Yòhanɛ̀s 19

1Wàlɛbɛ ŋua, Pilatò kplɔ̀ Yesù yì ne woa pò è ku àtãŋù. 2Gbãdãgbãwo sɔ àŋùja lɔ̃ kuku cɔ̃ èta na ɛ̀. Wo sɔ àwù gã jɛ̃ ɖe cã do na ɛ̀. 3Wo tètè gogo è, le gblɔ̃ na ɛ̀ be: “Mi le do ègbè na wò, Yudàviwo be èfìɔ!” Eye wo le pò è.

4Pilatò gbà to va xixeanu ke, eye be gblɔ̃ na Yudàviwo be: “Kpɔɖa, mù la kplɔ̀ ɛ̀ to na mì. Mì ɖo la nya be nyè mu kpɔ àgɔ̀ ɖe lè e ŋuti ò.” 5Yesù to va; e kpɔ̀tɔ̀ lè àwù jɛ̃a mè, eye àŋùja be kukua lè èta na ɛ̀. Pilatò gblɔ̃ na wo be: “Ŋusùa ye nyi ekèa!” 6Vɔ̀a, kè * mawunɔ gãwo kudo woabe sumɔ̃viawo kpɔ Yesùa, wo tɔ àpa dodo be: “Ka ɛ̀ ɖo àtisòga ŋuti! Ka ɛ̀ ɖo àtisòga ŋuti!” Pilatò gblɔ̃ na wo be: “Mìawo ŋutɔ mì xɔ̀ ɛ̀, ne mìa ka ɛ̀ ɖo àtisòga ŋuti. Ènyè yaa, nyè mu kpɔ àgɔ̀ kè be jè ne ma gblehùɛ do èa ò.”

7Yudàviwo ɖo e ŋuti na ɛ̀ be: “Èse lè mia si, eye ne mi la zɔ̃ ɖo èsea jia, e ɖo la ku, ɖo e gblɔ̃ be èyè ye nyi Mawu be Èvia.” 8Kè Pilatò sè ènyà ŋuaa, vɔ̃vɔ̃ gbà jè e ji kpe è. 9E gbà trɔ yì fìɔsaa mè, eye be biɔ Yesù be: “Fikɛ tɔ ye wò nyi ò?” Vɔ̀a, Yesù mu ɖo e ŋuti na ɛ̀ ò. 10Eye Pilatò gblɔ̃ na ɛ̀ be: “Wò mu le ji la ɖo ènyà ŋuti na mù òa? Wò mu nya be mù ɖo ŋusɛ̃ la ɖè ègbè be woa ɖè àsi lè ŋuti wò, eye mù gbà ɖo ŋusɛ̃ la na be wo ne ka wò ɖo àtisòga ŋuti òa?” 11Yesù ɖo e ŋuti na ɛ̀ be: “Wò mu teŋu ɖo ŋusɛ̃ ɖe ɖo ji nyè, ne wò mu xɔ̀ ɛ̀ so jiŋùkusi ò. Ekèa ŋuti ye àmè kè kplɔ̀ mù do àsi na wòa be ènuvuɛ̃ wu tɔ̀ wò.”

12So gà ŋua mèa, Pilatò jè àgbàgba ne bèa ɖè àsi lè e ŋuti, vɔ̀a Yudàviawo do àpa be: “Ne wò ɖè àsi lè ŋusù kèa ŋutia, e ŋua wò mu nyi Romà-fìɔgã be èxlɔ̃ ò. Đo àmè ɖekpekpe kè sɔ ye ɖokoe wɔ̀ èfìɔa, le ɖè è fiɔ be yè sitè ɖo Romà-fìɔgãa ŋuti.” 13Ekè Pilatò sè ekèa, e kplɔ̀ Yesù to va, eye e na be nɔ̀ ànyi ɖo àzìkpea ji, lè tèpe kè wo yɔna lè Hebrùgbe mè be Gabataa. E gɔ̃mè ye nyi: “Èkpenyigbãa”. 14Gbè ŋua gbè le nyi jàjràɖozã na Yudàviwo be Toŋutivayì. Lè gà woèvè mè lɔ̀gea. Pilatò gblɔ̃ na Yudàviwo be: “Mìabe èfìɔa ye nyi ekèa!” 15Vɔ̀a wo tɔ àpadodo be: “Wù ì! Wù ì! Ka ɛ̀ ɖo àtisòga ŋuti!” Eye Pilatò biɔ wo be: “Ma ka mìabe èfìɔa ɖo àtisòga ŋutia?” Mawunɔ gãwo ɖo e ŋuti na ɛ̀ be: “Mi mu ɖo èfìɔ bu wu Romà-fìɔgã ò!” 16Wàlɛbɛ ŋua, e ɖè àsi lè e ŋuti na wo, ne woa yì ka ɛ̀.

