Actes 18

Pɔɔl bí Kɔranti

1Míǹ boonee, Pɔɔl dāa yíkì Ateeni ki búntì Kɔranti. 2Niin ní u ká uninja ubɔ, bi yíì-u Akiilasi, u sá Ujuudaja ní bi màl̄-u Pɔnti. U nìn nyánní Italii ki bāań kpalaa u nì u-nimpuu Priisiil, kun puee gɔminakpaan Kloodi nìn bí yii Juuda yab kɔkɔ ń nyā Room tiŋkin. Niinee bíǹ nì Pɔɔl dūu píí tɔb kubɔɔtiiu. 3Kii bi-kɔkɔ nín nìn tūǹ ditumbaantiil puee, ní u kɔ́ bi-cee, ní bi kpáfì ki tūǹ ditundi dicilpu. Bi-kɔkɔ nìn sá bitantiluliibi ní. 4Ŋwiŋŋuŋfikaa dal sá kamaayee, Pɔɔl nìn pɔ̄ɔntí ní ki sòoǹ kukpafidiin kí ŋmā Juuda yab nì Greeki yab.

5Ŋyunti ŋun Siilasi nì Tiimootee dāa nyánní Maseeduwaan ki bàn̄ee, ní Pɔɔl dū u-yuntiŋu kɔkɔ ki kíǹ ki cáa sòoǹ Unimbɔti bɔti, ki tùkù Juuda yab yii Yeesu di sá Meesiya. 6Ama Juuda yab kaa nìn là min u sòoǹee, ní ki bíi sìí-u. Ní u gbáfì u-bɔkutiŋ#18.6 Dūú ŋmàntī nì Maar 6.11 nì tin bi ŋmàn̄ kugbɔŋu faaku taapuee., ki bí-bi yii: «Ni-busuu ń gítí ni-pu! Man nyáń ni-bɔtin. Kɔŋkɔnnee m làá nīn cá bin kaa sá Juuda yabee cee.» 7U nìn yíkì niin, ki cūtìi kɔ́ uninja un nìn tɔ́ Unimbɔti marabee dumpu, bi yíì-u Titiyusi Justuusi. U-dumpu nìn nákáǹ kukpafidii. 8Ní Kriisipusi kukpafidii kpiliu nì u-dicaŋku kɔkɔ fōō ti-Dindaan ki kíí. Kɔranti yab bin nìn gbìl̄ Pɔɔl nyɔɔbundee tikpil nìn fòol̄ ki kíikí ki yàntī bi fùul̀-bi Unimbɔti nyim.

9Kunyeeu kubɔee ti-Dindaan nyántì u-ba ki dàkā Pɔɔl ní ki bí-u yii: «Á taa fàŋkì, ama nín̄ sòoǹ kí taa gbèen̄, 10di sá yii m bí a-cee. Ubɔ kaa làá sútiń kí pìlīń-si ní kaa nín ŋá-si tikpitil. Kun puee, m cáá binib tikpil kitiŋ nee poon.» 11Pɔɔl nìn kāl̀ bi-kansikin dibindi diba nì dijandi, ki dàkà-bi Unimbɔti bɔti.

12Bi kāaǹ Galiyɔn gɔmina Akaayi tiŋkinee, ní Juuda yab kpáfì ki yíkìi cúú Pɔɔl, ki cáa cūnnì Galiyɔn nimbiin, 13ní ki bí yii: «Unil nee yàntī bi nōotí Unimbɔti mbamin, min ní marab kaa lēe.» 14Ŋyunti ŋun Pɔɔl bàà làá wàan̄ u-nyɔkɔ kí sòoǹee, ní gɔmina Galiyɔn bí Juuda yab yii: «Juuda yab, u yaa bàà ŋá tibɔkpitil tiba àá digaŋgam ubɔ, m bàà ŋūǹ kí pīlifiǹ-ni. 15Ama an yaa sá yii ni yaa bíi kpákà nimbi ni-ba marab pu tibɔti tiba nì ayin aba puee, m yíì, maa làá sòoǹ an bɔti. Nimbi ni-ba ń kpèè-tì!» 16Ní u jìn̄-bi ki nyántì. 17Ní bi-kɔkɔ cúú Sɔsteen kukpafidii kpiliu, ki bíi gbáà gɔmina nimbiin. Ní gɔmina kaa kpáàa fātìi tɔ́.

Pɔɔl gítìń Antiyɔɔsi

18Pɔɔl gíti kāl̀ Kɔranti ki yúntì fiii. Boonee, u dāa yíkì nnabiyaamu cee ki kɔ́ meela ki búntì Siirii, u nì Priisiil nì Akiilasi. Kí wàatī ú nín yīkì Saŋkireeyee, Pɔɔl nìn kōol̀ diyibaakpandi kí dàkà yii u pōoǹ kí ŋá tiba kí tīī Unimbɔti#18.18 Kpèè Dikà 6.5-18.. 19Bi bàn̄ Eefeesee, ní bin nì Pɔɔl nìn nóóyee gbíntì niin. Pɔɔl nìn kɔ́ kukpafidiin ki tí bíi sòoǹ nì Juuda yab. 20Binib gbanti nìn bíi mèé-u yii ú gíti kàl̄ iwiŋkaaŋkaa bi-cee. Ní waa kíí. 21U làá yīkì bi-kansikinee, ní ki bí-bi yii: «Unimbɔti yaa là, m dāa gítiń ni-cee dalba.» 22U yíkì Eefeesee, ki kɔ́ meela ki kpákatì Seesaaree, ní ki jɔ́m̀ Jeerusaleem ki jáam̀ Kriisitoo yab, ní ki fātìi sīntìń Antiyɔɔsi. 23U kāl̀ ŋyunti ŋubɔee, ní ki yíkìi cūtì Galaati nì Friijii timmu kɔkɔn, ki tìì Kriisitoo yab kɔkɔ kunyannyaau.

Apooloosi cūtì Eefeesi nì Kɔranti

24Ujuudaja ubɔ nìn bí, bi yíì-u Apooloosi. Bi nìn màl̄-u Aleekisandirii, ní u dɔ́miń Eefeesi. Uninja gbantee nìn sá un nyí ki sòoǹ tiŋanee, ki nyí Unimbɔti gbɔŋku mun tikpil. 25Bi nìn dàkā-u ti-Dindaan bɔti, ní u mun cáa sòoǹ deedee ki dàkà Yeesu bɔti nì kunyannyaau. Nì míǹ kɔkɔee, Yoowaneesi nyiŋfàltam baba ní u nìn pée nyí. 26Ní u mɔ̄tìi bíi sòoǹ ki cántí-bi kukpafidiin. Priisiil nì Akiilasi gbìl̄ mimmee ní ki yōoǹ-u ki cáa cūnnì bi-cee, ki mɔ̄tìi dàkā-u Unimbɔti saŋŋu páaa. 27Ní Apooloosi lēē yii u làá cù Akaayi. Niinee, nnabiyaamu tīī-u kunyannyaau ki ŋmàn̄ kugbɔŋu ki tīī Kriisitoo yab bin bí lapuee, yii bí fōō-u tiŋan. U nín bàn̄ niinee, nì Unimbɔti pɔŋŋu puee, u tútúǹ bin fōō Yeesu ki kííyee tikpil. 28Di sá yii, u nì Juuda yab nìn kpákà samaa nimbiin, ní u nìn sòoǹ ki líikí-bi, ki dàkà-bi Unimbɔti gbɔŋku poon yii Yeesu di sá Meesiya.

Currently Selected:

Actes 18: BASSARDC

Highlight

Copy