Jean 12

Maarii dū talaalu ki sītì Yeesu taaŋi pu

(Kpèè Maat 26.6-13, Maar 14.3-9)

1An nìn kíǹ iwiin iluu bí jī Dilákatil jiŋaaliu, ní Yeesu nìn bàn̄ Beetanii#12.1 Kpèè Maar 11.1., laakin Laasaar, kijapaai kin u nìn fīkitèe nìn kóòyee. 2Niin ní bi ŋá Yeesu tican. Maarta di nìn tìì tijin. Laasaar mun nìn ŋmàl̄ bin nì Yeesu nìn kā ki jīǹee kansikin. 3Ní Maarii yōoǹní talaalumɔnti un bi yíì náaree, u pɔ̄ɔ̄ kudaau tikpil, ní ki cáań ki kpáatìi sītì Yeesu taaŋi pu, ní ki dū u-yikpiti ki pítì#12.3 Dūú ŋmàntī nì Luuki 7.37-38., ní kudii kɔkɔ jíń talaalu sɔnsɔfiŋu. 4Niinee ní Yeesu boonnooliibi kansikin ubɔ, Juudasi Isikaariyɔti un dāa dū-u ki nyáfèe, bí yii: 5«Ba pu ní baa dū talaalu nee kí nyāfì kí fōō animbil jitɔmbi#12.5 animbil jitɔmbi: kpèè Maar 6.37 nì tin bi ŋmàn̄ kugbɔŋu faaku taapuee. alaataa ata kí dūú yàkatī biwɔfib?» 6Tin u sòon̄ee, an kaa sá u sūǹ biwɔfib pu, u nìn sá unaayuu ní. Úǹ di nìn ŋúb́ bi-nimbiliŋ ní ki lèekī ŋi-poon. 7Ní Yeesu bí-u yii: «Yàntī-u! U yāaǹ ki cíitì daliŋkin bi làá dāá dū-mi kí ŋá dikaakulinee dee. 8Biwɔfib làá nīn pée bí ni-kansikin ní baabadal#12.8 Dūú ŋmàntī nì Ditee 15.11., ama man nì ni kaa làá nīn bí baabadal.»

Bi búkú Laasaar pu kí kpɔ̀-u

9Juuda yab tikpil nín gbìl̄ yii Yeesu bāań Beetaniiyee, ní bi nín cá niin. An kaa nìn sá Yeesu ŋmaniŋma pu ní bi cá, ama kí tin kpáàa kpèè Laasaar un u fīkitèe mun. 10Ní bisaraaŋakpilibee sòon̄ ki yóoǹ yii bí kpɔ̀ Laasaar mun, 11kun puee úǹ pu ní Juuda yab tikpil kíǹ ki nóó Yeesu, kaa ti là bíǹ cee.

Yeesu kɔ́ Jeerusaleem nì ifaal

(Kpèè Maat 21.1-11, Maar 11.1-11, Luuki 19.28-40)

12Kutaa wúntèe, kunipaau kun nìn dɔ́miń Dilákatil jiŋaaliuee gbìl̄ yii Yeesu dòoń Jeerusaleem. 13Bi nìn bátì tikpakpati ki túŋkì-u nsanni, ní ki kūuntí yii: «Oosaana, tí dàntìmaan-u! Ti-Dindaan ń bìin̄ un dòoń úǹ yindi puee! Unimbɔti ń bìin̄ Isirayeel bɔtiu boon#12.13 Dūú ŋmàntī nì Ilan 118.25-26.!» 14Yeesu nìn ká dimampɔmbil ki kā, kii Unimbɔti gbɔŋku nín nìn lī ki yóoǹ puee, yii:

15«Siiyɔn tiŋki, taa fàŋkì!

Kpèè, a-bɔtiu di dòoń,

ki kā dimampɔmbil puee#12.15 Saka 9.9.!»

16Ŋyunti gbantee, u-boonnooliibi kaa nìn dáá láá gbìl̄ taapu. Ama ŋyunti ŋun u fōō u-nyootee ní bi nín téetì yii Unimbɔti gbɔŋku nín nìn sòon̄ tin u-puee, míǹ ní bi ŋá ki tīī-u nee.

