Matthieu 4

Sitaan cɔ́ŋkì Yeesu

(Maar 1.12-13, Luuki 4.1-13)

1Boonee ní Unimbɔti Fam cáá Yeesu ki cūnnì kuteeun Sitaan ń cɔ̄ŋkì-u. 2Ní u bóob́ kinyɔkɔ iwiin imuŋku ili, ŋwiimpu nì kunyeeu, ní ŋkùm kíǹ ki cáá-u. 3Ní Sitaan sútì ki pìl̄-u, ní ki bí-u yii: «A yaa lafun sá Unimbɔti Jipɔɔn, tīī ditaŋkpal nee mara dí kpántí kpɔnɔ.» 4Ní Yeesu fātìi kíí-u yii: «Unimbɔti gbɔŋku lī yii: <An kaa sá tijin dijil ŋmaniŋma di yì unil maŋfal, ama, unil ń nīn tɔ́ Unimbɔti bɔtee di yì u-maŋfal.#4.4 Ditee 8.3.>»

5Ní Sitaan cáá-u ki cūnnì Jeerusaleem ki tɔ́kɔǹ kunimbɔtidii yilpu kúnti kunti, 6ní ki bí-u yii: «A yaa sá Unimbɔti Jipɔɔn, yùkū kí tìin̄ taapu tiba kaa làá ŋá-si, kun puee an ŋmàn̄ Unimbɔti gbɔŋkun yii:

<Unimbɔti làá yàntī u-tuuŋyi

ń nīn tíkí-si i-ŋaaŋyin

a-taal ń taa gbéetí ditaŋkpal#4.6 Ilan 91.11-12..>»

7Ní Yeesu kíí-u yii: «An lī Unimbɔti gbɔŋku poon yii: <Á taa cɔ̄ŋkì ti-Dindaan a-Nimbɔtiu.#4.7 Ditee 6.16.>»

8Ní Sitaan tí cáá-u ki jɔ́m̀ dijoofɔŋfɔkɔl diba pu, ní ki yāntì u ká abee ŋin bí duulinyanee kɔkɔ nì ŋi-nyooti, 9ní ki bí-u yii: «A yaa gbāaǹ ki jáam̀-mi, m làá dū an kɔkɔ kí tīī-si.»

10Niinee Yeesu bí-u yii: «Sitaan, sútí niin kí wàatī-mi! Kun puee an ŋmàn̄ Unimbɔti gbɔŋku poon yii: <Ti-Dindaan a-Nimbɔtiu baba ní an sá á jāam̀, kí nīn bí úǹ baba tundin#4.10 Ditee 6.13..>» 11Ní Sitaan cāntì-u ní Unimbɔti tuuŋyi dɔ́miń u-cee ki bíi kèetī-u.

Yeesu kíĺ u-tundi Galiilee tiŋkin

(Maar 1.14-15, Luuki 4.14-15)

12Yeesu nín gbìl̄ yii bi cúú Yoowaneesi ki pīiǹ sarkee ní u yíkì ki nín cá Galiilee. 13U bàn̄ee kaa kóò Naasaareeti ní ki tin kóòń Kapeernayum Galiilee mɔɔl caŋin, laakin sá Sabulɔn nì Neefitalii#4.13 Sabulɔn nì Neefitaliisá Isirayeel naakɔti tili tin nìn bí kitiŋ yilpu púee ní. tiŋkinee. 14An ŋá kii Unimbɔti bɔnaatiliu Yeesaya nín nìn sòon̄ ki síiǹ puee dee, yii:

15«Sabulɔn nì Neefitalii timmu yab,

tiŋku watil pú,

Jɔɔdan buŋgbandi lapu,

Galiilee tiŋki, laakin bin kaa sá Juuda yabee kóòyee!

16Niin ní inifunaan in kɔkɔ nìn kóò dibɔmbɔndinee

ká ŋwalifikpaan! Bin nìn kā ŋkúm bɔmbɔndinee,

ŋwalifi ŋmíntì bi-pu#4.16 Yees 8.23-9.1.!»

17Kí yòon̄ ŋyunti gbantee ní Yeesu kíĺ ki bíi sòoǹ Unimbɔti bɔti, yii: «Kpántímaan ni-bimbim, kun puee Unimbɔti beel sútì ki pìlīń-ni!»

Yeesu yíiń bijɔncuuliibi binaa

(Kpèè Maar 1.16-20, Luuki 5.1-11)

18Yeesu nín bíi kpàkaǹ Galiilee mɔɔlee, ní u ká nnabiyaamu muli: an nìn sá Siimɔn un bi yíì Peetrooyee nì u-naal Andree. Bi nìn sá bijɔncuuliibi ní ki bíi tòó kulaaŋŋu. 19Ní Yeesu bí yii: «Dāan̄ kí nīn nóómaan-mi, ḿ dū-ni kí kpántí bin cāabìń binib m-ceeyee.» 20Dicilpu niin ní bi yāntì bi-laanti ki kíǹ ki táá-u.

21U gíti cūtì nyɔkɔpuee, ní ki ká binib bili, bi mun tí sá unil nì u-naal. An sá Yakubu nì Yoowaneesi, Seebeedee jipɔmbi. Bi nìn kā buŋalimbun bi nì bi-baa ki ŋáŋkí bi-laanti. Ní Yeesu yíiń-bi, 22ní bi yāntì bi-baa nì bi-ŋalimbu niin, ní ki táá Yeesu.

Yeesu bíi dàkà binib ki cāantí-bi

23Yeesu nìn yìiǹ Galiilee timmu kɔkɔn ki dàkà akpafidiinni ki sòoǹ tibɔmɔntiil tin sá Unimbɔti Beel bɔtee, ki cāantí bideembi nì bibunliibi kɔkɔ samaa kansikin. 24Siirii yab kɔkɔ nín gbìl̄ tin Yeesu ŋáańee ní bi cáań bin kɔkɔ būǹ igbaŋween nín pée bí pu iba ibee nì bin bí iyaliŋkin tikpilee, nì bin pu arasiniibi kēe nì bibimbidambi nì bifaliŋfaambi. Yeesu nìn cáaǹ bi-kɔkɔ. 25Dinikitikpaandi nìn kíǹ ki nóó-u, ki nìn nyánní Galiilee nì ntimu saalaa watil, nì Jeerusaleem nì Juudee tiŋkin nì kitiŋ kin bí Jɔɔdan buŋgbandi lapu puee.

Currently Selected:

Matthieu 4: BASSARDC

Highlight

Copy