2 Maccabées 5
5
Kujaau leedakaŋ
1Ŋyunti gbantee, Antiyookuusi nìn bíi bɔ́ntí kí cùú já nì Eejipiti yab nliliitiim. 2Kí yòon̄ kii iwiin imuŋku ili poonee, binib nìn kāntí bitanjakaliibi bin pēē tiwan tin bi dū sindaariya ki gbáńee nyēē Jeerusaleem tiŋki kɔkɔn. Bi nìn sáń ki pùntī kutaa ki ŋúb́ ŋkpamu nì ntàataajimu. 3Bi nìn kpáfì akiti akiti, ní dikitil kamaa cáá binib alaataa ali nì dijandi ki bɔ́ntì kí já kujaau. Ijaan kɔkɔ puee, binib jáà ní ki mɔ́tí bi-ba pu. Agbampɔɔ ŋin nìn bí ki màntēe nì ŋkpamu nìn wīikí an kaa cáá bí lì. Ipiin nìn ŋàaǹ an kɔkɔ pu, ní sindaariya wampeeŋkaati tin pá tikúti gbampɔɔŋi kɔkɔ nì ŋi-bulifi puee jìl̀ pàlpal. 4Jeerusaleem yab kɔkɔ nìn bí ki mèé yii tin bi ká gbantee ń nīn sá kudaammɔntiiu.
Jasɔn bíi jáà nì Jeerusaleem
5Binib biba nìn bí ki mɔ́ntí yii Antiyookuusi kpíì. Niinee ní Jasɔn kpáfì binib kii kutuku pu, ní ki kpáàa kíĺ ki bíi jáà nì Jeerusaleem yab. U nìn jáń ki pɔ́ɔkiǹ bin tɔ́kɔ́ agun puee, ní ki púntìi jáń ki fōō kitiŋ kɔkɔ. Meeneelasi nìn sáǹ ki kɔ́ sintil difɔkɔku kun bí kunimbɔtidii jool caŋinee. 6Jasɔn kūū Isirayeel yab bin kíǹee kaa súń bi-saai. Waa nyí yii á já kí pɔ̄ɔkiǹ sii a-ba nibulee, a jáń ki pɔ́ɔkiǹ sii a-ba ní. U dàkafī yii u jáń ki pɔ́ɔkiǹ u-nannanliibi ní, kaa nyí kii an sá úǹ u-ba nibul. 7Nì míǹ kɔkɔee, waa nìn ŋúń ki fōō mpɔn. Kí kūtèe, u nín nyáń úǹ u-ba nibul boonee kɔ́ǹ-u icoo, ní u sáǹ ki fātìi nín gítí Amɔn yab tiŋkin. 8U-kpitii gbanti yāntì u kpíì nsansaaŋkúm. Bilaalibub kpiliu Areetaasi di péé péé ki cúú-u ki pīiǹ kudii, ní míǹ boonee, u kíǹ ki tú ki yìiǹ ki póotí ntimu. Báà ŋma nìn pée kíǹ ki nyàab̀ kí cúú-u ní, ní binib ná-u ki kpèé-u fám. Di sá yii u nìn nyáń u-nibul marab boon, ní ki yāntì úǹ u-ba nibul jíń falaa u-tiŋkin. An dāa pée kúntèe bi jìn̄-u ki tɔ́ Eejipiti tiŋkin ní. 9U nyáń niinee ní ki nín cá Greesi tiŋkin ki nyàab̀ Sipaarta yab bin nì Juuda yab pēēyee. Unil un di jìn̄ binib bi-tiŋki puee tin kpíì kinicantiŋin u-ba. 10Jasɔn nìn kūū binib tikpil kaa síb́-bi. Míǹ mbaantiim ní ubɔ kaa súń u-pu, kaa ŋá u-kpool, ní waa ká mpaan u-baabi kaakulin.
Antiyookuusi fúkúl̀ kunimbɔtidiin wanti
(1 Maka 1.20-63)
11Ubɔti Antiyookuusi nín gbìl̄ tin jítì Jeerusaleemee, u dàkafī yii Juudee yab kɔkɔ yíkì kaa kíí bi-ba pu ní. Niinee ní u fōō diŋuul kii upeecuncutee, ki yíkì Eejipiti u nì u-janjakitil ki cūtìi fōō kitiŋee. 12U nìn tīī u-janjaliibi mara yii bí kpɔ̀ un kamaa bi yaa pée kée kí taa sɔ̄ u-saai, kí làntì bin sáǹ ki bál̀ adiinnee. 13Bi nìn kūū binipɔmbi nì bitikpilib, ki kúntì binimpoobi nì mbiyaamu, ki lāntì bisapɔmbi nì mbipɔmu. 14Iwiin ita poonee, binib kutukub imuŋku inaa di nyáń Jeerusaleem tiŋkin. Bi nìn kūū bi-kansikin binib kutukub imuŋku ili, ní ki nyáfì binib kutukub imuŋku ili.