17Bin kɔkɔwoooo nìn bí ŋyunti ŋun Yeesu yíiń Laasaar dikaakulin ki fīkitì-u ditaŋkpiilinee bíi máafí tin bi ká Yeesu ŋée. 18Di sá yii bi nín nìn gbìl̄ maamaaci un u nìn ŋée puee ní kunipaauee túŋkì-u. 19Ní Fariisab bíi lì tɔb cee niin yii: «Ni káa! Naa làá ti ká báà tiba. Binib kɔkɔ di bìtifī ki cá kí nóó-uee.»

Greeki yab biba bíi nyàab̀ Yeesu

20Greeki yab biba nìn ŋmàl̄ bin nìn dɔ́miń Jeerusaleem kí nyɔ̄ŋkì Unimbɔti jiŋaalee poonee kansikin. 21Ní bi dɔ́miń ki ká Fiiliipi un sá Beetisayida Galiilee tiŋkinee, ki bíi gbàam̄-u yii: «Ukpil, ti là kí ká Yeesu.» 22Ní Fiiliipi cūtìi tùkū Andree, ní bi-liitil cūtì ki tùkū Yeesu. 23Ní Yeesu kíí-bi yii: «Ŋyunti ŋun man Kinibiki làá fōō m-nyootee bāań dee. 24Ibaamɔn, ibaamɔn ní m sòoǹ nì ni, ŋwambool yaa kaa lítì kitiŋ ki kpíì, ŋu pée gbíntìi sá mbaanti ní. Ama ŋu yaa kpíìyee, ní ŋú nyā kí lòoǹ tikpil. 25Sii un yaa néeń a-maŋfalee làá fá-dì, ní sii un yaa ná a-maŋfal taapu doo neeyee, siiyee di kpáafí-dì ki kāntí dimaŋfal din kaa cáá dikúntilee#12.25 Dūú ŋmàntī nì Maat 10.39, 16.25, Maar 8.35, Luuki 9.24.. 26Un yaa là kí tɔ̄ m-tundee máaǹ kí nīn nóó-mi, ní laakin m yaa bée, m-tɔntɔnliu mun ń nīn bí niin. Un yaa tūǹ m-tundee, Ubaati làá tīī-u tinyool.»

Yeesu bíi sòoǹ u-kúm pu

27«Kɔŋkɔnnee m bākatì. Mimmee, ḿ lì yii, m-Baa, nyāntí-mi tin làá bàń-mi ŋyunti nee pooneeee? Aayee, kun puee ŋyunti nee falaau pu ní m dɔ́miń. 28Míǹ puee, m-Baa, tīī a-yindi tinyool!» Niinee ní Unimbɔti sòon̄ní yilpu ki bí yii: «M tīī m-yindi tinyool, ki làá gíti tí tīī-dì.»

29Kunipaau kun nìn yú niinee gbìl̄ Unimbɔti neen puee ní ki bí yii: «An sá utaa di fáá didundi.» Ní biba mun bí yii: «An sá Unimbɔti tuuŋŋu ŋubɔ di sòon̄ nì u.» 30Ní Yeesu bí-bi yii: «An kaa sá man pu ní nneenee sòon̄, ama an sá nimbi pu ní ŋu sòon̄. 31Ŋyunti nee ní Unimbɔti làá sòoǹ duulinya bɔti, ní kí jà duulinya bɔtiu Sitaan. 32Bi yaa láa yōoǹ-mi yilpuee, m làá dāá dáaliń nnibiyaamu kɔkɔ kí cáań m-cee.» 33U nìn lī míǹ kí dàkà ŋkúm min u làá kpúee nín sá miŋyee ní. 34Ní binibee kíí-u yii: «Ti bífì marab gbɔŋku poon yii Meesiya làá nīn pée bí ní kí nīn cá jaanjaan#12.34 Kpèè Ilan 110.4, Yees 9.6, Dani 7.14.. Kin ba pu ní sii lī yii bi làá yòon̄ Kinibiki yilpu? Ŋma di sá Kinibiki gbanti ní?» 35Ní Yeesu kíí-bi yii: «Ŋwalifi dáá bí ni-kansikin ŋyunti ŋubɔ poon fiii. Ní nīn còom̄ ŋwalifi gbanti poon, án nín làá ŋá pu dibɔmbɔndi ń taa jēetí ni-puee, kun puee un còom̄ dibɔmbɔndinee kaa nyí laakin u cée. 36Ŋyunti ŋun ŋwalifi dáá bí ni-cee nee, ní fōō-ŋu kí kíí án nín làá ŋá pu ní kpántí ŋwalifin nibee.»

