Genèse 43

Jaakɔb kíí Beenjameen ń nóó u-mambi

1Ŋkùm nìn mɔ̄tìi bíi pɔ́ɔkí Kanaan tiŋkin. 2Bi nín jíń tijin tin bi dánní Eejipitee ki dóòyee, ní Jaakɔb bí u-jipɔmbi yii: «Ní gítímaan kí cùú dāń-ti tijin.» 3Ní Juuda kíí-u yii: «Uninjee nìn baasii kpáafì-ti ní ki lī yii: <Ni yaa kaa cáań ni-naal, m gíti kpá kí fōō-ni.> 4An puee a yaa kíí Beenjameen ń nóó-ti kí cùee, ti làá cùú dāń-si tijin. 5Ama a yaa yíì yii tí taa kpáaǹ-uee, ti mun kaa làá cù, kun puee uninjee baasii tùkū ki cántì-ti ní yii: <Ni yaa kaa cáań ni-naal, m gíti kpá kí fōō-ni.>» 6Ní Jaakɔb bí yii: «Nimbi di ŋá-mi míǹ. Ba pu ní ni bàà tùkū-u yii ni gíti cáá naal ubɔ ní?» 7Ní bi kíí-u yii: «Uninjee di páb́-ti ki bālifì ti nì ti-dicaŋku poon bɔti yii: <Ni-baa báaa? Ni gíti cáá naal ubɔɔɔ?> Tin u bālifèe ní ti kíí-u. Taa ŋūǹ kí béé yii u làá lì yii tí cáań ti-naalaa!»

8Ní Juuda bí-u yii: «M-baa, dū Beenjameen kí kpàan̄ man tí yīkì kí cùú cáań tijin tí jī kí ŋmátí. Tí taa nín̄ kā míǹ, timbi nì sii nì ti-biyaamu kɔkɔ ń dāá kpú ŋkùm. 9Tin kɔkɔ yaa láa bāań u-puee, man fōō ki ŋá m-ba, á dāá bàlifì-mi. M yaa kaa gíiǹní-u ki ŋúbiǹ-see, ḿ nīn pée sá ukpiti a-cee kí nīn cá jaanjaan. 10Ti yaa kaa bàà bíil̀ ŋyuntee, naŋkɔnampu ti bàà gítìmaan mili mili ki cáań tijin.» 11Ní bi-baa kíí-bi yii: «Too, an nín sá yii míǹ ní tí pée ŋée, ni nín làá ŋá puee sɔ̀. Ní nyàab̀maan ti-tiŋki doo wammɔntiiti tiba kii talaalub nì ikpafi nì tisiil, nì asubil ŋin bi yíì piistaasi nì amandee kí cùnnì kí pɔ̄ uninja gbanti. 12Ní ŋúb́ animbil mili pu kí fàtīí gíiǹ ŋin bi nìn dūu ŋá ni-kutukubinee kí tīī-bi. An yaa yíì, an nìn ŋá-bi inaatuu ní. 13Ní yīkìmaan kí kpáaǹ ni-naal kí nīn gítí uninjee cee. 14Unimbɔti Mpɔŋkɔdaan ń yàntī uninjee ń tin sɔ̄ ni-saai kí yàntī Beenjameen nì Simeeyɔn ń nóó-ni kí fàtīń. An yaa kíǹ mamee, m làá nīn pée kā kii maa pée màl̄ ki kée ní.»

Jooseefi sòon̄ nì u-mambi nliliitiim

15Niinee ní bi bɔ́ntì tiwampɔkaal ní ki yōoǹ animbil mili pu, ki kpáaǹ Beenjameen ki nín cá Eejipiti ki tin bàn̄ ki kɔ́ ki yúl̀ Jooseefi nimbiin. 16Ŋyunti ŋun Jooseefi ká Beenjameen nóoń-bee ní u bí u-tɔntɔŋkpiliu yii: «Cáá binib nee kí cùnnì m-dumpu kí kpɔ̀ kuwaŋkuluu kubɔ kí ŋá tijin, di sá yii man nì bi di làá jī ŋwiimpu nee.» 17Ní uninjee cáá-bi ki cūnnì Jooseefi dumpu kii Jooseefi nín bí yii ú ŋá puee. 18Ŋyunti ŋun bi bàn̄ ki làá kɔ́ Jooseefi dumpuee ní tifaandi kɔ́-bi, ní bi bíi lì yii: «Ti nín nìn péé péé ki dɔ́miń bi gíiǹ animbil ŋin ki ŋá ti-kutukubinee, an pu ní bi cáań-ti doo kí sàaǹ-ti án bà-ti, kí fōō ti-mammu ní kí dū-ti kí ŋá iyumbu.» 19Bi làá kɔ́ee, ní ki sútì ki pìl̄ Jooseefi tɔntɔŋkpiliuee kipunyɔkɔpu ki sòon̄ nì u. 20Bi nìn lī yii: «Ti gbāam̀-si, ukpil! Ti nìn pée dɔ́miń doo ki dá tijin. 21Ti nìn fàtīi kùǹ ki bàn̄ laaba kunyeeu mɔ́ ti làá dòon̄ ki gútì ti-kutukubee, báà ŋma nimbiliŋ nì ŋi-nyɔkɔm kā u-kutukuun. An puee ti fātìi gíiǹní animbil gbanti. 22Ti gíti ŋúbiń animbil aba mun kí dā tijin. Di sá taa nyí un di yaa nìn dū ti-nimbiliŋ ki gíiǹ ki ŋá ti-kutukubinee.» 23Ní utɔntɔŋkpilee kíí-bi yii: «Yàntīmaan ni-pɔbiliŋ ń nīn sɔ̀m̀, ní taa fàŋkì tiba. An sá ni-Nimbɔtiu, ni-baa Nimbɔtiu di dū tigaajati ki ŋá ni-kutukubin. Ni-nimbiliŋee nìn kɔ́ m-ŋaan.»

