Jean 9

Yeesu cáaǹ uninja un bi màl̄ nì ijɔfee

1Dalba Yeesu jītée, ní ki ká ujɔfu ubɔ. Bi nìn pée màl̄-u nì ijɔfi ní. 2Ní u-boonnooliibi bālifì-u yii: «Ukpil, ba pu ní bi màl̄ kijapaai nee nì ijɔfi ní? Úǹ u-ba di ŋá ikpiti naaa, u-baa nì u-na di ŋá ikpiti ní#9.2 Kpèè Disa 20.5.?» 3Ní Yeesu kíí-bi yii: «An kaa sá úǹ di ŋá ikpitaaa, an kaa tí sá u-baa nì u-na di ŋá ikpiti, ama an sá Unimbɔti ń dī u-pu kí dàkà u-tundi, an pu ní bi màl̄-u míǹ. 4Ŋwìiń nín dáá bí pu nee, tí tɔ̄ un túnní-mee tundi, kun puee kunyeeu làá mɔ́ ubɔ kaa dāa gíti ŋūǹ kí tɔ̄ ditundi. 5M nín dáá bí duulinyan doo nee, man di sá ŋwalifi ki tīī duulinya.» 6Yeesu lī mimmee, ní ki tíil̀ timɔtan#9.6 Dūú ŋmàntī nì Maar 8.23. kitiŋ ní ki dū u-ŋambiki ki mɔ́ǹ ntam ki dūu ŋmītì ujɔfuee nimbiliŋ, 7ní ki bí-u yii: «Nín̄ cá Siiloowee nyimbɔbilin#9.7 Siiloowee nyimbɔbil nìn bí digundi din bi máń ki tú Jeerusaleem tiŋkee ní. Kpèè 2 Bib 20.20, Yees 8.6. kí fíntí a-nimbiin.» - Siiloowee taapu di sá yii: «Bi túnní-u.» - Ujɔfuee nìn búntì kí fíntí u-nimbiin. U dāa fātìi gítìńee, u kíǹ ki wāĺ ní. 8Ní u-kɔŋkɔnnaatɔb nì bin nìn kāntí u kàal̀ ki mèé animbilee bíi lì yii: «An kaa sá kijapaai nee di nìn kàal̀ doo ki mèé ki jīǹeeee?» 9Ní biba bí yii: «Tiŋman, an sá úǹ!» Ní bin kíǹee bí yii: «An kaa sá úǹ, bi náań ní.» Niinee ní un nìn sá ujɔfuee bí yii: «Tiŋman, an sá man!» 10Ní bi bālifì-u yii: «Kin, an ŋá mana ní a wál̀?» 11Ní u kíí-bi yii: «Kijapaai kin bi yíì Yeesuee di sɔ̄ŋkì ntam ki ŋmītì m-nimbiliŋ ní ki bí yii ḿ nīn cá Siiloowee kí fíntí m-nimbiin. M nín cūtì ki fíntì m-nimbiinee, ní m wál̀.» 12Ní bi bālifì-u yii: «Kijapaayee bí la?» Ní u kíí-bi yii: «Maa nyí u-laŋki.»

Fariisab bíi bàlifī ujɔfu un ká dicáaǹdee tibɔti

13Ní bi yōoǹ kijapaai kin nìn sá ujɔfuee ki cáa cūnnì Fariisab cee. 14An nìn sá ŋwiŋŋuŋfikaa dal ní Yeesu nìn sɔ̄ŋkì ntam ki ŋúbitì ujɔfuee nimbiliŋ. 15Míǹ pu ní Fariisab mun bālifì kijapaayee yii: «An ŋá mana ní a wāĺ kɔŋkɔnnee ní?» Ní u kíí-bi yii: «U sɔ̄ŋkì ntam ki dūu ŋmītì m-nimbiliŋ, ní m cūtìi fíntì m-nimbiin ní ki kíǹ ki wāĺ kɔŋkɔnnee.» 16Ní bi-kansikin biba bíi lì yii: «U nín kaa nyí ŋwiŋŋuŋfikaa nee, kijapaayee kaa sá Unimbɔti niliu.» Ní biba mun lī yii: «Unikpiti mun ŋūǹ kí ŋá maamaacib yéèee?» An di nìn cáań diyakatil bi-kansikin. 17Niinee ní bi fātìi bālifì un nìn jɔ̀b̄ee yii: «Un ŋúbitì a-nimbiliŋee, sii nyí yii u sá ŋma ní?» - Ní u kíí-bi yii: «U sá Unimbɔti bɔnaatiliu ní.»

