Actes 1

Yeesu pōoǹ Unimbɔti Fam

1Teewoofiil,

M nìn ŋmàn̄ m-gbɔmpeepeekaaku#1.1 Kpèè Luuki 1.1-4, Atuun gbɔŋku nìkì tin kā Luuki gbɔŋku poonee ní. poon tin kɔkɔ Yeesu nìn kíĺ ki ŋáań, ki dàkèe, 2doooo ŋkilkaam áli ki tin sāā ŋwiin ŋun u jɔ́m̀ yilpuee. U-kúm nì u-fìkititam boonee, kí wàatī kí nín jɔ̄m̀ee, u kpáafì akpambal ŋin u nìn lútèe nì Unimbɔti Fam pɔŋŋu. 3U nín kpíì ki fīkitèe, u nyántì u-ba ki dàkā u-boonnooliibi ŋfunyɔm tikpil áli ki tin sāā iwiin imuŋku ili kí dàkà yii u lafun bí dimaŋfalin. Ní bi-nimbil ká-u, ní u sòon̄ nì bi Unimbɔti Beel bɔti. 4U nì bi nín nìn dáá bée#1.4 U nì bi nín nìn dáá bée: Kpèè Luuki 24.49., u nìn kpáafì-bi yii bí taa yīkì Jeerusaleem tiŋkin. U nìn bí-bi yii: «Ní kàl̄ kí cīití ti-Baa Unimbɔti nín nìn pōoǹ dipoondi diŋyee, dipoondi din bɔti m nìn sòon̄ nì nee. 5Kun puee nì nnyim ní Yoowaneesi nìn fùul̀ binib. Ama nimbee, nì iwiŋkaaŋkaa poonee, Unimbɔti làá fàl̀-ni nì Circir Fam#1.5 Kpèè Maat 3.11, Maar 1.8, Luuki 3.16, Yoow 1.33..»

Yeesu jɔ́m̀ yilpu

6Ŋyuntee, akpambal nì Yeesu nìn kpáfì ki kēe, bi bālifì Yeesu yii: «Ti-Dindaan, an sá ŋyunti nee ní a làá fàtīí yàntī Isirayeel yab ń fōō dibeelaaa#1.6 Dūú ŋmàntī nì Amoo 9.11-12, Luuki 19.11.?»

7Ní u kíí-bi yii: «M-Baa nín dū úǹ u-ba pɔŋŋu ki síiǹ iyunti nì iwiin iŋyee kaa sá ni-yati#1.7 Dūú ŋmàntī nì Maar 13.32.. 8Ama Circir Fam làá kpákatiń ni-pu kí tīī-ni mpɔn ŋubɔ. Míǹ boonee, ni làá lēē m-pu seera Jeerusaleem tiŋkin nì Juudee nì Samaarii timmun, kí tin sāā kutagbɔŋu nì kitiŋ kúntinyɔkɔ#1.8 Dūú ŋmàntī nì Maat 28.19, Maar 16.15, Luuki 24.47-48..» 9U lī míǹ ki dóòyee, u-kpambaliŋ bíi kpèé-uee, ní an yōoǹ-u ki cáa nín jɔ́ḿ yilpu, ní ditagbandi diba dɔ́miń ki līkiǹ u nì bi kansikin, ní baa ti wāĺ-u#1.9 Dūú ŋmàntī nì Maar 16.19, Luuki 24.50-51.. 10Bi dáá gbíntìi yú ki kpèé yilpu u nín cá puee, kpalaayee, bininjab bili dee bi-nimbiin ki pēē tiwampin#1.10 Dūú ŋmàntī nì Luuki 24.4., 11ní ki bí-bi yii: «Galiilee yab, ba pu ní ni yú ki kpèé kutaa pu míǹ? Yeesu un ni ká u yíkì ni-kansikin ki jɔ́ḿ yilpu nee, làá dāá fàtīí tí gítiń míǹ mbaantiim kii ni nín ká u jɔ́m̀ pu nee ní.»

