Jean 18

Bi cúú Yeesu

(Kpèè Maat 26.47-56, Maar 14.43-50, Luuki 22.47-53)

1Yeesu sòon̄ an nyɔɔbuŋŋi ki dóòyee, ní u nì u-boonnooliibi búntì Seedrɔn buŋgbandi lapu pu#18.1 Kpèè Maar 11.1.. Bukpaa bubɔ nìn bí niin, ní u nì u-boonnooliibi cūtì ki kɔ́ bu-poon. 2Juudasi un nìn nyáń u-boonee mun nyí niin, kun puee Yeesu nì u-boonnooliibi nìn pée cá niin múlmul#18.2 Kpèè Luuki 21.37, 22.39.. 3Bisaraaŋakpilib nì Fariisab nìn tīī Juudasi disoojakitil nì dipilisikitil, ní u yōoǹ-bi ki cáa nín cá bukpaayee poon. Bi nìn ŋúb́ iŋminaapool nì fitilab nì tijanjawan. 4Yeesu nyí tin dòoń-uee, ní ki sútì ki pìl̄-bi, ki bālifì-bi yii: «Ŋma ní ni nyàab̀ ní?» 5Ní bi kíí-u yii: «Ti nyàab̀ Yeesu Naasaareeti yɔuee ní.» Ní u kíí-bi yii: «Man sèé!» Juudasi, un nyáń u-boonee, sáká bi-kansikin. 6Yeesu nín kíí-bi yii: «Man sèéyee», ní bi fātìi túlifì bi-boon ki lítì kitiŋ. 7Ní Yeesu fātìi tí bālifì-bi yii: «Ŋma ní ni nyàab̀ ní?» Ní bi bí yii: «Ti nyàab̀ Yeesu Naasaareeti yɔuee ní.» 8Ní Yeesu kíí-bi yii: «Kéè, m pée tùkū-ni yii m sèéyaa! An yaa sá man ní ni nyàab̀ee, ní yàntī bin bí nee ń nīn cá!»

9Mimmee an ŋá kii u nín bàà sòon̄ puee dee, yii: «Maa fá bin a tīī-mee kansikin báà ubɔ.» 10Niinee ní Siimɔn Peetroo dáaĺ ki fɔ́fì u-tàataajiki, ki gāā ki wúkutì usaraaŋakpil tɔntɔnliu ubɔ ŋaŋgiitafal. Bi nìn yíì utɔntɔnli gbanti Maalkusi ní. 11Ní Yeesu bí Peetroo yii: «Gíiǹ a-tàataajiki kí fúuń kujitooun! M-Baa yaa tīī-mi falaa ḿ nyɔ̀ee, ḿ taa nyɔ̀ɔɔ#18.11 Dūú ŋmàntī nì Maat 26.39, Maar 14.36, Luuki 22.42.?»

Bi cáá Yeesu usaraaŋakpil nimbiin

(Kpèè Maat 26.57-58, Maar 14.53-54, Luuki 22.54)

12Niinee ní disoojakitilee nì bi-kpiliu nì Juuda yab pilisib cúú Yeesu ki bóob́-u, 13ní ki dá láá cáá-u ki cūnnì Aani#18.13 Aani : kpèè Luuki 3.2 nì tin bi ŋmàn̄ kugbɔŋu faaku taapuee. cee. Aani gbanti di nìn sá Kaayiifi un nìn sá usaraaŋakpil dibindi gbantee coo. 14Kaayiifi gbantee di nìn sáŋkì Juuda yab yii: «An máaǹ unibaanti ń kpú binib kɔkɔ yil puee.»

Peetroo néé yii waa nyí Yeesu

(Kpèè Maat 26.69-70, Maar 14.66-68, Luuki 22.55-57)

15Siimɔn Peetroo nì Yeesu boonnooliu ubɔ nìn nóó Yeesu. Uboonnoolee nóó Yeesu ki kɔ́ usaraaŋakpil cindin, kun puee usaraaŋakpil nìn nyí-u, 16ní Peetroo nìn gbíntìi sí kipunyɔkɔ boon mmɔŋki. Ní uboonnool un usaraaŋakpil nìn nyée nyáń ki ká unimpu un nìn cí kipunyɔkɔpuee ní ki cáá Peetroo ki kɔ́ǹ. 17Ní unimpu un nìn cí kipunyɔkɔpuee bālifì Peetroo yii: «A mun kaa sá uninja nee boonnooliibi ubɔɔɔ?» Ní Peetroo bí-u yii: «Aayee, maa sá.»

18Tiwool nìn bí, an pu ní bitɔntɔnliibi nì pilisib kpāā ŋŋmi ki sí ki wùl̀, ní Peetroo mun yú bi-cee niin ki wùl̀.

