Actes 10

Peetroo nì Kɔɔrneeyi bɔti

1Uninja ubɔ nìn bí Seesaaree, bi yíì-u Kɔɔrneeyi. U nìn sá usoojakpil disoojakitil din bi yíì Italii yalee kansikin. 2Uninja gbanti nìn nóó Unimbɔti ki sá unimɔnti, u nì u-dicaŋku kɔkɔ nìn fàŋkí Unimbɔti. U nìn pūǹ Juuda yab wɔfib tiwan ní ki mèé Unimbɔti baabadal. 3Dalbee, an cá kii tikúti titee, u ká Unimbɔti tuuŋŋu kpìrrr, ŋu kóoń u-cee ní ki bí-u yii: «Kɔɔrneeyi!» 4Tifaandi nìn kɔ́-u, ní u kíǹ ki bíi kpèé Unimbɔti tuuŋŋu, ní ki bí yii: «Ba ŋá ní, m-Dindaan?» Ní ntuun bí-u yii: «A-wimmeem nì a nín pūǹ tiŋyee bàn̄ Unimbɔti, ní u téetì a-pu. 5Tɔ̄ bininjab kɔŋkɔnnee Joopee bí yíiń un bi yíì Siimɔn ki páaǹ-u diyindi yii Peetrooyee. 6U bí ugbanjɔb un bi yíì Siimɔŋyee cee, un diiku bí tiŋku caŋinee.» 7Ŋyunti ŋun ntuun ŋun nìn dɔ́miń ki sòon̄ nì Kɔɔrneeyee búntèe, ní u yíiń u-tɔntɔnliibi bili nì sooja ubɔ un nìn bí u-cee ki fàŋkí Unimbɔtee. 8U nìn máafì-bi tibɔtee ní ki dū-bi ki tú Joopee.

9Kutaa wúntèe, bi bí nsanni ki tóob́ kitiŋ gbantee, Peetroo jɔ́m̀ kudii yilpu kuwiŋkuluu yuntiŋu kí mèè. 10Ŋkùm nìn cúú-u, u bàà là kí jī. Ŋyunti ŋun bi bíi ŋáań-u tijinee, ní an ŋá-u kii ŋgeemee. 11Ní kutagbɔŋu pīitì, ní u ká tiwan tiba bí kii satakpaanee bi bóob́ ajannaatil pu ki sīntìń kitiŋ u-nimbiin. 12Tiwan tin còom̄ ataa anaayee nì tin fùee nì nnɔmbiyaamu kɔkɔ nìn kā satee poon, 13ní nneen ŋubɔ bí-u yii: «Peetroo, yīkìm̄ kí kpɔ̀ kí ŋmɔ́!» 14Ní Peetroo bí yii: «Aayee, m-Dindaan! Maa láá pée jíń tijin tin kòóyee àá tin kaa bí circiree#10.14 Kpèè Akoo 11.1-47, Eesee 4.14..» 15Ní an gíti sòon̄ nì u nliliitiim yii: «Tin tin Unimbɔti ŋáŋkèe, sii ń taa lī yii taa ŋān̄#10.15 Dūú ŋmàntī nì Maar 7.15,19.!» 16An jítì míǹ diba dibee mita pu, ní tiwanee fātìi nín jɔ́ḿ yilpu.

17Peetroo bākatì ki kíǹ ki bíi dàkafī tin tin u bàà wál̀ee taapuee, niinee, bininjab bin Kɔɔrneeyi túnnée bālifì ki béè Siimɔn dumpu ki dɔ́miń ki yú kipunyɔkɔpu 18ki yíiń ki bālifì yii: «Doo ní Siimɔn un bi yíì Peetrooyee kóòoo?» 19Peetroo gbíntìi bíi dàkafī tin u bàà wál̀ee taapuee, ní Unimbɔti Fam bí-u yii: «Bininjab bita biba di nyàab̀-see. 20Yīkìí kpákatí, taa gùgufì, si nì bi kɔkɔ ń nīn cá, kun puee man di túnní-bi.» 21Niinee ní Peetroo kpákatìń, ní ki bí bininjabee yii: «Man un ni nyàab̀ee sèé. Ba di ŋá ní ni dɔ́miń doo?» 22Ní bi kíí-u yii: «Kɔɔrneeyi un sá usoojakpil ki bí deedee ki fàŋkí Unimbɔti, Juuda yab kɔkɔ sòoǹ u-pu yii u sá unimɔntee, Unimbɔti tuuŋŋu ŋubɔ tùkū-u yii ú yíiń-si, á dāan̄ u-dumpu ú pīlifì tin tin a cáá kí tùkù-uee.» 23Ní Peetroo fōō-bi ki bíl̀.

