Jean 2

Yeesu dū nnyim ki kpántì ndaam

1Winta dalee, tinimpucan tiba nìn bí Kana, Galiilee timbiliikin. Yeesu na mun nìn bí niin, 2ní bi nìn yíiń Yeesu mun nì u-boonnooliibi bí dāan̄. 3Ndaam dāa dóòyee, ní Yeesu na bí-u yii: «Bi-daam dóòyaa!» 4Ní Yeesu kíí-u yii: «M-na, sii di làá tùkù-mi m nín làá ŋá pueeee? Ŋyunti ŋun m làá tɔ̄ m-tundee kaa láá ŋmāntì.» 5Niinee ní Yeesu na bí bitɔntɔnliibi bin bí niinee yii: «U yaa bí ní ŋá puee, ŋámaan míǹ.» 6Ataŋkpee lɔnti tiluu nìn yú. Niin ní bi nìn jòotī nnyim ki fíntí, kii Juuda yab koobiliŋ nín sá puee. Kulɔŋŋu kamaa nìn fòol̄ nnyim liitirib dilaataal ní. 7Ní Yeesu bí bitɔntɔnliibee yii bí lúń nnyim kí gbéeǹ tilɔn gbanti. Ní bi lafun lúń ki gbéeǹ yátí yati. 8Niinee ní Yeesu bí-bi yii: «Jōōmaan kí cáá tīī ukpil un kpèé tijinee!» Ní bi jōō ki cáa tīī-u. 9Ukpilee dákée, nnyimee kpántì ndaam. Waa nìn nyí laakin ndaamee nyánnée, see bitɔntɔnliibi bin nìn lúń nnyimee di nyí. Niinee ní u yíiń unimpucaan cal, 10ní ki bí-u yii: «Bi péetí kí cáań ndamɔntiim, ní binib yaa nyùn̄ an nyāatì-bee ní bí nín nyāntiń min kaa mɔ̄tìi mɔ̄ee. Ní sii dū ndamɔntiim ki kpáafì ki dāa cāabìń-mi naŋkɔnampuɔɔɔ?»

11Kana timbiliiki kin bí Galiileeyee ní Yeesu nìn ŋá u-maamaacipeepeekaau ki dàkā u-nyooti, ní u-boonnooliibi fōō-u ki kíí. 12Boonee ní u nì u-na nì u-naalib nì u-boonnooliibi nín sìntī Kapeernayum#2.12 Kpèè Maat 4.13., ki kāl̀ niin iwiŋkaaŋkaa iba.

Yeesu jìn̄ biwannyafiliibi kunimbɔtidiin

(Kpèè Maat 21.12-13, Maar 11.15-18, Luuki 19.45-46)

13Juuda yab jiŋaaliu un bi yíì Dilákatil jiŋaaliuee nìn tóobińee, ní Yeesu nín cá Jeerusaleem#2.13 Kpèè Disa 12.1-27.. 14U bàn̄ ki kɔ́ kunimbɔtidiinee ní ki ká bin nyáfí inaa, nì ipii nì abeenanjilee nì binimbikpantiliibi kā#2.14 Kpèè Maar 11.15.. 15Ní u nyàab̄ iŋmii ki dūu ŋá dinaalabil, ní ki jìn̄-bi ki nyántì nì bi-piii nì bi-naai kɔkɔ, ní ki dū binimbikpantiliibi nimbiliŋ ki yàl̄ kitiŋ, ní ki lábitì bi-teebilib ki cìb̄, 16ní ki bí bin nyáfí abeenanjilee yii: «Nyāntímaan ni-wanti nee doo. Ní taa nín̄ cáá m-Baa diiku ki kpántí kunyɔmpudii!» 17Niinee ní u-boonnooliibi téetì tibɔti tin bi ŋmàn̄ Unimbɔti gbɔŋkunee, yii: «Ti-Dindaan, m nín mɔ́tí a-diiku nee pu miŋyee di wù m-pɔbilin kii ŋŋmee#2.17 Ilan 69.10..»

18Ní Juuda yab kpilib bí-u yii: «Dàkà-ti kudaaŋŋu ní tí béé yii a cáá nsan kí ŋá min a ŋá nee!» 19Ní Yeesu kíí-bi yii: «Wīīmaan kunimbɔtidii nee, iwiin ita dal m làá fàtīí mā-ku#2.19 Dūú ŋmàntī nì Maat 26.61, 27.40, Maar 14.58, 15.29..» 20Niinee ní Juuda yab kpilib bí yii: «Bi dū abin imuŋku ili nì aluu ní ki máń kunimbɔtidii nee, nì mana ní sii ŋūǹ kí dū iwiin ita kí fàtīí mā-ku?» 21Ama Yeesu nìn sòoǹ u-wunti pu ní ki nántiǹ kunimbɔtidii. 22Boon u nín dāa fīkitì ditaŋkpiilinee ní u-boonnooliibi téetì yii u nìn lī míǹ, ní ki fōō tin bi nìn ŋmàn̄ Unimbɔti gbɔŋkunee nì Yeesu nín sòon̄ tin u-fìkititam puee ki kíí.

Yeesu nyí tin bí unil pɔbilinee kɔkɔ

23Yeesu nín nìn bí Jeerusaleem Dilákatil jiŋaaliu yuntiŋuee ní binib tikpil kántì maamaacib bin u ŋáańee ní ki fōō-u ki kíí. 24Ama Yeesu kaa nìn máká bi-pu. Di sá yii u nyí bi-kɔkɔ nín sá biŋyee. 25Waa nyàab̀ ubɔ ń tùkù-u kun bi sée, kun puee u nyí tin bí unil pɔbilinee.

Currently Selected:

Jean 2: BASSARDC

Highlight

Copy