Toto jo 9

Àyàdonamè àtɔ̃gɔ̃a: Èlãwo be èdɔ̀vuɛ̃

1Tɔhonɔ̀ gblɔ̃ na Mosè be: “Yì Faraɔ̀n gbɔ, ne wòa to na ɛ̀ be: 'Tɔhonɔ̀, Hebrùviwo be Mawu a gblɔ̃ be: Ɖè àsi lè dùkɔ̃ nyèa ŋuti, ne bèa yì sumɔ mù. 2Ne wò gbe kpò be yè mu la ɖè àsi lè woa ŋuti ò a, ne wò le wo dà ɖɛ kpò ye à, 3Tɔhonɔ̀ be àlɔ̀ la jè èlãha kèwo lè àpo àgblèwo mèa ji, e la jè èsɔwo ji, èsɔ àkɛtɛwo, èsɔ èkpovènɔ̀wo, ènyìwo, àlɛ̃wo ji: èdɔ̀ vuɛ̃ bàɖà ɖe ŋutɔ be la nyi! 4Tɔhonɔ̀ la do vòvòtoto Izràɛlviwo be èlãhawo ku Ejiptèviwo be èlãhawo dòmè. Izràɛlviwo tɔ̀ ɖekpe mu la ku ò.'” 5Eye Tɔhonɔ̀ ɖo àzã be: “Èsɔ̀a, Tɔhonɔ̀ la wɔ̀ ekèa lè Ejiptè be ànyigbã a ji.” 6Ekè èŋù kèa, Tɔhonɔ̀ na be va e mè: Ejiptèviwo be èlãhawo keŋu ku; vɔ̀a, lè Izràɛlviwo be èlãhawo dòmèa, èlã ɖèka ŋutɔ cã mu ku ò. 7Faraɔ̀n dɔ̃ àmè ɖoɖa, wo yì kpɔ be: èlã ɖekpe mu ku lè Izràɛlviwo be èlãhawo dòmè ò! Gãkea, Faraɔ̀n be èjì gbà trì kpò ye; mu ɖè àsi lè Izràɛlviwo ŋuti, ne woa jo ò.

Àyàɖùɖu àdɛ̃gɔ̃ a: Ènu tɛ̃tɛ̃wo

8Tɔhonɔ̀ gblɔ̃ na Mosè ku Arɔ̀n be: “Mì la xa èkpomè be àfi àlɔ̀ gògòe èvè. Mosè la kɔ̀ ɛ̀ ɖoɖa àya mè, le Faraɔ̀n be ŋùkumè. 9Ne àfia kãkã ɖo Ejiptè be ànyigbã a keŋu jia, e la na ènu tɛ̃tɛ̃ kèwo la dosìa ɖo àgbètɔwo ku èlãwo ŋuti, lè Ejiptè be ànyigbã a kpata ji.” 10Mosè ku Arɔ̀n sɔ èkpomè be àfia, eye wo va Faraɔ̀n be ŋùmè; Mosè kɔ̀ ɛ̀ ɖo àya mè, eye be na ènu tɛ̃tɛ̃ dosìwo kɔ̀ ɖo àgbètɔwo ku èlãwo ŋuti. 11Faraɔ̀n be kpajije wɔ̀tɔwo mu gbà teŋu nɔ̀tè ɖo Mosè be ŋùmè ò, ɖo, ènu tɛ̃tɛ̃awo ŋuti. Ènu tɛ̃tɛ̃awo xɔ̀ ŋuti na kpajije wɔ̀tɔawo ku Ejiptèviwo kpata. 12Vɔ̀a, Tɔhonɔ̀ na Faraɔ̀n be èjìmè gbà sɛ̃ŋu, eye mu ɖo èto Mosè ku Arɔ̀n, sìgbè lekè Tɔhonɔ̀ gblɔ̃ ɛ̀ na Mosè sãa nènea ò.

