Jean 14

Yeesu di sá nsan ŋun cá Unimbɔti ceeyee

1Ní Yeesu nìkī ki lī yii: «Ni-pɔbiliŋ ń taa bīil̀. Ní fōō Unimbɔti kí kíí, kí fōōmaan ma mun kí kíí. 2Ikɔŋkoon tikpil bí m-Baa dumpu, m làá cù kí bɔ́ntí-i kí yóoń-ni. I yaa kaa bàà bí tiŋman, m bàà tùkù kí cántí-ni. 3M yaa cūtì ki bɔ́ntì ipaan gbantee, ní ḿ gítiń kí yòon̄-ni, án nín làá ŋá pu laakin m làá nīn bée, ni mun ń nīn bí m-cee niinee. 4Ni nyí laakin m cée, ki nyí nsan mun.» 5Ní Toomasi bí-u yii: «Ti-Dindaan, taa nyí laakin a cée! Ti làá ŋá mana kí béé nsan?» 6Ní Yeesu kíí-u yii: «Man di sá nsan, ki sá ibaamɔn ki sá dimaŋfal. Ubɔ kaa ŋūǹ kí dī laaba kí dāan̄ m-Baa Unimbɔti cee, see ú dīń man pu. 7Ni yaa bàà nyí-mee, ni bàà nyí m-Baa mun ní. Ama kɔŋkɔnnee ni nyí-u, ki ká-u mun.»

8Niinee ní Fiiliipi bí-u yii: «Ti-Dindaan, dàkà-ti a-Baa Unimbɔti ti-pɔbiliŋ ń sɔ̀ŋkì.» 9Ní Yeesu kíí-u yii: «Fiiliipi, m nín bí ni-cee an yúntì pu nee, ní saa nyí-maaa? Un yaa ká-mee, ká m-Baa mun dee. Kin ba pu ní sii gíti lì yii ḿ dàkà-ni m-Baa? 10Aa nyí yii man bí m-Baa ni, ní m-Baa mun bí man naaa? Tibɔti tin m sòoǹ nì nee, maa sòoǹ-tì m-ba pu, an sá m-Baa un bí m-nee di tūǹ u-tundi. 11Fōō kí kíímaan yii m bí m-Baa ni ní m-Baa mun bí man ni. Báà ni yaa kaa fōō m-bɔti ki kíí, kpèèmaan m-tuuŋŋi ŋin m ŋá nee pu kí fōō kí kíí. 12Ibaamɔn, ibaamɔn ní m sòoǹ nì ni, un yaa fōō-mi ki kííyee làá tɔ̄ atuun ŋin m tūǹee, úǹ làá tɔ̄ ŋin jítiǹ man yaŋ nee gba, kun puee m cá m-Baa cee ní. 13Ní tin kɔkɔ ni yaa mēē m-yindi puee, m làá ŋá míǹ kí tīī-ni, ní m-Baa ń ká tinyool u-Jipɔɔn pu. 14Ni yaa mēē tiba m-yindi pu, m làá ŋá míǹ kí tīī-ni.

Yeesu pōoǹ kí tɔ̄ń Circir Fam

15«Ni yaa néeń-mee, nín̄ ŋúb́maan m-marab, 16ní man ń mèè m-Baa Unimbɔti ú gíti tīiń-ni Ututunli ubɔ un làá nīn bí ni-cee kí nīn cá jaanjaanee. 17Úǹ di sá Unimbɔti Fam ibaamɔndaan, un duulinya nib kaa ŋūǹ kí fōōyee, kun puee baa wāĺ-uaaa, kaa nyí-u mun. Ama an yaa sá nimbi, ni nyí-u kun puee u kóò ni-cee ní ki làá dāá nīn bí ni-ni. 18«Maa làá dū-ni kí fá kii ataŋkpiibilee, m làá fàtīí gítiń ni-cee. 19An kíǹ fiii duulinya nib kaa làá ti ká-mi, ama nimbi làá ká-mi, kun puee m bí dimaŋfalin, míǹ ní ni mun làá nīn bí dimaŋfalin. 20Ŋwiin gbanti yaa láa bāańee, ni dāa béetí yii man bí m-Baa ni, ní nimbi bí man ni, ní man bí ni mun ni.

21Un yaa cáá man marab ki ŋúb́-bee, udaanee di néeń-mi. Míǹ ní m-baa làá nīn néeń un néeń-mee, ma mun ń nīn néeń-u, ní kí nyāntí m-ba kí dàkà udaan.»

22Ní Juudi - an kaa nín sá Juudasi Isikaariyɔti - bí-u yii: «Ti-Dindaan, mana ní a làá ŋá ní kí nyāntí a-ba kí dàkà timbi, ní kí taa dàkà duulinya nib?» 23Ní Yeesu kíí-u yii: «Un yaa néeń-mee làá nīn ŋúb́ m-bɔti. M-Baa làá nīn néeń udaan, ní man nì m-Baa ń dāan̄ kí nīn kóò udaan cee. 24Un kaa néeń-mee kaa ŋúb́ m-bɔti. M-bɔti tin m sòoǹ nì nee nyánní m-Baa un túnní-mee cee ní, an kaa sá m-ba pu ní m sòoǹ. 25«M tùkū-ni tin bí nee ŋyunti ŋun m dáá bí ni-cee nee. 26Ama Ututunlee, Circir Fam min m-Baa làá dāá tɔ̄ń man yindi puee, làá dāá dàkà-ni tikɔkɔ, ní kí téetí-ni tin kɔkɔ m sòon̄ nì nee.

27«Ŋgbansɔŋfi ní m cáań-ni, man gbansɔŋfiŋu ní m dūu tīī-ni, maa tìì kii duulinya nín tìì puee#14.27 Dūú ŋmàntī nì Yees 9.5.. Ní taa bàkatī kí taa fàŋkì mun. 28Ni gbìl̄ m nín lī yii m làá nīn cá kí dāá fàtīí gítiń ni-ceeyee. Ni yaa bàà néeń-mee, an bàà mɔ́ɔkíǹ-ni kii m nín cá m-Baa ceeyee pu, kun puee m-Baa jítiǹ man. 29M tùkū-ni kɔŋkɔnnee ki yóoǹ kí wàatī ní án nín bàń, ní ŋyunti ŋun ní an yaa láa bāańee, ní ŋmā kí mɔ̀tīí fōō kí kíí. 30Maa làá ti sòoǹ nì ni tikpil, kun puee duulinya bɔtiu Sitaan dòoń. Waa nín ŋūǹ kí ŋá-mi tiba. 31Ama duulinya nib máaǹ kí béé yii m néeń m-Baa, an pu ní min ní m-Baa yaa bí ḿ ŋée, míǹ ní m ŋáań. Yīkìmaan, tí nīn cá.»

Currently Selected:

Jean 14: BASSARDC

Highlight

Copy