U sòon̄ nì bi míǹ ki dóòyee ní ki cūtìi nyántìń Simeeyɔn ki tīī-bi. 24Ní utɔntɔŋkpilee cáá-bi ki kɔ́ǹ Jooseefi dumpu, ki tīī-bi nnyim bi fíntì bi-taaŋi, ní ki tīī bi-mammu timool. 25Ní bi bɔ́ntì tiwampɔkaal tin bi cáań kí pɔ̄ Jooseefee ki yóoǹ kí wàatī ú nín bàń kuwiŋkuluu, kun puee bi nìn gbìl̄ yii niin ní bi làá jī tijin. 26Ŋyunti ŋun Jooseefi bāań mmɔŋkee, ní bi yōoǹní bi-wampɔkaati ki cūtì u-cee ki gbāaǹ u-nimbiin ní ki dūu tīī-u. 27Ní Jooseefi jáam̀-bi ki bālifì bi-gbampɔŋŋu pu, ní ki bí-bi yii: «Ni-baa utikpil un bɔti ni nìn sòon̄ m-ceeyee pɔ̄ɔ̄ tiŋanaaa? U gbíntìi dáá bí dimaŋfalinaaa?» 28Ní bi kíí-u yii: «Iiin, a-tɔntɔnliu ti-baa pée pɔ̄ɔ̄ ní. U dáá gbíntìi bí dimaŋfalin.» Bi lī mimmee ní ki fātìi tí gbāaǹ u-nimbiin. 29Jooseefi yáatì ki ká Beenjameen, u-naal u nì un pēē dinabiilee ní ki bí yii: «Ni-naal ujoolkaa un bɔti ni nìn sòon̄ nì mee sɔ̀ɔɔ?» Ní ki gíti kútì ki lī yii: «Unaacimpɔɔn, Unimbɔti ń bìin̄ a-boon.»

30Jooseefi nín ká u-naal mimmee, ní an kɔ́-u tikpil ní waa ti ŋūǹ kí cúú u-ba nnyinnyim ń taa nyā, ní u ŋá malaa ki kɔ́ u-diikun ki súń. 31U súń ki dóò ki fíntì u-nimbiin ki nyánnée, ní ki cúú u-ba ní ki bí yii bí yóoń-bi tijin. 32Ní bi gāntì Jooseefi sambil di-ba ní ki gāntì u-nabiyaamu bi-ba ní ki gāntì Eejipiti yab bin dɔ́miń kí jēe mun bi-ba. Di sá yii Eejipiti yab kaa nìn ŋūǹ bi nì Eebru yab ń kpāfìí jī disambibaantiilin. An nìn sá Eejipiti yab cee dikoobil ní. 33Ní bi kāaǹ Jooseefi nabiyaamu u-nimbiin ki túĺ-u, bi kā ki dī tɔb ki nóó nì bi nín kpíǹ tɔb puee, ki kíĺ ujipɔŋkpil ki tin kátì un jóol̀ dibiil puee, ní bi kā ki kpèé tɔb, ní an ŋá-bi bitii. 34Ní Jooseefi yāntì bi lēē tijin tin bi ŋá ki tɔ́kɔǹ u-nimbiinee ki yākatì-bi. Bi nín yākatì báà ŋma tijin miŋyee, u yāntì bi tīī Beenjameen míǹ miŋmoo pu ní. Ní bi nì Jooseefi jíń ki nyùn̄ ndaam ki bál̀ ní an nyāatì-bi.

Currently Selected:

Genèse 43: BASSARDC

Highlight

Copy