Genèse 45

Jooseefi yāntì u-nabiyaamu béè-u

1Niinee Jooseefi kaa nìn gíti ŋūǹ kí cúú u-ba bin kɔkɔ nìn bí u-ceeyee nimbiin. Ní u téeń yii: «Nyāntímaan binib kɔkɔ m-cee doo.» An kíǹ u nì u-nabiyaamu ŋmaniŋmee ní u yāntì bi béè yii an sá úǹ Jooseefi#45.1 Dūú ŋmàntī nì Atuun 7.13.. 2Ní u bíi sūǹ mpɔn ní Eejipiti yab bin u nyántèe gbìl̄ ní an gbītì ki bàn̄ Faaroo cindi. 3Ní Jooseefi bí u-nabiyaamu yii: «Man Jooseefi dee! M-baa gbíntìi dáá bí dimaŋfalinaaa?» Ama u-nabiyaamu wunti nìn kpíì u-nimbiin ní baa ŋúń ki kíí-u. 4Ní u bí-bi yii: «Ní sútiń kí pìl̄-maa!» Ní bi sútì ki pìl̄-u. Ní u bí-bi yii: «An sá man Jooseefi, ni-nabiki kin ni nìn dūu nyáfì bi cáá-mi ki cūnnì Eejipitee. 5Ama kɔŋkɔnnee, ni-pɔbiliŋ ń taa bīil̀, án taa wà-ni mun yii ni dū-mi ki nyáfì bi cáań-mi doo. An sá Unimbɔti di dū-mi ki péé ki līntìń ḿ dāá nīn bí doo kí ŋmā kí fīī-ni ní taa kpú. 6Di sá yii ŋkùm nín nyáń kitiŋ pu nee, abin ali sèé. Abin aŋmoo ŋin mun dòoń nee, ubɔ kaa làá kpɔ̀ tikpaalaaa, kaa làá cā tijin mun. 7Unimbɔti di túnní-mi ḿ lìntīń ni-nyɔkɔpu, án nín làá ŋá pu ní taa kúntí kitiŋ pu, ama ú dū u-pɔŋkpaaŋŋu kí fīī-ni ní ŋmátée. 8Míǹ puee an kaa sá nimbi di yāntì ní m dɔ́miń doo, Unimbɔti di cáań-mi. Úǹ di kāaǹ-mi ḿ nīn sá kii Faaroo kpambal ki kpòotī-u, kí nīn sá u-dicaŋkun ukpil, ní kí nīn sá Eejipiti tiŋki kɔkɔ gɔminau. 9An puee ní gítí m-baa cee malaa kí tùkù-u yii u-jipɔɔn Jooseefi nín tú bí tùkù-u puee sèé: <Unimbɔti dū-mi ki kāaǹ Eejipiti tiŋki kɔkɔ kpiliu. Míǹ puee dāan̄ m-cee malaa, á taa tàan̄ní. 10A làá nīn kóò Gooseen tiŋgbaŋkin ní ki pìlīǹ-mi, sii nì a-biyaamu nì a-naantiibi nì a-piii nì a-naai nì tin kɔkɔ a pée cááyee. 11M làá nīn kpèé-si niin, sii nì a-dicaŋku nì a-waŋkuti kɔkɔ, án nín làá ŋá pu tiba nì tiba ń taa lóó-see, kun puee an gíti kíǹ abin aŋmoo ní ŋkùm ń jītí.>»

12Ní Jooseefi kútì ki lī yii: «Kéè nimbi ni-ba ká nì ni-nimbiliŋ, m-naal Beenjameen mun ká nì u-nimbiliŋ yii an baasii sá man di bíi sòoǹ nì naa! 13Ní māafì m-baa tinyool paaŋŋu ŋun poon m bí Eejipiti tiŋkin nee nì tin kɔkɔ ni kée, kí ŋá malaa kí cáań-u m-cee doo.» 14U sòon̄ míǹ ki dóòyee ní ki bìb̄ u-naal Beenjameen ní bi-silii pá tɔb gbigbipati pu ní bi-liitil bíi sūǹ. 15Ní u bìb̄ u-nabiyaamu mun kíǹee mun ki súń. Míǹ boonee ní u-nabiyaamu nín ŋúń ki sòon̄ nì u.

Faaroo yíiń Jaakɔb ú dāan̄ Eejipiti

16Ní an gbītì ki bàn̄ Faaroo cindin yii Jooseefi nabiyaamu bāań, ní an mɔ́ɔkiǹ Faaroo nì u-naacimbi. 17Ní Faaroo bí Jooseefi yii: «Tùkù a-nabiyaamu yii bí túń bi-mammu tijin kí nīn gítí Kanaan tiŋkin. 18Bi yaa bàn̄ee, bí yòon̄ní bi-baa nì bi-dicaŋŋi kí cáań m-cee doo, ḿ lēē Eejipiti tiŋki dijandi din pée ŋān̄ee kí tīī-bi, ní bí nīn jīǹ tijimmɔntiil tin kitiŋ gbanti lòoǹee. 19Yàntī a-nabiyaamu ń yòon̄ tɔrɔkub Eejipiti doo kí cùú yòon̄ní bi-nimpoobi nì bi-biyaamu nì bi-baa kí cáań doo. 20Bí taa yāliŋkì tin bi làá yīkìí fáń lapuee pu, kun puee Eejipiti tiŋgbaŋki kin cáá tikɔkɔ nì tikɔkɔee poon ní bi làá nīn bí.»

21Ní Jaakɔb jipɔmbi ŋá kii bi nín sáŋkì-bi puee. Ní Jooseefi tīī-bi tɔrɔkub kii Faaroo nín bí yii ú ŋá puee, ní ki tīī-bi tijin tin bi làá nīn jīǹ nsannee. 22U pú u-nabiyaamu kɔkɔ dibɔkutipɔndi diba diba, ní ki tīī Beenjameen úǹ animbil jitɔmbi alaataa ata nì abɔkutipɔɔn aŋmoo. 23U dū tiwammɔntiil tin bí Eejipitee tiba ki túǹ mmanjamu saalaa, ní mmansalimu saalaa mun tú tijin bí cáá tīī u-baa ú nīn jīǹ ki dòoń. 24Ní u kpáafì u-nabiyaamu yii: «Ní taa tin já nsanni.» Ní ki pú-bi nsan bí nīn kùǹ. 25Niinee bi yíkì Eejipiti ki nín cá, ki tin bàn̄ Kanaan tiŋkin bi-baa Jaakɔb cee. 26Bi bàn̄ee ní ki tùkū-u yii: «Jooseefi gbíntìi dáá bí dimaŋfalin, úǹ di sá gɔmina Eejipiti tiŋkin.» Ama an kaa nìn kɔ́ Jaakɔb pɔbilin, di sá yii waa nìn fōō tin bi lēe ki kíí. 27Bi nín máafì Jaakɔb tibɔti tin kɔkɔ Jooseefi sòon̄ nì bee, nì u nín ká tɔrɔkub bin Jooseefi tīiń bí dāan̄ kí yòon̄-uee, ní u nín fīntì ŋgeem pu. 28Ní Jaakɔb bí yii: «M-biki Jooseefi gbíntìi bí dimaŋfalinaa! An ŋmāntì, maa ti pée là tiba kí kūtì. M làá cùú ká-u ní kí nín kpú.»

Currently Selected:

Genèse 45: BASSARDC

Highlight

Copy