Actes 14

Pɔɔl nì Baarnaabaasi bí Ikooniyum

1Ikooniyum tiŋkinee, Pɔɔl nì Baarnaabaasi tí kɔ́ Juuda yab kpafidiikun mbaantiim, ki sòon̄ tiŋan, áli binib tikpil, Juuda yab nì Greeki yab, fōō ki kíí. 2Ama Juuda yab bin kaa fōō ki kííyee téé bin kaa sá Juuda yabee bí cùú ŋá Pɔɔl nì Baarnaabaasi tin kaa ŋān̄ee. 3Nì míǹ kɔkɔee, Pɔɔl nì Baarnaabaasi kāl̀ ki yúntì Ikooniyum ki sòon̄ ti-Dindaan bɔti, kaa fàŋkí, ní ti-Dindaan yāntì bi ŋáań tidaandi nì maamaacib kí dàkà yii bi nín sòoǹ u-ŋanti puee, an sá ibaamɔn. 4Ní kitiŋin yab cúu yākatì mili: biba bí Juuda yab jandi pú, ní bin kíǹee mun bí Yeesu kpambaliŋ jandi pú. 5Ní Juuda yab nì bin kaa sá Juuda yabee, ki kpáaǹ bi-bɔtiibi, kpáfì ki bíi bɔ́ntí ki là kí sàaǹ-bi, kí yāŋkì-bi ataŋkpee kí kpɔ̀. 6Pɔɔl nì Baarnaabaasi béè mimmee, ní ki sáǹ ki búntì ki tin bàn̄ Liista nì Deebi, ntimu mun bí Liikayoonii tiŋkinee, nì mu-kpaanceetii. 7Bi nìn bí niin ní ki sòoǹ Yeesu bɔmɔntiiti.

Pɔɔl nì Baarnaabaasi bí Liista

8Ufaliŋfaan ubɔ nìn bí Liista. Bi pée màl̄-uee, u-taaŋi fáká ní waa cōom̀ ki ká. 9Dalba uninjee bíi pílifí Pɔɔl nyɔɔbundee, ní Pɔɔl dū u-nimbikpeeŋu ki báaǹ u-pu, ki béè yii u cáá fookii Unimbɔti pu ki ŋūǹ kí ká dicáaǹdee, 10ní u téeń mpɔn yii: «Yīkìí yūĺ mɔ́lmɔl a-taaŋi pu!» Ní u nyīī ki yíkì kùrub ki bíi còom̄. 11Samaa nìn ká min Pɔɔl ŋée, ní bi bíi tátí nì Liikayoonii sooŋyin yii: «Awaa aba kpántì binib ki kpákatìń ti-cee!» 12Ní bi pú Baarnaabaasi diyindi yii Seeyusi, ní ki pú Pɔɔl mun yii Eermeesi#14.12 Suusi nì Eemasi: Suusi di nìn sá awaa bɔtiu, ní Eemasi sá awaa tuuŋŋu Greeki yab cee., kun puee úǹ di nìn sòoǹ nì samaa. 13Ní utandaan un nìn tòotī diwaal din bi yíì Seeyusi, di-diiku yú kitiŋ kpaanceetiŋuee, dūń nsupumpukum #14.13 nsupumpukum : Bi yaa nìn dū nsupumpukum ki léeǹ kuwaŋkuluu kuŋyee, an dàkà yii bi gāntì-ku ki síiǹ kí dūú tòotī dee. ki léeǹ inajaa ki cáań kitiŋ punyɔkɔpu, u nì samaa là kí dūú tòotī-bi. 14Yeesu kpambaliŋ Pɔɔl nì Baarnaabaasi gbìl̄ mimmee, an wùn̄-bi, ní bi cátì tiwan tin bi pēēyee ki sáǹ ki nín cá samaayee kansikin ki tátí yii: 15«Ti-yab, ba ŋá ní ni ŋáań míǹ? Ti mun pée sá binib kii nimbee ní, tiwumbaantiil. Ti bíi tùkù-ni Tibɔmɔntiil yii ní fá ni-waaŋi gbanti ŋin sá fámee kí nóó Unimbɔti un bée. Úǹ di náań yilpu nì taapu nì tiŋku, nì tin kɔkɔwoooo pée bée#14.15 Kpèè Disa 20.11, Ilan 146.6.. 16Ŋyunti ŋun jítèe, u nìn yāntì ditimbundi kamaa nóó di-saŋŋu. 17Nì míǹ kɔkɔee, u dàkā-ŋi u-laŋŋaŋfitiiku. Di sá yii u yàntī utaa nì#14.17 Dūú ŋmàntī nì Ilan 147.8, Yeer 5.24., tiwan lòoǹ, tijikaal gbóotí ki tìì-ni dipɔɔpindi.» 18Mpɔn nì mpɔn ní Yeesu kpambaliŋ dū tibɔti gbanti ki dūu pīiǹ samaa nsan bí taa ŋmā kí tòotī-bi.

19Boonee, Juuda yab biba nyánní Antiyɔɔsi nì Ikooniyum ki ŋúń ki ŋmātiǹ samaa. Bi nìn yáŋkì Pɔɔl ataŋkpee ki fùn̄-u ki cáa bíl̀ kitiŋ boon ŋkpaanceeti, ki dàkafī yii u kpíì. 20Ama Kriisitoo yab dāa dɔ́miń ki māntìi tú-u, ní Pɔɔl yíkì ki nín cá kitiŋin. Kutaa wúntèe, ní u nì Baarnaabaasi búntì Deerbi.

Pɔɔl nì Baarnaabaasi nín gítí Antiyɔɔsi Siirii tiŋkin

21Bi sòon̄ Tibɔmɔntiil kitiŋ gbantin ki yāntì binib tikpil kpántì Kriisitoo yab. Boonee ní bi nín gítiń Liista, Ikooniyum nì Antiyɔɔsi. 22Bi nìn tìì Kriisitoo yab kunyannyaau, ki sáŋkí-bi yii bí nīn pɔ̄ɔntí bi-ba fookii poon, ní ki bí-bi yii: «An sá nì falaakpaan ní tí nín ŋmā kí kɔ́ Unimbɔti Beelin.» 23Bi nìn lēekì bikpilib Kriisitoo nikitil sá kamaa poon. Bi bóob́ kinyɔkɔ ki mēē ki dóòyee, ní ki dū-bi ki ŋá ti-Dindaan un bi fōō ki kííyee ŋaan.

24Bi dīń Piisidii puee, ki bāań Paŋfilii. 25Bi sòon̄ Unimbɔti bɔti Peeji ki dóòyee, ní ki nín sìntī Atalii. 26Niin ní bi kɔ́ meela ki búntì Antiyɔɔsi, laakin Kriisitoo yab nìn mēē Unimbɔti ń tūtuǹ-bi atuun ŋin bi túńee puee. 27Bi bàn̄ee ní ki kpáfì Kriisitoo nikitil ki máafì tin kɔkɔwoooo Unimbɔti ŋá ki tīī-bee, nì min ní u pīitì nsan bin kaa sá Juuda yabee kɔkɔ ń fōō kí kííyee. 28Bi nìn kāl̀ ki yúntì fiii Kriisitoo yab cee.

Currently Selected:

Actes 14: BASSARDC

Highlight

Copy