Gɔ̃mèjèje be Xoma 47

1E yomè a, Yosɛ̀f va yì sìa Faraɔ̀n eye e gblɔ̃ na ɛ̀ be: “Ètɔ nyè ku ètɔvi nyèwo so Kanàn nyigbã ji va kudo woabe àlɛ̃ha kudo woabe ènyìwo gbàkudo ènu kèwo keŋu nyi woa tɔ̀awo; wo lè Gosɛ̀n nyigbã ji.” 2Eye e ɖè àmè àtɔ̃ lè ètɔviawo dòmè fiɔ Faraɔ̀n. 3Àmè kèa gblɔ̃ na Yosɛ̀f be ètɔvi àtɔ̃awo be: “Èdɔ kɛ ye mì wɔ̀nà ò?” Wo ɖo e ŋuti be: “Sumɔvi wòwo nyi èlãkplɔ̀tɔwo; sìgbè mia tɔwo ke nènea, mi nyìnà èlãwo.” 4Wo gbà gblɔ̃ na Faraɔ̀n be: “Mi va be mia va zɛ̃ mìa gbɔ na hùenu kèa, ɖo ègbe mumu mu gbà lè na miabe ègbɔwo ò eye àdɔ̀totoa tɛ ɖo Kanàn be èdùa ji ŋutɔ. Na èmɔ̃ ne sumɔ̃vi wòwo woa nɔ̀ Gosɛ̀n be ànyigbã ji jro.” 5Faraɔ̀n gblɔ̃ na Yosɛ̀f be: “Ètɔ wò ku ètɔvi wòwo va gbɔ wò ye. 6Eye Ejiptè-nyigbã keŋu lè ŋùkɔ̀ na wò, xɔ̀ ètɔ wò ku ètɔvi wòwo ɖo àkpa nyuɛ̃tɔa. Ne woa nɔ̀ Gosɛ̀n be àgowo ji. Eye ne wò kpɔ be àmè ɖɔ̀hũi ɖewo lè woa mèa, sɔ wo ɖo àpe èlãha jikpɔtɔwo.” 7Yosɛ̀f kplɔ̀ ètɔa Yakɔb yì fiɔ Faraɔ̀n. Eye Yakɔb tu sì na Faraɔ̀n, 8kè le biɔ ɛ̀ sè be: “Èpè nène ye lè èta na wò ò?” 9Yakɔb ɖo e ŋuti be: “Àpe dãgbã-dãgbã xɔ̀ èpè èkà ètɔ̃ci èwo (130) vɔ̀! Àgbè zã nyèwo va yì kaba eye hùenu sɛ̃sɛ̃wo nɔ̀ àgbè nyèa mè. Eye èpè nyèwo mu sù ekèwo ètɔ nyèwo xɔ̀ va yì lè woabe dãgbã-dãgbãwo mè ò.” 10Ekè ye e tu sì na Faraɔ̀n vɔ̀a, Yakɔb jo lè e gbɔ. 11Yosɛ̀f ji tèpe na ètɔa ku ètɔa be èviwo eye be sò àxue ɖo Ejiptè-nyigbã be àkpa nyuɛ̃tɔa na wo, lè Ramsɛ̀s be àgowo ji, sìgbè àlekè Faraɔ̀n gblɔ̃ ɛ̀a nène. 12Yosɛ̀f ji ènuɖùɖu na ètɔa, na ètɔviawo ku ètɔa be àxuedo a kpata lè ènuɖùnuwo kpata be ɖoɖonu.