Àyàɖùɖu adrɛ̃gɔ̃ a: Èsìkpe jàja

13Tɔhonɔ̀ gblɔ̃ na Mosè be: “Fɔ̃ èzã, eye wòa yì Faraɔ̀n gbɔ. Gblɔ̃ na ɛ̀ be: Tɔhonɔ̀ kè nyi Hebrùviwo be Mawu a gblɔ̃ be: Ɖè àsi lè dùkɔ̃ nyèa ŋuti, ne bèa yì sɛ̃ mù. 14Ɖoa, fifìa, mù la ɖo àyà do na àmè nyèwo kpata ɖoɖa wò ŋutɔ cã, ɖoɖa sumɔ̃vi wòwo ku dùkɔ̃a, ne wòa nya be àmè ɖekpekpe mu sɔ̀ ku mù, lè ànyigbã ji ò. 15Ne mù kè vlũ àlɔ̀ ɖoɖa gbɔ wòa, mù la kè sɔ èdɔ̀ vuɛ̃ dɔ̃ èto na wò ku dùkɔ̃ wòa, eye wò la crɔ̃ lè ànyigbã ji xoxo. 16Gãkea, ènu kè ŋuti mù le wò ɖotèa, ye nyi be, ma ɖè ŋusɛ̃ nyè fiɔ wò, ne wòa kafu nyikɔ nyè, lè ànyigbãa keŋu ji. 17Kè wò gbe kpò be dùkɔ̃ nyèa mu la jo ò a, 18èsɔ̀, wàlɛbɛ kèa tututua, mù la na èsìkpe sɛ̃sɛ̃ ɖe la jà; e la sɛ̃ŋu kaka be ye hati mu jà lè Ejiptè be ànyigbã ji kpɔ, so gbè kè gbè wo ɖo yebe dodoe ànyi, kaka va na fifì ò. 19Fifìa, na, ne woa pòtɛ èlãha wòwo ku ènu kèwo keŋu nyi tɔ̀wò lè àgblè jia. Àmè ɖekpekpe àmè ku èlã ɖekpekpe kè la nɔ̀ àgblè ji, ekè ye wo mu la kplɔ̀, gbɔ̀ va àxomè ò a, èsìkpe la pò wo, eye wo la ku.” 20Lè Faraɔ̀n be ŋutimewo dòmèa, àmè kè vɔ̃ Tɔhonɔ̀ be ènyàa, na yebe sumɔ̃viwo ku yebe èlãhawo va àxɔmè. 21Àmè kè mu sɔ Tɔhonɔ̀ be ènyàa, veve ɖe ò a, gble yebe sumɔ̃viwo ku yebe èlãhawo ɖo àgblè mè. 22Tɔhonɔ̀ gblɔ̃ na Mosè be: “Kɔ àlɔ̀ yì ji, ne èsìkpe ne jà ɖo Ejiptè be ànyigbã a keŋu ji, ne jà ɖo àgbètɔwo ku èlãwo ji; ne jà ɖo ègbe kèwo lè Ejiptè be ànyigbã ji be àgblèwo mèa ji.” 23Mosè kɔ yebe àtikplɔa yì ji, eye Tɔhonɔ̀ na èji ɖè ègbè eye èsìkpe tɔ jàja. Èji kè èzò, lè ànyigbã ji, eye Tɔhonɔ̀ na èsìkpe jà ɖo Ejiptè be ànyigbã ji. 24Èsìkpea le jà, eye èji lè kè èzò, le ɖè ègbè ɖo e mè, e ji e ji. E sɛ̃ŋu kaka be Ejiptè be èdùa kpata mu kpɔ leke be ènu kpɔ, so kaka hùenu kè bè nyi dùkɔ̃a ò. 25Lè Ejiptè be ànyigbã a keŋu jia, èsìkpea pò ènu kèwo keŋu lè àgblè jia, àgbètɔ ku èlãwo; èsìkpea pò ègbe kèwo keŋu lè àgblè jia, e ŋɛ̃ àti kèwo keŋu lè àgblè jia. 26Gocɛ̀n be ànyigbã kè ji Izràɛlviwo lèa kpò ji ye èsìkpea mu jà lè ò. 27Faraɔ̀n na, wo yɔ Mosè ku Arɔ̀n va, eye be gblɔ̃ na wo be: “Fifìa yaa, mù wɔ̀ èvuɛ̃; Tɔhonɔ̀ tɔ̀ ye jɔ̀. Ènyè ku dùkɔ̃ nyèa, mi jè àgɔ̀. 28Mì ɖèkuku na Tɔhonɔ̀! Èji ɖè ègbèa ku èsìkpea nu ne sò jro! Mù la ɖè àsi lè mìa ŋuti, ne mìa jo, eye mì mu gbà la nɔ̀ àfi kèa dìdì ɖe ke ò.” 29Mosè ɖo e ŋuti na ɛ̀ be: “Ne mù gbe to lè èdùa mè kpòa, mù la kɔ àlɔ̀ yì ji, la yɔ Tɔhonɔ̀; èji ɖè ègbèa nu la sò. Èsìkpea cã la tɔtè jàja, ne wòa sɔ nya be ànyigbãa, Tɔhonɔ̀ tɔ̀ ye be nyi. 30Vɔ̀a, mù nya be èwò ku ŋutime wòwo, mì mu kpɔ lè vɔ̃ Tɔhonɔ̀ Mawu hàɖe ò.” 31Dèti ku èlùgãwo gble, ɖoa èlùgãa ɖì, eye dètia yaa pò èse. 32Èlù ku èlùviwo yaa, wo mu gble ò. Ɖo, woawo yaa, wo mu kpɔ mìɔ̃ hàɖe ò. 33Mosè to lè Faraɔ̀n gbɔ, eye be to lè èdùa mè. E kɔ àlɔ̀ yì èji ɖoɖa Tɔhonɔ̀. Èji be ègbèɖèɖea ku èsìkpe be jàjaa nu ɖoɖa. Èjia tɔtè jàja ɖo ànyigbã ji. 34Faraɔ̀n kpɔ be, èji jàja, èsìkpe jàja ku èji be ègbèɖèɖea nu sò. Vɔ̀a, e gbà wɔ̀ èvuɛ̃ ke. Ye ŋutɔ ku yebe ŋutimeawo gbà le sɛ̃ ètamè. 35Faraɔ̀n be èjì gbà trì; mu ɖè àsi lè Izràɛlviwo ŋuti, sìgbè lekè Tɔhonɔ̀ gblɔ̃, to Mosè jia nène ò.

Currently Selected:

Toto jo 9: GEN

Highlight

Copy