Actes 5

Ananiyasi nì Safiira bɔti

1Ama, uninja ubɔ nìn bí, bi yíì-u Ananiyasi. U nì u-nimpuu Safiira nìn kpáfì ki nyáfì bi-kpaatanti, 2ní ki bātì animbil, ki kíǹ ŋin kíǹee ki cáa bíl̀ Yeesu kpambaliŋ nimbiin. U-nimpuu mun nìn nyí min u-cal ŋée. 3Ní Peetroo bí yii: «Ananiyasi, ba ŋá ní a yāntì Sitaan jíń a-pɔbil poon mpaan míǹ#5.3 Dūú ŋmàntī nì Yoow 13.2.? A mɔ́ntì Unimbɔti Fam ki bātì tikpaatan nimbiliŋ pu. 4Sii di yì a-kpaatanti, a ŋūǹ kí dū-tì kí yóoń. A nín tí nyáfì-tèe, sii di yì an nimbiliŋ. Kin an ŋá mana ní a yāntì nlandɔkɔkpiti fōō mpaan a-pɔbil poon míǹ? An kaa sá binib ní a mɔ́ntì, an sá Unimbɔti.» 5Ŋyunti ŋun Ananiyaasi gbìl̄ mimmee, ní u lítì ki kpíì. Tifaandi nìn kɔ́ bin kɔkɔwoooo gbìl̄ an bɔtee. 6Ní binaacimpɔmbi yíkì ki dū sata ki bīiǹ-u, ní ki yōoǹ-u ki cáa síb́.

7An yúntì ki bàn̄ kii tikúti titee, ní u-nimpuu kóoń, kaa kpáàa béè tin jítèe. 8Ní Peetroo bālifì-u dinyɔɔbundi yii: «Tùkù-mi, ni nín nyáfì tikpaatan puee nimbiliŋ sɔ̀ɔɔ?» Ní u kíí yii: «Iiin, ti nín nyáfì puee dee.» 9Niinee Peetroo bí-u yii: «Ba ŋá ní sii nì a-cal kpáfì ki cɔ́ŋkì ti-Dindaan Fam míǹ? Kpèè, bin síb́ a-calee di dòoń kupunyɔkɔpuee! Bi làá dāá yòon̄ si mun.» 10Kpalaa niinee, ní u mun lítì Peetroo taaŋi taapu ki kpíì. Binaacimpɔmbi kóońee, ki ká u kpíì, ní bi yōoǹ u mun ki cáa síb́ ki kɔ́ĺ u-cal. 11Tifaandi nìn kɔ́ Kriisitoo nikitil kɔkɔ nì bin kɔkɔ nìn pée gbìl̄ an bɔtee.

Bi nín nìn ŋáań maamaacib puee

12Yeesu kpambaliŋ nìn ŋáań tidaandi nì maamaacib tikpil samaa kansikin. Bin fōō ki kííyee nìn kpáfí dicilpu dibɔɔbaantiil Saloomɔn kadantikuu taapu. 13Tifaandi nìn kɔ́ bin kaa fōō ki kííyee, ní bi-kansikin báà ubɔ kaa ti là kí sútíí pìl̄-bi, ama nì míǹ kɔkɔee bi nìn pàkà-bi. 14Bininjab nì binimpoobi bin nìn fòol̄ ti-Dindaan ki kíikée nìn wīikí tikpil, ki gbēentí ŋyunti kamaa, ní ki dūu ŋá dinikitikpaandi. 15An yāntì áli gba binib cāabìń bibunliibi ki bīil̀ nlambamu nì tikampati pu adan pu, án nín làá ŋá pu Peetroo yaa jītée, u-jiliŋku kpaŋkpam ń lítí biba puee. 16Binib tikpil mun nìn nyēeń ntimu mun kaa dátiǹ Jeerusaleemee, ki cāabìń bibunliibi nì bin pu arasiniibi nìn kā bi wáatèe, ní bi-kɔkɔ kāntí dicáaǹdi.

Bi sāaǹ Yeesu kpambaliŋ

17Niinee usaraaŋakpil nì u-yab kɔkɔ, an dàkà yii Sadusab jandi, kíǹ ki ná Yeesu kpambaliŋ. 18Bi nìn yíkìi cúú Yeesu kpambaliŋ ki pīiǹ-bi kudii. 19Ama ní kunyeeuee ti-Dindaan tuuŋŋu ŋubɔ dɔ́miń ki pīitì kusarkadii punyɔmmu ki nyántì-bi, ní ki bí-bi yii: 20«Cù kí yūĺmaan kunimbɔtidii poon kí dū dimaŋfal bɔti kɔkɔ kí sòoǹ, samaa ń gbìl̄.» 21Bi gbìl̄ mimmee, ní ki péé kutaafaau ki kɔ́ kunimbɔtidiin ní ki kíĺ ki bíi dàkà Unimbɔti bɔti.