Juuda yab kaa fōō Yeesu ki kíí

Yeesu sòon̄ míǹ ki dóòyee, ní ki yíkì bi-cee ki cūtì ndan ki bál̀-bi. 37Nì min kɔkɔ u ŋáaǹ maamaacib tikpil bi-nimbiinee, baa fōō-u ki kíí. 38Kii Unimbɔti bɔnaatiliu Yeesaya nín nìn ŋmàn̄ pu dooooyee, míǹ ní an ŋá nee. U nìn ŋmàn̄ yii:

«Ti-Dindaan, ŋma fōō ti-bɔti ki kíí?

Ŋma béè sii ti-Dindaan pɔŋŋu#12.38 Yees 53.1.?»

39Yeesaya nìn gíti lī kun pu ní baa nìn ŋúń ki fōō ki kííyee: u nìn bí yii:

40«Unimbɔti yāntì bi jɔ̀b̄ ní ki pɔ́ɔkì bi-pɔbiliŋ,

án nín làá ŋá pu bi-nimbiliŋ ń taa nín̄ wāĺee

ní bi-pɔbiliŋ ń nīn gbìfì

bí taa kpántí bi-bimbim ú cáaǹ-bee#12.40 Yees 6.9-10..»

41Yeesaya lī míǹ kun puee u nìn ká Yeesu nyooti, ní ki sòon̄ u-pu.

42Nì míǹ kɔkɔee, Juuda yab kpilib tikpil nìn fōō-u ki kíí. Ama Fariisab ń taa jà-bi kukpafidiin puee, baa nìn nyántì bi-ba. 43Di sá yii bi là binib ń pàkà-bi ki jítiǹ Unimbɔti ń pàkà-bi.

Yeesu bɔdakàtam kúntilaŋki

44Yeesu téeń mpɔn ki lī yii: «Un yaa fōō-mi ki kííyee, an kaa sá man ní u fōō ki kíí, u fōō un túnní-mee ní ki kíí. 45Un yaa ká-mee ká ki kpáaǹ un túnní-mee dee. 46M dɔ́miń duulinyan kii ŋwalifee, án nín làá ŋá pu un sá kamaa yaa fōō-mi ki kííyee ń taa nín̄ gíti bí dibɔmbɔndinee. 47Ama un di yaa gbìl̄ m-bɔti ní ki yaa kaa kpáafì-tèe, an kaa sá man di làá kpɔ̀ udaan bɔti, kun puee maa dɔ́miń kí kpɔ̀ duulinya nib bɔti, m dɔ́miń kí fīī-bi ní. 48Un kaa là-mi, kaa fōō m-bɔtee cáá tin làá dāá sòoǹ u-bɔtee: an di sá m-bɔti tin m nìn dàkēe, tíǹ di làá dāá kpɔ̀ udaan bɔti ŋwinjoolkaa dal. 49Di sá yii an kaa sá man m-ba pɔŋŋu pu ní m sòon̄, an sá m-Baa un túnní-mee u-ba di tīī-mi tin sá ḿ sòoǹee nì tin sá ḿ dàkèe. 50Ní m nyí yii tin ní u sòoǹee cāabìń dimaŋfal din kaa cáá dikúntilee. Míǹ puee, tin m sòon̄ee, tin m-Baa tīī-mi ḿ sòoǹee dee.»

Currently Selected:

Jean 12: BASSARDC

Highlight

Copy