Yosɛ̀f ku Ejiptètɔwo

13Ènuɖùɖu dɛ̃ lè ànyigbã keŋu ji ɖo àdɔ̀totoa dri àgbò. Ejiptè-nyigbã ku Kanàn nyigbã wo mu gbà nya tana àlekè be àdɔ̀totoa ò. 14Yosɛ̀f bɔ̀ Ejiptè ku Kanàn be ègà kpata, ɖo e sà àgblèmènukuwo na wo, nènea ye be lɔ èdùa be ègàa kpata yì Faraɔ̀n be èfìɔsa mè. 15Ègà plènu be ku ɖì lè Ejiptè kudo Kanàn nyigbãwo ji. Eye Ejiptètɔwo kpata va kɔ̀ ɖo Yosɛ̀f gbɔ, gblɔ̃ be: “Na mi àgblèmènuku ne mia ɖù. Nukɛ ŋuti ye mi la ku lè ŋùkɔ̀ na wò ɖo ègà plènu mu gbà lè mia si ò?” 16Yosɛ̀f ɖo e ŋuti na wo be: “Mì sɔ mìabe èlãwo va eye ne ègà plènu dɛ̃ mìa, mìabe èlãwo nu ye mù la sà àgblèmènukuwo na mì ɖo.” 17Wo yì kplɔ̀ woabe èlãwo va na Yosɛ̀f kè ye na wo àgblèmènuku ɖo èsɔwo, àlɛ̃hawo ku ènyìwo gbàkudo èsɔ àkɛtɛwo be tèpe. Ɖo èlãwo be àsìxɔ̀xɔ nu ye Yosɛ̀f na wo àgblèmènukuwo na èpè blibo ŋua. 18Kè èpè kèa va yì vɔ̀a, wo gbà trɔ va Yosɛ̀f gbɔ eye wo gblɔ̃ na ɛ̀ be: “Mi mu le ji la wla ɛ̀ ɖo mia àpetɔ be ègà plènu dɛ̃ ò, eye èlãhawo kpata trɔ zũ mia àpetɔ tɔ̀a. Ènu ɖekpe mu gbà kpɔ̀tɔ̀ lè mia àpetɔ be ŋùkɔ̀ wu miabe ŋutilã ku miabe ànyigbãwo ò. 19Nukɛ ŋuti ye mi la jo ku lè àpo ŋùku mè ɖo? Miabe ànyigbã mu la ɖo àsìxɔ̀xɔ ɖe ne mi mu lè ò. Plè mi ku miabe ànyigbã, eye wòa sɔ àgblèmènukuwo sɔ tu èfɛ̃a; funua mi ku miabe ànyigbã, mi la trɔ zũ Faraɔ̀n tɔ̀ blibo. Na mi àgblèmènuku dodo, nènea ye mi la nɔ̀ àgbè eye ànyigbã cã la sɛ̃ku yeye.” 20Eye Yosɛ̀f plè Ejiptè-nyigbã kpata na Faraɔ̀n, ɖo Ejiptètɔ ɖekpekpe sà yebe àgblè-nyigbã sɔ kù ɖo àdɔ̀ ku ɖìɖi sɛ̃sɛ̃a ŋuti. E ye wɔ̀ be ànyigbã trɔ zũ Faraɔ̀n tɔ̀. 21Na dùkɔ̃a, Yosɛ̀f na wo kplɔ̀ ɛ̀ ɖìsà to èdù gãwo mè so ànyigbã be àkɔ ɖe na àkɔ bu. 22Gãkea Yosɛ̀f mu plè hũbonɔawo be ànyigbã ò, ɖo Faraɔ̀n na ègbè be wo mu gbà sà woabe ànyigbãwo ò. Eye Faraɔ̀n ŋutɔ kpɔna woa ji eye mu gbà hiã be woa sà woabe ànyigbã ò. 23Yosɛ̀f gblɔ̃ na dùkɔ̃a be: “Eŋuã, fifìa mù plè mì ku mìabe ànyigbã na Faraɔ̀n. Mì la xɔ̀ àgblèmènuku dodowo eye mì la teŋu do ènukuwo ɖo ànyigbã ji. 24Lè àgblèmènuku kèwo mì la ɖèa jia, mì la sɔ àkpa àtɔ̃gɔ̃a na Faraɔ̀n eye àkpa ènè kpɔ̀tɛawo la nyi mìabe nuku dodo yeye ku ènuɖùɖu na mìa gbàkudo àmè kèwo keŋu lè mìa gbɔa ku mìabe èviwo.” 25Wo ɖo e ŋuti be: “Wò hlùɛ̃ miabe àgbè gã. Mawu ne jro ne mia nyɔ lè mia àpetɔ be ŋùmè eye mia nyi Faraɔ̀n be kluviwo.” 26Yosɛ̀f na wo ŋlɔ̀ ɛ̀ ɖɛ kaka vana egbè be Ejiptè-nyigbã be kusɛ̃sɛ̃ àkpa àtɔ̃gɔ̃a la nyi Faraɔ̀n tɔ̀. Hũbonɔwo be ànyigbã kpò ye mu nyi Faraɔ̀n tɔ̀ ò.

Yakɔb be èjro mlɛ̃awo

27Izràɛl, Yakɔb nɔ̀ Ejiptè-nyigbã ji lè Gosɛ̀n be àgowo ji, e na be Izràɛlviwo va trɔ zũ ànyigbã ɖotɔwo, eye wo jì ɖo ji sùgbɔ. 28Yakɔb nɔ̀ àgbè lè Ejiptè-nyigbã ji èpè woeadrɛ̃, eye Yakɔb be àgbènɔ̀ zã kpata nyi èpè èkà ètɔ̃ takpo ci adrɛ̃ (147). 29Ekè Yakɔb, Izràɛl be ku zã le sùa, e yɔ èvia Yosɛ̀f eye e gblɔ̃ na ɛ̀ be: “Ne mù ɖo àsì xɔ̀xɔ lè ŋùku mè na wòa, sɔ àpo àlɔ̀ ɖo àta nyè gɔ̃mè ne wòa ɖè àpo lɔ̃lɔ̃, ègbè jinɔ̀nɔ fiɔ mù ne mù gbà ɖì mù ɖo Ejiptè-nyigbã ji ò. 30Mù la yì mlɔ̃ ètɔ nyèwo gbɔ, wò la kɔ ŋutilã nyèa jo lè Ejiptè eye wò la yì jra mù ɖo lè woabe èyɔ̀doa mè.” Yosɛ̀f ɖo e ŋuti be: “Mù la wɔ̀ ɛ̀ sìgbè àlekè wò gblɔ̃ ɛ̀a.” 31Yakɔb yì e ji be: “Kã àtãŋu ɖo ji.” Eye Yosɛ̀f kã àtãŋu na ɛ̀ eye Izràɛl do èta gũ na Yosɛ̀f lè yebe àbàti a be ètagbe.

Currently Selected:

Gɔ̃mèjèje be Xoma 47: GEN

Highlight

Copy