Usaraaŋakpil bālifì Yeesu tibɔti

(Kpèè Maat 26.59-66, Maar 14.55-64, Luuki 22.66-71)

19Niinee ní usaraaŋakpil bíi bàlifī Yeesu u-boonnooliibi bɔti nì tibɔti tin u dàkèe pu. 20Ní Yeesu kíí-u yii: «M sòon̄ mpaampiin pu báà ŋma nimbiin, ki dàkā m-bɔti akpafidiinni nì kunimbɔtidiin, laakin Juuda yab kɔkɔ kpáfée. Maa nìn sòon̄ tiba dibalin. 21Ba pu ní a bàlifī-mi? Bàlifì bin pílifì tin m sòon̄ee. Bālifì-bi tin m lēe, bíǹ nyí tin m sòon̄ee.» 22Ŋyunti ŋun Yeesu lī mimmee, ní pilisi ubɔ un yú ki kɔ́ĺ-uee fáá-u ntampa, ní ki bí-u yii: «Míǹ ní bi kíikí usaraaŋakpilaaa?» 23Ní Yeesu bí-u yii: «M yaa sòon̄ min kaa kítèe, dàkà-mi min ní m yīntèe. M yaa tí sòon̄ min kítèe, ba pu ní a fáá-mi?» 24Yeesu ŋalii gbíntìi bóob́ee, ní Aani dū-u ki tīī usaraaŋakpil Kaayiifi.

Peetroo fātìi tí néé yii waa nyí Yeesu

(Kpèè Maat 26.71-75, Maar 14.69-72, Luuki 22.58-62)

25Ŋyunti gbantee, Peetroo yú ki wùl̀ ŋŋmi. Ní bi bālifì-u yii: «Si mun kaa sá uninja nee boonnooliuaaa?» Ní Peetroo néé yii: «Aayee, man kaa sá.» 26Ní usaraaŋakpil tɔntɔnliu ubɔ un nabiki tafal Peetroo bàà gāā ki wúkutèe bí-u yii: «Maa bàà ká si nì u bukpaanaaa?» 27Ní Peetroo fātìi tí néé yii an kaa sá úǹ. Kpalaa niin ní ukooja báakì.

Bi cáá Yeesu Piilati nimbiin

(Kpèè Maat 27.1-2,11-14, Maar 15.1-5, Luuki 23.1-5)

28Ní bi yōoǹní Yeesu Kaayiifi cee ki cáá-u ki nín cá gɔmina Piilati cee. An nìn dáá sá kutaafaau pɔ̀lpɔl ní. Juuda yab kaa nìn là kí kɔ́ gɔmina diikun kun puee bi là kí nīn bí circir kí ŋmā kí jī Dilákatil jiŋaaliu. 29Míǹ pu ní gɔmina Piilati nyánní ki dɔ́miń bi-cee, ní ki bālifì-bi yii: «Ba ní uninja nee ŋá ní ni cáań-u ní?» 30Ní bi kíí-u yii: «U yaa kaa bàà sá unikpiti, taa bàà cāabìń-u kí tīī-si!» 31Ní Piilati bí-bi yii: «Yòom̄maan-u, ní sòom̀maan u-bɔti kí nóó nì ni-marau nín sá puee!» Ní bi kíí-u yii: «Timbi kaa cáá nsan kí kpɔ̀ unil.»

32An ŋá míǹ kí dàkà Yeesu nín nìn sòon̄ u-kúm min u làá kpúee puee dee. 33Ní Piilati nín kóò kudiin ki yíiń Yeesu, ní ki bālifì-u yii: «Mimmee, sii di sá Juuda yab bɔtiuaaa?» 34Ní Yeesu kíí-u yii: «Tin tin a lī nee, sii a-ba di dākafì míǹ naaa, ubɔ di tùkū-si míǹ man pu ní?» 35Ní Piilati kíí-u yii: «M sá Ujuudajaaa? A-yab nì bisaraaŋakpilib di dū-si ki tīiń-mi. Mimmee, ba ní a ŋá ní?» 36Ní Yeesu kíí-u yii: «M-beel kaa sá taapu doo beel. M-beel yaa bàà sá duulinyan yal, m-tɔntɔnliibi bàà jáà kí mɔ̄tì m-pu ní. Baa bàà kíikí bí dū-mi kí tīī Juuda yab kpilib. Ama, m-beel kaa sá taapu doo yal.» 37Ní Piilati bí-u yii: «Mimmee, a sá ubɔti níii?» Ní Yeesu kíí-u yii: «Sii di lī. M dɔ́miń bi màl̄-mi duulinyan ḿ dàkà binib kun di sá ibaamɔnee ní. Un kamaa sá ibaamɔn yɔuee pílifí tin m sòoǹee ní.» 38Ní Piilati bālifì-u yii: «Ba di sá ibaamɔn ní?»

Piilati lēē yii bí kpɔ̀ Yeesu

(Kpèè Maat 27.15-31, Maar 15.6-20, Luuki 23.13-25)

Piilati sòon̄ míǹ ki dóòyee, ní ki nyáń ki tí nín cá Juuda yab cee, ní ki bí-bi yii: «Maa ká kun pu ní kijapaai nee máaǹ ditafadaaldee. 39Kii ni-marau nín pée sá puee, Dilákatil jiŋaaliu kamaayee, m gīintí usarkadaan ubɔ ní kí líí-ni. Mimmee, ni là ḿ gíiǹ Juuda yab bɔtiu kí líí-naaa?» 40Niinee ní bi gíti tí bíi tátí yii: «Aayee, á taa gíiǹ úǹ kí líí, see Baaraabaasi ní á gíiǹ kí líí!» Baaraabaasi gbantee mun di nìn sá digaŋgandaan#18.40 Dūú ŋmàntī nì Atuun 3.14..

Currently Selected:

Jean 18: BASSARDC

Highlight

Copy