Gɔ̃mèjèje be Xoma 30

1Ekè Raxɛ̀l kpɔ be yè mu le jì èvi na Yakɔb òa, e hùãŋu dàdaa Leà. E gblɔ̃ na Yakɔb be: “Na ma jì èvi, mu nyi nène òa, mù la ku!” 2Yakɔb do àdɔ̀mèze ɖo Raxɛ̀l ŋuti gblɔ̃ na ɛ̀ be: “Mù la nɔ̀ Mawu tèpe ye à? E ye kè mu na àpo àdɔ̀ bèa hɛ̃ èfu òa!” 3E yì e ji be: “Kpɔɖa, sumɔ̃vi nyè nyɔ̃nù Bilhà yeŋu, yì dɔ̃ ku ì ne bèa jì èvi na mù ma hɛ̃; so e ya mèa, nyè cã mù la ɖo èvi.” 4E sɔ yebe sumɔ̃vi nyɔ̃nù Bilhà na àsu eye Yakɔb dɔ̃ ku ì. 5Bilhà fɔfu eye e jì ŋusùvi ɖèka na Yakɔb. 6Raxɛ̀l do àpa be: “Mawu sò kòjo na mù! Nyè cã e sè àpe kuefã eye e na mù ŋusùvi ɖèka.” Eye ŋuti ye e yɔ ɛ̀ be Dàn. 7Raxɛ̀l be sumɔ̃vi nyɔ̃nù Bilhà gbà fɔfu eye be jì ŋusùvi ke na Yakɔb. 8Raxɛ̀l do àpa be: “To Mawu be ènu nya wɔ̀wɔ mè, mù nya wɔ̀ eye mù ɖù dàda nyèa ji” eye e yɔ ɛ̀ be Neftalì 9Wàlɛbɛ kè Leà kpɔ be yè kpò èvia, e sɔ yebe sumɔ̃vi nyɔ̃nù Zilpà sɔ na Yakɔb àsua, ne bèa ɖè. 10Zilpà, Leà be sumɔ̃vi nyɔ̃nùa, jì ŋusùvi ɖèka na Yakɔb. 11Leà do àpa be: “Nyɔ̃na kɛ ye nyi ekèa ò!” E yɔ ɛ̀ be Gad. 12E yomè a Zilpà, Leà be sumɔ̃vi nyɔ̃nùa, gbà jì ŋusùvi èvègɔ̃a na Yakɔb 13eye Leà do àpa be: “Ɖàgbè kɛ ye nyi na mù! Ɖo nyɔ̃nùviwo na mù nyikɔ be sìtume”, eye e yɔ ɛ̀ be Àsɛr. 14Ekè èlù yàya be hùenu ɖoa, Rubɛ̀n yì ji àgbìsã lè àgblè va na ènɔa Leà. Raxɛ̀l gblɔ̃ na Leà be: “Na mù èvi wò be àgbìsãa ɖe.” 15Leà ɖo e ŋuti be: “Mu sù wò be wò xɔ̀ èsrɔ̃ nyèa! Wò gbà le ji la xɔ̀ èvi nyè be àgbìsã cã a?” Raxɛ̀l yì e ji be: “Eŋuã Yakɔb ne dɔ̃ ku wò egbè ɖo èvi wò be àgbìsã nu.” 16Fìɛ̃si mè kè Yakɔb gbɔ̀ gbãnà so àgblèa, Leà to yì dogò è gblɔ̃ na ɛ̀ be: “Egbèa, wò la va dɔ̃ ku mù, ɖo mù sɔ èvi nyè be àgbìsã xɔ̀ wò lè Raxɛ̀l si.” E dɔ̃ Leà gbɔ èzã ŋua mè. 17Mawu sè Leà be kuefã, e fɔfu eye be jì ŋusùvi àtɔ̃gɔ̃a na Yakɔb. 18Leà do àpa be: “Mawu sɔ àpe àwòbanu nyèwo na mù, ɖo mù sɔ sumɔ̃vi nyɔ̃nù nyèa na àsu nyèa.” E yɔ ɛ̀ be Isakàr. 19Leà gbà fɔfu ɖe eye be jì ŋusùvi àdɛ̃gɔ̃a na Yakɔb. 20E do àpa be: “Mawu na mù ènu nyuɛ̃ ɖe! Fifìa ŋutɔ ye àsu nyèa la kpɔ àpe àsìxɔ̀xɔ, ɖo mù jì ŋusùvi àdɛ̃ na ɛ̀”, eye e yɔ ɛ̀ be Zabulɔ̀n. 21E yomè a, e jì nyɔ̃nùvi kè be yɔ be Dinà. 22Mawu ɖo ŋùkuvi Raxɛ̀l ji, Mawu sè yebe kuefã eye be hũ àdɔ̀ na ɛ̀. 23E fɔfu, jì ŋusùvi ɖèka eye e do àpa be: “Fifì ye Mawu ɖè ŋùkpɛ̃ nyèa jo!” 24E yɔ ɖèvia be Yosɛ̀f, gblɔ̃ be: “Tɔhonɔ̀ ne sɔ ŋusùvi bu kpe è na mù!”