Wo ka Yesù ɖo àtisòga ŋuti

(Màt 27.32-44; Mrk 15.21-32; Luk 23.26-43)

Eye wo le Yesù. 17Yesù ŋutɔ kɔ yebe àtisògaa, to lè èdùa mè, yì àfi kè wo yɔna be “Àmètatèpea”; kè nyi “Golgata”, lè Hebrùgbe mèa. 18Funu ye wo ka ɛ̀ ɖo àtisòga ŋuti lè. Wo ka àmè èvè buwo cã ɖo yebe àxàdawo mè, Àmè ɖèka ɖo yebe ɖùsi mè, eye àmè èvègɔ̃a ɖo yebe èmìɔ̃ mè; eye Yesù lè dòdòmè na wo. 19Pilatò ŋlɔ̀ ènu ka ɖo Yesù be àtisògaa be ètagbe be: “Yesù Nazarɛttɔ̀, Yudàviwo be èfìɔ.” 20E ŋlɔ̀ ènua ɖo Hebrùgbe mè, ɖo Latìngbe mè ku Grikgbe mè. Yudàvi sùgbɔ hlɛ̃ ènu kè be ŋlɔ̀a, ɖo àfi kè wo ka Yesù ɖo àtisòga ŋuti lèa, mu dìdì lè èdùa gbɔ ò. 21Yudàviwo be * mawunɔ gãwo gblɔ̃ na Pilatò be: “Mù gbà ŋlɔ̀ be: 'Yudàviwo be èfìɔ' ò, vɔ̀a be: 'Àmè kèa gblɔ̃ be ye nyi Yudàviwo be èfìɔ.'” 22Pilatò ɖo e ŋuti be: “Ènu kè mù ŋlɔ̀a, mù ŋlɔ̀ ɛ̀ vɔ̀.”

23Ekè gbãdãgbãwo ka Yesù ɖo àtisòga ŋuti vɔ̀a, wo fɔ̀ yebe àwùwo, ma wo ɖo tèpe ènè, eye àmè sia àmè sɔ ɖèka. E kpɔ̀tɔ̀ yebe àwùgãa, wo mu tɔ̃ ɛ̀ ò, vɔ̀ wo lɔ̃ ɛ̀ blibo, so èji kaka va gɔ̃mè. 24Gbãdãgbãwo gblɔ̃ na woa nɔ̀nɔwo be: “Mi mu gbà zɛ̃ àwùgã kèa ò, vɔ̀ bòhũa, mìa dà àkɔ̀ sɔ̀ nya àmè kè tɔ̀ be la nyia.” Ne ŋɔ̀ŋlɔ̃ a ne zɔ̃ sù be:

“Wo ma àwù nyèwo lè woa nɔ̀nɔwo dòmè,

wo dà àkɔ̀ ɖo àwùgã nyèa ji.”

Ènu kèa, gbãdãgbãwo wɔ̀ ɛ̀ pɛpɛpɛ.

25Eye Yesù be ènɔ̀ ku ènɔa be nɔ̀vi-nyɔ̃nù, Mari kè nyi Klòpas be èsrɔ̃a, kudo Mari, Magdalà tɔ̀a, lètè lè Yesù be àtisògaa gbɔ. 26Kè Yesù kpɔ ènɔa, kudo *nukplavi kè be ɖève a lètè lè ènɔa gbɔa, e gblɔ̃ na ènɔa be: “Nyɔ̃nù, èvi wò ye nyi ekèa!” 27E yomè a, e gblɔ̃ na nukplavia be: “Ènɔ̀ wò ye nyi ekèa!” So gà ŋua mèa, nukplavia xɔ̀ Yesù be ènɔ̀ ɖo àxomè.