Niinee, usaraaŋakpil nì u-yab bāań ki yíiń bibɔsoonliibi kitil. Bi kpáfì ki tú bí yíiń Yeesu kpambaliŋee kusarkadiin. 22Pilisib bàn̄ee, kaa ká-bi kusarkadiin, ní ki fātìi gítìń ki tùkū-bi yii: 23«Ti bàn̄ee, kusarkadii pīī kpálkpal, ní soojab yú mpunyɔmu nyɔkɔpui, ní ti cúu pīitèe, báà ubɔ nì ubɔ kpá poon!» 24Bi gbìl̄ mimmee, ní bin kpèé kunimbɔtidiiyee kpiliu nì bisaraaŋakpilib bākatì nì Yeesu kpambaliŋ nín wáŋkì puee, kun puee tiba yaa làá gíti bàń-bi tibɔti nee poon sɔ̀, baa nyí. 25Ní ubɔ bāań ki bí-bi yii: «Binib bin ni cúú ki tɔ́ sarkanee di yú kunimbɔtidiin ki dàkà samaayee.»

26Ní bin kpèé kunimbɔtidiiyee kpiliu nì u-pilisib cūtì ki cáań-bi soooo, kaa ŋá-bi mpɔn, kun puee bi fàŋkí samaa ń taa tɔ̄-bi ataŋkpee.

27Bi cáań-bee, ní ki cáá-bi ki cūnnì bibɔsoonliibi kitil nimbiin. Ní usaraaŋakpil bālifì-bi tibɔti yii: 28«Taa bí-ni yii ní taa ti sòoǹ diyindi din pu ni sòoǹ nee pu kpataaa? Kpèèmaan, díǹ pu nee ni yāntì ni-bɔti gbanti gbītì Jeerusaleem kɔkɔ! Mimmee, ni là timbi ń jī kijapaai nee kpuulool deeyaa#5.28 Dūú ŋmàntī nì Maat 27.25.!» 29Ní Peetroo nì Yeesu kpambaliŋ ŋin kíǹee, kíí-u yii: «An máaǹ tí gbìl̄ Unimbɔti nyɔkɔ kí yàntī binib. 30Nimbi di kpáá Yeesu ndɔpuntikaa pu ki kūū-u, ní ti-naanjab Nimbɔtiu fīkitì-u. 31Unimbɔti dū-u ki kāaǹ u-ŋaŋgiil pú, ú nīn sá Ubɔti nì Ufiil ki tīī Isirayeel yab bí ŋmā kí fá bi-kpitii, Unimbɔti ń dūú pɔ̄-bi. 32Timbi nìn ká ki sá biseeradambi an bɔti pu, ki kpáaǹ Circir Fam min Unimbɔti tìì bin tɔ́-uee.»

33Bi gbìl̄ an bɔtee, ní ki fōō diŋuul ki là kí kpɔ̀ akpambal. 34Ama Fariisab kansikin ubɔ nìn bí niin, bi yíì-u yii Gamaliyeel#5.34 Gamaliyeel nìn sá Juuda yab dàkaliu ubɔ un nyáń dinyindee ní. U nìn bí u-timbundi bɔsooŋkpaambi kitilin ní ki nìn dàkā Pɔɔl mun (22.3)., u sá umaradakal un samaa kɔkɔwoooo nìn tɔ́ee. Kijapaayee nìn yáatìi yúl̀ bibɔsoonliibi kitil kansikin ki pú kinyɔkɔ yii bí dá láá nyāntí akpambalee. 35Ní u bí-bi yii: «Isirayeel yab, ní kpèèmaan tiŋan nì tin ní ni là kí ŋá nì njapaamu nee! 36An kaa yúntì ní un bi nìn yíì Teedasee yíkì ki yíì u-ba yii u sá unikpaan, ní binib bàn̄ kii tilaafati tili ki nóó-u. Ní bi kūū-u ní bin kɔkɔwoooo nìn nóó-uee yàl̄, báà ubɔ kaa ti kíǹ. 37Úǹ boonee, ní Juudasi ugaaliileeja mun yíkì ŋyunti ŋun bi kàan̄ binibee, ní ki dáaliń kunipaau ki gíiǹ u-jandi pú. Ní bi kūū u mun ní bin kɔkɔwoooo nìn nóó-uee yàl̄. 38Míǹ puee, tin m cáá ki làá tùkù-nee di sá yii, ní càntīmaan binib nee kí taa ŋá-bi tiba, kun puee atuun ŋin bi ŋáań nee yaa nyánní binib cee, ŋi bí kí dāá kúntí. 39Ama an yaa nyánní Unimbɔti cee, naa ŋūǹ kí pìin̄-bi nsan. Ní kpèèmaan tiŋan kí taa jáǹ Unimbɔti kujaau!» 40Niinee, bi-kɔkɔ kpáfì ki gbìlīǹ-u ní ki yíiń Yeesu kpambaliŋ, ní ki gbáń-bi anaalab, ní ki bí-bi yii bí taa ti sòoǹ Yeesu yindi pu, ní ki gíiǹ-bi ki líì. 41Nì dipɔɔpindi ní Yeesu kpambaliŋ nìn nyáń bibɔsoonliibi kitil nimbiin, kun puee Unimbɔti ŋá-bi tinyool ki yāntì bi jíń falaa Yeesu yindi pu. 42Ní baabadal bi bí kunimbɔtidiin, nì binib dumpui ki sòoǹ ki dàkà tibɔmɔntiil tin sòoǹ Yeesu, Meesiya puee, kaa gbèentí.

Currently Selected:

Actes 5: BASSARDC

Highlight

Copy