Yakɔb ku Labàn

25Ekè Raxɛ̀l gbe jì Yosɛ̀f kpòa, Yakɔb gblɔ̃ na Labàn be: “Ɖè àsi lè ŋuti nyè ne ma yì mia de lè àpe ànyigbã ji. 26Tàsi èvi nyèwo ku èsrɔ̃ nyèwo na mù, àmè kèwo ŋuti mù wɔ̀ èdɔ na wò ɖoa, eye ne ma jo. Wò nya èdɔ kè ŋùmè mù wɔ̀ na wòa nyuɛ̃ ɖe.” 27Labàn gblɔ̃ na ɛ̀ be: “Ne mù ɖo àsì xɔ̀xɔ ɖe lè àpo ŋùkumè a… wo ɖè fiɔ mù be èwò ŋuti ye Tɔhonɔ̀ tu sì na mù ɖo.” 28Labàn yì e ji be: “Ɖokpe fɛ̃tu wòa ji na mù eye mù la sɔ ɛ̀ na wò.” 29E ɖo e ŋuti na ɛ̀ be: “Wò ŋutɔ wò nya àlekè mù sumɔ wò ɖoa eye àlekè àlɛ̃ha wòa trɔ ɖoa. 30Wò mu ɖo àdɔ̀kùnu gã ɖe gbɔ̀xue mù va ò, ɖo ŋuti nyèa e jì ɖo e ji mànya gblɔ̃ eye Tɔhonɔ̀ tu sì na wò. Eye fifìa ɖe, gàkɛ mè ye nyè cã mù la wɔ̀ èdɔ na àpe àxuedo ò?” 31Labàn gblɔ̃ be: “Nukɛ mù la na wò ò?” Yakɔb ɖo e ŋuti be: “Wò mu la na mù ènu ɖekpe ò. Ne wò dà àsi ɖo ènu kè mù la gblɔ̃a jia, mù la gbìgbɔ̀ trɔ va kplɔ̀ àlɛ̃ha wòa. 32Mù la ɖìsà to àlɛ̃ha kpata mè egbè eye mù la ɖè àlɛ̃ kèwo ŋuti èflì àlo èfu càkà-cakawo lèa ɖovò, àlɛ̃ nɔ ɖekpekpe lè àlɛ̃awo dòmè, ègbɔ nɔ ɖekpekpe kè ŋuti èflì àlo èfu càkà caka la nɔ̀a, wo ye la nyi àpe fɛ̃tu. 33Eye ne èŋù kèa, wàlɛbɛ kè ye wò la va kpɔ fɛ̃tu nyèa be gbèsɔ̀sɔɛa, èlã ɖekpekpe kè ŋuti èflì àlo èfu càkà caka mu lè òa, lè àsuwo ku ènɔawo dòmè lè ègbɔawo dòmè òa, la nyi màjɔ̀ màjɔ na mù; lè gbɔ nyèa, la nyi èfĩ fìfi be nyà.” 34Labàn gblɔ̃ be: “E nyɔ, ne nyi àlekè wò gblɔ̃a.” 35Gbè ŋua gbè kea, Labàn kplɔ̀ gbɔgbɔɛ kèwo ŋuti èflì àlo èfu càkà caka lèa, ègbɔnɔvi kèwo ɖo èflì àlo èfu càkà caka; ekèwo kpata ji Labàn be àlɔ̀ jè a, ku èlã-nɔ̀ kèwo lè àlɛ̃awo dòmè a, e sɔ wo do àsi na èvia ŋusùwo 36eye e na wo zɔ̃ àzɔ̃lì ŋùkèkè ètɔ̃ lè ŋùkɔ̀ na Yakɔb. Yakɔb kplɔ̀ Labàn be àlɛ̃ kpɔ̀tɛawo. 37Eye Yakɔb ji logò ɣe ku ànyati be àti wuwluiwo. E ɖè woabe àkpàa ɖe jo eye kpɔ̀tɛa ci ànyi eye àtiviawo wɔ̀ wùãtã-wùãtã. 38E sɔ àtiviawo sɔ dà ɖo èlãwo be ŋùku kpɔpe lè woabe sìnùpe; eye zòzo le na wo, ne wo va le nù èsìa. 39Èlãwo liana woa nɔ̀nɔwo lè àtiviawo be ŋùkɔ̀; ènɔawo jìnà èvi kèwo ɖo èflì ɖo èfu mèa, àlo èfu mè nɔ̀nà wùãtã-wùãtã. 40Ne àlɛ̃ kèwo Yakɔb ɖè ɖo àkpa ɖèkaa, e kplɔ̀nà wo ɖoɖa àtiviawo gbɔ, nène ye be wɔ̀ na Labàn be àlɛ̃ kèwo la gbe teŋu jì kpòawo kpata, eye e ɖo àlɛ̃ha ɖo vò ekè mu lè Labàn be ègo mè òa. 41Ne èlã kèwo kpɔ lãmè nyuɛ̃ ɖeawo la lia woa nɔ̀nɔwo kpòa, Yakɔb sɔna àtiviawo dànà ɖo ŋùku kpɔpe na wo, lè èsìnùpe, ne woa teŋu dɔ̃ lè àtiviawo be ŋùkɔ̀; 42Mu wɔ̀nà ekèa na èlã kèwo ɖìkù ò. Èlã ɖìkùwo nyi Labàn tɔ̀, eye èlã kpɔ-lãmèwo nyi Yakɔb tɔ̀.

Yakɔb be sisi

43Ŋusù kèa ɖo àdɔ̀kùnuwo gbɛ̀lu, e ɖo àlɛ̃ha sùgbɔ, sumɔ̃vi ŋusùwo ku sumɔ̃vi nyɔ̃nùwo, èsɔ kpovènɔ̀wo ku èsɔ àkɛtɛwo.

Currently Selected:

Gɔ̃mèjèje be Xoma 30: GEN

Highlight

Copy