Yesù ku

(Màt 27.45-56; Mrk 15.33-41; Luk 23.44-49)

28E yomè a, kè Yesù nya be, so wàlɛbɛ ŋua, ènu sia ènu wu e nu ne Ŋɔ̀ŋlɔ̃ a bèa zɔ̃ sùa, e gblɔ̃ be: “Sìkɔ le tì mù.” 29Èsìgo ɖe lè funu kè ɖɔ ku vɛ̃ vesìa. Wo nyrɔ̃ àpùmèkusa ɖe ɖo e mè, sɔ trɔ̃ ɖo àpla ɖe nu, drɛ̃ ɛ̀ ɖoɖa Yesù be ènu gbɔ. 30Kè Yesù nù vɛ̃ vesìa, e gblɔ̃ be: “Ènu sia ènu wu e nu vɔ̀!” E yomè a, e do èta gũ, eye be jo yebe Gbɔ̃gbɔ̃ a na.

Èhũ ku èsì

31Ekè be nyi jàjràɖo be àzã gbè ye à, Yudàviawo biɔ Pilatò be woa ŋɛ̃ àta na àmè kèwo ye lè àtisòga ŋutiawo, ne woa ɖè wo jo, àlekè be àmèkukuawo mu gbà nɔ̀ àtisòga ŋuti lè jɛ̃gbɔ̃zãa gbè ò, ɖo jɛ̃gbɔ̃zã ŋua lè tɔ̀xɛ. 32Gbãdãgbãwo va, eye wo ŋɛ̃ àta na àmè cucugbã kè wo ka ɖo àtisòga ŋuti kudo Yesùa; wo gbà ŋɛ̃ àta na àmè èvègɔ̃a cã. 33Vɔ̀a ekè wo va Yesù gbɔa, wo kpɔ be e ku xoxo, eye wo mu ŋɛ̃ yebe àtawo ò. 34Vɔ̀a, Gbãdãgbãwo dòmètɔ ɖèka sɔ èhuã trɔ̃ Yesù be àxàda eye, èhũ kudo èsì to. 35Àmè kè kpɔ ɛ̀a, ɖù ɖase, eye yebe ɖasea sɔ̀gbè, eye e nya be, nyàwo ye yè to, ne mìawo cã mìa xɔ̀sè. 36Ènu kèawo jɔ̀ ne ŋɔ̀ŋlɔ̃ a bèa zɔ̃ sù be: “Wo mu la ŋɛ̃ yebe èpu ɖekpe ò.” 37Ŋɔ̀ŋlɔ̃ bu cã gblɔ̃ be: “Wo la va kpɔ àmè kè wo tɔ ènua.”

Wo sɔ Yesù do èyɔ̀do mè

(Màt 27.57-61; Mrk 15.42-47; Luk 23.50-56)

38Ènu kèawo yomè a, Yozɛ̀f Arimatètɔ̀ kè nyi Yesù be *nukplavi, vɔ̀ mu ɖènà ye ɖokoe fiɔ ò, ɖo e le vɔ̃ Yudàviwo be àmègãwoa, biɔ Pilatò be ne sɔ Yesù be àmètia na yè. 39Nikodemɔ̀, àmè kè zɔ̃ èzã va kpɔ Yesù gbè ɖèkaa, cã va yebe àmètia gbɔ. E hɛ̃ àmèɖìtikè kè wo sɔ àbɛyɛ ku àɖi-àɖi wɔ̀a, va. Àtikèa be kpɛ̃kpɛ̃mè gogo kìlo ègbã. 40Yozɛ̀f ku Nikodemɔ̀ sɔ Yesù be àmètia, bla ɛ̀ ɖo àmèɖìvɔa mè, kɔ̀ àmì hũɛ titi ɖo e ji, sìgbè àlekè Yudàviwo wɔ̀nà gbɔ̀xue ɖìnà àmèa nène. 41Àbɔ ɖe lè àfi kè wo ka Yesù ɖo àtisòga ŋuti lèa. Èyɔ̀do yeye kè mè wo mu ɖì àmè ɖo kpɔ òa lè àbɔ a mè. 42Ekè gbè ŋua gbè le nyi jàjràɖozã na Jɛ̃gbɔ̃zãa, eye èyɔ̀doa cã mu lè dìdìpe òa, wo ɖì Yesù ɖo funu.

Currently Selected:

Yòhanɛ̀s 19: GEN

Highlight

Copy