̀ a woa dòmètɔ ɖe mu biɔ ɛ̀ sè be: “Nukɛ wò le ji ò?” Àlo: “Nukɛ ŋuti wò le pò nupo ku ì ɖo ò?” 28Nyɔ̃nù a gble yebe èze a ɖɛ, sidù yì èdù a mè, gblɔ̃ na àmèwo be: 29“Mì va kpɔ ŋusù ɖe kè gblɔ̃ ènu kèwo keŋu mù wɔ̀ kpɔawo na mù. Mu nyi E ye la nyi Mɛ̀sia a ò à?” 30Àmèwo to lè èdùa mè, eye wo yì Yesù gbɔ.

31Wàlɛbɛ ŋua, Yesù be nukplaviwo ɖè kuku na ɛ̀ be ne ɖù ènu. 32Vɔ̀a E gblɔ̃ na wo be: “Ènuɖùɖu ɖe lè àsi nyè ma ɖù, ekè mì mu nya òa.” 33Nukplaviawo biɔ woa nɔ̀nɔwo be: “Àlo àmè ɖe hɛ̃ ènu ɖùɖu va na ɛ̀ ye à?” 34Yesù gblɔ̃ na wo be: “Ènuɖùɖu nyèa ye nyi be ma wɔ̀ àmè kè dɔ̃ mù ɖoɖaa be èjro; eye ma wu èdɔ kè be do àsi na mùa nu. 35Mìa ŋutɔwo mì mu gblɔ̃nà be: 'Lè wètri ènè yomè a, ènuku yàya be gàmè la ɖo ò a.' Vɔ̀a ènyè yaa, mù le to na mì be: mì ɖè ŋùku kpɔ àgblèwo ɖa. Ènukuawo sĩ na yàya vɔ̀! 36Ènukuyàtɔa xɔ̀ yebe fɛ̃tu vɔ̀. E bɔ̀nà ènukuawo ɖodu ne àgbè mà-vɔ. Eye nènea, àmè kè do ènua, ku àmè kè yà ènua, wo jɔ̀nà èjì ɖodu. 37Đo, lè ekèa mè ye ènyà kè wo gblɔ̃nàa nyi nyàwo be: 'Àmè ɖe dona ènu, eye àmè bu yànà ɛ̀.' 38Mù dɔ̃ mì be mìa yì yà ènuku lè àgblè kè mè mì mu wɔ̀ èdɔ lè òa mè. Àmè buwo wɔ̀ èdɔ lè àgblèa mè, eye mì va le ɖù yebe àlè.”

39Sàmarìatɔ kèwo lè èdù ŋua mèawo sùgbɔ xɔ̀ Yesù ji sè, ɖo ɖase kè nyɔ̃nùa ɖù so e ŋuti be: “E gblɔ̃ ènu kèwo mù wɔ̀awo keŋu na mùa” ŋuti. 40Ye ŋuti ye wàlɛbɛ kè Sàmarìatɔwo va Yesù gbɔa, wo ɖè kuku na ɛ̀ be ne nɔ̀ yèwo gbɔ. Yesù nɔ̀ woa gbɔ ŋùkèkè èvè. 41Àmè sùgbɔ buwo cã gbà xɔ̀ Yesù ji sè, ɖo ènyà kè be to na woa ŋuti. 42Eye wo gblɔ̃ na nyɔ̃nùa be: “Mi mu xɔ̀sè ɖo ènyà kè wò gblɔ̃ na mia ŋuti ji kpò ò. Vɔ̀a, e pò nupo, eye mia ŋutɔwo mi sè, eye mi nya be e ye nyi xixea be Mɛ̀sia nyàwo.”

Yesù dà èdɔ̀ na jiɖùɖua be àmègã ɖe be èvi

43Lè ŋùkèkè èvè yomè a, Yesù jo lè funua yì Galilea. 44Yesù ŋutɔ gblɔ̃ be: “Wo mu bùnà gblɔ̃ɖɛtɔ lè ye ŋutɔ be èdù mè ò#4.44 Wo gblɔ̃nà lè Gɛ̃gbe mè be: àxue bòkɔ mu jènà àmè ŋùmè ò..” 45Galileatɔ sùgbɔ yì ɖù Toŋutivayì be àzãa lè Yèruzàlɛm, eye wo kpɔ ènu kèwo Yesù wɔ̀ lè àzãa hùenua. Ènu kèa ŋuti ye wàlɛbɛ kè Yesù yì Galileaa, èdùamètɔwo xɔ̀ ɛ̀ nyuɛ̃ ɖe.

46Yesù trɔ va Kanàn, lè Galilea nyigbã ji, àfi kè be sɔ èsì trɔ zũ vɛ̃ lèa. Èjiɖùɖua be àmègã ɖe lè funu, kè be èvi jè èdɔ lè Kapɛrnaum. 47Kè be sè be Yesù jo lè Yudeà va yì Galileaa, e yì kpɔ ɛ̀ lè funu, eye be ɖè kuku na ɛ̀ be ne va dà èdɔ̀ na yèbe èvi kè ɖo èkudonua. 48Yesù gblɔ̃ na ɛ̀ be: “Ne mì mu kpɔ jèsìwo kudo ŋùdãnuwo òa, eŋuã, mì mu la xɔ̀sè gbèɖe ò a?” 49Ŋusùa gblɔ̃ na ɛ̀ be: “Àpetɔ, mù ɖè kuku, ɖèbla va kpɔ ɖèvia na mù, ne mu nyi nène òa, e la ku.” 50Yesù gblɔ̃ na ɛ̀ be: “Yì, èvi wò lè àgbè.” Ŋusù kèa xɔ̀ Yesù be ènyàa ji sè, eye be jè èmɔ. 51Wàlɛbɛ kè be le yì àxomèa, yebe sumɔ̃viwo va dogò e lè èmɔ ji, eye wo gblɔ̃ na ɛ̀ be: “Èvi wòa lè àgbè.” 52E biɔ wo be: “Gà kɛ mè ye èdɔ̀a kã ɖo e mè na ɛ̀ ò?” Wo ɖo e ŋuti na ɛ̀ be: “Èsɔ̀ wètrɔ gà ɖèka mè lɔ̀ge ye àvìvɔa jo lè e ji.” 53Èvitɔa ɖoŋù be gàpòpo ŋua mè tututu ye Yesù gblɔ̃ na yè be: “Èvi wò lè àgbè.” So gà ŋua mèa, ye ku yebe àxomètɔwo keŋu xɔ̀sè. 54Ekèa ye le nyi jèsi èvègɔ̃ kè Yesù wɔ̀, wàlɛbɛ kè be so Yudeà va Galileaa.

Currently Selected:

Yòhanɛ̀s 4: GEN

Highlight

Copy