Actes 20

Pɔɔl cūtì Maseeduwaan nì Greeki timmun

1Fìkil fikilee jítèe, ní Pɔɔl yíiń Kriisitoo yab, ki tīī-bi kunyannyaau, ní ki kāaǹ-bi, ní ki yíkì bi-kansikin ki búntì Maseeduwaan. 2U dī Maseeduwaan tiŋgbammun, ki sòon̄ nì Kriisitoo yab ki sáŋkí-bi tikpil ki wāatì ní ki nín bàn̄ Greeki tiŋkin. 3U nìn ŋá niin iŋmal ita ní. Ŋyunti ŋun u bɔ́ntì ki làá kɔ́ meela kí nīn cá Siiriiyee, ní u béè yii Juuda yab sòon̄ ki bɔ́ntì nsàmbiyaamu mun pu bi làá dī kí kpɔ̀-uee. Niinee ní u fātìi dūu dīń Maseeduwaan pú. 4Bin nìn nóó-uee di sá: Sɔpateer, Piirusi jipɔɔn un nìn sá Beereeyee, nì Ariistaarki nì Seekundusi, bíǹ sá Teesalooniiki yab, Gaayusi un sá Deebee, nì Tiimootee nì Tiisiiki nì Troofiim, bíǹ nyánní Asii. 5Bíǹ kɔkɔ nìn līntì ki cūtìi cíitì-ti Troowaasi. 6Iwiin in poon Juuda yab ŋmóò kpɔnɔb bin baa ŋá ŋkpɔnɔnyɔkɔee boonee, timbi kɔ́nní meela ki yíkìń Fiiliipi tiŋkin, ki ŋá iwiin iŋmoo ní ki nín bàn̄ bi-cee Troowaasi, ní ki ŋá iwiin iluli niin.

Pɔɔl taaluŋkikaal Troowaasi tiŋkin

7Kinyɔŋ wimpeepeekaaŋu dalee, ti nìn kpáfì kí jī ti-Dindaan jikaati, ní Pɔɔl kíĺ ki bíi sòoǹ nì bin kpáfì niinee. U nìn sòon̄ ki yúntì tikpil, áli kunyataasiiu tikúti saalaa nì tili, kun puee an nìn sá kutaa ń wúntí ú yīkì ní. 8Fitilab nìn wīikí diditɔntɔkɔl din poon ti nìn kpáfèe ni tikpil. 9Unaacimpɔɔn ubɔ nìn bí niin, bi yíì-u Eetiiki. U nìn kā diditɔntɔkɔl tɔkɔlau nyɔɔgbandi pu. Ŋyunti ŋun Pɔɔl gbíntìi bíi sòoǹ nì bi ki cée, ní ŋgeem cúú-u. U bíi gèeǹ tikpil tikpilee, ní ki dāa kpáàa nyánní diditɔntɔkɔl yilpu kuditataatiiu poon ki lítì kitiŋ. Bi pée yōoǹ-uee, u kpíì ní. 10Niinee ní Pɔɔl kpákatìń ki bōoǹ ki yōoǹ-u ní ki bí yii: «Ni-pɔbiliŋ ń taa máĺ, kun puee u fātìi jɔ́mìń!» 11Ní u fātìi nín jɔ́ḿ ki cūtìi yākatì kpɔnɔb bi ŋmɔ́, ní u fātìi tí kíĺ ki bíi sòoǹ nì bi áli kutaa nì ku-wuntil, ní boonee u dāa nín yíkì. 12Ní bi fātìi gíiǹ unaacimpɔɔnee u-dumpu nì alaafiya, ní an nìn mɔ́ɔkiǹ báà ŋma tikpil.

Pɔɔl yíkì Troowaasi ki búntì Miilee

13Ní timbi kɔ́ meela ki līntì kí cùú kíntí Pɔɔl Asoosi tiŋkin, kii u nín nìn pée sòon̄ puee, kun puee úǹ làá dāá còomìń ataa pu ní. 14U bāań ki ká-ti Asɔsee, ní ti yōoǹ-u ki nín cáa cá Miitileen. 15Niinee ní ti nín nìkì. Áli kutaa nì ku-wuntilee ní ti dūu bàn̄ Kiyoo. Ku tí wúntèe ní ti dūu bàn̄ Samɔsi, ní ku gíti tí wúntèe ní ti yúl̀ Troogiliyɔn ní ki nín bàn̄ Miilee. 16Pɔɔl nìn lēē yii u là kí gɔ́ntí Eefeesi kí taa bīil̀ ŋyunti kitiŋ gbantin. Míǹ pu ní u nìn túĺ dicancaal, án ŋá-u malaa u yaan ŋūǹ, ú bàà nín̄ bí Jeerusaleem Pantikooti wiiŋŋu dal.