Bi lēē Maatiyasi ú fōō Juudasi paaŋŋu

12Niinee ní Yeesu kpambaliŋ yíkìń Ɔliifi sufii jool pu ki fātìi nín gítiń Jeerusaleem. Dijoolee kaa nìn dátiǹ Jeerusaleem: an dandatiŋu nìn sá ditaŋkpal diba ní#1.12 Kpèè Maar 11.1.. 13Bi bāań niinee, ki jɔ́m̀ diditɔntɔkɔl din ni bi nìn pée kpààa kpáfée. An nìn sá Peetroo nì Yoowaneesi nì Yakubu nì Andree nì Fiiliipi nì Toomasi nì Baateeleemii nì Maatiiu nì Yakubu Alfee jipɔɔn nì Siimɔn un nìn là kí jáǹ Room yabee, nì Yakubu jipɔɔn Juudi#1.13 Peetroo... Juudi: dūú ŋmàntī nì Maat 10.2-4, Maar 3.16-19, Luuki 6.14-16.. 14Bíǹ kɔkɔ nìn kpáfì kinyɔɔbaantii ki mɔ̀tīi mèé ŋwimmeem, bi nì binimpoobi biba, nì Yeesu na Maarii, nì Yeesu naalib mun.

15Iwiin gbanti poonee, Peetroo síl̀ nnabiyaamu mun nìn kpáfì ki bàn̄ kii binib imuŋku iluuyee kansikin, ki bí-bi yii: 16«Nnabiyaamu, an máaǹ yii Unimbɔti gbɔŋku nín nìn sòon̄ min Juudasi#1.16 Dūú ŋmàntī nì Ilan 41.10. pu dooooyee, an ŋá míǹ. Kun puee Unimbɔti Fam dī Daafiidi pu ki sòon̄ Juudasi un nìn līntì nsan bi cúú Yeesuee pu. 17U nìn ŋmàl̄ ti-kansikin ki mun nìn sá ti-tundi nee poon yɔu ubɔ. - 18Unil gbanti dū ntoonam nimbiliŋ ki dá kusaau. Niin ní u lítì dicincibil, u-pool pōō, u-nai kɔkɔ yāaǹ. 19Jeerusaleem yab kɔkɔ nín gbìl̄ an bɔti gbantee, ní bi pú kusaau gbanti diyindi bi-sooŋyin yii: Akeeldama, an taapu sá yii: fatiku saaku#1.19 B. 18-19, kpèè Maat 27.3-8.. - 20Ilan gbɔŋkun ní ubɔti Daafiidi nìn sòon̄ ki síiǹ yii:

<U-kɔŋkooŋŋu ń kpántí kudigbuŋu,

ubɔ ń taa ti kɔ́ kudii gbantin,>

ní ki gíti ŋmàn̄ yii:

<Ubɔ ń fōō u-tundi#1.20 Ilan 69.26, 109.8..>

21«Binib biba nìn céeǹ-ti ŋyunti ŋun Yeesu nìn bí kitiŋ pu doo ti nì u yìin̄ee, 22kí yòon̄ daliŋkin Yoowaneesi fùl̄-u Unimbɔti nyim kí tin cáá sāā ŋwiin ŋun u yíkì ki nín jɔ́ḿ yilpuee. An máaǹ yii binib gbanti kansikin ubɔ nín kūtì ti-pu kí kpántí Yeesu fìkititam seeraleeliu#1.22 Kpèè Maat 3.16, Maar 1.9, Luuki 3.21..»

23Peetroo lī míǹ ki dóòyee, ní bi cáań binib bili, Jooseefi un bi yíì Baarsabaasi ki gítì páaǹ-u diyindi yii Justuusee, nì Maatiyasi. 24Ní bi mēē yii: «Ti-Dindaan, sii di nyí báà ŋma pɔbil. Dàkà-ti un ní a lēē bi-kansikinee, 25udaan ń kpántí a-kpambal kí nīn bí mpaan ŋun Juudasi dūu fá ki búntì u-laŋkee.» 26Bi tɔ́ kasee, Maatiyasi jíń, ní bi dū-u ki ŋàl̄ akpambal saalaa nì dibee pu.

Currently Selected:

Actes 1: BASSARDC

Highlight

Copy