18Juuda yab kpilibee kaa nìn fōō ki kíí yii kijapaayee nìn sá ujɔfu ní ki wál̀ kɔŋkɔnnee, an pu ní bi tú ki yíiń u-baa nì u-na 19ki bālifì-bi yii: «Ni-jipɔɔn baasii sɔ̀ɔɔ? Ni lafun màl̄-u nì ijɔfaaa? Ní an ŋá mana ní u wāĺ kɔŋkɔnnee?» 20Ní u-baa nì u-na kíí-bi yii: «Tiŋman, ti-jipɔɔn dee, ti lafun màl̄-uee u sá ujɔfu ní. 21Ama taa nyí an nín ŋá pu ní u wāĺ kɔŋkɔnneeyee, kaa tí nyí un di yāntì u wál̀ee mun. Ní bàlifìmaan-u, kun puee u cíkitì ki ŋūǹ kí sòoǹ u-ba.» 22Kun pu u-baa nì u-na nìn sòon̄ mimmee di sá bi nìn fāŋkì Juuda yab tindaŋkpilib, kun puee bi nìn sòon̄ ki yóoǹ yii un yaa pée lī yii Yeesu sá Meesiyayee, bí jà-u kukpafidiin ú taa ti nín̄ bí bi-kansikin. 23Kun yì-tì u-baa nì u-na nìn bí yii u cíkitì ki ŋūǹ kí kíí u-ba, bí bàlifì-uee dee.

24Niinee ní bi gíti tí yíiń kijapaai kin nìn jɔ̀b̄ee nliliitiim, ní ki bí-u yii: «Á pàkà Unimbɔti! Ama timbi nyí yii uninjee sá unikpiti ní.» 25Ní u kíí-bi yii: «U yaa sá unikpitaaa, u yaa kaa sáaa, maa nyí, kun m nyée di sá m nìn sá ujɔfu ní kɔŋkɔnnee m wāĺ.» 26Ní bi gíti bālifì-u yii: «U ŋá-si mana naaa? Mana ní u ŋúbitì a-nimbiliŋ ní?» 27Ní u kíí-bi yii: «M pée tùkū-ni ní naa pílifiǹ-mi. Ba pu ní ni là ḿ gíti bùsì kí lì nliliitiim? Àá ni mun là kí kpántí u-boonnooliibi ní?» 28Niinee ní bi bíi sìí-u yii: «Sii di sá kijapaai gbanti boonnooliu, ama timbi sá Mooyiisi boonnooliibi ní. 29Kun puee, ti nyí yii Unimbɔti nìn sòon̄ nì Mooyiisi, ama un bí nee úŋ̀wuee, taa kpáàa nyí laakin gba ní u yaa nyánnée.» 30Ní kijapaayee kíí-bi yii: «Tin sá maamaacee sɔ̀. Nimbi kaa nyí laakin u nyánnée, u mun di ŋúbitì man nimbiliŋ. 31Ti nyí yii Unimbɔti kaa pílifíǹ binikpitib, ama un yaa tɔ́-u ki ŋáań min min ní u lèe, udaan ní u pílifíǹ#9.31 Kpèè Yees 1.15, Ilan 34.16, 66.18, Alaŋ 15.29.. 32Doooo nee, taa láá gbìl̄ dalba dalba yii ubɔ ŋúbitì unil un bi màl̄ nì ijɔfee nimbiliŋ. 33An niliuee yaa kaa nyánní Unimbɔti cee, waa ŋūǹ kí ŋá míǹ.» 34Ní bi kíí-u yii: «Sii pée sá unikpiti doooo a-na poon ní bi nín màl̄-si, ní sii là kí dàkà timbaa!» Niinee ní bi jìn̄-u ki nyántì.

Bin baasii jɔ̀b̄ee

35Yeesu gbìl̄ yii bi jìn̄ un nìn sá ujɔfuee. U dāa ká-uee ní ki bí-u yii: «A fōō Kinibiki ki kííii?» 36Ní u kíí-u yii: «Ukpil, úǹ di sá ŋma ní ḿ fōō-u kí kíí ní?» 37Ní Yeesu bí yii: «A wāĺ-uaa! Úǹ di bíi sòoǹ nì si nee.» 38Ní u bí yii: «M-Dindaan, m fōō-si ki kíí,» ní ki tātìi gbāaǹ Yeesu nimbiin ki jáam̀-u. 39Ní Yeesu bí yii: «M dɔ́miń duulinya nee ni ibɔsoon ní. Bin yaa jɔ̀b̄ee ń wāl̀ ní bin wāĺee ń jɔ̀b̄.» 40Fariisab biba nìn bí niin. Bi gbìl̄ an nyɔɔbuŋŋee, ní ki bālifì-u yii: «Mimmee, ti mun sá bijɔfub deeyaaa?» 41Ní Yeesu kíí-bi yii: «Ni yaa bàà sá bijɔfubee, naa bàà cáá ikpiti. Ama ni nín bí yii ni wāĺee puee, ni-kpitii làá nīn pée dī-ni ní.»

Currently Selected:

Jean 9: BASSARDC

Highlight

Copy