Gɔ̃mèjèje be Xoma 50

Yakɔb be ɖìɖi kɔ̀nuwo

1Yosɛ̀f jè ètɔa ji, fã ɛ̀, eye e fã àvi kɔ̀ ɖo e ji. 2E yomè a, e ɖè ègbè na yebe èdɔ̀dàtɔwo be woa jrà ye tɔ ɖo. Eye èdɔ̀dàtɔawo jrà Izràɛl be ŋutilã kukua ɖo, 3ekèa va e mè ŋùkèkè èkà blibo, ne woa sɔ jrà àmèa ɖo. Ejiptètɔwo lòfũ ŋùkèkè èkà takpo ci èwo (70) sɔ fã ɛ̀.

4Kè àvi fãfãa be gàmè va yìa, Yosɛ̀f gblɔ̃ na Faraɔ̀n be àxuedo a be: “Ne mù teŋu jè mìabe ŋùmèa, to kuku ɖèɖe mèa, mì gblɔ̃ ekèa na Faraɔ̀n: 5“Ètɔ nyè na ye mù tà ènu ɖo ji be: 'kpɔɖa mù le ja ku. Èyɔ̀do kè mù na wo kù lè Kanàn nyigbã jia mè ye wò la ɖì mù ɖo.' Fifìa mù le ji la sɔ ŋutilã kukua yì ɖì, e yomè a, mù la trɔ gbɔ̀ va.” 6Faraɔ̀n ɖo e ŋuti be: “Yì ɖì ètɔ wòa sìgbè àlekè e na wò tà ènu ɖo jia nène.” 7Eye Yosɛ̀f yì ɖì ètɔa ɖo Kanàn. Faraɔ̀n be cãmìwo ku yebe sumɔ̃viwo ku Ejiptè be ŋùkɔ̀nɔ̀tɔwo kpata kplɔ̀ ɛ̀ do, 8nènea ke Yosɛ̀f ŋutɔ be àxomè tɔwo, ètɔa be èviwo ku ètɔa be àxuedoawo cã yì. Woabe èviwo kudo woa tɔgbeyɔviwo gbàkudo èlãwo kpò ye wo gble dà ɖo Gosɛ̀n nyigbã ji. 9Àhùakèkewo ku àgbãsɔnuwo ŋutɔ cã kplɔ̀ ɛ̀ do. Eye woabe gbɔsùsua wɔ̀ ŋùdã ŋutɔ.

10Wo va yì ɖo Gorɛ̀n-Àtad lè Yɔrdàn be ètɔ̀a godo. Funua ye wo wɔ̀ ècɔ gã kè wɔ̀ ŋùdãa lè. Yosɛ̀f nɔ̀ èfũ lòvɔ mè na ètɔa xɔ̀ ŋùkèkè adrɛ̃. 11Kè Kanàn-tɔ kèwo lè Gorɛ̀n-Àtad wo kpɔ ènu kè jɔ̀ a, wo do àpa be: “Ècɔ tɔ̀hɛ ye be nyi na Ejiptè!” Nène a, wo ɖo nyikɔ na tèpe kèa be 'Ejiptè be ècɔ' àlo 'Abɛ̀l-Misràyim'.

12Yakɔb be èvi ŋusùawo wɔ̀ ɛ̀ sìgbè àlekè woa tɔa biɔ so woa sia nène. 13Wo kɔkɔ woa tɔ be ŋutilã kukua yì Kanàn nyigbã ji eye wo yì ɖì ì lè àkpãdo kè lè Màkpelà be àgblèa mè, àgblè kè jè ŋùkɔ̀ Mamrè eye Abràham plè lè Hitìtɔ Efrɔ̀n si, sɔ wɔ̀ àmèkuku ɖìpea mè. 14Ekè wo ɖì woa tɔa vɔ̀a, Yosɛ̀f trɔ gbɔ̀ va Ejiptè, eye ètɔviawo ku àmè kèwo keŋu kplɔ̀ ɛ̀ do yì àmèɖìpe a.

Yosɛ̀f be ku

15Ekè wo kpɔ be woa tɔ kua, Yosɛ̀f be ètɔviwo gblɔ̃ lè woa nɔ̀nɔwo dòmè be: “Ne Yosɛ̀f be ye à ɖo e tèpe na mi ɖo èvuɛ̃ kèwo keŋu mi wɔ̀ do èa ɖe!” 16Wo do àŋɛ̀ ɖoɖa Yosɛ̀f gblɔ̃ be: “Ètɔ wò gblɔ̃ ènyà kèa ɖɛ gbɔ̀xue ku be: 17“Mì gblɔ̃ ekèa ne Yosɛ̀f be: tɔ̀ wò jɔ̀, sɔ ètɔvi wòawo be àgɔ̀ sɔ kè wo. Nyàwo ye, wo wɔ̀ èvuɛ̃ sùgbɔ do wò, vɔ̀ fifìa tɔ̀ wò jɔ̀, sɔ kè wo ɖo wo le sɛ̃ ètɔ wò be Mawu ɖèka ŋua ke.” Wàlɛbɛ kè wo gblɔ̃ ènyà kèa na ɛ̀a, Yosɛ̀f fã àvi. 18Ètɔviawo ŋutɔ yì jè èklò na ɛ̀, eye wo gblɔ̃ be: “Àpo kluviwo kpò ye mi nyi!” 19Yosɛ̀f ɖo e ŋuti na wo be: “Mì mu gbà vɔ̃ ò. Mù lè Mawu be tèpea? 20Mì jro la wɔ̀ èvuɛ̃ ku mù, eye Mawu ya trɔ ɛ̀ sɔ wɔ̀ ènyuɛ̃: ne bèa hlùɛ̃ dùkɔ̃ gbogbowo be àgbè gã, sìgbè àlekè be lè egbèa nène. 21Mì mu gbà vɔ̃ gbèɖe ke ò. Mù la kpɔ mìa ku mìabe èviwo ji.” E do wo ŋusɛ̃ eye e pò nupo na wo ku èjìmè kɔ̀kɔ̀ɛ.

22Yosɛ̀f ku ètɔa be àxuedo a kpata ci Ejiptè-nyigbã ji. Yosɛ̀f nɔ̀ àgbè xɔ̀ èpè èkà èvè takpo ci èwo (110), 23eye e kpɔ èvia Efràyim be jìjimè ètɔ̃gɔ̃a. Gbà wua, wo jì èvia Manasè be èvi ŋusù Makìr be èvi ŋusùwo ɖo Yosɛ̀f be àta ji. 24Yosɛ̀f gblɔ̃ na ètɔviawo be: “Mù le ja ku. Mawu la kpe ɖo mìa ŋuti eye e la ɖè mì to lè ànyigbã kèa ji, yì ànyigbã kè be àjɔ̀gbè be fìã na Abràham, Izàk ku Yakɔb ji.” 25E yomè a, Yosɛ̀f na Izràɛl be èviwo kpata kã àtãŋu ɖo ènyà kèa ji be: “Wàlɛbɛ kè Mawu la kpe ɖo mìa ŋutia, mì la lɔ àpe èpuwo jo lè fikèa.” 26Yosɛ̀f ku lè yebe èpè èkà-èvè takpo ci èwo yomè. Wo jrà ŋutilã kukua ɖo eye wo sɔ ɛ̀ yì mlɔ̃ àmè kukuɖaka mè lè Ejiptè.

Currently Selected:

Gɔ̃mèjèje be Xoma 50: GEN

Highlight

Copy