15Min Antiyookuusi ŋá nee kaa nìn yá ki kɔ́-u. U nìn ŋá mpɔɔgbifin ki kɔ́ kunimbɔtidii kun sá duulinya kɔkɔn circiree poon. Meeneelasi un nìn nyáń marab nì u-tiŋki boonee di nìn cáá-u ki kɔ́ǹ. 16Ubɔti nìn dū a-ŋalii in kaa bí circiree ki gbēē circir sambiliŋ. Tiwan tin ní bibɔtiibi biba nìn cáań mpaan gbanti pu kí tīī-ŋu tinyool kí gíti nyāantì-kuee ní úǹ yùn̄.
17Antiyookuusi lambil poonee, waa nìn béè yii Jeerusaleem yab kpitii pu ní Unimbɔti un sá tiwan kɔkɔ Dindaanee fōō bi-pu diŋuul ŋyunti ŋubɔ poon fiii. An pu ní u fātì u-boon ki tīī kunimbɔtidii. 18Bin nìn kóò kitiŋee ni yaa kaa bàà nìn ŋá ikpiti tikpilee, Antiyookuusi nín bàà nìn pée bāańee, Unimbɔti bàà nìn fátí kí kpɔ̀-u ní. U bàà pée cútí u-ŋal ní ú gbèen̄ kí taa ŋá u-waatitundi gbanti, kii an nín nìn jítì Eeliyoodoor un ubɔti Seeleewukusi nìn túnní ú dāá cɔ̄ŋkì kí kpèè tigaajawan tin bí kunimbɔtidiinee puee. 19Ama an kaa sá kunimbɔtidii pu ní ti-Dindaan lēē u-nibul, u-nibul pu ní u là kunimbɔtidii#5.19 Dūú ŋmàntī nì Maar 2.27.. 20An pu ní kunimbɔtidii ku-ba péé ki jíń u-nibul naabuŋu. Ama boonee kúǹ di dāa páatì tiŋan tin Unimbɔti ŋá u-nibulee pu. Unimbɔti Mpɔŋkɔdaan ŋuul poonee, u nìn dū kunimbɔtidii ki fá. Ama ŋyunti ŋun duulinya kɔkɔ Dindaan nì u-nibul kansikin fātìi mɔ́ɔkèe, kunimbɔtidii nìn fātìi ká ku-nyandi.
Bi fātìi pɔ̄fì Juuda yab Jeerusaleem
21Antiyookuusi nìn yōoǹ kunimbɔtidii poon animbil tɔnnib imuŋku ili nì binii ní. Míǹ boonee ní u nín kùǹ Antiyɔɔsi tiŋkin malaa. U nìn cáá dilambil ní ki máká u-ba pu, ní ki nìn dàkafī yii u ŋūǹ kí ŋá tikɔkɔ. U nìn dākafì yii u làá ŋmā kí yàntī meelab ń còom̀ kitiŋkuliŋŋi pu àá kí yàntī u-janjaliibi ń ŋmā kí còom̀ tiŋku pu. 22U nìn kāaǹ kɔmandambi bí nīn ŋáań Juuda yab tikpitil. Jeerusaleem tiŋkinee, Fiiliipi un sá Friijii tiŋkinee ní u nìn dūu kāaǹ. Úǹ nìn néeń tipɔmbɔti ki jítiǹ Antiyookuusi u-ba gba. 23Geerisiim jool puee, Androonikuusi ní u nìn dūu kāaǹ. Binib bili gbanti boonee, Meeneelasi nìn bí. Úǹ nìn gíti wɔ́b́ u-nibul ki jítiǹ bili bin kíǹee gba.
Antiyookuusi nimbil kaa nìn pée là kí wāl̀ Juuda yab. 24U nìn dū bijanjaliibi kpiliu Apoolooniyuusi ki tú Jeerusaleem nì bijanjaliibi kutukub mmuŋku nì bili. U nìn tīī-bi mara bí kpɔ̀ binicikitikaabi kɔkɔ ní kí dū binimpoobi nì mbiyaamu kí nyāfì. 25Apoolooniyuusi nín bàn̄ Jeerusaleemee, u ŋá kii u sá ŋgbansɔŋfi niliuee ní. U nìn kāl̀ ki cíitì ŋwiŋŋuŋfikaa ŋun sá Juuda yab cee circir wiiŋŋuee. U nìn cíitì Juuda yab wiŋŋuŋfikaaŋu ní ki yāntì u-janjaliibi nyáń ki cōom̀ nì bi-janjawanti. 26U nìn tīī-bi mara bí kpɔ̀ bin kɔkɔ dɔ́miń kí kpèè dinimbilee. U ŋá míǹ ki dóòyee ní u nì u-janjaliibi sáǹ ki kɔ́ kitiŋin ki kūū binib tikpil.
27Ŋyunti gbantee, Juudasi un bi gíti yíì Maakabeeyee nì bininjab biwa kākatì bi-ba ki cūtìi kóòń ajoonni. U nì u-bɔɔbi gbanti nìn kóò niin kii ipeelee ní. Kí taa kɔ́ǹ bi-ba tijɔkɔndee, bi nìn ŋmóò timool ní ki bí.
Currently Selected:
2 Maccabées 5: BASSARDC
Highlight
Share
Copy
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.