Jean 20

Yeesu fìkititam

(Kpèè Maat 28.1-10, Maar 16.1-8, Luuki 24.1-12)

1 Ŋwiŋŋuŋfikaa jítì kutaa wúntì, kutaafaau pɔ̀lpɔl an dáá bɔ̀ǹee, Maarii un sá Magidalaa tiŋkinee nín cá dikaakul laŋki, ní ki ká yii ditaŋkpal din bi nìn dūu pīiǹ dikaakul nyɔkɔ puee kaa ti pīī. 2Ní u fātìi sáǹ, ki cūtì Siimɔn Peetroo nì Yeesu boonnooliu un u néeńee cee, ní ki bí-bi yii: «Bi cúú ti-Dindaan ki lēē dikaakulin. Taa nyí laakin bi cáá-u ki ŋée!» 3Ní Peetroo nì uboonnool un béeyee nín cá dikaakul laŋki. 4Bi-liitil kɔkɔ nìn sáń ki cá, ní uboonnool un béeyee sáǹ ki jítì Peetroo pu, ki péé ki bàn̄ dikaakul laŋki malaa. 5U gbóońee, ki ká iŋaabu dɔ̄, ama waa kɔ́. 6Boonee ní Siimɔn Peetroo mun bāań ki nín kóò dikaakul poon, ní ki ká iŋaabu in nìn fìn̄ Yeesu wuntee dɔ̄ kitiŋ 7nì ŋŋaabu ŋun nìn fìn̄ u-yilee. Ŋŋaabu gbanti nì in nìn fìn̄ u-wuntee kaa nìn dɔ̄ dibɔɔbaantiil, ŋúǹ nìn póob́ ki dɔ̄ ŋkpaanceeti laaba. 8Niinee ní Yeesu boonnooliu un nìn péé péé ki bàn̄ee mun kɔ́, ki ká, ní ki fōō ki kíí yii u fīkitì. 9Ama Yeesu boonnooliibi kaa nìn dáá gbìl̄ Unimbɔti gbɔŋku nín lī yii Yeesu máaǹ kí fìkitī ditaŋkpiilinee taapu#20.9 Kpèè Ilan 16.10.. 10Niin ní bi fātì ki nín gítí bi-dumpu.

Maarii Magidalaa yɔu ká Yeesu

(Kpèè Maat 28.9-10, Maar 16.9-11)

11Maarii nìn yú ki kɔ́ĺ dikaakul ki sūǹ. U yú ki sūǹee, ní ki gbóoń ki kpēē dikaakul poon, 12ní ki ká Unimbɔti tuuŋyi ili kā laakin bi nìn bíl̀ Yeesu wuntee ki pēē tiwampin. Ŋubɔ kā u-yil laŋki, ní ŋun kíǹee mun kā u-taaŋi laŋki. 13Ní ituunee bālifì-u yii: «Unimpuee, ba ŋá ní a sūǹ?» Ní u kíí-i yii: «Bi yōoǹ m-Dindaan. Maa nyí laakin bi dū-u ki ŋée!» 14U lī mimmee, ki fātèe ki ká Yeesu yú, ama waa béè yii an sá Yeesu. 15Ní Yeesu bālifì-u yii: «Unimpuee, ba ŋá ní a sūǹ ní? Ŋma ní a nyàab̀ ní?» Unimpuee nyí kii bukpaadaan di bíi bàlifī-u, míǹ pu ní u bí yii: «Ukpil, sii di yaa yōoǹ-u, dàkà-mi laakin a cáá-u ki ŋée, m làá cùú yòon̄-u». 16Ní Yeesu yíiń-u yii: «Maarii!» Ní u fātìi u-ba ki túĺ-u ní ki lī-u nì eebru sooŋyin yii: «Rabuunii!» - An taapu sá yii, Ukpil. - 17Ní Yeesu bí-u yii: «Taa gbēē-mi, di sá yii maa láá jɔ́m̀ m-Baa cee. Ama nín̄ cá kí tùkù m-nabiyaamu yii m nín jɔ́ḿ m-Baa un sá ni-Baayee, m-Nimbɔtiu un sá ni-Nimbɔtiuee cee.» 18Niinee Maarii Magidalaa yɔu nín cá u-boonnooliibi cee ki tùkū-bi yii: «M ká ti-Dindaan!» Ní ki dū tin u tùkū-uee ki lī.