Kutaa wúntèe, u nì bi yíkìi búntì. Nnabiyaamu mun nìn bí Joopeeyee biba mun nìn céeǹ-u. 24Ku wúntèe ní u dūu bàn̄ Seesaaree. Kɔɔrneeyi nìn yíiń u-yab nì u-bɔɔtimɔntiibi ki kíǹ ki kā ki cí-bi. 25Ŋyunti ŋun Peetroo kóònée, ní Kɔɔrneeyi túŋkì-u ki gbāaǹ ki póofì-u kunɔpoou. 26Ama Peetroo yáatì-u, ní ki bí yii: «Yīkìm̄! Ma mun sá unil ní.» 27Bi bíi sòoǹee ní ki nín kóò, ní Peetroo bàn̄ ki ká kunipaau kpáfì ki kā. 28Ní u bí-bi yii: «Kéè, ni nyí yii an sá timbi Juuda yab dikoobil ti nì binicambi ń kpāfì àá tí kɔ́ bi-dumpuyaa! Ama Unimbɔti dàkā-mi yii ḿ taa kpèè yii ubɔ sá ukpiti àá waa ŋān̄. 29Míǹ pu ní ni tú ki yíiń-mi, m dɔ́miń kaa kpákáǹ. Too, ba pu ní ni yíiń-mi?» 30Ní Kɔɔrneeyi kíí-u yii: «Iwiin inaa sèé, tikúti tita, ŋyunti ŋun bí nee deedee, m bíi mèé m-dumpu. M kpēēyee, uninja ubɔ dee ki pēē dibɔkutil diba di jìl̀, ki yú m-nimbiin, 31ní ki bí yii: <Kɔɔrneeyi, Unimbɔti fōō a-wimmeem ki téetì a nín ŋáań biwɔfib tiŋan puee. 32Tɔ̄ Joopee bí yíiń Siimɔn un bi yíì Peetrooyee, u kóò Siimɔn ugbanjɔb un dumpu nákáǹ tiŋkuee.> 33Dicilpu ní m tú binib a-cee, ní a ŋá tiniti ki dɔ́miń. Kɔŋkɔnnee, ti-kɔkɔ bí Unimbɔti nimbiin kí pīlifì tin ti-Dindaan tīī-si á tùkù-tee.»

Peetroo nyɔɔbundi

34Niinee, Peetroo kíĺ ki bíi sòoǹ nì bi yii: «Ibaamɔn, m béè yii Unimbɔti kaa gàntī ubɔ#10.34 Dūú ŋmàntī nì Ditee 10.17.. 35Ntimu kɔkɔn, un yaa fàŋkí-u ki ŋáań min kítèe ŋān̄ u-nimbiin. 36«Ni nyí yii Unimbɔti túnní Tibɔmɔntiil#10.36 Dūú ŋmàntī nì Yees 52.7. Isirayeel yab cee, kí tùkù-bi yii nì Yeesu Kriisitoo puee bi làá ká nsɔŋfi: Yeesuee di sá ti-kɔkɔ Dindaan. 37Yoowaneesi nín sòon̄ Unimbɔti nyim difaldi bɔti ki dóò boonee, ni nyí tin jítì Juudee tiŋki kɔkɔn ki kíliń Galiileeyee. 38Ni nyí yii Unimbɔti nìn tīiń Yeesu Naasaareeti yɔu u-Fam ki yāntì u cáá mpɔŋkpaan. U nìn cá ajan kɔkɔ ki ŋáań tiŋan ki cāantí bin kɔkɔ Sitaan pɔŋŋu nìn ŋúb́ee, kun puee Unimbɔti nìn bí u-cee. 39Timbi kántì tin kɔkɔ u ŋáaǹ Juuda yab tiŋkin ki kpáaǹ Jeerusaleemee mun. Úǹ ní bi kpáá ndɔ pu, ki kūū-u. 40Ama Unimbɔti fīkitì-u winta dal, ki yāntì bi ká-u. 41An kaa sá samaa kɔkɔ di ká-u, asee Unimbɔti nín nìn pée lēē timbi bin bin ń ká-uee. Di sá u nín nìn fīkitì ditaŋkpiilinee, boonee, ti nì u di jíń ki nyùn̄#10.41 Kpèè 1.4, Luuki 24.30,42.. 42Ní u bí-ti yii tí nīn sòoǹ u-pu samaa cee, kí dàkà-bi yii úǹ Yeesu baba ní Unimbɔti lēē u-bɔsoonliu, ú sòoǹ bin wāĺee nì bin kpíìyee bɔti. 43Úǹ pu ní Unimbɔti bɔnaatiliibi kɔkɔ lēekì seera yii un sá kamaa yaa fōō-u ki kííyee kāntí u-kpitii pɔ̄tam u-yindi pu#10.43 Kpèè Yees 53.5-6, Yeer 31.34..»

Bin kaa sá Juuda yabee mun fōō Circir Fam

44Peetroo bíi sòoǹ mimmee, ní Circir Fam kpákatìń bin kɔkɔ nìn bíi pílifí u-nyɔɔbundee pu. 45Kriisitoo yab bin sá Juuda yab ki céeǹní Peetrooyee nìn bākatì. Di sá yii Unimbɔti nìn pú bin kaa sá Juuda yabee gba Circir Fam. 46Bi nìn gbìl̄ binicambi bíi sòoǹ isooncaan ki nyɔ́ŋkí Unimbɔti. Niinee ní Peetroo bí yii: 47«Binib nee fōō Circir Fam kii timbee dee. Mimmee, ti ŋūǹ kí yíí yii taa làá fàl̀-bi Unimbɔti nyimaaa?» 48Ní u pú nsan yii bí fàl̀-bi Unimbɔti nyim Yeesu Kriisitoo yindi pu, ní bi gbāam̀-u yii ú kàl̄ bi-cee iwiŋkaaŋkaa.

Currently Selected:

Actes 10: BASSARDC

Highlight

Copy