Pɔɔl kāaǹ Kriisitoo nikitil kpilib bin bí Eefeesee

17Pɔɔl bí Miileeyee, ní ki tú bí cù Eefeesi kí yíiń niin Kriisitoo nikitil kpilib. 18Bi bāań u-ceeyee, ní u bí-bi yii: «Kéè, nimbi ni-ba nyí doooo ŋwimpeekaa ŋun m kóoń Asii tiŋkinee m nín bí nì ni baabadal miŋyeeyaa! 19Míǹ ní m nìn sīntiǹ m-ba ki túń ti-Dindaan tundi nì nnyinnyim, ki bí falaabi kansikin kun puee Juuda yab nìn nyàab̀ isan kí kpɔ̀-mi. 20Míǹ ní ni nyí yii maa nìn bál̀ tin ŋūǹ kí tūtuǹ-nee báà tiba, ki sòoǹ ki dàkà-ni Unimbɔti bɔti laakin binib kpáfée ki kpáaǹ ni-dumpui. 21M nìn sáŋkí Juuda yab ki kpáaǹ Greeki yab tiŋan, yii bí fá ikpiti, kí fōō ti-Dindaan Yeesu kí kíí kí nóó Unimbɔti. 22«Kɔŋkɔnnee, m làá nīn cá Jeerusaleem dee kii Unimbɔti Fam nín bí ḿ ŋá puee, kaa nyí tin làá ŋá-mi niinee. 23Ama ntimu mun kɔkɔ poon m jītée, Circir Fam tùkù-mi yii sarka nì dinimbinaamandi dɔ̄ ki cí-mi. 24Ama, man maŋfal bɔti kaa páb́-mi, a lì kii an kaa sá-mi tiwammɔntiil tibee ní. Tin di páb́-mee di sá ḿ tɔ̄ ditundi din m fōō ti-Dindaan ceeyee: díǹ di sá ḿ sòoǹ Tibɔmɔntiil kí tùkù binib dineendi din Unimbɔti cáá ti-puee#20.24 Dūú ŋmàntī nì 2 Tiim 4.7..

25«Míǹ puee, nimbi bin cee m jítì ki sòon̄ Unimbɔti Beel pu bɔtee, kɔŋkɔnnee m nyí yii naa làá ti ká-mi. 26An di yì-tì ní m tùkù-ni an bɔti díǹ kí síiń, boonee, ubɔ yaa láa gíti wáŋkèe, an kaa dāa gíti sá m-cee. 27Di sá yii m tùkū-ni kaa bál̀-ni Unimbɔti nín là kí dāá ŋá min miŋyee kɔkɔ. 28Míǹ puee, ní kpèèmaan ni-ba tiŋan, kí kpèèmaan dinikitil din pu Circir Fam lēē-ni yii ní nīn sá bikpilibee, kí kpòotī Unimbɔti nikitil din u dū u-ba fatikuu ki dée tiŋan. 29M nyí yii, m-kpátam boonee, binib làá dāá kóoń ni-kansikin. Baa làá dāá tàan̄ dinikitil gbanti, a lì kii agbiŋgbil nín cáá ntoom, kaa tàantí dipikitil puee. 30Míǹ ní ni-kansikin bininjab biba mun làá dāá yòon̄ tinyimɔmbɔti kí sòoǹ kí ŋmàtiǹ Kriisitoo yab biba ń nīn nóó-bi. 31Míǹ puee, ní nīn nyímaan nì ni-ba kí nīn téetí m nín nìn sáŋkí-ni pu nì nnyinnyim ŋwiimpu nì kunyeeu áli abin atee.

32«Kɔŋkɔnnee, m dū-ni ki ŋá Unimbɔti ŋaan, ní nīn ŋúb́ u-bɔmɔntiitee. Tíǹ di cáá mpɔn kí yàntī ní béé Unimbɔti bɔti tikpil kí dāá fōō ipaati in u síiǹ kí tīī bin kɔkɔ sá u-yabee. 33Ni nyí yii man kaa nìn là ubɔ nimbiliŋ, kaa nìn là ubɔ mun bɔkutil. 34Nimbi ni-ba nìn nyí yii nì m-ŋalii in bí nee ní m nìn cáa tūǹ ditundi ní man nì bin nìn nóóyee jīǹ. 35M dàkā-ni ni-kɔkɔ ń béé yii ni máaǹ kí nīn tūǹ ditundi tikpil kí ŋmā kí tūtuǹ biwɔfib, kí nīn téetí ti-Dindaan Yeesu u-ba nín nìn lī dinyɔɔbundi diŋyee, yii: <Á pɔ̄ tiwanee mɔ̄ ki jítiǹ bí pɔ̄-si.>»

36Pɔɔl lī míǹ ki dóòyee, ní ki gbāaǹ, ní u nì bi kɔkɔ bíi mèé. 37Niinee ní bi-kɔkɔ bíi sūǹ, ní ki dū bi-ŋalii ki kpàl̄ Pɔɔl. 38Tin nìn kɔ́ǹ-bi kunimbaauee di sá u nín lī yii dalba dalba baa làá ti ká-uee. Niinee ní bi céeǹ-u áli meela taapu.

Currently Selected:

Actes 20: BASSARDC

Highlight

Copy