Yeesu boonnooliibi ká-u

(Maat 28.16-20, Maar 16.14-18, Luuki 24.36-49)

19 Ŋwiŋŋuŋfikaa jítì, ku wúntì kujoouee ní Yeesu boonnooliibi kpáfì ki kā kudii kubɔn ki pīiǹ mpunyɔmu nì saafii, kun puee bi fàŋkí Juuda yab kpilib. Ní Yeesu cílìń, ki dɔ́miń ki yúl̀ bi-kansikin, ní ki bí-bi yii: «Ni-pɔbiliŋ ń nīn sɔ̀m̀!» 20U bíi sòoǹ mimmee, ní ki dàkā-bi u-ŋalii nì u-takakal. U-boonnooliibi nín ká ti-Dindaan mimmee, ní an mɔ́ɔkiǹ-bi tikpil. 21Ní Yeesu gíti lī-bi yii: «Ni-pɔbiliŋ ń nīn sɔ̀m̀! Kii m-Baa nín túnní-mi puee, ma mun tú nimbi.» 22U lī mimmee, ní ki púfì bi-pu, ní ki bí yii: «Fōōmaan Unimbɔti Fam. 23Ni yaa dū bin kpitii ki pú-bee, bi làá ká bi-kpitii pɔ̄tam. Ni yaa kaa dū bin kpitii ki pú-bee, baa làá ká bi-kpitii pɔ̄tam#20.23 Dūú ŋmàntī nì Maat 16.19, 18.18..»

Yeesu nì Toomasi bɔti

24Ama ŋyunti ŋun Yeesu dɔ́mińee, Toomasi un bi gíti yíì Ata ki sá Yeesu kpambaliŋ saalaa nì alee kansikin dibee, nìn kpá. 25Ní u-boonnooliibi bin nìn bée bí-u yii: «Ti ká ti-Dindaan!» Ní Toomasi kíí-bi yii: «M-nimbiliŋ yaa kaa ká u-ŋalii laakin bi kpááyee, m yaa kaa dū m-ŋambiki ki bɔ́ laakin bi kpááyee, ki yaa kaa dū m-ŋal ki bɔ́ u-takakal laakin bi nìn sāāyee, maa làá fōō kí kíí.»

26Iwiin inii boonee, Yeesu boonnooliibi fātìi kpáfì kudiin. Toomasi mun nìn bí bi-kansikin. Bi dū mpunyɔmu ki pīiǹ ki kpàl̄, ama ní Yeesu cílìń bi-kansikin, ní ki bí-bi yii: «Ni-pɔbiliŋ ń nīn sɔ̀m̀!» 27Ní u bí Toomasi yii: «Dāá kpèè m-ŋalii, kí cáań a-ŋambiki kí máań! Cáań a-ŋal kí máań m-takakal, kí fōō kí kíí, kí taa nín̄ gíti kpākantí!» 28Niinee ní Toomasi ń bí-u yii: «M-Dindaan, m-Nimbɔtiu!» 29Ní Yeesu kíí-u yii: «A nín ká-mee ní a nín fōō ki kííyaa! Bin kaa ká-mi ki fōō ki kííyee bí mmɔnneeee#20.29 Dūú ŋmàntī nì 1 Peet 1.8.!»

Kun pu bi ŋmàn̄ kugbɔŋu neeyee

30Yeesu nìn ŋáaǹ maamaacib tikpil u-boonnooliibi kansikin bin ní baa ŋmàn̄ ki ŋá kugbɔŋu nee poonee. 31Bi yaa ŋmàn̄ tin bí neeyee, an sá ní fōō kí kíí yii Yeesu sá Unimbɔti Jipɔɔn ki sá Meesiya. Ni yaa fōō-u ki kíí mimmee, ní ká dimaŋfal u-yindi pu.

Currently Selected:

Jean 20: BASSARDC

Highlight

Copy